Rauðu djöflarnir

Erik ten Hag heldur áfram að hrista upp í byrjunarliðinu. Núna koma inn Reguilón og Martial en liðið er svona:

Á bekknum eru þeir: Bayindir, Varane, Wan-Bissaka, Evans, Van de Beek, Mainoo, Hojlund, Rashford og Pellistri.

Lið gestanna:

Pendúllinn sveiflast og við erum komin aftur í krísu. Skelfileg frammistaða í dag, United fékk varla færi, átti þrjú skot á mark en vörnin og miðjan gerðu næg mistök sem Bournemouth nýtti. Solanke skoraði á fimmtu mínútu eftir mistök á miðjunni. Phillip Billing bætti við í seinni hálfleik eftir að hafa verið skilinn eftir óvaldaður af Reguilon, rétt á eftir skoraði svo Senesi með skalla eftir horn, hafði skilið sig frá Maguire og í uppbótartíma setti Outtara boltann í netið en hafði slæmt hendi í hann þegar hann fór yfir og framhjá Onana og markið því dæmt af.

Það er ekkert hægt að segja gott um United í þessum leik, mestur fögnuður var þegar Martial var tekinn útaf fyrir Højlund enda hafði fyrrnefndur ekki sést.

Bruno Fernandes rak smiðshöggið á ömurleikann þegar hann nældi í gult spjald fyrir kjaftbrúk og verður í banni í næsta leik sem er auðveldur: Liverpool á Anfield.

Og enn hefur pendúllinn sveiflast. Eftir hrikalegt tap gegn Newcastle á laugardaginn kom besti leikur United á tímabilinu á miðvikudag, öruggur sigur á slöku Chelsea liði þar sem hver leikmaðurinn á fætur öðrum sýndi meira en hingað til.

Á morgun kemur Bournemouth svo í heimsókn á morgun og nú ríður á að fylgja þessu eftir, ekki síst í ljósi þess að næstu tveir leikir þar á eftir er heimsókn Bayern München á þriðjudag og heimsókn á Anfield um aðra helgi.

Það eru fleiri góðar fréttir. Erik ten Hag var valinn stjóri mánaðarins í úrvalsdeildinni, Harry Maguire leikmaður mánaðarins og, þetta kemur ekki síst á óvart, mark Alejandro Garnacho gegn Everton var valið mark ár… afsakið, mánaðarins. Þrenningin stillti sér upp á æfingu

Annars missti Marcus Rashford af æfingunni í dag vegna veikinda og er efasamt hvort hann nær að verða góður fyrir morgundaginn. Rashford hatarar eru vinsamlegast beðin um að halda í sér. Victor Lindelöf meiddist gegn Chelsea og verður ekki með. Raphaël Varane æfði hins vegar og ætti að vera tilbúinn í slaginn. En ég spái nú samt að Luke Shaw fari í haffsentinn og Reguilón taki bakvörðinn. Vissulega slæmt að missa Shaw af kantinum, endurkoma hans hefur verið lykilatriði í betri leik United undanfarið. Óbreytt annars bara, er það ekki?

OptaJoe sá tilefni til að henda þessu út áðan.

🧤 – André Onana's rank among goalkeepers in the Premier League this season (min. 2 starts):

1st – Clean sheets (5)
1st – Save percentage from shots outside box (100%)
2nd – Save percentage (75.7%)
4th – Goals prevented (3.8)

Podium. pic.twitter.com/q5S47bbSyY

— OptaJoe (@OptaJoe) December 8, 2023

Ekki slæmt sérstaklega í ljósi þess að vörnin fyrir framan hann hefur verið allt annað en stabíl og með aðalmönnum.

Bournemouth

AFC Bournemouth þurfti að bíða fram til 28. október til að vinna fyrsta leikinn í deildinni þegar Burnley var lagt að velli , og hafði þá tapað fjórum í röð. En síðan þá hefur lukkan snúist með þeim, sigrar unnist gegn Newcastle, Sheffield United og Crystal Palace, jafntefli kom gegn spútnikliði Aston Villa, og aðeins ferðin á Etihad skilaði 1-6 tapi.

Við sjáum því að Bournemouth á alveg erindi gegn hinum liðunum sem lóna fyrir aftan toppliðin og eru sýnd veiði en ekki gefin. Engin sérstök meiðslavandræði hrjá liðið og framherjarnir þykja ágætlega skæðir. Dominic Solanke er nú þegar búinn að skora sjö mörk í deild, einu fleira en í allan fyrravetur. Aðrir hlutar liðsins hafa ekki alveg sama yfirbragð og vonandi að sókn og miðja United nái nú loksins að halda bolta betur en áður.

