Rauðu djöflarnir

Enska úrvalsdeildin

Manchester United 4:1 Fulham

skrifaði þann | 11 ummæli

Síðast þegar þessi tvö lið mættust á þessum velli vöru úrslitin ekki uppá marga fiska og undirritaður einnig á þeirri skýrslu. Þau úrslit voru kornið sem fyllti mælinn hjá stuðningsmönnum United sem vildu leyfa David Moyes að fá tíma til að gera eitthvað af viti. Þetta var einmitt alræmdi fyrirgjafaleikurinn.

Embed from Getty Images

Eins og allir vita þá hefur þetta tímabil verið ansi dapurt hjá okkur mönnum og velgengni City og Liverpool er ekkert að hjálpa. Eins og fram kom í upphitun skipti Fulham um stjóra fyrir stuttu í von um að halda sér í efstu deild. Það kom svo sem ekki mjög á óvart að Paul Pogba byrjaði annan leikinn í röð á bekknum en Romelu Lukaku fékk að byrja. Það var mjög ánægjulegt að sjá Diogo Dalot byrja í fyrsta sinn í deildarleik en Luke Shaw var ekki með vegna meiðsla. Chris Smalling og Phil Jones ásamt Ashley Young fullkomnuðu svo fjögurra manna varnarlínuna. Mourinho ákvað að stilla upp þriggja manna miðju en hana skipuðu þeir Nemanja Matic, Juan Mata og Ander Herrera. Fyrir framan þá voru þeir Jesse Lingard, Marcus Rashford og Lukaku.

Embed from Getty Images

United byrjaði leikinn nokkuð vel og virkaði liðið sprækt. Það varð ansi fljótt ljóst að Fulham er ekki neðsta sætinu án ástæðu. Á þrettándu mínútu sólaði Young sig í gegnum vörn gestanna og skoraði laglega framhjá vesalings Rico í markinu. Kortéri síðar lagði Rashford upp mark fyrir Mata sem átti góðan leik í dag. Fjórtán mínútum eftir markið átti Mata svo sjálfur sendingu fyrir markið á Lukaku sem að kláraði auðveldlega. Þetta var fyrsta mark Lukaku á Old Trafford síðan í mars. Staðan var því 3:0 þegar flautað var til hálfleiks.

Embed from Getty Images

Seinni hálfleikurinn var langt því jafn skemmtilegur og sá fyrri. United slakaði of mikið á og gáfu Fulham fullt af sénsum til að komast aftur inn í leikinn. Um miðjan hálfleikinn kom loks að því. Herrera braut á Kamara inni í teig og vítaspyrna var dæmd sem að Kamara skoraði sjálfur örugglega úr. Fulham voru enn að fagna markinu þegar Anguissa fékk sitt annað gula spjald og gestirnir því einum manni færri restina af leiknum. Tíu mínútum fyrir leikslok innsiglaði Rashord 4:1 sigur með laglegu skoti en markvörður Fulham hefði nú líklega átt að gera betur.

Embed from Getty Images

Næst á dagskrá er leikur sem skiptir nánast engu máli þann 12. desember gegn Valencia. En sunnudaginn í næstu viku mætir United á Anfield og gætu úrslit þar haft mikil áhrif á stöðu José Mourinho.

1
De Gea
18
Young
4
Jones
12
Smalling
20
Dalot
31
Matić
21
Ander Herrera
10
Rashford
14
Lingard
8
Mata
9
Lukaku

Varamenn: S.Romero, Marcos Rojo (Smalling 59′), A.Pereira, Fellaini, Fred (Lingard 73′), McTominay (Rashford 84′), Pogba

Enska úrvalsdeildin

Manchester United tekur á móti nýliðum Fulham

skrifaði þann | 1 ummæli

Nýr dagur, ný áskorun. Eftir líflegan leik gegn Arsenal sem endaði 2:2 er röðin komin að Fulham. Gestirnir frá Lundúnum hafa verið ákveðin vonbrigði í deildinni hingað til en félagið eyddi talsverðum fjármunum í nýja leikmenn en árangurinn hefur ekki verið eftir því. Slavisa Jokanovic sem kom liðinu upp í úrvalsdeildina var látinn fara fyrir nokkru og hefur Ítalinn geðþekki Claudio Ranieri tekið við liðinu.

