Rauðu djöflarnir

Enska úrvalsdeildin

Upphitun: Manchester United – Bournemouth

skrifaði þann | Engin ummæli

Embed from Getty Images

Hefð er fyrir að spila þétt í ensku úrvalsdeildinni um jól og áramót, enda fótboltinn lengi helsta afþreying vinnandi fólks í Englandi. Jólatörn Manchester United byrjar á Bournemouth á morgun. Það er hins vegar lítil breyting fyrir lið sem undanfarinn mánuð hefur, eins og oftast, spilað tvo leiki á viku.

Eftir Bournemouth á United leik gegn Úlfunum á öðrum degi jóla og síðan gegn Newcastle þann 30. desember en síðan kemur frí í tæpa viku fyrir heimsókn til Liverpool.

Þegar leikið er þétt skiptir máli að skipta út leikmönnum til að halda þeim ferskum og forðast meiðsli. Ruben Amorim hefur verið óhræddur við það síðan hann tók við liðinu fyrir mánuði og trúlega gert það betur en margir aðrir forverar hans. Út frá því er erfitt að giska á byrjunarliðið, nema að Amad Diallo er orðinn eins og malt og appelsín á jólum – ómissandi.

United hefur séð það svartara í meiðslum. Masoun Mount þurfti þó að fara út af snemma gegn Manchester City fyrir viku og fréttirnar af honum eru ekki góðar, fjarvera í nokkrar vikur. Það gæti opnað pláss í hópnum fyrir Marcus Rashford, sem settur var í skammarkrókinn í síðustu viku. Ef hann verður áfram utan hóps hefur hann trúlega leikið sinn síðasta leik fyrir Manchester United.

Í vörninni eru brestir. Victor Lindelöf fór út af meiddur í hálfleik gegn Tottenham á fimmtudag og Luke Shaw er meiddur. Mathijs de Ligt var veikur í vikunni og Harry Maguire fer í leikbann við næsta gula spjald. Vörnin velur sig því nokkurn vegin sjálf.

United er fyrir leikinn í 13. sæti með 22 stig en Bournemouth í því sjötta með 25 stig. Sigurinn gegn City fyrir viku skilaði United ekki upp um sæti, en færði það nær þéttum pakka því sex stig eru upp í fjórða sætið. Góð jólavertíð gæti því bætt stöðuna í deildinni verulega. Sigur gegn Bournemouth myndi til dæmis senda United upp fyrir liðið af suðurströndinni.

Hjá gestunum er það að frétta að Alex Scott, Julian Araujo, Luis Sinsterra, Marcos Senesi og Marcus Tavernier glíma við meiðsli og verða varla með.

Leikurinn hefst á morgun klukkan 14:00. Leikið er á Old Trafford.

Enska úrvalsdeildin

Tottenham – Manchester: Athyglin er á framtíð Rashfords

skrifaði þann | Engin ummæli

Embed from Getty Images

Manchester United heimsækir Tottenham í fjórðungsúrslitum ensku deildarbikarkeppninnar í kvöld. Bæði lið fögnuðu frábærum en ólíkum sigrum í deildinni á sunnudag. Umræðan hjá United hefur í vikunni þó mest snúist um framtíð Marcus Rashford.

Eftir mánuð í starfi hefur Ruben Amorim ákveðið að taka sinn fyrsta stórslag. Marcus Rashford og Alejandro Garnacho voru báðir settir út úr hópnum gegn Manchester City á sunnudag. Báðir geta státað af mörkum og stoðsendingum á tímabilinu, en ekki endilega liðsframlagi en milli línanna mátti lesa gagnrýni á áhrif þeirra inni í hópnum og frammistöðu á æfingum.

Garnacho var í hópnum sem fór til Lundúna í gær og hefur borið harm sinn, enn sem komið er, í hljóði. En þar var enginn Rashford. Veikindi eru sögð hafa átt sinn þátt í að hann var ekki með gegn City, hann æfði ekki daginn fyrir leik en gerði það hins vegar á leikdegi.

