Rauðu djöflarnir

Í dag mættust stórliðin úr Manchesterborg í síðasta leik dagsins í ensku úrvalsdeildinni á Etihad vellinum í ljómandi fínu veðri. United var án Paul Pogba auk þess sem Alexis Sanchez og Romelu Lukaku byrjuðu báðir á bekknum eftir nýafstaðin meiðsl. Framlínan okkar var því Anthony Martial á vinstri kantinum og Jesse Lingard á þeim hægri með Marcus Rashford fremstan.

City menn byrjuðu leikinn af kraftinn og gáfu gestunum ekki nein grið og er varla hægt að segja að United menn hafi snert boltann, svo mikil var einstefnan og áræðnin hjá heimamönnum. Sú vinnusemi skilaði sér strax á 12. mínútu þegar David Silva kom boltanum á Sterling sem átti frábæra fyrirgjöf yfir á fjærstöngina þar sem Bernardo Silva lúrði og náði að senda boltann fyrir markið þar sem nafni hans frá Spáni fékk opið marktækifæri og hamraði boltann í netið fram hjá de Gea.

Embed from Getty Images

Eftir það virtist United liðið vakna aðeins en þegar þarna var komið við sögu voru City menn með 107 heppnaðar sendingar og 83% með boltann á meðan United hafði klárað heilar 19 sendingar og nánast ekkert með boltann. Virkilega dræmar upphafsmínútur hjá okkar mönnum en það virðist vera stíllinn hjá liðinu þessar vikurnar.

Loksins þegar rúmar tuttugu mínútur voru komnar á klukkuna virtust okkar menn ætla að taka þátt í leiknum en rétt þegar okkur tókst að setja saman nokkrar sendingar á samherja þá missir Ander Herrera boltann á miðjunni og David Silva komst í hálffæri sem varnarmenn okkar hreinsuðu sem betur fer upp. Í kjölfarið komu fyrstu færin okkar en enginn veruleg hætta skapaðist. Martial átti skot sem var varið, Smalling átti skalla yfir markið og fyrirgjöf frá Young rataði beint í krumlurnar á Ederson.

Embed from Getty Images

Engu að síður leit út fyrir að við værum að ýta þeim aftar á völlinn en þó að við næðum að vinna okkur meira og meira inn í leikinn voru heimamenn alltaf líklegir. Undir lok fyrri hálfleiks áttum við í tómu basli með að koma boltanum af hættusvæðinu, heimamenn fengu endalausar hornspyrnur og ekki bætti það úr skák að Herrera virtist vera að missa boltann í annað hvert sinn þegar hann fékk boltann í lappirnar. Gátum talist þokkalega heppnir að vera bara 1-0 undir í hálfleik og greinilegt að breytinga er þörf þar sem United virtist elta allan fyrri hálfleik.

Hálfleikur

Seinni hálfleikur fór ekkert gífurlega vel af stað. Strax eftir þrjár mínútur komst Sergio Aguero inn fyrir vörn United og átti þrususkot yfir de Gea úr þröngu færi og breytti stöðunni í 2-0. Áfram héldu City menn að sundurspila United vörnina og áttu nokkur góð færi á næstu tíu mínútum, óneitanlega besta færið fékk þó Sterling þegar hann komst einn inn fyrir en vildi ná skotinu með hægri og var alltof lengi að aðhafast í teignum og Smalling komst fyrir hann.

Embed from Getty Images

Á 57. mín kom Lukaku inn fyrir Jesse Lingard og það tók hann ekki nema nokkrar sekúndur að krækja í vítaspyrnu eftir frábæra stungusendingu en sá belgíski steif ekki sjálfur á punktinn. Sennilega hefur það spilað inn í að Lukaku var nýkominn inn á og að hann hafi ekki skorað í háa herrans tíð fyrir United. Því steig Martial á punktinn, en sá franski tók stutt tilhlaup og sendi Ederson í vitlaust horn. Staðan orðin 2-1 og hálftími rúmur eftir af leiknum og nægur tími til að snúa við taflinu. Við þetta mark fengu okkar menn aukinn kraft enda tími til kominn.

