Everton 1:0 Man Utd

Manchester United skráði sig úr leik í baráttunni um Meistaradeildarsæti eftir sanngjarnt 1-0 tap á Goodison Park rétt í þessu. Frammistöðunni verður best lýst sem andlausri og mögulega spaugilegri. Ég gæti sennilega bara smellt á copy/paste af einhverri gamalli skýrslu og skellt hér inn, því að þetta var bara endurtekið efni. Hér er tölfræði af Twitter sem að gefur góða mynd af því sem að gekk á, en hún dekkar þó bara fyrri hálfleikinn:

Manchester United players LOST POSSESSION 84 TIMES in 45 minutes of Football.

Have a nice day. #MUFC #EVEMUN pic.twitter.com/bxdeQ83Okj

— ManUtd Analytics ⚽ (@Utd_Analytics) April 9, 2022

Gaman að þessu! Svona stilltu liðin upp.

Man Utd:

Pogba inn fyrir Fred, Mata inn fyrir Matic og Elanga inn fyrir Rashford.

Everton:

Leikurinn

Everton liðið var með varnarlínuna lágt á vellinum og bauð United að sækja á sig. Marcus Rashford komst í tvígang nokkuð nálægt því að koma liðinu yfir en Jordan Pickford sá við honum. United hélt boltanum áfram lengst af án þess að skapa sér opin marktækifæri og það kom sennilega engum á óvart þegar að Everton komst skyndilega yfir, án þess að hafa nokkuð gert í leiknum fram að því. Langur bolti skilaði sér á Richarlison úti á vinstri vængnum, hann tók Aaron Wan-Bissaka á og lagði boltann út á Anthony Gordon. Gordon átti afleitt skot sem að fór í fyrirliðann Harry Maguire og framhjá David de Gea í markinu. Helvíti týpískt, en algjörlega viðbúið svona miðað við gengi United á tímabilinu. 1-0.

Svar United við þessu mótlæti var í besta falli aumingjalegt. Eftir því sem að leið á leikinn þá bara fann maður að liðið myndi aldrei finna jöfnunarmark. Engar hugmyndir gegn Everton liði sem að hafði tapað 5 af síðustu 6 leikjum sínum. Hver feil sendingin á fætur annarri og leikmenn virtust aldrei á sömu bylgjulengd. Ef að samherji vildi fá boltann í hlaupið, þá bjóst boltamaður við því að viðkomandi vildi fá hann í lappir = Everton innkast/markspyrna. Það er eins og þessir leikmenn æfi aldrei saman.

Það er ekki hægt að taka einn leikmann fyrir. Þetta var tap liðsheildarinnar. Ef liðsheild mætti kalla. Samstaðan er engin og það er alltaf það sama á dagskránni þegar á móti blæs – pirringur og uppgjöf þegar hlutirnir detta ekki nákvæmlega fyrir þá.

The very bare minimum should be to *try*. This lot can’t even manage that. Awful.

— Scott Patterson (@R_o_M) April 9, 2022

Undirritaður hefði til dæmis fyrirgefið það ef að einhver í liðinu hefði tekið sig til og straujað Richarlison þegar að Brasilíumaðurinn ákvað að halda boltanum á lofti með höfðinu þegar að leikmenn United höfðu ekki fyrir því að pressa hann. Þá hefði ég allavega vitað að viðkomandi væri sár og pirraður yfir ástandinu.

Framhaldið

Nú er bara beðið eftir því að þetta tímabil klárist. Liðið á til að mynda eftir að fara á Anfield. Drottinn minn sæll og glaður, það verður einhver slátrunin. Nýr stjóri á ærið verk fyrir höndum og vonandi fær hann frið og frjálsar hendur til að hreinsa út öll rotnu eplin. Erik ten Hag er orðaður sterklega við starfið, en við skulum vona að hann hafi verið úti að hlaupa eða í langri verslunarferð á meðan á þessum leik stóð. Ekki var þetta fallegt.

Næsti leikur er heimaleikur gegn Norwich. Þau sem halda að þar verði aldeilis spýtt í lófana og boðið uppá veislu ættu að búa í Undralandi. Þetta verður eins út leiktíðina þar sem að leikmenn hafa einfaldlega gefist upp. Ralf Rangnick hefur ekki náð til þeirra og mun ekki gera það úr þessu. Víða hefur verið skrifað að leikmenn hafi skoðanir á því hver næsti stjóri ætti að vera. Þessir sömu leikmenn mega endilega drekka einn rjúkandi heitan bolla af grjóthaltu kjafti og leggja sig fram fyrir klúbbinn.

Áfram gakk. Og áfram Manchester United.