Rauðu djöflarnir

Enska úrvalsdeildin

Manchester United 2:0 Swansea

skrifaði þann | 6 ummæli

Páskarnir. Engin upphitun og síðbúin leikskýrsla en það verður að hafa það, leikurinn vannst allavega.

José Mourinho hefur farið mikinn í fjölmiðlum undanfarið, svo mikinn í raun að allir hættu að tala um frammistöðu leikmanna Manchester United í nokkrar vikur en í dag snerum við okkur aftur að fótboltanum, loksins.

1
de Gea
18
Young
2
Lindelöf
12
Smalling
25
Valencia
6
Pogba
31
Matic
7
Sánchez
14
Lingard
8
Mata
9
Lukaku

Varamenn: Bailly, Martial, Rashford, Herrera, Shaw, McTominay, Castro Pereira.

Leikurinn

Fyrri hálfleikurinn var einn sá skemmtilegasti á tímabilinu, okkar menn léku á als oddi og biðin eftir fyrsta markinu taldi einar fimm mínútur. Alexis Sánchez kom þá boltanum á stóra manninn, Romelu Lukaku, sem skoraði sitt 100. mark í ensku úrvalsdeildinni, einn sá yngsti til að afreka það.

Forystan var svo tvöfölduð á 20. mínútu þegar Sílemaðurinn sjálfur þrumaði boltanum í nærhornið frá vítateigslínunni eftir sendingu frá Jesse Lingard. Gott dagsverk frá Sánchez í dag, eitt það besta frá honum í United treyju.

Það virtist alltaf stutt í þriðja markið og var þá helst Lingard að daðra við það í fyrri hálfleik en allt kom fyrir ekki. United menn réðu lögum og lofum í fyrri hálfleik og var viðstöddum á Old Trafford vel skemmt en gestirnir frá Swansea stóðu okkar mönnum á sporði eftir hléið.

Juan Mata var ekki langt frá frábæru marki þegar hann lét vaða, viðstöðulaust eftir vipp-sendingu Paul Pogba en honum brást bogalistin og boltinn þaut yfir markið. Á hinum enda vallarins hafði David de Gea svo betur gegn Tammy Abraham en sá síðarnefndi fékk tvær álitlegar tilraunir til að skora með skömmu millibili.

Það tókst ekki að fylgja eftir frábærum síðari hálfleik en kannski ekki við öðru að búast eftir landsleikjahlé. Stigin urðu allavega þrjú og er það fyrir öllu.

Punktar eftir leik

Lukaku í 100 marka klúbbinn. Muniði þegar stuðningsmenn United voru síkvartandi yfir Belganum? Það vill enginn kannast við það í dag enda kappinn að ríða baggamuninn hjá liðinu þegar á reynir. Lukaku er nú einn 28 sem hafa skorað 100 í úrvalsdeildinni, sá fyrsti frá Belgíu og sá fimmti yngsti.

Alexis Sánchez að vakna til lífsins? Sílemaðurinn hefur farið rólega af stað en hann sýndi, í rispum, hvers hann er megnugur í dag. Hann lagði upp fyrsta mark leiksins og skoraði það næsta og fer vonandi að finna sitt allra besta form á næstu vikum.

Að duga eða drepast. Næsti leikur er nágrannaheimsókn á Etihad og nokkurs konar „lose, lose“ viðureign. Ef við vinnum þá frestum við hinu óumflýjanlega og ef við töpum þá tryggja hinir háværu Englandsmeistaratitilinn fyrir framan nefið á okkur. Það væri þó skömminni skárra að slá þeim fögnuði á frest.

Djöflavarpið

Djöflavarpið 50.þáttur – Er José Mourinho algjörlega búinn að missa það?

skrifaði þann | 11 ummæli

Maggi, Tryggvi, Björn og Halldór settust niður  og fórum yfir leikina frá sigrinum á Chelsea. Einnig voru mál þeirra Luke Shaw og Alexis Sánchez tekin fyrir. José Mourinho hefur verið mikið á milli  tannanna hjá aðdáendum United og létum við spurningarnar ykkar ráða ferðinni þegar hann var  ræddur.

PS: Þessi þáttur var tekinn upp mínútum áður en fréttir bárust af stofnun atvinnukvennaliði Manchester United og það verður klárlega tekið fyrir í næsta þætti.