Embed from Getty Images

Manchester United situr í dag í 8.sæti deildarinnar með 23 stig og Fulham í því 20 með 9 stig. Sem þýðir einfaldlega að United er nær falli en deildartitli eins og staðan er í dag. Auðvitað er meiðslakrísa að hrjá varnarmenn United sem gerist á hverju einasta tímabili og orðið vel þreytt ástand. Svo eru lykilmenn alls ekki að standa sig en þeir Paul Pogba og Romelu Lukaku ásamt Nemanja Matic „fremstir“ með jafningja. Liðið spilar reyndar ekkert mikið betur þegar þeir eru ekki með. Meira að segja David de Gea hefur verið að gera mistök af og til en hann hefur lengi falið vanhæfni varnarmanna liðsins með ótrúlegum vörslum og átti nokkrar góðar gegn Arsenal. Svo mun ástæðan fyrir fjarveru Fred úr liðinu einfaldlega vera sú að vörnin er ekki nógu stöðug.

Embed from Getty Images

Það er ekki auðvelt að ætla að spá fyrir byrjunarliði hjá Manchester United því ómögulegt er að vita hvað Mourinho er að hugsa þessa dagana og kæmi það engan veginn á óvart að hann myndi stilla liðinu upp með 5 varnarmenn eins og gegn Arsenal. Það segir kannski allt um þetta tímabil að þessi leikur á morgun getur farið á hvaða veg sem er. En hann á að vinnast örugglega og ef það gerist ekki þá er það einfaldlega vonbrigði sama hvað stjórinn bullar eftir leik.

Enska úrvalsdeildin

Manchester United 2:2 Arsenal

skrifaði þann | 8 ummæli

Stóru fréttirnar láku rétt fyrir sjö, bæði Paul Pogba og Romelu Lukaku voru á bekknum. Eftir nokkrar vangaveltur komust menn að því að líklegast væri að liðið væru að spegla hvort annað, bæði í 3-4-3 uppstillingu. Diogo Dalot byrjaði sinn fyrsta úrvalsdeildarleik og Marcos Rojo sinn fyrsta leik á tímabilinu. Sóknir United frá upphafi sýndu án efa að Darmian og Dalot voru fullir þátttakendur og því mun réttar að hafa þá sem miðjumenn en varnarmenn.

1
De Gea
16
Rojo
12
Smalling
3
Bailly
36
Darmian
21
Ander Herrera
31
Matić
20
Dalot
14
Lingard
9
Rashford
11
Martial

Varamenn: S.Romero, Valencia, Fellaini, Mata, McTominay, Pogba, Lukaku

Lið Arsenal var svona:

Leno
Holding
Sokratis
Mustafi
Kolašinac
Guendouzi
Torreira
Bell
Iwobi
Ramsay
Aubameyang

United var mun frískaraliðið frá upphafi og héldu boltanum vel. Sóknir þeirra stöðvuðust þó oftast við teiginn enda var varnarlína Arsenal þétt og liðið allt mjög til baka þegar United sótti. Arsenal sótti ekki oft, en var næstum komið í færi þegar Ramsey kom boltanum framhjá Dalot inn á Kolasinac, en vörn United hreinsaði. Leikurinn var að snúast þannig að um miðjan hálfleikinn var Arsenal komið með yfirburði á boltanum og United var liðið sem bakkaði og þétti línurnar. Arsenal spilaði mikið upp á Dalot sem þurfti að gefa nokkur horn til að verjast. Úr einu slíku á 26. mínútu gaf Torreira fyrir, Shkodran Mustafi skallaði í jörð og upp og á einhvern óskiljanlegan hátt skóflaði De Gea boltann upp og yfir sig. Ander Herrera reyndi að hreinsa á línu en boltinn var rétt kominn inn. 1-0 fyrir Arsenal.

