Rauðu djöflarnir

Eftir þessi hrikalegu vonbrigði á miðvikudaginn er annar risaútileikur næstur á dagskrá. United fer til Newcastle og tekst á við Saudi United.

Meiðslalistinn hjá okkur er nokkurn veginn óbreyttur, Mason Mount er byrjaður að æfa en verður nær örugglega ekki með á morgun. Það var skynsamlegt að henda Mainoo ekki í djúpu laugina í İstanbul en hann verður að vera á miðjunni á morgun

Liðið verður því svona

Newcastle er líka í stökustu vandræðum, meiddir hjá þeim eru Jacob Murphy, Joe Willock, Matt Targett , Javier Manquillo , Harvey Barnes, Sven Botman, Elliot Anderson, Dan Burn (back) og Callum Wilson meiddir. Sandro Tonali er svo í nær árs banni vegna veðmángs.

Liðinu er spáð svo:

Newcastle hefur verið hrósað í vetur fyrir góða frammistöðu, en United er stigi á undan! Það er nauðsynlegt til að sveifla pendúlnum til baka úr umræðunni eftir Galatasaray leikinn að vinna á morgun eða í það minnsta tapa ekki. Það getur United haldið haus þokkalega hátt í deildinni

Leikurinn er kvöldleikur og hefst stundvíslega klukkan átta og við hvetjum ykkur öll að ganga á hæfilegum hraða um gleðinnar dyr!

United heimsótti særða Everton menn á Goodison Park í dag klukkan 16:30. Erik Ten Hag gerði nokkrar breytingar á liði sínu frá sigrinum á Luton fyrir landsleikjahlé. Luke Shaw var kominn aftur í byrjunarlið United, loksins loksins. Martial byrjaði þar sem Rasmus Hojlund er frá vegna meiðsla, en stóru fréttirnar voru að Kobbie Mainoo byrjaði sinn fyrsta leik í ensku úrvalsdeildinni. Sjálfur var Erik Ten Hag í leikbanni og mætti með sixpensarann upp í stúku en Mitchell van der Gaag stýrði skútunni af hliðarlínunni. Eins og kom fram í upphituninni þá voru dregin 10 stig af Everton í landsleikjahléinu fyrir brot á Financial Fair Play (FFP). Stuðningsmenn Everton og klúbburinn eru talsvert ósátt við þessa refsingu þar sem ónefnt ögn ljósblárra lið 50 km í burtu liggur undir grun að brotið reglur FFP ögn oftar. Stuðningsmenn Everton héldu því uppi bleikum spjöldum sem á stóð „Corrupt“. Topp lið deildarinnar gerðu jafntefli um helgina, sem varð til þess að Arsenal tilti sér á toppinn og þá tapaði Tottenham, United gat því með sigri minnkað muninn í toppliðið niður í 6 stig og muninn í Tottenham í 2 stig.

Liðin:

United:

Bekkur: Bayindir, Varane, Reguilon, Wan-Bissaka, Amrabat, Hannibal, Pellistri, Van De Beek, Hugill

Everton:

Bekkur: Virginia, Coleman, Godfrey, Danjuma, Chermiti, Patterson, Keane, Hunt, Dobbin

Fyrri hálfleikur

United byrjaði leikinn kröftulega svona eins og liðið hefur gert nokkrum sinnum á tímabilinu, liðið keyrði af strax í sókn sem þó ekkert varð. Stuttu seinna eða á annarri mínútu hélt liðið ágætlega boltanum hátt upp á vallarhelmingi Everton, sem varð til þess að Dalot fékk boltann frá McTominay í fínustu fyrirgjafastöðu. Portúgalinn slengdi boltanum fyrir en sendingin virtist þó vera of aftarlega fyrir Garnacho á fjærstönginni. EN VÁ VÁ VÁ, MAÐUR LIFANDI, GARNACHO DRENGUR HNEIGÐU ÞIG. Þvílík hjólhestaspyrna!!! Drengurinn sótti boltann á þriðjuhæð og smellti honum í fjærhornið, Pickford ekki nálægt boltanum og þó að hann væri með venjulega langa handleggi þá hefði hann samt ekki verið nálægt því að verja. Þetta fer niður sem eitt af bestu mörkum úrvalsdeildarinnar. 0-1 fyrir United og aðeins þrjár mínútur liðnar, svona mörk ættu samt eiginlega að gilda tvöfalt.

