Manchester United 2:3 Galatasaray

United tók á móti Galatasary í 2. umferð meistaradeildarinnar í kvöld. Erik Ten Hag gerði eina breytingu frá tapinu gegn Palace, Hannibal Mejbri fékk kallið í stað Pellistri. Fyrrum United leikmaðurinn Wilfried Zaha byrjaði hins vegar á hægri kantinum hjá Galatasary.

United liðið er enn að takast á við talsvert af meiðslum, nýjustu fréttir úr sjúkraherbergi United eru þær að Lisandro Martinez þarf að fara aftur í aðgerð vegna meiðslanna sem hann hlaut í lok síðustu leiktíðar. Það gætu því verið rúmlega tveir mánuðir í að við sjáum argentíska slátrarann aftur í liði United. Það eru þó ekki bara slæmar fréttir úr sjúkraherberginu en Luke Shaw ætti bráðlega að fara verða tilbúinn. Fyrir leikinn var United á botni A-riðils eftir tap gegn Bayern í fyrsta leik en Galatasary í 2-3 sæti eftir jafntefli gegn FCK.

 

Byrjunarlið United:

Bekkur: Bayindir, Vitek, Maguire, Evans, McTominay, Garnacho, Pellistri, Martial og Antony

 

Byrjunarlið Galatasaray:

 

Fyrri hálfleikur

Það tók United u.þ.b. mínútu að fá fyrsta tækifæri leiksins, Rasmus Hojlund gerði mjög vel þegar hann þeystist upp vinstri kantinn og hristi af sér Boey. Hojlund sendi lágan fastan bolta inn í teig en Bruno hitti boltann ekki nægilega vel og framhjá fór boltinn, fínasta færi. Það var hraði í leiknum á upphafs mínútunum þó að liðin næðu ekki að skapa sér færi af einhverju ráði. United voru sterkari fyrstu 15 mínúturnar en áttu í bölvuðu basli að skapa sér færi. Á sextándu mínútu lyfti hins vegar Casemiro boltanum út á hægri kantinn þar sem Rashford var mættur og keyrði inn á teiginn, Rashford þrumaði boltanum fyrir þar sem Hojlund kom á hvínandi siglingu og stangaði hann í netið, 1-0 United alvöru sentera mark!

Adam var þó ekki lengi í paradís, rúmlega fimm mínútum eftir mark Hojlund kom langur bolti fram frá Davison Sanchez. Zaha náði að bakka með Dalot á markteig með skoppandi bolta hjá sér og skóflaði honum í Dalot og í jörðina og þaðan sveif boltinn í blá hornið, 1-1. Stórfurðulegt mark, léleg varnarvinna og samskiptaleysi í vörninni alveg galið. Leikurinn hélt áfram að vera líflegur og á 25. mínútu átti Casemiro skot fyrir utan teig sem fór af varnarmanni og rétt framhjá, Muslera farinn í rangt horn og heppinn að boltinn hafi ekki farið á rammann. Aftur voru United menn nálægt því að skora, eftir gott hlaup frá Rasmus Hojlund kom hann boltanum á Rashford sem renndi honum á Amrabat sem kom í overlappi. Amrabat sneiddi hann til baka á Mason Mount sem átti fínt skot en í varnarmann og í horn.

Það hægðist aðeins á færasköpun næsta korterið en á 43. mínútu fékk Mason Mount kjörið tækifæri þegar Rashorf keyrði inn á vítateig af vinstri kantinum og sneiddi boltann út á Mount. Skot Mount sem var á leiðinni að öllum líkindum í netið hæfði hins vegar sköflunginn á Hannibal Mejbri. Þrátt fyrir þriggja mínútna uppbótartíma tókst hvorugu liði að skapa færi það sem eftirlifði af fyrri hálfleik og því allt jafnt í hálfleik, 1-1.

Það voru stöðugar myndtruflanir á útsendingu hjá Viaplay/Stöð2 og því ekki alveg víst að undirritaður hafi fengið að sjá allt það markverða sem gerðist í fyrri hálfleik. United liðið var þó talsvert sterkara og reyndu Galatasaray menn að ógna með skyndisóknum. Það gekk ágætlega hjá United liðinu að halda Galatasaray í skefjum þó að tyrkneska liðið hafi átt fínann kafla beint eftir markið sitt. United átti í erfiðleikjum með að byggja upp álitlegar sóknir og virtust bestu færi United koma upp vinstri vænginn þegar annað hvort Rashford eða Amrabat komust upp að endalínu og sneiddu boltann út í teiginn. Líkt og í flestum leikjum á þessu tímabili virtist United liðið vera hálf taktlaust á köflum en kveikja á sér einstaka sinnum. Markið hjá United var mjög gott og gaman að sjá Rashford leggja upp mark fyrir Hojlund vonandi eitthvað sem við förum að sjá meira af.