Hægt er að hlusta á þáttinn í spilaranum hér fyrir ofan auk þess sem hægt er að hala honum niður í gegnum spilarann eða hér að neðan. Jafnframt má gerast áskrifandi að þættinum í gegnum ýmis podkast-forrit:

Gerast áskrifandi í iTunes
Gerast áskrifandi í öðrum forritum

MP3 niðurhal: 50. þáttur

Enska bikarkeppnin

Manchester United 2:0 Brighton and Hove Albion

skrifaði þann | 35 ummæli

Eftir tapið gegn Sevilla í vikunni þá fengu leikmenn United kjörið tækifæri til að vinna stuðningsmenn liðsins aftur á sitt band þegar liðið mætti Brighton í 8-liða úrslitum FA bikarsins á Old Trafford í kvöld.

Leikurinn

Það var ljóst strax frá fyrstu mínútu að stuðningsmenn liðsins voru tilbúnir í slaginn en það var töluvert betri stemmning á Old Trafford í upphafi leiks heldur en gegn Sevilla í vikunni. Leikurinn var hins vegar frekar rólegur í byrjun og þeir sem höfðu reiknað með að United myndi keyra yfir Brighton í upphafi hafa eflaust orðið fyrir vonbrigðum. Það kom á óvart að Glenn Murray, markahæsti leikmaður Brighton, byrjaði leikinn á bekknum en það var snemma ljóst að leikmenn Brighton yrðu sáttir ef leikurinn færi í vítaspyrnukeppni.

United gekk illa að skapa sér færi í upphafi leiks en það var nánast jólalegt um að litast á Old Trafford í kvöld. Hvít slikja af snjó yfir vellinum og einstaka snjókorn að falla til jarðar. Það var hins vegar lítið jólalegt við spilamennsku heimamanna framan af leik en þeim gekk illa að finna glufur á þéttri vörn gestanna.

Eftir rúmlega 20 mínútna leik lifnaði yfir leiknum en það var eins og leikmenn Brighton finndu lykt af blóði og fóru þeir að ógna marki United eftir að hafa legið í skotgröfunum fyrstu mínútur leiksins.

Það var loks eftir hálftíma leik sem United átti almennilega sókn en Juan Mata og Anthony Martial áttu 2-3 þríhyrninga upp við teig Brighton sem endaði með því að Mata átti skot sem varnarmaður Brighton henti sér fyrir og niðurstaðan varð hornspyrna. Upp úr hornspyrnunni, sem Mata tók, þá hrökk knötturinn til Chris Smalling sem átti gott skot með vinstri fæti en Tim Krul varði vel í marki Brighton – dómari leiksins dæmdi hins vegar markspyrnu. Örskömmu síðar hefðu Brighton hins vegar geta tekið forystuna en þeir fengu hornspyrnu sem fór beint á kollinn á Lewis Dunk sem skallaði að marki en Sergio Romero varði vel.

Embed from Getty Images

Á 36. mínútu braut United ísinn. Luke Shaw átti góðan sprett upp vinstri vænginn, hann lagði knöttinn svo til baka á Nemanja Matic sem plantaði knettinum fullkomlega á pönnuna á Romelu Lukaku sem var fullkomlega staðsettur á fjærstönginni. Staðan orðin 1-0 og Lukaku nú búinn að skora í öllum leikjum United í FA-bikarnum í ár. Jafnframt var
þetta sjöunda markið hans í síðustu 10 leikjum (ásamt tveimur stoðsendingum). Fátt markvert gerðist eftir markið í fyrri hálfleik og staðan 1-0 þegar flautað var til hálfleiks.

Ashley Young kom inn fyrir Luke Shaw í hálfleik en óvíst er hvort Shaw hafi meiðst eða hvort José Mourinho hafi einfaldlega verið ósáttur með frammistöðu hans í kvöld.

Það er ljóst að Kevin Palmer, blaðamaður Sunday World, telur að Mourinho sé einfaldlega að reyna kenna Shaw lexíu.

Brighton mættu út í síðari hálfleik til að spila og settu þeir mikla pressu á United á fyrstu mínútunum. Það var ljóst að þeir ætluðu ekki að sitja í skotgröfunum fram á 80. mínútu og reyna þá að stela jöfnunarmarki. Gestirnir voru með öll völd á vellinum og eftir 10 mínútur var Romero tvisvar búinn að verja vel. Á þessum tíma lá jöfnunarmark gestanna hreinlega í loftinu og virtust leikmenn ekki hafa vilja eða þol í að gera eitthvað í málunum. Ef ekki hefði verið yfir tæklingar á ögurstundu frá Matic, Bailly og Smalling þá hefðu Brighton eflaust jafnað leikinn.

