Manchester United 1:0 Wolverhampton Wanderers

Nokkrir óvæntir pukntar voru í liðsuppstillingu gestana. Wolves fór í sitt 3-4-3 kerfi með tvo unga leikmenn sem voru að byrja sinn fyrsta leik í úrvalsdeildinni, þá Ki-Jana Hoever (18) og Vitinha (20). Einnig byrjuðu þeir ekki með neinn eiginlegan framherja þar sem Fabio Silva byrjaði á bekknum og Jimenez frá vegna höfuðkúpubrots. Einnig kom á óvart þegar leikurinn hófst að Saiss spilaði í miðri vörn úlfana í stað Coady sem iðulega hefur leikið þar. Sennilega ræðst það af því að Nuno Santo vildi spila með vinstri fóta mann vinstra meginn og hægri fótarmann hægra meginn. Coady var eini tiltæki réttfætti miðvörður úlfana í kvöld. 

Hjá okkar mönnum kom kanski mest á óvart að Eric Bailly var að byrja sinn þriðja leik í röð og það á einungis sex dögum. Yfirleitt kemst Bailly ekki í gegnum svona mikið af leikjum án þess að meiðast. Cavani byrjaði eftir mjög góðar framviðstöður í síðustu tveim leikjum.

Byrjunarlið okkar manna:

Henderson, Shaw (46′), Tuanzebe, Fred, Mata, McTominay (95′), James, Van de Beek og Martial (64′)

 

Lið Wolves:

 

Fyrri hálfleikur

Fyrri hálfleikurinn var nokkuð tíðindalítill. United hélt boltanum og reyndi að brjóta niður vörn úlfana með fyrirgjöfum og að þræða sig í gegnum vörn þeirra með stuttum og snörpum sendingum við vítateig þeirra. Wolves hins vegar sat aftarlega á vellinum og reyndi að beita skyndisóknum með áramóta raketturnar sínar Neto og Traoré í fremst víglínu. Einnig voru langskot og föst leikatriði nýtt til hins ýtrasta. Með þeim hætti voru akkúrat fyrstu þrjú markverðu tækifæri leiksins sköpuð. Vitinha og Neves áttu tvö langskot eftir rúmar tíu mínútur sem De Gea varði. Moutinho tók svo aukaspyrnu utan af velli sem Saiss skallaði að marki og endaði knötturinn ofan á markslánni. Það var svo ekki fyrr en eftir um 26 mínútur að United fékk ágætis færi. Þá kom fyrirgjöf sem Cavani reyndi að stýra á markið með höfðinu en boltinn fram hjá. Besta færi fyrri hálfleiks fékk svo Bruno stuttu síðar. Grernwood lék þá á hægri kantinum og kom sér á vinstri fótinn sinn og kom boltanum fyrir. Bruno kom sér fram fyrir bakvörð úlfana og potaði boltanum í átt að marki af stuttu færi en Rui Patricio vel staðsettur og varði. Cavani náði svo ekki að gera sér mat úr frákastinu. Síðasta færi fyrri hálfleiks var annar skalli eftir aukaspyrnu hjá Wolves sem De Gea varði.

Embed from Getty Images

 

Seinni hálfleikur

Ole tók Telles af velli í hálfleik og inn á kom Shaw. Ef fyrri hálfleikurinn var tíðinda lítill þá veit ég ekki hvað skal segja um þann seinni. Fyrsta færið í þeim seinni kom á 64 mínútu þar sem Rashford skallaði fyrirgjöf yfir markið. Þegar 20 mínútur voru eftir skoraði Cavani en var réttilega dæmdur rangstæður. VAR skoðaði þó markið þar sem boltinn fór í hendi Coady í aðdraganda færisins en réttilega ekki dæmd vítaspyrna þar sem hendin var í eðlilegri stöðu þegar knötturinn skall í henni. Nokkrum mínútum seinna fékk Patricio gult spjald fyrir leiktöf og einkendi það leik Wolves sem eftir lifði leiks. United reyndi að herja á Wolves en uppskar einungis skotfæri af löngu færi sem annað hvort voru varin af merkverði og varnarmönnum Wolves eða hittu ekki markið. 

Embed from Getty Images

Það var svo á þriðju mínútu uppbótartíma þar sem Bruno sendi langa sendingu í átt að Rashford á hægri kantinum. Varnarmenn Wolves misreiknuðu svif boltans og Rashford náði boltanum við endalínuna. Hann sótti þá út í teiginn til að koma sér í skotfæri gegn þrem varnarmönnum. Hann lét svo skotið ríða af með vinstri og fór boltinn í Saiss og þaðan í markið. Stuttu seinna var leikurinn flautaður af.

Embed from Getty Images

Þetta gæti orðið ótrúlega mikilvægt mark upp á framhaldið. Þrjú stig og situr nú liðið í öðru sæti tveim stigum frá Liverpool. 

Næsti leikur er á nýársdag kl. 20:00 gegn Aston Villa sem hefur verið á ótrúlegu skriði á tímabilinu eftir að hafa verið í fallbaráttu á síðustu leiktíð.