En United var ekki lengi að svara fyrir sig. Guendouzi brá Martial rétt utan vítateigshálfhringsins og dæmd var aukaspyrna. Rojo tók aukaspyrnuna, Leno skutlaði sér og varði út til hliðar, þar náði Ander Herrera boltanum alveg á endalínunni og náði að skófla boltanum fyrir, sendingin fór framhjá Lingard sem var dottinn en Anthony Martial var á markteignum til að hamra boltann inn. Herrera var reyndar rangstæður sem nam nokkrum sentimetrum rangstæður þegar Rojo tók aukaspyrnuna, fínt að VAR var ekki komið í gagnið. Vörn Arsenal getur líka sjálfri sér um kennt, voru lengi að bregðast við og létu Martial óáreittan.

Embed from Getty Images

Rob Holding meiddist þegar Marcus Rashford keyrði frekar hressilega inn í hann skömmu eftir mark United, og Stephan Lichtsteiner kom inn á í staðinn. Mustafi var hins vegar fyrstur í bókina eftir nokkuð groddalega tæklingu á Marcus Rashford úti við endamörk. Það kemur hins vegar engum á óvart að Marcos Rojo fékk fyrstur United manna gult, tók létta flugtæklingu á Guendouzi inni í teig Arsenal. Varla mínútu síðar brá Lingard Torreira til að stöðva sókn Arsenal og fékk réttilega gult og síðan var komið að Bellerín að sparka í Darmian og enn eitt spjaldið. Loks var það Nemanja Matic sem var spjaldaður fyrir að toga í Aubameyang sem var að sleppa í sókn eftir slæma sendingu frá United. Fimm spjöld á fimm mínútum var ansi hressilegt.

Torreira hefði getað fengið gult fyrir að stíga á ökklann á Matic en dómarinn mat það sem slys. Síðan var það Ramsey sem fór að haltra eftir samstuð en Ramsey hélt út til hálfleiks. Henrikh Mkhitaryan kom síðann inná fyrir hann í hálfleik

Þetta var bara frekar góður fyrri hálfleikur frá United, í það minnsta miðað við síðustu leiki. Liðið var þétt, vörnin að mestu góð og sóknirnar´sterkari, þó ekki kæmu færin, ekki frekar en að Arsenal fengi þau. Fyrir utan markið voru það helst tvö langskot frá Rashford og Martial sem hittu markið en bæði skot voru beint á Leno.

Fyrstu mínútur hálfleiksins sóttu Arsenal en United sneri því vel og ullu usla í vítateig Arsenal. Torreira fór í Martial án þess að ná í boltann, hefði jafnvel getað orðið víti. Dalot átti góða rispu inn í teig og skömmu síðar varði Leno neglu Rojo yfir.

Martial haltraði af velli á 63. mínútu og Romelu Lukaku kom inná. Á sama tíma kom síðasta skipting Arsenal, Lacazette fyrir Iwobi.

En þrátt fyrir góða sóknartilburði United var það Arsenal sem komst yfir. Rojo var undir pressu frá Mkhitaryan og gaf beint á Lacazette. Eftir veggsendingu á Mkhitaryan var Lacazette kominn inn fyrir og skoraði, þrátt fyrir tæklingu Rojo sem missti af boltanum en nelgdi niður Lacazette.

En aftur jafnaði United strax. Rojo fékk boltann eftir miðjuna og nelgdi fram, einn varnarmaður missti af boltanum, sem fór svo af Kolasinac og Lingard var fyrstur til og skoraði framhjá Leno.

Embed from Getty Images

Arsenal setti í sóknargír og óð upp í teig en þar var fyrir David de Gea og bætti fyrir mistökin í fyrri hálfleik með frábærri markvörslu frá Aubameyang..

