Manchester United er úr leik í Meistaradeild Evrópu. Það er ljóst að allavega Manchester City og Liverpool komast lengra en Manchester United í keppninni í ár, af ensku liðunum. Fyrir tæpum þremur vikum kvörtuðu margir yfir því að markalaust jafntefli á útivelli væru slök úrslit. Öðrum fannst að úrslitin ættu að sleppa en frammistaðan væri áhyggjuefni. Síðan þá komu þrír góðir sigrar í deildinni, þar sem liðið vann m.a. bæði Chelsea og Liverpool með því að vera sterkari aðilinn inni á vellinum.
Það hefði því mátt halda að liðið kæmi með sjálfstraust inn í þennan leik. Það hefði líka mátt halda að liðið myndi sækja töluvert á þetta Sevilla lið, bæði af því United þurfti að vinna leikinn en líka af því Sevilla er ekkert sérstaklega öflugt fótboltalið, ekki fyrir 16-liða úrslit í Meistaradeildinni. En United gerði hvorugt af því og á endanum skilaði öflug skipting Sevilla útisigri og áframhaldandi þátttökurétt í keppninni en United er úr leik. Vonbrigði!
Byrjunarlið Manchester United í kvöld var svona:
Varamenn: Romero, Darmian, Lindelöf, Mata, McTominay, Pogba, Martial.
Byrjunarlið gestanna frá Spáni var svona:
Varamenn: Soria, Pareja, Arana, Geis, Pizarro, Nolito, Yedder.
Leikurinn sjálfur
Manchester United byrjaði leikinn af nokkrum krafti og virtist ætla að ná inn marki strax í upphafi. Átti t.a.m. fjórar marktilraunir á fyrstu 6 mínútum leiksins. Það var jákvætt að sjá en eftir um 10 mínútna leik var leikurinn farinn að minna óþægilega mikið á fyrri leikinn. Hann spilaðist þannig megnið af hálfleiknum að Sevilla hélt boltanum ívið meira og lét vaða nokkurn veginn hvenær sem þeir sáu glitta í markið. Það þýddi að þeir áttu mikið af skottilraunum en flestar hátt yfir eða langt framhjá eða bæði. Eina tilraunin sem hitti á rammann var laflaus bolti sem truflaði De Gea ekki neitt.
Manchester United náði lítið að skapa sér aftur þar til tæplega 10 mínútur voru eftir af hálfleiknum, þá kviknaði aftur smá líf í sóknarleik liðsins. Fellaini náði þá að vinna boltann framarlega á vellinum, tók nettan þríhyrning við Sánchez og var kominn einn í gegn. Hann lét vaða með vinstri, fast skot en í þægilegri hæð fyrir Rico í marki Sevilla sem varði í horn. Lukaku var nokkuð ósáttur við að fá ekki sendingu fyrir þar sem hann var fyrir framan markið en Fellaini hafði varla svigrúm til að senda boltann því Kjær, miðvörður Sevilla, nálgaðist Belgann hratt og lokaði sendingarleiðinni á Lukaku. Skotið hefði þó mátt vera betra, þrátt fyrir að þetta væri með vinstri.
Bæði lið náðu tilraunum til viðbótar sem ýmist lentu í varnarmönnum eða fóru framhjá eða yfir. N’Zonzi ætti skilið einhver bjartsýnisverðlaun fyrir að láta vaða af rúmlega 30 metra færi í lok fyrri hálfleiks. Veit ekki hvernig hann hélt að hann ætlaði að skora framhjá De Gea af þessu færi en boltinn fór langleiðina að efstu sætaröð í stúkunni.
Það hefði vel verið hægt að skilja einhverja skiptingu í hálfleik, til að reyna að hressa upp á spilið og sóknarleikinn, eða bara til að fá meiri ákefð inn í United liðið. Það var ekki alveg hægt að sjá á þeim að þeir væru að spila á þessum merka vettvangi, hvað þá að þeir þyrftu nauðsynlega sigur. Það var frekar eins og liðið væri að reyna að verja stöðuna. Sem er ágætt ef liðið leiðir leikinn.