Hvað er að gerast með Marcus Rashford?

En það eru vísbendingar um að vík hafi myndast milli vina. Áreiðanlegir miðlar hafa sagt frá því að United sé tilbúið að selja Rashford strax í janúar. Undanfarin misseri hafa þeir sagt frá því undir rós að ekki væri allt eins og það ætti að vera hjá Rashford. Markaþurrðin í fyrra gaf það líka til kynna.

Opinberu voru fréttirnar af djammi, sem hann var bekkjaður fyrir. En á móti var bent á að leikmenn áður fyrr hefðu gert verri hluti án þess að það væri á allra vörum en gat líka bent til að hann væri uppteknari af öðrum hlutum en brauðstritinu. Í öðrum fréttum var tekið fram að Rashford bæri mjög á sér tapleiki á æfingum. Það má túlka sem metnaðargirni eða að hann væri fúllyndur. Eins kom fram að Rashford hefði oftar en einu sinni skipt um talsmann.

Í það minnsta er á hreinu að Rashford hefur ekkert gert til að réttlæta risasamninginn sem hann fékk sumarið 2023. Þegar leið á síðasta vetur myndaðist sú tilfinning að nýtt félag og umhverfi gæti gert bæði honum og United gott.

Hvaða kosti á Rashford?

Það hefði verið hægt að sópa ýmsu undir teppið eftir síðustu helgi ef Rashford sjálfur hefði ekki drifið sig í viðtal hjá Henry Winter. Winter var áður yfirmaður knattspyrnuskrifa hjá einu stórblaðanna, Daily Telegraph, en lenti í niðurskurði í fyrravor. Hann hefur síðan starfað sjálfstætt. Það endurspeglar furðulega stöðu, jafnvel örvæntingu, að Rashford hafi farið beint í viðtal hjá honum, þar sem hann sagðist vera tilbúinn að skoða ný verkefni. Viðtal sem félagið vissi ekki af fyrr en stuttu áður en það birtist, sem er ekki venjan. Það segir líka beint út að Rashford hafi tekið því virkilega illa að vera settur út úr hóp og hringt strax í umboðsmanninn með skipun um að finna honum nýtt lið.

Það væri ekkert mál ef hann hefði spilað vel undanfarið ár. En það er alls ekki staðan. Evrópsku stórliðin hafa ýmist ekki áhuga eða ekki efni á honum, hvorki laununum eða líklegu kaupverði. Lausnirnar gætu verið Sádi-Arabía eða Bandaríkin, sem væri stórt skref niður fyrir 27 ára gamla enska stjörnu. Til að bæta gráu ofan á svart sagði The Athletic í gær að Sádunum þætti Rashford ekki nógu góður. En það eru til fleiri lið til dæmis Chelsea.

Það virðist því fokið í flest skjól. Í fljótu bragði virðist Rashford ekki eiga leið en bíta í það súra, að reyna að hlýða Amorim og leggja sig fram á vellinum – fái hann á annað borð tækifæri til þess. Hinn kosturinn er að vera áfram í fýlu með mögulega stigvaxandi refsingum, á borð við að vera látinn æfa einn úti í horni. Stuðningsmenn United eru tilbúnir að elska hann sem Manchester-strákinn, en þeir álíta hann ekki stærri en liðið eða nýja þjálfarann eftir frammistöðu síðustu 18 mánaða.

Hvað er að frétta af öðrum?

Í öðrum fréttum þá er Mason Mount meiddur. Hann átti að fara í skoðun í gær til að meta alvarleikann þannig í kvöld gæti verið opinberað hve lengi hann verði frá. Noussair Mazroui meiddist líka gegn City og er tæpur. Luke Shaw er áfram frá.