Lítið markvert gerðist á næstu tíu mínútum annað en að Leroy Sane kom inn á og greinilega átti að ganga frá Ashley Young en hann var þegar orðinn gífurlega þreyttur eftir að elta Sterling allan leikinn. Alexis Sanchez og Juan Mata komu inn á sem varamenn þegar tæpar tuttugu mínútur voru eftir og fengum við strax aukaspyrnu sem hefði getað skapað hættu í vítateig City en í staðinn komust City menn í skyndisókn og sem betur fer lét Sane vaða fyrir utan teig en boltinn sveif hátt yfir markið.

Embed from Getty Images

Örlítill meiri hraði færðist í leikinn við þessar skiptingar sem gerði síðustu mínúturnar mun skemmtilegri en fyrri hluta síðari hálfleiks. Bæði lið gerðu þó nokkur mistök en ekki nein eins slæm eins og Matic á 86. mínútu þegar City hélt boltanum í heilllangan tíma sem endaði svo með fyrirgjöf inn í teig á İlkay Gündoğan þar sem Nemanja Matic gleymdi hreinlega að hann væri til. Gündoğan kláraði færið af yfirvegun og kom City aftur í tveggja marka forystu. Þannig lauk leiknum og skelltu City menn sér aftur í fyrsta sæti deildarinnar.

Embed from Getty Images

Hugleiðingar að leik loknum

Okkar menn fengu loksins skellinn, en það hlaut að vera komið að því að við næðum ekki að koma til baka eftir að við lendum undir. En í stað þess að velkjast um í biturri neikvæðni og pólitískum ómöguleika þá skulum við líta á nokkra jákvæða punkta.

Fyrst ber að nefna að Victor Lindelöf virðist vera að stíga upp sem byrjunarliðsleikmaður og virðist vera að aðlagast ensku deildinni ágætlega loksins. Anthony Martial heldur áfram að vera gífurlega beinskeyttur fram á við auk þess að sinna varnarvinnu í mun ríkara mæli en áður og samvinna hans og Luke Shaw virðist batna með hverjum leiknum.

Embed from Getty Images

Vissulega var miðjan okkar yfirspiluð, það verður að segjast eins og er að B.Silva-Fernandinho-D.Silva eru alltaf að fara vinna Herrera-Fellaini-Matic í reitabolta en Fellaini var engu að síður mjög sterkur inn á miðjunni, hefði verið líklega annar leikur ef t.d. Pogba hefði verið með honum. Romelu Lukaku átti líka fína innkomu og gerði mjög vel í að krækja í þessa vítaspyrnu.

En engu að síður sást það með mjög afgerandi hætti að liðið er eftirbátur nágranna sinna á flestum sviðum. Við getum þó huggað okkur við það að við vorum að mæta sterkasta liði deildarinnar, hvort sem þeir hafi orðið það með svikum og prettum skal látið kyrrt liggja, en nú tekur við landsleikjahlé og næstu leikir eru svo Crystal Palace (H), Young Boys (H) og Southampton (Ú) áður en Arsenal mætir á Old Trafford 5. des n.k. Það eru því næg tækifæri fyrir okkar menn til að safna sjálfstrausti og rífa sig í gang fyrir jólatörnina.

Embed from Getty Images

Á morgun fer fram fyrri orrustan um Manchesterborg en þá taka borgararnir í Manchester City á móti rauðu djöflunum í sannkölluðum nágrannastórslag á Etihad vellinum. Síðast þegar liðin mættust á þessum velli í deildinni var boðið upp á fótboltaveislu sem vert er að rifja upp en heimamenn í City komust í 2-0 á fyrsta hálftímanum með mörkum frá Vincent Kompany og Iker Gündogan og þannig stóðu leikar í hálfleik.

Í þeim síðari fengum við að sjá allt annað United lið mæta úr klefanum og með mikilli baráttu og þrautseigju náðum við að snúa taflinu við á um 15 mínútna kafla með tveimur mörkum frá Paul Pogba og sigurmarki frá Chris Smalling. Þarna tapaði City í fyrsta sinn deildarleik í tíu ár eftir að hafa komist tveimur mörkum yfir. Það verður að segjast eins og er að það er óskhyggja að vonanst eftir því að við fáum að sjá sömu veisluna en eitt er víst að við eigum eflaust eftir að fá hörkuleik.

