Rauðu djöflarnir

Þó nokkru fyrir leik bar fréttum saman um að Romelu Lukaku hefði ekki náð að vinna kapphlaupið við meiðslin og þyrfti að láta sér nægja að sitja á varamannabekk. Marcus Rashford kom í hans stað.

Romero, Bailly, Darmian, McTominay, Mata (86.), Lukaku (73.), Martial (73.)

Hjá Chelsea var Willian á bekknum, Bakayoko kom inn og Hazard og Giroud frammi

Það er ekki hægt að segja að leikurinn hafi byrjað af krafti, bæði lið voru að þreifa fyrir sér og  boltinn fór ekki mikið út af miðjusvæðinu.

Chelsea fékk fyrsta færi leiksins á 9. mínútu, Eden Hazard stakk sér framhjá Phil Jones og náði skotinu á nærstöng en De Gea varði nokkuð þægilega. Hazard var annars í strangri gæslu Ander Herrera eins og svo oft áður. Chelsea dró sig nokkuð meira aftur en United og til tilbreytingar var það United sem var að spila handboltasóknir fyrir framan vítateig Chelsea. Bæði lið vildu víti snemma í leiknum, Matic ýtti aðeins við Bakayoku og síðar var það Victor Moses sem greip aðeins í axlir Alexis. Michael Oliver var samt ekkert að hlusta á þær umkvartanir, réttilega.

En á 21. mínútu fékk Chelsea víti. Aftur var það Hazard sem komst í gegn með að hlaupa auðveldlega framhjá Phil Jones, Jones reyndi að ná honum og fór á endanum í tæklinguna, og tók niður Hazard. Jones fékk gult samkvæmt nýjum reglum um að þó sóknarmaður sé rændur tækifæri þá er ekki rautt ef varnarmaðurinn reyndi að ná boltanum.

Embed from Getty Images

Hazard tók vítið og renndi boltanum létt í markið, De Gea var farinn í hitt hornið.

United setti nokkur kraft í sóknirnar eftir þetta, fyrsta hornið kom á 27. mínútu en það varð auðvitað ekkert úr því frekar en fyrri daginn. Sóknarleikur United var samt mjög máttlaus gegn Chelsea liðið sem spilaði allt mjög aftarlega. Rashford var að reyna að finna pláss og eyddi mestöllum tíma sínum úti á kanti, eins og Lukaku hefði gert ef hann hefði verið inná. United skapaði í raun engin færi nema ef hægt var að kalla það þegar Jones var nálægt því að ná skalla við stöngina eftir góða fyrirgjöf Ashley Young á næstsíðustu mínútu hálfleiksins. Eitt augnablik héldum við að eitthvað gæti veirð að gerast á síðustu sekúndunum þegar þeir fóru hratt upp völlinn en sú von dó þegar Rashford klúðraði boltanum frá sér inni í teig.

En United fór inn í hálfleik einu marki undir og án þess að hafa sýnst líklegt til að að breyta þeirri stöðu.

Mourinho gerði engar breytingar í hálfleik og leikurinn var ekki ósvipaður því sem hann hafði verið í fyrri hálfleik, en United var þó öllu gráðugra í sóknunum og fór að senda betur og hraðar milli leikmanna. Loksins á 63. mínútu kom Alexis Sánchez boltanum í netið, en hann var rangstæður. Courtois varði skalla Jones og Sánchez var rangstæður í skallanum, fylgdi á eftir og setti boltann í netið. Oliver kallaði eftir sjónvarpsdómi og fékk dóminn staðfestan.

United hélt áfram að bæta leikinn, Pogba var farinn að verða mun áhrifameiri og ákveðnari en í fyrri hálfleik. Það var samt Chelsea sem fékk gullið tækifæri í hraðaupphlaupi. Kanté hljóp á vörnina og renndi á Marcos Alonso en hann þurfti að setja boltann á hægri fótinn og skaut beint á De Gea í opnu færi. Í hasarnum á eftir skaut Bakayoko í hendi Young, aftur kallaði Oliver eftir sjónvarpsdómi og sleppti Young, réttilega en maður hefur séð víti á svona.