Næstu fimm mínútur í leiknum var eins og leikmenn inn á vellinum væru frekar að einbeita sér að því að leita að hökunni sinni eftir markið frekar en að spila fótbolta. Á þessum kafla var mikið um langar spyrnur og liðin héldu ekkert sérstaklega mikið í boltann. En það var svo Everton sem tók í raun völdin á vellinum, United liðið átti í stöðugum vandræðum með háspressu Everton og hasíteraðir stuðningsmenn bláliða byrjuðu að láta vel í sér heyra. Calvert Lewin átti máttlaust skot sem fór beint á Onana á 10. mínútu. Þrátt fyrir að Everton væri klárlega betri aðilinn þá skapaði liðið sér ekki mikið en á sama tíma skapaði United enn minna í þau fáu skipti sem liðið komst á seinasta vallahelminginn. Já United var eins og Arnar Gunnlaugs myndi orða það að „suffera“, sem er eiginlega galið á móti Everton.

Síðustu 15. mínúturnar af fyrri hálfleik náði Everton að skapa sér loksins ákjósanleg færi, Calvert-Lewin átti hættulegt skallafæri eftir horn á 31. mínútu, en skallinn tiltölulega beint á Onana. Aðeins mínútu seinna skoppaði boltinn heppilega fyrir títtnefndan Lewin sem átti fínt skot sem Onana varði vel, fyrrum United maðurinn James Garner komst í frákastið sem átti skot af stuttu færi sem fór af Onana og Maguire og var við það að leka í netið þegar að Kobbie Mainoo, kom eins og eimreið og hreinsaði boltann í burtu af línunni. Það virtist liggja mark í loftinu, mínútu síðar fékk Doucoure mjög fínt færi eftir lága fyrirgjöf en setti boltann talsvert framhjá. Tæplega tíu mínútum síðar fengu Everton tvö færi með mínútna millibili, annars vegar annað skallafæri hjá Lewin sem skallaði boltann yfir og hins vegar fínt skotfæri hja Idrissa Gana Gueye sem fór hátt yfir.

United lifði þó af og komst inn í hálfleik marki yfir og jahérna þvílíkt mark. United byrjuðu vel og af krafti en það var eins og allur vindur færu úr liðinu eftir þetta sturlaða mark Garnacho. Everton byrjaði hægt og rólega að þjarma meira og meira að United og seinustu 15 mínúturnar í fyrri hálfleiknum voru algjörlega eign Everton. United eins og svo oft áður í vetur átti í erfiðleikum með að spila sig út úr fyrstu pressunni, menn kannski alveg tilbúnir að taka óeigingjörn hlaup til þess eins að losa um aðra og Everton virkuðu bara frekar áræðnir. Það segir allt sem segja þarf að United átti bara eitt skot að marki (ekki á markið heldur að marki), það er ekki gott.

Seinni hálfleikur

Everton menn voru ekki jafn ferskir í upphafi síðari hálfleiks, líkt og þeir voru í lok þess fyrri. United liðinu tókst að draga aðeins úr tempóinu í leiknum og liðið náði að halda aðeins meira í boltann. Þegar að síðari hálfleikur var aðeins sex mínútna gamall komst United í álitlega sókn, Bruno Fernandes kom boltanum inn á Antohony Martial sem tók hann með sér inn í teiginn, aðþrengdur Everton mönnum fór frakkinn brosmildi niður í teignum. John Brooks flautaði, sagði Martial að standa upp og gaf honum gult fyrir dýfu. Það var erfitt að sjá fyrst hvort um einhverja snertingu hefði verið að ræða, en í endursýningu sást að fyrrum United maðurinn, Ashley Young, setti vissulega bara löppina fyrir Martial og alveg fáránlegt að gefa gult fyrir dýfu. Stockley Park ákvað samt að taka sér u.þ.b. 2 mínútur í að ákveða hvort þetta augljósa víti væri víti eða ekki og sendu svo John Brooks í skjáninn svona til að auka dramatíkina. Að lokum komst hann þó að þeirri niðurstöðu að þetta væri víti, tók gula spjaldið til baka og United í góðum séns að tvöfalda forystuna. Bruno ákvað að leyfa ísköldum Rashford að taka vítið, ný klipping hjá heiðursdoktornum, hún truflaði ekkert og Rashford lúðraði boltanum upp í þaknetið yfir Pickford sem fór í rétta átt. 0-2 fyrir United og útlitið orði hreint ekki slæmt. Everton menn tók miðju og voru staðráðnir í að svara, mínútu eftir markið fékk Gueye boltann á skoppinu og lét vaða fyrir utan vítateig, Onana gerði samt virkilega vel í því að blaka boltanum yfir.

