Þrátt fyrir afhroðið gegn Everton um síðustu helgi þá á Manchester United á einhvern ótrúlegan hátt enn möguleika á því að enda í efstu fjórum sætum ensku úrvalsdeildarinnar og tryggja sér þar með þátttöku í Meistaradeild Evrópu á næstu leiktíð. Eftir hörmulegt gengi undanfarnar vikur eru líkurnar á því hins vegar litlar sem engar. Það gæti þó breyst á morgun þegar ríkjandi Englandsmeistarar Manchester City heimsækja Old Trafford.
Enska úrvalsdeildin
Everton 4:0 Manchester United
Í gær fóru Tottenham tómhentir frá Etihad vellinum eftir 1-0 tap gegn Manchester City. United gat því jafnað Tottenham að stigum og komist upp fyrir Arsenal og Chelsea, í það minnsta tímabundið, með sigri á Everton í dag. Sú varð aldeilis ekki raunin enda mætti gjörsamlega andlaust og máttvana United lið til leiks í dag en svo virtist sem leikmenn liðsins væru með öllu áhugalausir og enginn baráttuvilji fyrir hendi.
Leiðin liggur í Bítlaborgina á ný
Eftir að Manchester United mistók að viðhalda Meistaradeildardrauminum eftir afdrifarík einstaklingsmistök á þriðjudaginn síðast liðinn var ljóst að liðið mun ekki fagna neinum titli í ár. Ef litið er á björtu hliðina þá gefst meiri tími til að einblína á deildina en sem stendur er liðið í granítharðri baráttu við Tottenham, Arsenal og Chelsea um 3. og 4. sætið. Einungis 3 stig skilja þessi lið að og öll hafa liðin leikið 33 leik að undanskildu Chelsea sem hefur spilað leik meira.
Manchester United 2:1 West Ham
Ole Gunnar Solskjaer talaði um að United þyrfti að vinna fimm af síðustu sex leikjum sínum til að tryggja þáttöku í Meistaradeildinni. Liðið tók öll stigin í dag en frammistaðan var algjörlega ósannfærandi. Solskjaer hvíldi nokkra leikmenn í dag og fengu nokkrir leikmenn séns til að sýna eitthvað til að réttlæta betri samning eða hreinlega til að sannfæra stjórann um að selja sig ekki. Helst ber þar að nefna Marcos Rojo, Juan Mata og David de Gea. West Ham skoraði mark í fyrri hálfleiknum sem dæmt var af vegna rangstöðu. Endursýningar sýndu að það var rangur dómur og sem betur fer er VAR ekki komið ennþá í gagnið í Úrvalsdeildinni. Frammistaða Rojo var þannig að hans yrði varla saknað ef hann fer. Reyndar var hann að spila í bakverði sem er ekki hans sterkasta staða. Juan Mata lék ágætlega og vann vítaspyrnuna sem Paul Pogba skoraði úr. Sameiginleg mistök David de Gea og Marcos Rojo urðu til þess að West Ham tókst að jafna leikinn í byrjun seinni hálfleiks. Mata var óheppinn með að vera sá sem fórnað var til setja Marcus Rashford inná en þeir Jesse Lingard og Anthony Martial höfðu verið talsvert daprari. Sá síðarnefndi vann einnig vítaspyrnu seint í leiknum og aftur skoraði Pogba. 2:1 sigur staðreynd en frammistaðan engan veginn nógu góð.
Manchester United tekur á móti á West Ham
Nú þegar farið er að sjá fyrir endan á tímabilinu eru öll stig orðin mjög mikilvæg og mjög mikilvægt að misstíga sig ekki. Úrslitin að undanförnu hafa ekki verið eins góð og við hefðum viljað. Tímabilið hjá West Ham hefur reyndar ekki verið uppá marga fiska og árangur liðsins klárlega undir væntingum eftir miklar fjárfestingar sumarsins. Liðið gjörsamlega valtaði yfir United fyrr í vetur í einni af verstu frammistöðum United undanfarin ár. Það væri svo alveg týpískt að Lukasz Fabianski myndi eiga stórleik í leiknum á morgun.