Þá gerði United sína aðra skiptingu, Fellaini kom inná fyrir Rojo sem var orðinn ansi heitur fyrir rauða spjaldinu. De Gea varði aftur glææsilega langskot frá Aubameyang og svo kom Pogba inná fyrir Lingard. Arsenal var að sýna hvers vegna liðinu hefur gengið mun betur í seinni hálfleikjunum í vetur og voru ansi sprækir en leikurinn var mun opnari en í fyrri hálfleik. Arsenal komu boltanum í mark á 90. mínútu en Mkhitaryan var mjög rangstæður við endamörk þegar hann sneri boltann inn.

United hélt síðan út fjórar mínútur og rúmlega það í viðbótartíma.

Þetta er vissulega hressasti leikur sem við höfum séð frá United í langan tíma en það var ekki nóg. Eftir nokkuð jafnan fyrri hálfleik voru Arsenal vissulega aðeins betra liðið í seinni hálfleik og hefðu getað stolið sigrinum undir lokin.

Uppstilling United virkaði vel gegn eins uppstillingu Arsenal og leikmenn voru ákafari en við höfum séð lengi. En það var ekki alveg nóg. Þegar Lukaku og Pogba komu loksins inná gerðu þeir nákvæmlega ekkert til að sýna að þeir ættu að fá að vera með frá upphafi. Marcos Rojo kom vel út í sínum fyrsta leik í vetur, gaf síðan mark og hann hefði hugsanlega átt að fá eitt rautt, ekkert nýtt þar. Eric Bailly var mjög öruggur eftir meiðslafráveru og ætti að vera með fast sæti.

Embed from Getty Images

En þetta er ekki leikurinn sem breytir gangi tímabilsins. United hefur tekið 2 stig af 12 gegn Tottenham, Chelsea, City og Arsenal og það er svo fjarri því að vera viðunandi. Liðið er enn 8 stigum frá fjórða sæti, þökk sé tapi Chelsea gegn Úlfunum í kvöld en er núna 18 stigum á eftir City.

https://twitter.com/gavreilly/status/1070438110994030592

Stigið þýðir að stjórnin getur líklega leiðrétt það fyrir sjálfum sér að reka ekki José, en þeir eru líklega ein um þá skoðun. Það að þessi leikur hafi verið smá skemmtun bjargar ekki málum.

Enska úrvalsdeildin

Nýtt Arsenal mætir á Old Trafford á morgun

skrifaði þann | 1 ummæli

Leikurinn gegn Arsenal er mikill tímamótaleikur. Í fyrsta skipti í 23 ár, síðan 20. mars 1995 kemur Arsenal án Arsène Wenger, og í fyrsta skipti síðan 25. ágúst 1985 er hvorki að finna Sir Alex Ferguson eða Wenger á hliðarlínunni.

Það er óhætt að segja að stuðningsmenn Arsenal hafi verið orðnir langeygir eftir að Wenger ákvæði að leggja svefnpokann á hilluna og leyfa öðrum að spreyta sig. Gengi félagsins hafði farið versnandi og Wenger bikarinn endaði á Anfield í fyrra.

Undirbúningurinn fyrir stjóraskiptin hafði þó verið nokkur,  í fyrra var ráðinn var yfirmaður knattspyrnumála og Sven Mislintat kom frá Borussia Dortmund og stjórnar leikmannakaupum. Í sumar var svo Unai Emery ráðinn framkvæmdastjóri og það er óhætt að segja að Arsenal hafi staðið sig vel. Tímabilið byrjaði á töpum gegn Manchester City og Chelsea en síðan hefur liðið ekki tapað leik og situr í 4. sæti, í því sem virðist ætla að vera barátta um 4. sætið milli Lundúnaliðanna. Síðasti leikur Arsenal var einmitt sannfærandi sigur á Tottenham í Lundúnaslagnum á sunnudaginn, sem var meira fjör á 90. mínútum en þó öllum fjörlegum atvikum United í leikjum í vetur hefði verið safnað saman. Í þeirri orrahríð sem nú stendur á José Mourinho þá er þetta ekki síst það sem nýtt er, leikur United er næsta leiðinlegur og það bjargar litlu að benda á að leikur liðsins undir stjórn Louis van Gaal hafi verið enn leiðinlegri.

