Rauðu djöflarnir

Embed from Getty Images

Manchester United tapaði í gær leiknum um Samfélagsskjöldinn gegn Manchester City eftir vítaspyrnukeppni. Yfirbragð leikmanna bar þó það yfirbragð að leikurinn væri upptakturinn að alvörunni frekar en alvaran sjálf.

City fór betur af stað og átti fyrsta hálftímann. Eftir það fóru að sjást fínir spilkaflar hjá United og nokkur ágæt færi.

Áframhaldandi eru vísbendingar um að ten Hag sé að færa sig meira í átt að hollensku samspili frekar en þeim hröðu umskiptum sem hann talaði um að liðið ætlaði sér að byggja á í fyrra. Kannski eru þetta vísbendingar um að ten Hag sé virkilega farinn að setja sitt bragð á leikstílinn. Nái þetta samspil að þróast áfram ætti færunum að fjölga og þar með vonandi mörkunum, sem hefur skort fyrri tvö tímabil ten Hag. Hins vegar þá fóru leikmenn United illa með færin í gær.

Þau bestu komu þegar um kortér var til leiksloka. Fyrst slapp Marcus Rashford inn fyrir eftir sendingu frá hægri en voru mislagðar fætur og skaut með sköfluningum framhjá. Næst skallaði hann niður hornspyrnu sem fór á milli fóta Scott McTominay.

Tvö mörk á tíu mínútum

Það var hins vegar Alejandro Garnacho sem skoraði mark United þegar tæpar tíu mínútur voru eftir. Þar var reyndar hröð sókn. Facundu Pellistri vann boltann niðri hægra meginn, kom honum fram á Bruno Fernandnes sem sendi á Garnacho sem lék af hægri kantinum inn á miðjan teiginn og afgreiddi hann með vinstri fæti niður í nærhornið.

Forustan entist fram á 89. mínútu þegar Bernando Silva, sem skömmu áður kom inn sem varamaður, skallaði boltann í netið.

Engin framlenging er í Samfélagsskildinum heldur farið beint í vítaspyrnukeppni. André Onana varði fyrstu spyrnu City en spyrna Jadon Sancho, sem var sú fjórða hjá United, var varin í stöng og út. Johnny Evans sendi síðan áttundu spyrnu United yfir meðan City nýtti sína og náði skildinum.

Vissulega sýndu leikmenn gleði og vonbrigði, en tilfinningarnar hefðu verið mikilfenglegri ef í húfi hefðu verið stærri verðlaun en skjöldurinn. Í sjálfu sér er fagnaðarefni að United hafi fengið að spila þennan leik í fyrsta sinn síðan 2016 og annað skiptið á þessari öld án þess að Alex Ferguson hafi tryggt liðið þangað.

Hvað var athyglisvert í liðsvalinu?

Bæði notuðu í leiknum leikmenn sem vart er hægt að reikna með að verði fastamenn. Ef horft er á hvað skipti mál í hjá United þá spilaði Bruno frammi í fjarveru Rasmus Höjlund. Vonbrigði voru að sjá ekki nýja manninn Joshua Zirkzee, því hann tók ekki þátt í æfingaferðinni til Bandaríkjanna og veitir eflaust ekki af mínútum til að fylla skarðið sem meiðsli Höjlund mynda fyrstu vikurnar.

Toby Collyer fékk hálftíma í gær, sem bendir til þess að hann eigi alvöru tækifæri á tímabilinu. Harry Amass var í hóp en kom ekki inn á. Lisando Martinez var vinstri bakvörður fyrsta klukkutímann. Diego Dalot tók við stöðunni þegar Facundo Pellistri kom inn fyrir Harry Maguire.

Innkoma Pellistri og framlag hans var kannski með því áhugaverðara í gær. Hann spilaði sem hægri bakvörður og bæði vann boltann í marki Garnacho en missti Silva fram fyrir sig þegar City jafnaði. Hann er einn þeirra leikmanna sem virðast hafa átt í stirðum samskiptum við ten Hag, því mínúturnar voru afar fáar í fyrra og umboðsmaður Úrúgvæans tilbúinn að skjóta á ten Hag.

Hæpið virðist þó að ten Hag sjái framtíð Pellistri sem bakvarðar miðað við fréttirnar sem bárust rétt fyrir leik um að United hefði fengið samþykkt tvennutilboð í miðvörðinn Matthijs de Ligt og bakvörðinn Noussair Mazraoui hjá Bayern München. Báðir eiga þeir fortíð hjá ten Hag hjá Ajax. Hvað sem líður allri umræðu um að styrkja teymið í kringum hann í leit að leikmönnum þá fjölgar þeim áfram. Á móti eiga samningar að vera í höfn við West Ham um að Aaron Wan-Bissaka fari þangað.