Á 72. mínútu gerði Mourinho aðra skiptingu sína í leiknum en þá kom Marcus Rashford inn á fyrir Juan Mata en þetta er í 24 skiptið sem Mata er tekinn útaf í þeim 29 leikjum sem hann byrjar fyrir United í vetur. Þegar 82 mínútur voru komnar á klukkuna þá höfðu leikmenn United ekki átt skot að marki í síðari hálfleik og því taldi undirritaður að
hann gæti stokkið á klósettið án þess að missa af miklu. Að sjálfsögðu skoruðu United sitt annað mark í leiknum en það gerði Nemanja Matic með frábærum skalla eftir sendingu Ashley Young. Aftur var það fjærstöngin sem skilaði marki.

Embed from Getty Images

Á 88. mínútu gerði Mourinho svo sína síðustu skiptingu en Marouane Fellaini kom inn á fyrir Jesse Lingard. Eftir það fjaraði leikurinn út og United þar með komið áfram í undanúrslit FA bikarsins þar sem Tottenham Hotspur bíða ásamt Chelsea eða Leicester og Wigan eða Southampton.

Maður leiksins er að sjálfsögðu Nemanja Matic eftir mark og stoðsendingu. Sergio Romero kemur þar á eftir en hann á enn eftir að fá á sig mark í FA bikarnum á leiktíðinni.

Punktar eftir leik

Skortur á náttúrulegri breidd  hamlar United oft sóknarlega þar sem lið pakka bara í teig því þau vita að allir vængmenn United leita inn á við. Verður
enn einhæfara þegar Ashley Young er í vinstri bakverði því hann fer sjaldan upp að endalínu. Finnst þetta há United þessa dagana en lið vita að ef þau fylla teiginn af mönnum þá á United erfitt með að brjóta þau niður þar sem þeir leita alltaf inn á við. Svo verður að viðurkennast að þegar United gefur fyrir þá eru fyrirgjafirnar frekar mikið prump. Hornspyrnur United í kvöld gott dæmi um það.

Það er ennþá þessi tilfinning að United geti fengið mark á sig hvenær sem er. Maður fann þetta sérstaklega hjá Louis Van Gaal þegar liðið var með knöttinn ca. 70% af leikjum sínum en svo fengu mótherjarnir eitt færi og skoruðu. Sú tilfinning er ekki farin þó svo að tölfræði United segi annað í vetur.

Sama hvað menn vilja segja um Romelu Lukaku og feril hans hjá United hingað til þá verður að segjast að drengurinn er að spila frábærlega þessa dagana. Hann er ekki fullkominn en hann er eina stöðuga ógn United sóknarlega. Aðrir leikmenn virðast taka rispur hér og þar og svo einfaldlega hverfa en Jesse Lingard er engan veginn að finna sig eins og hann gerði í desember.

Það er erfitt að segja hvort blaðamannafundur Mourinho í gær hafi haft tilætluð áhrif á leikmenn í dag en maður bjóst við aðeins meiri eldmóð og greddu í liðinu eftir tapið gegn Sevilla. Þá sérstaklega hjá sóknarmönnum liðsins en flestir þeirra voru hálf bitlausir í dag.

Eftir nokkrar slakar frammistöður þar sem Mourinho sagði meðal annars að hann væri að spila meiddur þá hefur Nemanja Matic verið mjög góður undanfarið. Sérstaklega í ljósi þess að hann spilar ALLA leiki.

Pistlar

Er José að missa það?

skrifaði þann | 15 ummæli

Það er leikur í kvöld og upphitunin er hér, en umræðan snúst núna alfarið um José Mourinho.