Velgegni Arsenal er einna mest Pierre-Emerick Aubameyang að þakka en hann er nú þegar kominn með tíu mörk í deild og er markahæstur þar. Henrikh Mkhitaryan þekkjum við vel og hann hefur staðið sig betur en hjá United, og betur en Alexis Sánchez síðan við skiptum við Arsenal á þeim félögumm. Það vill reyndar til að ekki er mjög erfitt að standast þessa samanburði, frammistaða hans hjá Arsenal hefur í besta falli verið þokkaleg.

Annars er Emery að láta Arsenal spila hápressubolta með eltingarleikjum og það hefur leitt til þess að Mesut Özil hefur ekki alltaf verið í náðinni hjá honum. Granit Xhaka er reyndar í banni á morgun, þannig liðið á morgun verður einhvern veginn svona:

Leno
Holding
Sokratis
Mustafi
Kolašinac
Guendouzi
Torreira
Bellerín
Iwobi
Mkhitaryan
Aubameyang

Staðan hjá United

Það er óhætt að segja að staðan sé ekki góð hjá United. Liðið situr í sjötta sæti, átta stigum frá Meistaradeildarsæti. Jafnteflið við Southampton á laugardaginn var skelfilegt, ekki síst vegna marggagnrýndrar uppstillingar þar sem Nemanja Matic og Scott McTominay léku í miðvarðarstöðum. Varnarvandræðin munu að öllum líkindum halda áfram, Ashley Young er í banni á morgun, Victor Lindelöf verður frá fram að jólum í það minnsta og Luke Shaw, Eric Bailly, Chris Smalling Antonio Valencia og Matteo Darmian eru allir eitthvað meiddir og óvíst til eða frá hvort þeir verði frá á morgun. Phil Jones er hugsanlega í þessum hópi líka en er eitthvað líklegri. Að auki kom Marcus Rashford meiddur af velli á laugardaginn, en Mourinho segir líklegt hann verði með

1
De Gea
16
Rojo
39
McTominay
4
Jones
31
Matić
20
Dalot
6
Pogba
27
Fellani
17
Fred
11
Martial
9
Lukaku

Ég býst því við að Diogo Dalot verði hent í djúpu laugina og byrji sinn fyrsta deildarleik. Marcos Rojo er víst enn til, og aldrei að vita nema hann þurfi að leysa af vinstra megin. Það kæmi síðan ekkert á óvart ef Mourinho færi enn í varfærnisgírinn með sömu þrjá miðverðina og gegn Southampton. United hefur ekki tapað í deildinni á Old Trafford gegn Arsenal síðan í september 2006. Mourinho mun reyna að hindra að það breytist.

Engin bjartsýni

Ég segi það alveg eins og er að ég er alveg laus við bjartsýni fyrir leikinn á morgun. Það virðist sama hvað hver reynir, liðið er fast í einhverju öngstræti. Það fara ófáir dálksentimetrar í þetta í fótboltafréttum internetsins og það er ljóst að það að finna einn sökudólg er ómögulegt. En það eru gömul sannindi í knattspyrnunni að það er auðveldara að reka einn framkvæmdastjóra heldur en 12, nú eða 24 leikmenn og starf José Mourinho er í stórhættu. Það sem er verst við þetta að þetta gæti verið þriðja tímabilið á sex árum þar sem ljóst er að brottrekstur framkvæmdastjórans er yfirvofandi mestan hluta tímabilsins en stjórn félagsins getur ekki tekið þá ákvörðun fyrr en fjórða sætið er orðið stærðfræðilegur ómöguleiki og þar með bótagreiðslurnar lægri en sem því nemur. Í staðinn þurfum við að verða vitni að langri þrautagöngu þar sem engin gleði er í leik liðsins, og þaðan af síður fjör og frískleiki.