 

Seinni hálfleikur

United gerði eina breytingu í hálfleik en Christian Eriksen kom inn á fyrir Hannibal Mejbri, ekki veit ég hvort að Hannibal sé eitthvað meiddur eða hvort Ten Hag sé að stóla á sköpunarkrafta Eriksen fyrir seinni hálfleik. Galatasaray fékk fyrsta færi seinni hálfleiks þegar að samskiptaleysi á miðju United varð til þess að Ayhan vann boltann og kom honum á Akturkoglu sem fékk fínt færi en skot hans beint í Victor Lindelöf. Á 54. mínútu fékk Galatasaray horn, United vann boltann og keyrðu upp Rashford alveg kominn einn inn fyrir. Rashford með Bruno til hliðar ákvað að gefa boltann en sendingin hræðileg og Boey náði að hreinsa í horn, hræðileg nýting á dauða dauðafæri. Upp úr hornspyrnunni fékk Mason Mount skotfæri fyrir utan teig sem Muslera blakaði yfir markið. Á 60. mínútu koma snyrtileg sending frá Rashford á Mason Mount sem sendi hann á Hojlund sem setti Boey á rassinn og þrumaði boltanum í netið. Því miður var Hojlund örlítið fyrir innan og markið því dæmt af, staðan því enn 1-1.

Mínútu síðar koma góð sending fyrir frá Christian Eriksen á Rashford en Boey náði að koma sér fyrir boltann og Muslera greip boltann. United hélt þó áfram í sókn og virtist vera að taka algjöra yfirhönd á leiknum, MAson Mount og Casemiro fengu fín skotfæri en náðu ekki að nýta þau. Skömmu seinna fékk United fínt færi þegar Bruno fékk boltann skoppandi á vítateigslínunni en skot hans beint á Muslera. ÞÁ LOKSINS! Galatasaray spilaði boltanum aftur á Davison Sanches sem rann Rasmus Hojlund tók boltann á miðjunni og keyrði já keyrði upp völlinn Bardacki átti engan séns í hraða danans og Hojlund kominn einn gegn Muslera og lyfti honum fallega yfir Úrúgvæann, 2-1 þið takið þetta mark ekki af honum. United gerði skiptingu eftir markið, Garnacho koma inn fyrir Marcus Rashford. Rétt eftir markið koma fyrirgjöf inn í teig United, Onana sló boltann út í teiginn sem datt fyrir Zaha, hann koma honum á Akturkoglu sem skaut framhjá. Glatasaray voru ekki hættir, eftir innkast slökktu United menn á sér Yilmaz sem kominn var inn á keyrði upp kantinnog sendi hann á Akturkoglu sem var aaaalveg einn inn í teig United og eftirleikurinn auðveldur, 2-2 jeeeesús.

Þá varð vont verra, Andre Onana átti skelfilega sendingu skelfilega, Mertens fékk boltann rétt fyrir utan teiginn kominn einn inn fyrir, Casemiro reyndi að koma í veg fyrir mark og gaf víti. Casemiro á gulu og sendur í sturtu, Icardi setti boltann þó framhjá úr vítinu en United manni færri. United héldu þó baráttunni áfram, Garnacho prjónaði sig inn á teiginn og var kominn í mjög gott færi en aftur björguðu varnarmenn Galatasaray marki. Á 81. mínútu átti Amrabat sendingu fram sem Sanches skallaði beint til baka, Icardi allt í einu kominn inn fyrir aleinn og lyfti boltanum yfir Onana, 2-3. Manni færri og marki undir komust Galatasary aftur í sókn, Boey hægri bakvörður tyrkneska liðsins komst í fínt færi en setti boltann yfir. United gerði svo breytingu á liði sínu, útaf kom Mason Mount og inn á koma Antony. 5 mínútum síðar hafði lítið gerst og gerði Erik Ten Hag þá aðra skiptingu á liðinu útaf fór Amrabat og inn á kom Anthony Martial. United voru farnir að henda mörgum mönnum fram enda gefur tap ekkert, Icardi fékk fínt færi á fyrstu mínútu uppbótartíma en framhjá fór boltinn.

 

Að lokum

United liðið var betra í leiknum, en liðið slekkur á sér mörgum sinnum í leik og þó að Galatasaray sé ekki lið í heimsklassa þá er liðið í meistaradeildinni og refsar þegar lið slökkva á sér. Þetta er að vera gjörsamlega óþolandi, einbeitingarleysið er algjört í vörninni í fyrstu tveimur mörkum Galatasaray. Svo þegar að Onana gefur Mertens dauðafæri sem leiðir til rauða spjaldsins á Casemiro þá verður brekkan brött. Svona mistök eins og hjá Onana mega ekki verða mikið fleiri, en einbeitingarleysið var ekki bara hjá honum í leiknum. Það er einn bjartur punktur í liði United akkúrat núna og það er Rasmus Hojlund, hann var frábær í leiknum og fáránlegt að tvö mörk frá honum séu ekki nóg á heimavelli gegn Galatasaray. Ég held að ég láti þetta nægja, það var ömurlegt að horfa upp á þennan leik. Ég mun þó ekki kalla eftir höfði Ten Hag, það þarf einhvern veginn á þetta United lið og brottrekstur þjálfara til þess að reka þann næsta eftir 1 og hálft tímabil er ekkert endilega lausnin.