Embed from Getty Images

Í næstu sókn fékk Rashford frábært tækifæri, Jesse stakk inná hann en skot Rashford fór í öxl úthlaupandi Courtois. Þetta var það síðasta sem þeir gerðu í leiknum því skiptingin kom strax á eftir, Rashford og Lingard útaf fyrir Lukaku og Martial. Martial var varla kominn inná þegar hann átti skot í varnarmann sem Courtois hirti. Ef eitthvað var varð þó Chelsea betra eftir þessar skiptingar United og skyndisóknir þeirra voru að skapa hættu á vallarhelmingi United, ef ekki alveg uppi við markið.

Loksins kom svo opið færi hjá United en Paul Pogba skallaði framhjá. Hann var óvaldaður á miðjum teignum eftir horn, skelfilega illa farið þar með gott færi. Þegar fimm mínútur voru eftir kom Juan Mata inná fyrir Phil Jones, síðasta tilraun José Mourinho til að breyta einhverju. Það gerðist ekkert við það, Chelsea skellti Morata og Willian inná og voru öllu betri í uppbótartímanum og sigldu sigrinum auðveldlega í höfn.

Þessi leikur endurspeglaði allt það sem verið hefur að hjá Manchester United undir stjórn José Mourinho. Upplagið í leiknum var ekki nærri nógu sókndjarft og þær sóknir sem voru, voru alltof bitlausar. Fyrri hálfleikur var gjörsamlega gagnslaus hjá liðinu, eins og svo oft áður í vetur, og þá spilið snarbatnaði í seinni hálfleik, vantaði fleiri færi, Mourinho sagði eftir leik að Chelsea hefði verið alltof varnarsinnað, sem var rétt, en United var á engan hátt stillt upp þannig að þeir gætu unnið á þeirri taktík, sem var satt best að segja frekar fyrirsjáanleg. Marcus Rashford var notaður á rangan hátt, Alexis Sánchez sást ekki í seinni hálfleik, Pogba áti spretti en vr alltof slakur þess á milli. Það er galið að árið 2018 séum við að treysta á þessa vörn frá Fergie tímanum og að sjá Ashley Young vera manninn sem átti að gefa fyrir er nóg til að kalla fram heilablóðfall í hraustasta fólki.  Anthony Martial ætti að vera að berjast fyrir framtíð sinni hjá United, en innkoma hans í dag vr hroðalega slök, nær allar ákvarðanir hans með boltann voru út i hött. Ég get ekki grátið brottför hans ef þetta er spilið sem hann ætlar að sýna næsta vetur. Að öllu því sögðu var það seamt Eden Hazard sem var stærsti munurinn á liðunum, maður sem var með meiri tækni, leikni og kraft en nokkur í United, leikmaður sem sýndi það sem United á að krefjast þess að Alexis Sánchez sýni.

Embed from Getty Images

Ný tekur við versti tími ársins, hann byrjar á því að við veltum okkur upp úr því sem úrskeiðis hefur farið (uppgjörshlaðvarp verður vonandi tekið upp á morgun) og síðan verða allir og amma þeirra orðuð við United næstu vikur.

En ég hef sagt það áður, mun segja það aftur í uppgjörinu og segi það núna: Það er ekki hægt að reka José.

Ef þið getið bent mér á stjóra sem er treystandi til að skila titlum OG spila skemmtilegan fótbolta OG kunna að kaupa dýrustu leikmenn í heimi OG láta þá síðarnefndu passa inn í liðið þá væri ég til í persónulega að sparka Mourinho útaf Carrington í kvöld.

En eins og staðan er í dag þá er enginn slíkur á lausu. Og það er svolítið sárt.