Embed from Getty Images

Það hefur enginn velkst í vafa um þá skoðun mín að stjórn klúbbsins sé í molum, og eigendur, Edward Woodward og José Mourinho eiga þar allir sína sneið af sökinni. Fyrsta skrefið í að bæta ástandið er að reka José Mourinho. Það er þó fjarri því nóg. Það sýna klúbbar eins og Manchester City, Liverpool og Arsenal þar sem reistar hafa verið styrkar stoðir og markvisst unnið að uppbyggingu sem treystir ekki einugis á einum knattspyrnustjóra.

En aðdáun Edward Woodward á stórum nöfnum hefur ekki einskorðast við leikmenn, stjóraráðingar hans hafa líka einkennst af því. Það er kominn tími til að eigendurnir taki til. Kannske að sú staðreynd hreyfi við þeim að nú í eftirmiðdaginn voru enn til miðar  á leikinn á morgun fyrir stuðningsmenn, frekar en þeir væru löngu uppseldir og þyrfti að veita þá í happdrætti.

Ég skil við ykkur með þessari sturluðu staðreynd og því að leikurinn hefst klukkan átta á morgun.

 

Enska úrvalsdeildin

Southampton 2:2 Manchester United

skrifaði þann | 11 ummæli

Byrjunarlið United kom vægast sagt á óvart í dag en José Mourinho ákvað að fara í fimm manna varnarlínu með þá Nemanja Matic og Scott McTominay í miðverði ásamt Phil Jones. Vakti þetta litla lukku meðal stuðningsmanna liðsins enda með eindæmum varnarsinnuð uppstilling gegn liði á borð við Southampton.

Annað sem kom á óvart var það að Ashley Young byrjaði leikinn í hægri bakverði en Mourinho hafði tilkynnt að Diego Dalot myndi byrja leikinn fyrr í vikunni. Ástæðan fyrir því er að ég held hræðsla en þeir Chris Smalling og Eric Bailly misstu af leiknum vegna meiðsla. Því hefur José ekki þorað að setja Dalot inn með nú þegar laskaða varnarlínu – að því sögðu þá er þetta Southampton. Stilltu upp sókndjörfu liði og jafnaðu út lélega vörn með frábærri sókn.

Byrjunarliðið var eftirfarandi:

1
De Gea
23
Shaw
39
McTominay
4
Jones
31
Matic
18
Young
6
Pogba
27
Fellaini
21
Herrera
10
Rashford
9
Lukaku

Á bekknum voru svo Sergio Romero, Diogo Dalot (70. mín), Marcos Rojo, Fred, Jesse Lingard, Juan Mata og Anthony Martial.

Spjöld: Rashford (18. mín), Fellaini (35. mín) og Pogba (53. mín).

Fyrri hálfleikur: Hörmulegar 30 mínútur – Frábærar 15 mínútur

Eftir aðeins tveggja mínútna leik gerðist Alex McCarthy, markvörður Southampton, sekur um slæm mistök þegar honum mistókst að sparka knettinum frá marki sínu. Í kjölfarið átti Marcus Rashford hælsendingu á Romelu Lukaku sem náði skoti á markið sem McCarthy varði. Var það eina alvöru færi United á fyrsta hálftíma leiksins. Á sjöttu mínútu leiksins áttu heimamenn svo álitlega sókn sem rann út í sandinn en fyrstu tíu mínútur leiksins voru með eindæmum rólegar.

Næstu tíu mínútur leiksins voru hins vegar eitthvað allt annað en þegar 12 mínútur voru komnar á leikklukkuna tóku heimamenn forystuna. Það gerði Stuart Armstrong með góðu skoti utarlega úr vítateig Manchester United en hann smellhitti boltann í fyrsta eftir sendingu Michael Obafemi. Ég ætla ekkert að þykjast vita hvaða menn þetta eru en það lýsur ástandi hjá United ágætlega þeir Halli og Laddi eru farnir að skora gegn liðinu.

Embed from Getty Images

Vert er að taka fram að Southampton hafði aðeins skorað sex mörk á heimavelli fyrir leikinn og ekki enn unnið heimaleik í deildinni (síðasti sigurleikur liðsins á heimavelli kom 23. apríl).