Embed from Getty Images

Eftir leikinn á þriðjudaginn á José að hafa komið inn í klefa þar sem sumir leikmenn voru hreinlega grátandi og sagðist ætla að taka á sig tapið: „When we win, we all win, when we lose, I lose alone“. Þetta kann að einhverju leyti skýra frammistöðu hans á blaðamannafundinum eftir leikinn þar sem hann talaði meðal annars um þau tvö skipti sem hann sem stjóri hafði slegið út United í meisteradeildinni, nokkuð sem þótti frekar dónalegt og ekki sæmandi manni sem núna væri stjóri United og ætti að koma þeim áfram. En eitt var víst, eftir leikinn var fókusinn fyrst og fremst á Mourinho, en ekki leikmönnum. Rætt var um að Mourinho hefði lagt upp með allt of varnarsinnað taktík, nokkuð sem er ljóst, en lítið talað um að leikmenn hefðu ekki staðið sig vel, þó sumir, eins og Lukaku segðu beint og óbeint að svo hefði verið raunin.

https://twitter.com/UtdClips/status/974665435051380736

Mourinho bætti um betur í gær á blaðamannamannafundi fyrir leikinn í kvöld gegn Brighton og tók undirbúna ræðu og ræddi um arfleifðina sem United státaði sig af. Hann var með undirbúinn miða þar sem listuð voru öll þau skipti þegar United hefur fallið úr meistaradeildinni á undanförnum árum, sem er jú alltaf, eða þá að United hefur ekki verið í meistaradeildinni tvö af síðustu fjórum árum. Hann benti á að síðustu fjögur árin hefði United endað í sjöunda, fjórða, fimmta og sjötta sæti og sagði að þetta væri arfleifðin sem hann hefði tekið við. Reyndar var þetta sjötta sæti undir hans stjórn en hann var ekkert að ræða það! Hann bar það saman við að versta staða City síðustu sjö árin var fjórða sæti og var þar augljóslega að vísa í hversu betra búi Pep Guardiola hefði tekið við.

En hann sagði líka

 I am exactly on the same page as the owners, as Mr. Woodward, Mr. Arnold, we are on exactly the same page, we agree on everything, on the investments, that we have what we have, the investments that we are going to do will be season after season. We are exactly on the same page, so life is good.

Fréttamannafundurinn var eins og alltaf í tveimur hlutum, sá fyrri var opinber strax, en síðari hlutinn var fyrir prentblöðin, og ekki mátt birta efni hans fyrr en seint í gær.

Þar hélt hann áfram að tala um að liðið væri hreinlega ekki nógu gott. Hann benti á að hann hefði að sjálfsögðu ekki getað sagt að liðið væri engan veginn nógu gott til að vinna meistaradeildina áður en liðið væri dottið út, en sagði svo að sú væri auðvitað raunin, liðið væri ekki nógu gott. Hann spurði síðan fréttamenn hvort það væri munur að detta út í 16 liða úrslitum eða fjórðungsúrslitum, og vildi þar með meina að það væri lítill sem enginn munur þegar kæmi að framförum og staðhæfði að „margir“ leikmenn Sevilla myndu eiga sæti í liði hans. Þegar horft er á leikmannahóp Sevilla leyfi ég mér samt að efast um það. Og ef svo er í raun, þá ætti að draga upp veskið

Það var ýmislegt fleira sem hann sagði og fjallað er um fyrri hluta fundarins hér og seinni hlutann hér.

Embed from Getty Images

Það er alveg óhætt að segja að United stuðningsfólk sé ekki sammála um hvað sé í gangi. Er José að missa það, er hann orðinn stjórnlaus eða er þetta útspekulerað útspil til að taka pressuna af leikmönnum? Ef það var það sem hann gerði á þriðjudaginn, þá er það ekki raunin nú, hann sagði að leikmenn væru hreinlega ekki nógu góður. Pressan á þá til að sýna hvað þeir geta hefur aukist margfalt, og ég segi að það sé gott. Eitt af því sem mörgum hefur fundist undanfarið er að leikmenn séu hreinlega ekki nógu grimmir og gráðugir í leikjum. Er það vegna þess að þeir hafa misst áhugann á að spila fyrir Mourinho? Mourinho nefndi einungis tvö nöfn af þeim sem hann hefur keypt sem hafa staðið sig virkilega vel, Lukaku og Matić. Hvort tveggja fyrrum leikmenn hans. Hvernig bregðast Pogba og Alexis við? Pogba hefur ekki verið að sýna hvað hann getur upp á síðkastið og raddir á samfélagsmiðlum jafnvel frá skynsamari einstaklingum hafa heyrst um að það mætti íhuga að skipta á honum og einhverjum öðrum.