Sem sé: Sigur á morgun er bráðnauðsynlegur og það má alveg vona að pendúllinn fari lengra í jákvæða átt. Látum hugsanir um næstu viku eiga sig í bili, gerum hlé á jólaundirbúningi og setjumst við sjónvarpið á eðlilegum knattspyrnutíma, klukkan þrjú á morgun. Dómari verður Peter Bankes

Erik ten Hag ákvað að stilla upp liðinu gegn Chelsea svona:

Á bekknum sáum við þá Bayindir, Evans, Reguilon, Mainoo, Van de Beek, Wan-Bissaka, Pellistri, Martial og Rashford.

 

Lið gestanna:

 

Fyrri hálfleikur

United byrjaði leikinn af smá krafti og kom fyrsta færið þegar Dalot átti fyrirgjöf frá hægri kantinum en Cucurella var réttur maður á réttum stað til að bjarga í horn fyrir gestina. Annað færi leit dagsins ljós stuttu síðar þegar Sanchez átti laka sendingu og United komst í skyndisókn, Antony fékk boltann í vítateignum og reyndi að pota boltanum áfram en þá var stigið á hann.

Dómari leiksins, Chris Kavanagh, fór í skjáinn og dæmdi víti. Bruno Fernandes steig á punktinn og tók hægt aðhlaup og hoppaði í skotinu en Robert Sanchez varði slakt skot hans og McTominay fylgdi á eftir og hamraði boltann yfir markið. Illa farið með gráupplagt færi til að komast yfir snemma í leiknum.

Embed from Getty Images

United virtust staðráðnir í að bæta upp fyrir klúður Bruno og blésu strax til sóknar aftur. Chelsea fékk hins vegar næsta dauðafæri eftir afleita sendingu inn á miðjum vellinum. Jackson komst inn í sendinguna og stakk boltanum á Mudryk en hann var kominn í þröngt færi og Onana lokaði vel og skotið endaði í stönginn og aftur fyrir endamörk.

Garnacho var næstur til að fá dauðafæri en skot hans varið og út frá vörslunni fengu gestirnir skyndisókn þar sem þeir voru komnir fjórir á tvo en síðasta sendingin klikkaði og varnarmaður náði að komast inn í hana og pota boltanum á Onana. Fram og til baka og hátt tempó.

Embed from Getty Images

Liðin skiptust þvi næst á því að skjóta fyrir utan teig sem reyndist ekkert annað en létt skotæfing fyrir markmennina þar til United fékk háan bolta inn í teiginn og Fernandes skallaði boltann fyrir inn í markmannsteiginn þar sem Antony og Hojlund rifust aðeins um boltann en að lokum skaut Antony en boltinn endaði í hornspyrnu. Úr hornspyrnunni kom ekkert en Antony vann boltann út við hornfánann hinu meginn og kom boltanum fyrir teiginn.

Þar tók við darraðardans og Maguire fékk tækifæri og skaut í Cucurella en þaðan barst boltinn til Scott McTominay sem tók boltann á lofti og setti hann í hægra hornið þar sem Hojlund hoppaði undan boltanum sem endaði í netinu. 1-0 forysta sem var vissulega verðskulduð enda United komnir með 11 tilraunir á fyrstu tuttugu mínútunum.

Embed from Getty Images

Chelsea komst í öfluga sókn á 26. mínútu sem endaði með Sterling í teignum á móti Lindelöf og sá enski tók listflug inn í teignum og heimtaði vítaspyrnu en fékk ekkert fyrir sinn snúð og VAR herbergið var sammála dómarnum á vellinum í það skiptið.

Næsta áhugaverða færi kom eftir fyrirgjöf frá Brunpo á vinstri, en hún rataði beint á pönnuna á McTominay en Sanchez varði, boltinn skaust í Skotann aftur og aftur varði Sanchez. Áður en endursýningin var búin komst Chelsea í dauðafæri hin meginn á vellinum og Sterling og Jackson tveir einir gegn Onana, Sterling renndi boltanum til hliðar en Onana gerði sig fimmfaldan í markinu og varði vel frá honum úr færi sem ætti að skora úr í 99 tilraunum af 100.

Embed from Getty Images

United féll aftar á völlinn síðustu mínúturnar í fyrri hálfleik og það kann að bjóða hættunni heim. Chelsea fékk að fikra sig ofar á völlinn. Mudryk fékk boltann milli miðju og vítateig og fann Cole Palmer sem tók vel á móti boltanum, dansaði aðeins fyrir framan D bogann og lagði boltann í fjærhornið framhjá Onana. 1-1 og blaut tuska í andlit heimamanna.

 

Síðari hálfleikur

Gestirnir byrjuðu mun betur og sköpuðu nokkur hálffæri en United hristu sig fljótlega í gang. Báðir stjórar gerðu breytingar í hálfleik. Reguilon kom inn á í stað Lindelöf og Shaw færðist þá í miðvörð. Hinu meginn kom Reece James inn fyrir Cucurella.