Man City

City hefur verið á siglingu í vetur og leiða deildina með 29 stig úr 11 leikjum og eru enn sem komið er taplausir. Chelsea og Liverpool eru sömuleiðis taplaus og einungis tveimur stigum á eftir City en munurinn á þessu liðum liggur þó í markaskoruninni. City hefur gersamlega gengið frá mótherjum sínum og hafa skorað 33 mörk eða 3 mörk að meðaltali í leik.

Embed from Getty Images

Þar að auki eiga þeir um 21 skot í leik og eru með boltann um 64% að meðaltali. Þessi tölfræði hjá lærisveinum Pep Guardiola er algjörlega út í hött og þarf enginn að velkjast í vafa með það að meistararnir eru bara betri en á síðasta tímabili ef eitthvað er. Breiddin er gífurleg og virðist Pep vera að ná því besta út úr leikmönnunum sínum auk þess sem læknateymið hjá þeim hefur aðgang að einhverjum galdramjöð því enginn er frá hjá þeim vegna meiðsla lengur en nokkrar vikur að því er virðist.

Liðið hefur skorað 35 mörk í síðustu 11 leikjum en einungis fengið á sig tvö mörk á meðan. Kapparnir hans Guardiola eru þar af leiðandi af mörgum taldir mun sigurstranglegri á sunnudaginn en United. Líklega má búast við því að þeir spili 4-3-3 þar sem Pep Guardiola mun stilla upp sínu sterkasta liði en svona gæti liðið litið út á morgun;

City hafa þó verið að breyta til og meðal annars verið að nota Stones í hægri bakverði en þó verður að teljast líklegt að Kyle Walker og Benjamin Mendy fái það hlutverk að taka á móti okkar funheita Martial. Þar að auki verður City verður án Kevin de Bruyne sem er að kljást við hnémeiðsli en þó belginn knái sé einn af betri miðjumönnum heims þá virðist þetta City-lið ekki sakna hans eins mikið og maður hefði vonast til.

Embed from Getty Images

United

Ef þessi leikur hefði verið fyrir fáeinum vikum síðan hefðu eflaust ekki margir verið til í að veðja á United sigur. Liðið átti í tómu basli í deildinni og virtist vera svo langt frá sínu besta að José Mourinho var orðinn líklegastur af öllum stjórunum í deildinni til að fara næstur og spilamennska liðsins virtist eiga heima í Championship deildinni í besta falli.

Stanslausar sögur um ósætti innan liðsins og hörmulegt gengi liðsins ásamt neikvæðum fréttum af öllu og öllum sem tengdust liðinu virtist vera til marks um upphafið að endinum.

Embed from Getty Images

Þar til kom að leiknum við Newcastle United en daginn fyrir leik barst það slúður í blöðin að Mourinho yrði rekinn sama hvernig sá leikur færi. Leikurinn byrjaði nákvæmlega eins og hér væri um að ræða aftöku stjórans, Newcastle komst yfir á upphafsmínútunum og staðan var 0-2 í hálfleik á Old Trafford!

En í hálfleik gerðist eitthvað sem varð til þess að leikmennirnir ákváðu að spila úr sér lífið og lungun til þess að bjarga annað hvort eigin orðspori eða stjóranum frá yfirvofandi atvinnuleysi (hreinlega er mér sama hvor ástæðan varð til þess) og leikurinn vannst að lokum 3-2.

Embed from Getty Images

Þarna í hálfleik gerðist eitthvað sem bæði stjórinn og liðið í heild virðist hafa gripið föstum tökum og ekki ætla að sleppa fyrir sitt litla líf. Liðið var óheppið að sigra ekki Chelsea á Brúnni í næsta leik og baráttusigrar gegn Everton, Bournemouth og síðast Juventus hafa gefið stuðningsmönnum von um að liðið sé loksins að rétta úr kútnum.

Enda kominn tími til, því liðið situr í 7. sætinu með 20 stig og eitt mark í plús eftir fyrstu 11 umferðirnar. Þessi leikur gegn óumdeilanlega sterkasta liði deildarinnar verður því mikil prófraun og áhugavert að sjá hvort Mourinho nái að draga það besta fram úr okkar mönnum í heilar 90 mínútur að þessu sinni en leikmenn United hafa átt í stökustu vandræðum með að leggja sig 100% fram í heilan leik.