Hvað Alexis Sánches varðar þá eru gömul í hettunni farin að rifja upp kaup á miðju tímabili sem hafa sett góð lið úr skorðum. Fræg dæmi úr sögunni eru kaup Newcastle á Faustino Asprilla í febrúar 1996 og þegar QPR keypti Rodney Marsh vorið 1972 [footnote]Já, ég sagði gömul í hettunni![/footnote]. Það er alveg rétt sem Mourinho sagði í síðustu viku að við dæmum Sánchez næsta vetur en ef hann er ekki standa sig núna, þá verður hreinlega að fórna honum úr liðinu, það gengur ekki að hann sé fastamaður ef liðið er að spila ver fyrir vikið.

Embed from Getty Images

Mourinho fór hörðum orðum um þá arfleifð sem honum var fengin í hendur og það er alveg ljóst að hún var ekki góð. En það verður að benda á að hann hefur fengið mikið af peningum í hendurnar og það er ekki ljóst hvort innkaupin hafi öll verið góð. Ibrahimović hefur auðvitað ekkert spilaðá þessu tímabili og Eric Bailly aðeins 10 leiki í deild af 30 (og aðeins 25 í deild í fyrra) og hefði ef hann hefði verið ómeiddur verið fastamaður og a.m.k. verið maðurinn sem bjargaði okkur frá ða horfa endalaust upp á fjögurra manna vörn sem var öll frá tíma Sir Alex. Mkhitaryan var sparkað eftir að hafa verið nær gagnslaus í vetur, þó sum skelli skuldinni þar á Mourinho.

Er það alltaf sök þjálfarans ef kaupin ganga ekki upp? Eins og staðan var þegar hann tók við þá þurfti því sem næst nýtt lið til að keppa á toppi deildarinnar og ég held að öllum kaupum hans hafi verið fagnað, utan Victor Lindelöf sem er jú veðmál á framtíðina.

En að baki allri umræðunni um fréttamannafundinn í gær, og frammistöðuna á þriðjudaginn þá liggur stærsta umkvörtunarefnið sem stuðningsfólk hefur í dag: Lið Manchester United undir stjórn José Mourinho spilar leiðinlegan fótbolta. Það er óumdeilt. Spurningin er eingöngu: Er það ásættanlegt sem hluti af framförum sem gætu átt sér stað ef Mourinho heldur áfram með liðið eða er það óumflýjanlegur hluti af stjórnun hans.

Embed from Getty Images

Mourinho hefur skilað betri árangri en Moyes og Van Gaal, og heldur því vonandi áfram með bikar og öðru sæti. Er það nóg til að deyfa leiðindin? Van Gaal spilaði leiðinlegan bolta og endaði í sjötta sæti og bikarinn gat ekki bjargað honum. Það er það sem við vitum. Það sem við vitum líka er að ef Mourinho skilar fyrrnefndu öðru sæti, nú eða bara meistaradeildarsæti, þá er næt útilokað að hann veðri rekinn, að ekki sé talað um ef bikarinn vinnst. Brottrekstur verður ekki með kosningu á Twitter, hann er í höndum eigandanna og Ed Woodward og það bendir allt til að þeir séu ánægðir.

Embed from Getty Images

Að auki er allt tal um brottrekstur vitagagnslaust ef ekki er stjóri til staðar að taka við. Eins og staðan er í dag þá eru líklega oftast nefndir Mauricio Pochettino, Carlo Ancelotti og Luis Enrique. Pochettino spilar fallegan fótbolta og fær lítin pening úr að moða, en hefur ekki skilað titlum.  Reyndar hjá Tottenham sem eru jú ekki vanir því, en það er vissulega tekin áhætta hjá hverju því liði sem ræður hann. Ef United fær Pochettino sem þjálfara má lofa að minnsta kosti einu ef ekki tveimur tímabilum í að byggja upp liðið og láta að það spila að hans höfði. Hann gæti þó ef allt fer vel orðið langtímaþjálfari. Það er hins vegar ekki hægt að segja um Ancelotti. Ráðning á honum væri aldrei nema til 1-2 ára. Til að bíða eftir Pochettino? Kannske. Að lokum Luis Enrique sem hefur vægast sagt þunna ferilsskrá sem þjálfari, eitt ár hjá Roma, eitt hjá Celta og síðan þrjú ár hjá Barcelona þar sem hann vann þrennu fyrsta árið með besta lið í heimi, síðan tvöfalt og loks ekkert og var látinn hætta.