Aðeins sex mínútum síðar ákvað Marcus Rashford að togna á heila og brjóta á Mario Lemina rétt fyrir utan vítateig. Rashford fékk gula spjaldið fyrir vikið. Cedric Soares, hægri bakvörður heimamanna, stillti knettinum upp og smurði hann svo yfir varnarvegg United og upp í samskeytin. Óverjandi fyrir David De Gea og staðan orðin 2-0 heimamönnum í vil.

Embed from Getty Images

Hvað nákvæmlega gerðist eftir tæpan hálftíma er í raun ómögulegt að setja fingurinn á en leikur United umturnaðist allavega. Rashford virtist loksins finna taktinn en hann vann knöttinn af harðfylgi nálægt vítateig Southampton og renndi knettinum inn fyrir fyrir þar sem Lukaku kom á fullri ferð og hamraði knettinum af alefli í netið. Staðan orðin 2-1 og okkar menn komnir aftur inn í leikinn.

Embed from Getty Images

Aðeins sex mínútum síðar hafði United jafnað metin. Þar var að verki Ander Herrera eftir frábæran sprett Rashford upp hægri vænginn þar sem hann óð fram hjá hverjum varnarmanni Southampton á fætur öðrum áður en hann sendi þéttingsfastan bolta meðfram jörðinni þegar hann var kominn alveg upp að endalínunni. Sendingin rataði á Herrera sem flikkaði honum með hælnum undir McCarthy í marki Southampton og staðan orðin 2-2.

Herrera gerði sig svo líklegan til að koma United yfir undir lok fyrri hálfleiks þegar hann átti þrumuskot beint á McCarthy. Staðan 2-2 í hálfleik.

Embed from Getty Images

Drep leiðinlegur síðari hálfleikur

Síðari hálfleikur fór einkar rólega af stað en heimamenn hefðu ef til vill átt að fá vítaspyrnu þegar rúmur klukkutími var liðinn af leiknum. McTominay virtist þá brjóta á Michael Obafemi, eða Ladda eins og ég kýs að kalla hann, innan vítateigs. Kevin Friend, dómari leiksins, gerðist einkar vinalegur og dæmdi ekkert. Áfram hélt ekkert að gerast í leiknum og loks á 70. mínútu kom fyrsta skipting leiksins. Hún var til heiðurs Louis Van Gaal en Mourinho skipti Diogo Dalot inn fyrir Luke Shaw.

Shaw virtist reyndar vera meiddur og fór beint inn í klefa. Það gæti ekki komið á verri tíma en vörn United var einstaklega þunnskipuð fyrir leik. Á 76. mínútu gerði Mourinho sína aðra breytingu en þá Anthony Martial kom þá inn fyrir Rashford.

Ef eitthvað þá voru það heimamenn sem voru nær því að tryggja sér sigur heldur en okkar menn. Leiknum lauk hins vegar með 2-2 jafntefli sem gerir um það bil ekki neitt fyrir United í baráttunni um 4. sætið en liðið er sem stendur í 7. sæti með 22 stig, jafn mikið og Everton sem á leik til góða.

Embed from Getty Images

Punktar eftir leik

  • Loksins þegar Mourinho virtist vera finna mojo-ið sitt aftur þá hefur hann svo sannarlega verið sleginn niður á jörðina. Markalaust jafntefli gegn Crystal Palace og svo þetta stórundarlega byrjunarlið í dag. Að því sögðu eru litlar sem engar líkur að hann verði atvinnulaus á næstunni þar sem það kostar eigendur félagsins of mikið að reka hann – og það eina sem þeir hugsa um eru jú peningar.
  • Meiðslavandræði United halda áfram. Ef það er einhver tími í ensku deildinni þar sem þú þarft alla þína menn heila er það í desember geðveikinni. Það stefnir hins vegar í að United verði án um það bil allra sinna varnarmanna í komandi leikjum.
  • Tekst United að enda í efstu fjórum sætum deildarinnar? Svarið er einfalt: Nei.