Eftir um tíu mínútna leik fékk Garnacho tækifæri til að endurtaka draumamarkið frá því um síðustu helgi en hann hoppaði upp og klippti boltann en yfir markið. Aftur fékk hann skotfæri í næstu sókn en skrúfaði þá boltann rétt framhjá vinklinum. United hélt uppteknum hætti í síðari hálfleik. Að fá fullt af hornspyrnum og setja þær allar á nærstöngina og skapa enga hættu um leið.

Embed from Getty Images

Næst átti Antony skot úr D boganum en það fór af varnarmanni og rétt framhjá. Loksins setti Luke Shaw hornspyrnuna inn í teiginn eftir klukkustundarleik og McTominay reis manna hæst og skallaði á rammann, ekki góður skalli en í grasið og Sanchez fipaðist örlítið en greip boltann í annarri tilraun.

Síðari hálfleikurinn var mun rólegri og var engan veginn líkur þeim fyrri en það var loksins á 69. mínútu að eitthvað markvert gerðist. Þá kom Reguilón upp völlinn og lagði hann til vinstri út á kantinn á Garnacho. Sá stutti setti boltann með fallegum sveig inn að fjærstönginni og þar kom skoska eimreiðin á fullri ferð og stangaði boltann inn af stakri snilld. 2-1 og United aftur komið í skoska forystu.

Embed from Getty Images

Sá skoski var næstum því kominn með þrennu eftir mistök hjá Sanchez strax eftir markið. Spænski markvörðurinn setti þá boltann út beint á Antony sem potaði boltanum á McTominay en skot hans var arfaslakt.

Chelsea blésu til sóknar en United komst í skyndisókn þegar hár bolti barst inn fyrir vörnina og Garnacho gerði vel og komst inn fyrir einn á móti markmanni en varnarmaður gestanna gerði vel og tókst að lauma fætinum fyrir skot hans á lokametrunum.

Aftur var Reguilón á ferðinni þegar hann átti lága fyrirgjöf inn í teiginn sem rataði á Garnacho en táningurinn hitti boltann illa og boltinn fór rétt framhjá stönginni.

Embed from Getty Images

Chelsea fengu ágætis færi þegar lítið var eftir af leiknum. Fyrirgjöf Reece James lak í gegnum allan pakkann yfir á vinstri vænginn þar sem önnur fyrirgjöf kom en enginn gerði heldur árás á þá sendingu. Aftur var James á ferðinni þegar hann sendi boltann inn á markmannsteiginn þar sem Armando Broja var mættur en skalli hans fór beint í stöngina og aftur út.

Chelsea tókst ekki að koma boltanum nær markinu en það og leiknum lauk með 2-1 sigri United. Úrslitin þýða það að United klifrar upp töfluna, í 6. sætið að sinni en Newcastle á inni leik á morgun gegn Everton á Goodison Park. Næsti leikur United er svo  heimaleikur gegn Bournemouth sem virðast vera sækja í sig veðrið í síðustu leikjum og verða ekki auðveldir andstæðingar. Leikurinn er á laugardeginum kl 15.

Embed from Getty Images

Á morgun eigast við Manchester Untied og Chelsea á Old Trafford. Þessi tvö lið hafa lengi vel eldað grátt silfur saman en viðureignir liðanna hafa gjarnan reynst mikilvægar í toppbaráttunni.

Sú er þó ekki raunin í dag enda sjaldan ef nokkurn tímann sem þessi lið hafa setið jafn neðarlega á þessum tímapunkti leiktíðarinnar. United situr í 7. sæti deildarinnar eftir 1-0 tap á útivelli gegn Newcastle í síðustu umferð en Chelsea er í því tíunda og mæta galvaskir eftir 3-2 heimasigur á Brighton í leik þar sem þeir spiluðu einum færri allan síðari hálfleikinn.

Chelsea

Það er ótrúlegt að segja að segja það en Chelsea hefur farið aftur frá því Boehly tók við þrátt fyrir að eigandi hafi dælt meira en milljarði punda í leikmannakaup á undanförnum misserum. Liðið er með fimm sigra, jafnmarga ósigra og fjögur jafntefli og er því sem stendur með 19 stig. Það sem hins vegar er áhugavert er að þeir hafa sótt flest stigin á útivelli í ár en 10 af þessum stigum hafa komið úr útileikjum.