Embed from Getty Images

Liðið hefur verið í vandræðum með vörnina, sem er ótrúlegt miðað við að í fyrra fékk liðið á sig einungis 28 mörk á sig en hefur nú þegar þurft að sækja boltann 18 sinnum í eigið net. Engu að síðar að þegar við lítum á hugsanlegt byrjunarlið fyrir nágrannaslaginn má gera fastlega ráð fyrir því að spænski kötturinn byrji á milli stanganna með Chris Smalling og Victor Lindelöf fyrir framan sig. Þá verða líklegast Luke Shaw og Ashley Young sitthvoru meginn við þá.

Það verður þó aðeins meira spennandi að velta fyrir sér hvernig miðjan og framlínan mun líta út. Ander Herrera átti frábæran leik gegn Juventus og hefur verið að finna fyrra form en að sama skapi hefur Nemanja Matic dalað gífurlega frá síðustu leiktíð. Reyndar stóð hann sig vel gegn Juventus í síðari leiknum en það er spurning hvort það sé komin tími á að hvíla serbann og gefa öðrum sénsinn. Það kann að vera að Manchesterslagurinn sé of stór leikur til að gera svo áhrifamiklar breytingar að skipta út fastamönnum eins og Matic. Marouane Fellaini hefur líka staðið sig mjög vel upp á síðkastið og gæti vel verið að Mourinho noti hann ekki bara sem plan B í þessum leik heldur fái hann stærra hlutverk.

Embed from Getty Images

Paul Pogba verður þó að teljast líklegur enda var hann maður leiksins í 2-3 endurkomu sigrinum á síðustu leiktíð og hefur verið einn besti leikmaður liðsins undanfarið. Hann var þó arfaslakur gegn Juventus og virtist ekki vilja gera sínum gömlu félögum það að kroppa af þeim stig í Meistaradeildinni.

Anthony Martial VERÐUR í byrjunarliðinu, svo einfalt er það. Ef Mourinho ætlar að sækja í leiknum verður fótafimi frakkinn á vinstri kantinum en strákurinn er búinn að vera sóðandi heitur í undanförnum leikjum og virðist vera upp á sitt allra besta. Þar að auki hefur hann magnaða tölfræði gegn Manchester City svo það væri algjörlega óafsakanlegt að geyma hann ef hann verður heill.

Embed from Getty Images

Marcus Rashford fór illa með kjörið tækifærið til að gera út um leikinn gegn Juventus en Jesse Lingard var svo sem ekki að gera neitt sérstakt heldur svo hugsanlega verður Juan Mata í byrjunarliðinu á kostnað þeirra á sunnudaginn. Það ber þó að nefna það að Sanchez, Pogba og Lukaku gætu allir verið frá í leiknum á morgun vegna meiðsla en það verður að koma í ljós hvort þessir leikmenn verða tilbúnir í slaginn. Antonio Valencia er byrjaður að æfa aftur en Diogo Dalot er enn frá vegna meiðsla en aðrir leikmenn ættu að vera klárir. Því mun byrjunarliðið fara mikið eftir því hvort þessir leikmenn treysti sér, annars spái ég liðinu;

Manchester City hefur einungis unnið 2 af síðustu 8 viðureignum þessara liða en þar áður unnu þeir 4 í röð. Með sigri í leiknum getur City haldið sér í toppsætinu á meðan okkar menn vonast til þess að draga 3 stig heim með sér og eiga þá möguleika á að komast í 6. sætið og þokast nær toppbaráttunni. Dómari í leiknum verður Anthony Taylor en leikurinn fer fram á sunnudaginn kl 16:30.

Enn hangir möguleikinn á leikbanni yfir Mourinho eftir að varalesari var fenginn til að finna út hvað Mourinho sagði að loknum 3-2 leiknum gegn Newcastle. Það er því vel við hæfi að enda þetta á svari Mourinho þegar hann var spurður út í það sem hann gerði að leik loknum í Meistaradeildinni núna á miðvikudaginn á Ítalíu.

https://twitter.com/mundialmag/status/1060306133586468864?s=21