Astana 2:1 Manchester United

Það var ungt lið sem hóf leikinn. Ethan Laird, DiShon Bernard og Dylan Levitt léku sinn fyrsta leik fyrir Manchester United og meðalaldur útileikmanna var innan við 21 ár

Varamenn: Kovar, Mengi, Taylor, Galbraith, Puigmal, Bughail-Mellor, Ramazani

Byrjaði mjög frísklega og ungu leikmennirnir sýndu að þeir voru óhræddir við að reyna að spila hratt upp og pressa á Astana. Fyrsta færið kom á fimmtu mínútu, Greenwood með skot beint á markmann. Pressan var næsta stöðug og Astana var komið að mestu inn í teig og á 10. mínútu kom markið. Reynsluboltinn og fyrirliðinn Jese Lingard fékk sendingu frá hinum gamla manninum úti á vellinum, Luke Shaw, lagði boltann fyrir sig og skaut utan teigs, boltinn fór aðeins í varnarmann og í markhornið fjær, mjög smekklegt mark!

Embed from Getty Images

United hélt áfram og átti leikinn að mestu, sérstaklega voru Laird og Chong frískir upp hægra megin.

Um miðjan hálfleikinn fór Astana samt aðeins að vinna betur og sækja á móti. Annars var fátt um markverða atburði, Rúnar Már fékk reyndar gult fyrir fara of seint í Jesse Lingard en Lingard hristi það þó á endanum af sér. Spilamennskan hjá unglingunum var ágæt, menn létu boltann ganga vel en gekk illa að finna glufur í vörn Astana. Að samaskapi var vörn United líka þétt þegar Astana reyndi að sækja.

Garner og Levitt voru allt í öllu á miðjunni, dreifðu spilinu vel og voru með nærfellt fullkomið sendingahlutfall.

Astana kom svo öllu frískara út í seinni hálfleik og sótti vel á. Di’Shon Bernard var heppinn að setja ekki boltann í eigið net þegar hann ætlaði að hreinsa en hrasaði og skaut í staðinn yfir. Það tók United um fimm mínútur þangað til liðið náði boltanum almennilega og liðið átti erfitt með að komast í sama gír og í fyrri hálfleik. Tahith Chong átti að skora á 54. mínútu eftir frábæran undirbúning Luke Shaw en í stað þess að renna boltanum í opið mark skaut hann yfir. Það var geysidýrt því Astana fór beint upp í sókn og Shomko fékk boltann inni í teig, skaut úr þröngu færi og skoraði framhjá Grant. Leit ekki vel út fyrir Chong sem hefur ekki viljað skrifa undir nýjan samning hjá United og ku vera að leita að betri samningi annars staðar.

Það versnaði síðan fyrir United, Astana kom upp í sókn og Rukovina fékk boltann óvaldaður uppi í teignum hægramegin, gaf fyrir og boltinn fór beint á kollinn á Bernard sem var að reyna að komast fyrir boltann og þaðan í netið. 2-1 fyrir Astana. Í þetta skiptið var þó ekki hægt að áfellast Bernard.

Chong hafði ekki átt mjög góðan leik þó að hann hafi átt spretti í fyrri hálfleik og D’Mani Bughail-Mellor kom inná fyrir hann. Eftir að hafa komist yfir bakkaði Astana mjög og leyfði United að halda boltanum. Þeir komust í hraðaupphlaup á 74. mínútu sem endaði með því að Rúnar Már fékk boltann einn við teiginn og átti að gera betur en að skjóta framhjá. United heppnir þar.

Embed from Getty Images

Hinu megin átti Angel Gomes síðan alveg prýðilega tilraun úr aukaspyrnu, sveigði boltann yfir vegginn en markvörðurinn var viðbúinn og sveif upp að slá til að slá boltann yfir. United reyndi að setja meiri pressu á Astana og aftur var markvörðurinn Eric hetja þeirra þegar Greenwood skaut úr teignum, viðstöðulaust eftir góða fyrirgjöf en Eric var kattliðugur að verja yfir.

Næsta skipting var Largie Ramazani að koma inná fyrir Garner til að setja meiri brodd í sóknina, það gekk ekki alveg eftir og næst var það Ethan Galbraith sem kom inná fyrir Gomes rétt fyrir leikslok.

United sótti síðustu mínúturnar en sköpuðu ekki frekari færi og tapið staðreynd.

Embed from Getty Images

Þetta hefði getað farið betur og erfitt að horfa ekki á klúðrið hjá Chong sem atvikið sem breytti leiknum. En það sem þessa leiks verður minnst fyrir er að sex leikmenn léku sinn fyrsta leik, og jafn margir nýliðar hafa ekki komið við sögu frá því að félagið lék sinn fyrsta leik. Af fjórtán leikmönnum voru ellefu úr unglingastarfinu og þó að öruggt sé að ekki allir þeirra munu eiga sér framtíð hjá United var þessi lekur gríðarlegt lexía fyrir þá alla og vonandi sjáum við þá fá tækifæri síðar.