United vann City á borgarleikvanginum á sunnudag 1-2, með mörkum sem Amad Diallo skóp. Aðrar fréttir vikunnar hafa snúist um miklar framfarir Amads og hvernig Rashford og Garnacho geti tekið hann sér til fyrirmyndar.

Deildarbikarinn hefur oft verið nýttur til að hvíla leikmenn og gefa öðrum tækifæri. Amorim hefur verið duglegur við að hreyfa liðið til þessa og spurningin er hvað hann gerir í kvöld. Þannig hefur Altay Bayindir verið í markinu í báðum deildarbikarleikjunum í haust. En Amorim gæti líka lagt allt í deildarbikarinn í von um titilinn, eins og forverar hans gerðu.

Eftir erfiðar vikur snérist gæfan Tottenham í hag á sunnudag þegar liðið burstaði Southampton 5-0. Það kostaði stjóra Southampton vinnuna. Bakvörðurinn Destiny Udogie meiddist í leiknum og er tæpur. Spurs hefur verið í vandræðum með vörnina því þeir Ben David, Cristian Romero, Micky van de Ven eru meiddir, sem og markvörðurinn Guglielmo Vicario. Sóknarmennirnir Mikey Moore, Wilson Odobert og Richarlson eru líka frá. Yves Bissouma hefur afplánað leikbann en Rodrigo Betancur er í banni.

 

Enska úrvalsdeildinEnska úrvalsdeildin

Upphitun: Er tækifæri gegn City?

skrifaði þann | 1 ummæli

Embed from Getty Images

Manchester United leikur gegn Manchester City á borgarleikvanginum í Manchester á morgun. Hvorugu liðinu hefur gengið vel að undanförnu – sem að minnsta kosti ekki United í óhag. Meiðslalisti City er töluvert lengri en hjá United um þessar mundir.

City er með þriðja lakasta árangurinn í síðustu fimm leikjum í ensku úrvalsdeildinni, hefur tapað þremur, unnið einn og gert eitt jafntefli. Liðið er þar með í hóp með liðum sem almennt er ekki eftirsóknarvert að vera innan um, eins og Southampton, Leicester, Wolves og Tottenham. Árangur United er illskárri, tveir sigrar, tvö töp og jafntefli. Til að bæta gráu ofan á svart er City aðeins með einn sigur í síðustu tíu leikjum.

City stendur þó mun betur í deildinni, er í 5. sæti með 27 stig og myndi með sigri á morgun ná Arsenal, sem er þriðja, að stigum. United er á móti í 13. sæti með 19 stig. Sigur kæmi liðinu ekki nema upp um eitt sæti, það yrðu sætaskipti við Tottenham.

United tapaði með klaufagangi fyrir Nottingham Forest á Old Trafford fyrir viku. Liðið vann síðan Viktoria Plzen í Evrópudeildinni í Tékklandi í vikunni. Þar var engin flugeldasýnin, þótt seinni hálfleikurinn væri virkilega fínn.

Af þeim sem meiddir hafa verið hjá United er það helst að frétta að Johnny Evans hefur verið við æfingar í vikunni. Luke Shaw er meiddur.

Ruben Amorim hefur fiktað með byrjunarliðið í hverjum leik síðan hann tók við í lok nóvember, enda þörf á að halda mönnum ferskum í gegnum mikið leikjaálag því tveir leikir viku eftir viku geta sagt til sín. Rasmus Höjlund gerir trúlega tilkall til byrjunarliðssætis eftir að hafa leikið lykilhlutverk í Tékklandi.

Meiðsli hafa haft sitt að segja um vandamál City. Mestu munar um Rodri, sem er frá út tímabilið. Rico Lewis verður ekki með á morgun og Manuel Akanji, John Stones og Nathan Ake eru allir tæpir svo varnarlínan er brothætt. Ederson og Stefan Ortega hafa skipt með sér markvarðastöðunni í síðustu leikjum. Mateo Kovacic og Phil Foden eru heilir.

Leikurinn hefst klukkan 16:30.