Það var helst að Lukaku og Rashford væru að reyna. Lukaku gerði oft vel í að halda boltanum þegar vörnin þurfti að hreinsa og vann oft mikla vinnu einn gegn varnarmönnum Sevilla. Rashford átti þó nokkra öfluga spretti upp kantinn, spilaði á þeim hægri í fyrri hálfleik en vinstri í seinni hálfleik.
Mourinho gerði loks skiptingu eftir klukkutíma leik. Pogba inná fyrir Fellaini. Þá hefði maður nú haldið að það myndi koma aukið líf í miðjuspilið. En Pogba virtist óöruggur og hikandi í sínum aðgerðum, ef eitthvað er þá versnaði miðjuspilið við að fá hann inná. Allavega til að byrja með.
Á 71. mínútu gerði hins vegar Sevilla ákaflega afdrifaríka skiptingu, þegar framherjinn Luis Muriel var tekinn af velli og í stað hans kom Frakkinn Ben Yedder inn á. Sá skoraði 6 af 12 mörkum Sevilla í riðlakeppninni, þ.á m. þrjú mörk í 2 leikjum gegn Liverpool. Hann var varla kominn inn á völlinn þegar miðjumenn Sevilla voru farnir að dúndra á hann löngum boltum.
En það var hins vegar eins og varnarmenn Manchester United vissu ekkert hver þessi gaur væri eða hversu hættulegur hann getur verið. Eftir að hafa verið inná vellinum í tvær mínútur var hann búinn að skora. Banega fann Sarabia, Sarabia leitaði strax að Ben Yedder og fann með einfaldri sendingu. Ben Yedder var gegn Eric Bailly í jaðri vítateigsins, náði með einni snertingu að búa sér til smá pláss og plantaði svo þéttingsföstu skoti neðst í hægra hornið á markinu, óverjandi fyrir De Gea. Einfalt mark, vel gert hjá Sevilla.
Þarna þurfti United 2 mörk. Mourinho brást við því með tvöfaldri skiptingu, sendi þá Martial og Mata inn á fyrir Lingard og Valencia. Þarna átti að reyna eitthvað svipað og gegn Crystal Palace um daginn. En þeir voru ekki búnir að vera inná vellinum nema mínútu þegar Ben Yedder hafði bætt við öðru marki. Hornspyrna sem Sevilla fékk, einfalt flikk áfram og Ben Yedder mættur á fjærstöngina eins og alvöru framherja sæmir. Hann náði skallanum, De Gea var í boltanum en náði ekki að halda honum úti. 0-2. Hrikalegt!
Þá fyrst, eftir allt þetta, byrjaði Manchester United að reyna að sækja eitthvað að ráði. Það var bara of lítið og of seint. Ef eitthvað er þá fékk Sevilla samt betri færi til að bæta við mörkum. Lukaku náði þó að minnka muninn þegar hann klippti boltann í markið eftir hornspyrnu. Svo var þetta allt næstum því, og rétt hjá, og ekki alveg nógu gott. En samt aðallega alltof seint.
Ben Yedder átti svo að klára þrennuna þegar hann fékk stungusendingu innfyrir. Smalling var þá orðinn sóknarmaður og ansi fáliðað til baka. En De Gea var ekki á því að fá á sig fleiri mörk svo hann varði með löppunum. Leiktíminn rann síðan út og Sevilla komið í 8-liða úrslit. United situr eftir.
Eftir leikinn
Óþolinmæðin er farin að verða ansi mikil. United vann verðskuldaða sigra á Chelsea og Liverpool í deildinni á síðustu dögum en það er samt stutt í afskaplega mikinn pirring. Það sáust fleiri bætast við á Mourinho Out vagninn eftir leik kvöldsins.