Lið United: Onana, Martinez, Evans, Maguire (Pellistri 58), Dalot, Mainoo (Collyer 58), Casemiro, Rashford (Sancho 83), Mount (McTominay 58), Amad (Garnacho 58), Fernandes.

Embed from Getty Images

Æfingaleikur eða keppnisleikur? Bikar er alltaf bikar og stolt er alltaf í húfi gegn Manchester City. En leikurinn í dag mun aldrei gefa of mikið til kynna hvers megi vænta frá liðunum í vetur.

Nýtt tímabil vekur alltaf bjartsýni, kannski sérstaklega þar sem hið síðasta var sérlega ömurlegt. Enn leifir þó af gömlum vandræðum því United hefur strax tekið forustu í meiðslatöflu úrvalsdeildarinnar með tíu leikmenn meidda eða tæpa. Sú tafla var hin eina sem liðið leiddi nokkuð örugglega á síðustu leiktíð.

Vinstri bakverðirnir Luke Shaw og Tyrrell Malacia eru meiddir. Malacia virðist hafa fengið enn eitt bakslagið í endurhæfingunni meðan lítið hefur spurst til meiðsla Shaw. Nýi miðvörðurinn Leny Yoro meiddur langt fram eftir hausti og Harry Maguire og Victor Lindelöf tæpir. Maguire er þó í hóp. Harry Amass, sem spilað hefur vinstri bakvörðinn á undirbúningstímabilinu, er líka í hóp en hann trúlega enn númerum of lítill í City eða úrvalsdeildina.

Menn á borð við Bruno Fernandez, Lisandro Martinez, Diego Dalot, Alejandro Garnacho, Kobbie Mainoo, Facundo Pellistri og nýi framherjinn Joshua Zirkzee spiluðu ekkert á undirbúningstímabilinu vegna þáttöku í landsmótum frameftir sumri. Einhverjir þeirra fá mínútur í dag en hvort þeir spili frá byrjun er annað mál.

Brýn þörf gæti þó verið á Martinez og Dalot vegna meiðsla í vörninni, eða Bruno eða Zirkzee vegna meiðsla framherjans Rasmus Höjlund.

Áhugavert gæti veirð að sjá hvaða vængmenn verða fyrir valinu því það gæti gefið tóninn fyrir tímabilið. Af þeim Amad, Marchus Rashford, Jadon Sancho, Anthony og Garnacho byrja aldrei nema í mesta lagi þrír. Ákveðna furðu vekur að Pellistri sé í hóp því hann hlýtur að eiga að selja því hann hefur lítið í hina fimm að gera.

Casemiro er enn á sínum stað á miðjunni. Valið fyrir framan gæti haft áhrif á hver verður við hlið hans, til dæmis hvort Mason Mount verði þar ef Bruno kemur inn í sóknartengilliðinn eins og hann er vanur. Christian Eriksen fékk sinn skerf af mínútum í Bandaríkjaferðinni og sömuleiðis Toby Collyer sem lofar góðu fyrir framtíðina.

Auk Casemiro er André Onana hinn leikmaðurinn sem fullyrða má með vissu að byrji leikinn í dag.

Þjálfarar meiðast ekki og því verður glænýtt þjálfaralið til sýnis í dag. Ruud van Nistelrooy og Réne Hake eru komnir í stað Steve McClaren og Mitchell van der Gaag. Andreas Georgsson á að þjálfa föst leikatriði eftir að Eric Ramsay fór að þjálfa í MLS í fyrra. Jelle ten Rouwelaar þjálfar markverðina í stað Richard Hartis og sóknarþjálfarinn Benny McCarthy er farinn.

Eins verður forvitnilegt að sjá hvaða leikkerfi Erik ten Hag veðjar á. Í lok síðasta tímabils var hann kominn í 4-2-2-2 sem skilaði bikarmeistaratitlinum. Á undirbúningstímabilinu hefur liðið aftur spilar 4-2-3-1. Ef það verður fyrir valinu gæti orðið fróðlegt að sjá hvort áherslan verði á hollenskt samspil eða þýska hápressu.

Leikurinn hefst klukkan 14:00 og verður sendur út beint á Vodafone Sport/Viaplay.