Enginn þessara þjálfara er með þann þunga á bakvið sig að hægt sé án efa að segja: Ef við rekum José Mourinho og fáum þennan þjálfara mun hann skila árangri og skemmtilegri knattspyrnu.

Á meðan svo er, og á meðan árangurinn er ásættanlegur þá heldur José Mourinho starfinu og það er held ég óhætt að segja að hann viti það. Hvað raunverulega liggur að baki þessari uppákomu hans í gær, er erfiðara að negla niður. En það er orðið alveg óhætt að segja að allt tal um tvö kaup í sumar sé úrelt. Mourinho hlýtur að vilja að styrkja liðið enn meira og nú verður það að vera vörnin og miðjan sem allt kapp er lagt á. Ég hef enn trú á því að með sterka vörn og De Gea í markinu [footnote]De Gea er að bjarga markatölunni okkar, fær á sig mun færri mörk en færin gefa til kynna eins og xG, expected goals tölfræðin mælir[/footnote] þá verði leikur liðsins frjálsari og er tilbúinn í að gefa Mourinho sumarið og langt fram á næsta vetur. Óformleg skoðanakönnun hér á ritstjórninni sýndi að ritstjórar voru á sama máli en þolinmæðin væri engan vegin óþrjótandi. Það er hins vegar vitað að stuðningsfólk er fjarri því allt sammála þessu!.

Embed from Getty Images

En stærsta vandamálið sem Sir Alex Ferguson skildi eftir sig er að það vantar styrkari stefnu. Flest lið eru nú komin með „Director of Football“, yfirstjóra knattspyrnumála, sem ráðinn er til lengri tíma og heldur sínu striki hvað sem líður framkvæmdastjórunum. Slík staða hefur lykiláhrif á leikmannakaup og sér til þess að stefna klúbbsins sé skýr. Hjá City var vinur Pep, Txiki Begiristain búinn að sinna því verki síðan 2012 (og það þarf enginn að segja mér að Pep hafi ekki vitað af og stimplað öll kaup amk síðustu tvö árin áður en hann tók við). Hjá United er Ed Woodward í raun í þessari stöðu og ef það er eitthvað sem síðustu fimm ár hafa sagt okkur þá er það að hann er alltof gjarn á að glepjast af stóru nöfnunum þegar kemur að leikmannakaupum frekar en að horfa á heildina. Við sjáum til hvernig kaupin verða í sumar, en ég segi fyrir mitt leyti að ég sé enga ástæðu til að spreða í eitthver stórt sóknarnafn.

En það kemur í ljós í sumar og leikmannaslúður hefur farið í aftursætið, núna snýst þetta um José (og leikinn í kvöld).

Enska bikarkeppnin

Allt undir gegn Brighton annað kvöld

skrifaði þann | 2 ummæli

Klukkan 19:45 annað kvöld kemur Brighton & Hove Albion í heimsókn á Old Trafford í því sem er líklega mikilvægasti leikur okkar manna á tímabilinu miðað við hvernig það hefur þróast en eins og staðan er í dag er FA-bikarinn eini raunhæfi möguleiki Manchester United á titli.

Eftir tvær hörmulegar frammistöður gegn Sevilla er ljóst að United kemst ekki lengra í Meistaradeild Evrópu en Sevilla var einmitt dregið gegn Bayern Munich í 8-liða úrslitum keppninnar nú rétt í þessu. Okkar menn fá hins vegar tækifæri til að sýna úr hverju þeir eru gerðir gegn Brighton annað kvöld en ritstjórn mun fara betur yfir stöðuna á liðinu eftir að hún sér hvernig þeir bregðast við eftir tapið í Meistaradeildinni. Leikmenn liðsins hafa beðist afsökunar á samfélagsmiðlum og annað kvöld fá þeir tækifæri til þess að gera það á vellinum.

 

Brighton & Hove Albion

Segja má að Brighton sem knattspyrnulið sé nákvæmlega eins og Chris Hughton stjóri þess. Þeir sigla nokkuð þægilega undir radarnum en eru töluvert betri en flestir vilja viðurkenna. Liðið situr í 11. sæti ensku úrvalsdeildarinnar með 34 stig þegar 30 leikir eru búnir og eru svo gott sem búnir að tryggja sæti sitt fyrir næstu leiktíð.