Taktíkin gekk ekki upp. Það borgaði sig ekki að fara svona varfærnislega í útileikinn. Það borgaði sig alls ekki að fara varfærnislega í heimaleikinn. Þetta hefði getað sloppið en það hefði væntanlega ekki dugað langt í 8-liða úrslitum ef United hefði fengið lið eins og Real Madrid, Bayern Munchen eða Barcelona.
Alexis Sánchez og Paul Pogba voru daprir í kvöld. Var það endilega stjóranum að kenna? Það hefði allavega verið eðlilegt að líta til þeirra sem leikmanna sem hefðu átt að geta blásið lífi í sóknarleikinn, þegar liðið þurfti nauðsynlega á sigri að halda.
Sevilla er fyrsta liðið fyrir utan Manchester City sem nær að vinna United á Old Trafford eftir að Mourinho tók við félaginu. Sevilla. Af öllum liðum.
Maður leiksins
Maður leiksins er augljóslega Ben Yedder. Hvílík innkoma hjá kappanum! Undirritaður getur ekki annað en dáðst að því hvað hann gerði þetta vel.
En hvað leikmenn Manchester United varðar þá voru þeir flestir ekki nógu góðir í kvöld. Það munaði miklu um að fá Eric Bailly aftur í liðið fyrir Liverpool-leikinn en í kvöld sýndi hann nokkrum sinnum kæruleysishliðarnar sínar, þótt hann hafi heilt yfir átt fínan leik.
Marcus Rashford var einna líflegastur í liði United. Ef eitthvað er hefði liðið mátt spila meira upp á hann og láta hann keyra á vörn Sevilla.
Minn maður leiksins, United-megin, er samt Lukaku. Hann reyndi einna mest, sýndi meiri baráttuanda en flestir aðrir, oft einn gegn mörgum. Hann skoraði líka eina mark United í 180 mínútum gegn Sevilla og virkaði oft eins og eini maðurinn sem vissi af því að United þyrfti að vinna leikinn. Hann er búinn að vera duglegur að bæta ýmsar hliðar á sínum leik þetta tímabilið og á vonandi enn eftir að bæta í.
Mourinho
Eins og áður sagði þá virðist hafa fjölgað töluvert í hópi þeirra United-stuðningsmanna sem vilja sjá Mourinho fara frá United sem fyrst. Þrátt fyrir augljósar framfarir á liðinu frá síðustu tímabilum, sem sjá má á stöðu í deild, stigasöfnun, markaskorun, þátttöku í Meistaradeild o.fl., þá finnst mörgum spilamennska liðsins ekki nógu skemmtileg fyrir félag eins og Manchester United. Og það virðist enn vera töluvert í að Manchester United fari að berjast af alvöru um stærstu titlana tvo.
Það er kannski ekki best að dæma um viðbrögð fólks strax eftir svona slæmt tap. En pirringurinn er að mörgu leyti skiljanlegur, jafnvel fyrir mann sem ekki er kominn á Mourinho Out vagninn ennþá. Þetta er auðvitað allt spurning um hvernig staðan verður á liðinu í lok tímabils. Og vissulega einnig spurning um það hvaða stjórar eru lausir á hverjum tímapunkti.
Næsta skref
Brighton í bikarnum á laugardaginn. Eina keppnin sem Manchester United getur enn unnið. Brighton er sprækt lið. Það verður leikið kl. 19:45, sem er tilvalinn púbbtími.
Og svo er pæling að taka upp podkast annað kvöld. Einhverjar spurningar úr sal?
Eftir 
Lengi vel leit út fyrir að þriðja tap Manchester United á útivelli í röð væri á leiðinni. En ótrúleg endurkoma á lokaparti leiksins náði að bæta upp fyrir virkilega slaka frammistöðu framan af. Manchester United náði því að endurheimta 2. sætið í deildinni og auka muninn í 5. sætið upp í 9 stig.