 

Enska úrvalsdeildin

Viktoria Plzen – Manchester United 1-2

skrifaði þann | 6 ummæli

Embed from Getty Images

Hagur Manchester United í Evrópudeildinni er að vænkast eftir tvö sigra í röð. Líkt og gegn Bodö/Glimt fyrir tveimur tók það tíma fyrir United að komast yfir og Rasmus Höjlund sá um mörkin.

Fyrri hálfleikur var færalaus og því ekki vert að eyða fleiri orðum í hann. Strax á þriðju mínútu seinni hálfleiks ákvað André Onana að kveikja í fjörinu með að senda boltann beint í fætur eins Tékkans og sá kom boltanum fyrir á félaga sinn Vydra sem kom Viktoria yfir.

Ruben Amorim hélt áfram tilraunum með liðið, svo sem Johsua Zirksee og Tyrrell Malacia í byrjunarliðið. Það virkaði ekki og eftir tíu mínútur í seini hálfleik fór hann að breyta til baka. Fyrst brást hann við því þegar Marcus Rashford var næstum búinn að fá sitt annað gula spjald fyrir tæklingu og skipti honum út fyrir Höjlund. Fimm mínútum síðar fór Zirksee út fyrir Mount og Anthony kom inn fyrir Malacia en Diego Dalot fór úr hægri kantbakverði í þann vinstri.

Frá þeirri stundu var United miklu betra liðið í leiknum. Jöfnunarmarkið kom strax eftir seinni skiptinganrar, Antony losaði um Diallo hægra megin, skot hans (eða sending) hrökk af varnarmanni og fyrir Höjlund.

United fékk nokkur ágæt færi, tvö þó best. Á 76. mínútu slapp Mason Mount inn fyrir vinstra megin en markvörður Viktoria varði vel. Á 83. mínútu fékk Mount líka gott skotfæri, aðeins þröngt þó og markvörðurinn varði aftur.

Það var eitt færi eftir. Á 88. mínútu var dæmd hendi á sóknarmann heimamanna, sem var að reyna komast fram eftir horn. Bruno sá pláss vinstra megin við Höjlund og sendi boltann þangað. Daninn sýndi styrk og hélt varnarmanninum vel frá sér, tók vel við boltanum, lét hann skoppa nett áður en hann smellti honum á markið.

Hverjir stóðu upp úr?

Bruno átti góðan dag á miðjunni, var maðurinn sem sóknarleikur United fór í gegnum en það var Höjlund sem stal senunni með tveimur mörkum. Innkoma hans gerði United betur kleift að senda boltann fram og halda boltanum þar. Casemiro verðskuldar líka hrós fyrir að hafa unnið öll 10 nágvígin.

Hvað gekk illa?

United fékk engin færi fyrsta klukkutíma og sóknarleikurinn var jafn dauður og á tíma ten Hag. Skiptingarnar breyttu þessu. Annan leikinn í röð gerir Onana byrjendamistök sem kosta United mark.

Eitthvað annað eftirtektarvert?

Fín innkoma Anthony hægra sem hægri kantmaður megin. Það virðist gefast betur fyrir Amorim að vera með örvættan kantbakvörð, þá Dalot, vinstra megin. Amad Diallo var fyrir aftan framherjann lengst af leiknum. United er ósigrað í sex fyrstu Evrópudeildarleikjunum – Viktora fór taplaust inn í leikinn.

Hvað þýða úrslitin?

Kemur betur í ljós síðar í kvöld þegar aðrir leikir klárast. United er hins vegar komið í 12 stig og í það minnsta tímabundið í hóp átta efstu liðanna, sem þýðir að ekki þarf að spila aukaleiki um að komast í 16 liða úrslitin. Í næsta nágrenni er Glasgow Rangers sem United á í næstu umferð. Sá leikur er þó ekki fyrr en 23. janúar. United spilar næst í ensku úrvalsdeildinni á sunnudag, útileik gegn City.