Mauricio Pochettino tók við liðinu í sumar en hann var lengi vel orðaður við United á sínum tíma. Eflaust voru margir sem töldu hann vera rétta manninn og með svona sterkan fjárhagslegan stuðning myndi hann keyra Chelsea liðið upp í toppbaráttuna aftur en spilamennska liðsins hefur verið langt frá því að vera ásættanlegt. Liðið hefur náð í úrslit gegn City, Liverpool og Arsenal á þessu ári (allt jafnteflisleikir) en að sama skapi legið gegn Newcastle, West Ham, Nottingham Forest, Brentford og Aston Villa.

Embed from Getty Images

Miðjuparið Enzo Fernandes og Moises Caicedo, sem samanlagt kostuðu meira en Crystal Palace, Fulham, Everton, Nottingham Forest, Luton og Wolves eyddu samanlagt í leikmenn í sumar, hafa engan veginn staðist væntingar og virðist kaupstefna Boehly vera að kosta liðið á vellinum. Það að sleppa því að festa kaup á Maddison vegna aldurs og leitast nánast eingöngu eftir því að kaupa unga og spennandi leikmenn og setja þá á rétt tæplega ævilanga samninga skapar meiri vandamál en það leysir. Vissulega hefur Pochettino úr stórum hóp að moða en það kann líka að vinna gegn honum. Annars spái ég liðinu svona á morgun:

Chelsea virðast þó vera að hrökkva í gang en við vonum svo innilega að þeir haldi áfram að hökkta að minnsta kosti að sinni.

 

Manchester United

Lengi getur vont versnað. United hefur ekki náð að heilla neinn að undanförnu og kraftleysið og skortur á dugnaði virðist gegnsýra allt og alla sem klæðast treyjunni núna. Ef það eru ekki vandamál utan vallar þá eru vandamálin í klefanum og ef það eru ekki klefavandamál þá eru það vandamál á grasinu sjálfu. Erik ten Hag getur ekki með nokkru móti náð í stig á útivöllum nema það sé gegn minni spámönnum og það hriktir í stoðum hvert sem litið er.

En liðið er á heimavelli núna og það er því möguleiki á því að United takist að kroppa í stig en líklegast verður leikurinn ekki nein gífurleg skemmtun ef marka má deildarleiki liðsins undanfarið. Liðið hefur þó haldið hreinu í mörgum leikjunum en það hefur komið á kostnað sóknarleik liðsins því liðið virðist eiga í stökustu vandræðum með að koma tuðrunni í netið.

Embed from Getty Images

Rasmus Hojlund sem hefur verið funheitur á Evrópukvöldum fyrir United er kaldari en frostpinni í deildinni og á enn eftir að skora þar þrátt fyrir að hafa spila 680 mínútur þar. Ef við berum það saman við Meistaradeildarformið hans þar sem hann er með sjö mörk og eina stoðsendingu á undir 600 mínútum þá er eins og við séum ekki að ræða um sama leikmanninn. Marcus Rashford virðist vera farinn í jólafrí og þannig mætti lengi telja leikmenn sem eru engan veginn að standa undir nafni né getu.

En það eru nokkrir litlir ljósir punktar í annars drungalegri tilveru United stuðningsmanna. Kobbie Mainoo hefur gefið okkur örlítinn vonarneista og hefur farið fram úr björtustu vonum okkar þó auðvitað sé hann ekki að fara draga vagninn fyrir United. Luke Shaw og Aaron Wan-Bissaka eru komnir til baka eftir meiðsli og Martial er ekki meiddur (þetta var ritað rétt fyrir 3 á þriðjudegi svo takið með fyrirvara). Annars vona ég að við sjáum þetta lið á morgun:

Enginn Rashford, þar sem liðið þarf að spila með 11 menn á móti 11 á morgun. Lindelöf og Maguire með Shaw og Wan-Bissaka sitthvoru megin við sig í vörninni segir sig sjálft. Onana þar fyrir aftan en Erik ten Hag hefur greinilega tekið þá ákvörðun að standa með honum þrátt fyrir aragrúa af mistökum. Á miðjunni verðum við að sjá Mainoo en hvorki Amrabat né McTominay hafa staðið sig nægilega vel að undanförnu og því erfitt að segja til um hver eigi að byrja við hlið táningsins.

Framlínan má svo samanstanda af Pellistri, Garnacho og Hojlund. Áreiðin, spennandi og fersk framlína sem getur kryddað upp á einhverju sem við höfum ekki endilega séð margoft áður. Það er líka ekki út í hött að fá Fernandes inn á miðjuna og spila Mejbri í holunni en þá vantar okkur kannski reynsluna í fleiri stöður.

Leikurinn hefst korter yfir átta annað kvöld og Chris Kavanagh. Síðasta viðureign liðanna á þessum velli endaði 4-1 en ég efast stórlega að við fáum aðra eins veislu en það má alltaf leyfa sér að dreyma.

Embed from Getty Images