Embed from Getty Images

Liðið er sett saman af mjög fínum en samt sem áður frekar ódýrum leikmönnum og má segja að Hughton sé að ná því allra besta út úr liðinu í ár. Til að mynda er hinn 34 ára gamli framherji Glenn Murray kominn með 11 mörk í deildinni. Þá fékk liðið Pascal Gross frá Ingolstadt fyrir tímabilið og hefur hann skorað fimm mörk og lagt upp átta en alls hefur hann skapað 64 færi fyrir samherja sína í vetur. Þeir tveir verða eflaust á sínum stað í byrjunarliði Brighton sem spilar nokkuð hefðbundið 4-4-1-1 leikkerfi.

Liðið tapaði síðasta leik sínum 2-0 gegn Everton þar sem vængmaðurinn Anthony Knockaert fékk rautt spjald og verður því í banni á morgun. Þar áður höfðu þeir unnið frábæra sigra gegn Arsenal, 2-1 eftir að hafa komist 2-0 yfir, og svo 4-1 gegn Swansea City sem hafa átt góðu gengi að fagna undanfarið. Í bikarnum hafa þeir svo slegið út; Coventry City (3-1), Middlesbrough (1-0) og Crystal Palace (2-1).

Brighton hefur mætt Manchester United fjórum sinnum í enska bikarnum og alltaf hefur United farið með sigur af hólmi. Það er þó komið töluvert síðan að liðin mættust síðast en við reiknum þó með því að úrslitin verði þau sömu.

Okkar menn

Það þarf nú ekki að eyða mörgum orðum í okkar lið þar sem það er til umræðu meira og minna alla daga, sama hvort leikir vinnast eða tapast. Það er ljóst að eftir leik vikunnar þurfa leikmenn að stíga upp og sýna stuðningsmönnum að þeim sé hreinlega ekki sama. Að sama skapi þarf José Mourinho að gefa mönnum ákveðið sóknarleyfi og mig grunar að hann geri það í þessum leik. Ég býst við sóknarsinnuðu liði og vona að stuðningsmenn á Old Trafford styðji við bakið á þeim leikmönnum en stemmningin í leiknum gegn Sevilla var til skammar.

José Mourinho fór mikinn á blaðamannafundi fyrir leikinn og hélt stutta 12 mínútna ræðu varðandi gengi liðsins á undanförnum árum – þá sérstaklega í Evrópu.

 

En að leiknum

Leið okkar í 8-liða úrslit FA bikarsins hefur ekki beint verið sú erfiðasta en liðið hefur lagt Derby County, Yeovil Town og Huddersfield Town. Það tók liðið langan tíma að brjóta varnarmúr Derby niður en á endanum vann liðið 2-0 sigur þökk sé mörkum Jesse Lingard og Romelu Lukaku. Þeir félagar voru svo aftur á ferðinni í 4-0 sigrinum gegn Yeovil en Marcus Rashford og Ander Herrera voru einnig meðal markaskorara í þeim leik. Gegn Huddersfield skoraði svo Lukaku bæði mörk liðsins í 2-0 sigri og má því fastlega reikna með honum í byrjunarliðinu á morgun.

Embed from Getty Images

Leikur morgundagsins er ekki fyrsti leikur Brighton á Old Trafford í vetur en liðið tapaði 1-0 fyrir okkar mönnum í einstaklega bragðdaufum leik þökk sé marki Ashley Young sem er þó skráð sem sjálfsmark. Ég býst við meiru af liðinu á morgun og verð að viðurkenna að ég reikna ekki með Ashley Young í byrjunarliðinu, sömu sögu má segja um nokkra leikmenn sem byrjuðu leikinn á þriðjudag. Sergio Romero hefur spilað alla FA leikina hingað til án þess að fá á sig mark og heldur því áfram. Þá reikna ég með því að Luke Shaw komi inn í byrjunarliðið á kostnað Ashley Young og að Alexis Sanchez verði á bekknum.

Ég spái 3-0 sigri okkar manna og reikna með að Lukaku skori nú allavega eitt. Byrjunarliðið verður vonandi eftirfarandi:

20
Romero
23
Shaw
3
Bailly
2
Lindelöf
25
Valencia
31
Matic
39
McTominay
11
Martial
14
Lingard
8
Mata
9
Lukaku