Eftir þetta fór að draga talsvert af Everton, liðið hélt kannski ágætlega í boltann á tíðum en náði að skapa sér lítið. United tókst að hægja á leiknum og beitti skyndisóknum, allt í einu var það eiginlega United sem var talsvert líklegra til þess að bæta við frekar en Everton að minnka muninn. Á 72. mínútu gerði van der Gaag tvöfalda breytingu, Garnacho koma útaf í stað Pellistri og Amrabat leysti Kobbie Mainoo af hólmi. Þremur mínútum eftir skiptingarnar komst United í hraða sókn, Fernandes þræddi boltann á Martial og frakkinn kominn einn gegn Pickford, það vafðist lítið fyrir Anthony sem laumaði boltanum rétt yfir öxl Pickford, eins og hann væri í five-side með yngri bróður sínum og vinum hans. Smekkleg afgreiðsla en það er líka hans helsti kostur, 0-3 fyrir United. Við þett fór leikurinn Everton hélt áfram að sækja en virtust vera búnir að játa sig sigraða, bleik spjaldaðir stuðningsmenn mynduðu ekki jafn óvinveitt andrúmsloft og krafturinn sem liðið bjó yfir í lok fyrri hálfleiks var nánast horfinn. Mykolenko var þó nálægt því að minnka muninn þegar hann átti hörku skot í þverslána. United tókst að halda leiknum rólegum og liðið stólaði bara á skyndisóknir enda Everton menn talsvert fáliðaðir til baka. Á 95. mínútu fengu Everton þó besta færið sitt í síðari hálfleik, eftir hornspyrnu skallaði Tarkowski boltann aftur fyrir, boltinn fór af hnéi Jack Harrison en United náði að böðla boltanum burt af marklínunni. Þetta var það síðasta marktæka sem gerðist í leiknum, góður 0-3 sigur á Everton.

Að lokum

United voru ekkert sérstaklega góðir í þessum leik, liðið byrjaði af krafti og það dugði til þess að koma liðinu yfir snemma leiks. Eftir markið var mikið um brot og leikurinn fór ekki á neitt sérstakt flug, fyrr en seinustu 15 mínúturnar í fyrri hálfleik. Það voru þó bara Everton menn sem ákváðu að fara á flug á þeim kafla, United leikmennirnir voru í alvöru brasi með háu pressuna á þeim kafla. United komu talsvert betur út í seinni hálfleikinn með skírt leikplan, róa leikinn aðeins og ekki leyfa Everton að keyra upp tempó og spennu og fá „crowd-ið“ með sér. United fékk augljósa vítaspyrnu, snemma í seinni hálfleik, þó að Stockley Park og John Brooks hafi fundist þetta vera eitthvað vafamál (miðað við tímann sem tók að dæma víti). Það var smá vatnsgusa í andlitið fyrir Everton og eftir það þá náði liðið aldrei að byggja upp stemninguna sem myndaðist í lok fyrri hálfleiks. United kláraði svo dæmið með smekklegu marki Anthony Martial um miðbik seinni hálfleiks og þar fóru sigurmöguleikar Everton út um gluggann. Everton menn mega þó alveg eiga það að þeir hættu ekkert þó að þeir hafi misst smá dampinn eftir mark 2 og 3.

Það var eiginlega ótrúlegt að United hafi ekki fengið mark á sig í leiknum en Onana varði nokkrum sinnum vel og þá voru Maguire og Lindelöf ágætlega solid í hjarta varnarinnar. Ég vil þó taka fram að þessa leiks verður bara minnst sem leikurinn þar sem Garnacho skoraði eitt af fallegustu mörkum í sögu ensku úrvalsdeildarinnar. Ég vil líka minnast á Kobbie Mainoo, mér fannst hann standa sig virkilega vel, óhræddur við að fá boltann undir pressu og var mjög hreyfanlegur annað en margir í liði United, þessi strákur haldist hann heill er framtíðin. Skemmtilegt að loksins vinna með meira en einu marki og loksins er liðið ekki með neikvæða markatölu.

United situr enn þá í 6. sæti ensku úrvalsdeildarinnar, en er nú einungis tveimur stigum á eftir Tottenham sem situr í 5. sæti. United er líka bara sex stigum á eftir toppliði Arsenal sem er ótrúlegt miðað við spilamennsku liðsins og almennt bras í upphafi tímabils. United er með 15 stig af síðustu 18 mögulegum í úrvalsdeildinni, spilamennskan er ekki frábær en þessa stundina en vonandi með menn að snúa til baka úr meiðslum þá getur United farið að horfa upp á við. Næsti leikur United er gegn Galatasaray í meistaradeildinni, í Tyrklandi, sannkallaður úrslitaleikur ef United ætlar sér áfram.

Loksins loksins er landsleikjahléið búið og ekkert svoleiðis fyrr en í mars á næsta ári. United heimsækir bláa helming Liverpool borgar, þegar að liðið sækir Everton heim í Guttagarð á sunnudag klukkan 16:30. United mætir til leiks eftir landsleikjahléið sem mest „in form“ lið ensku úrvalsdeildarinnar, sem er fáránleg staðreynd ef horft er á spilamennsku liðsins. Það er þrátt fyrir allt í alvöru staðreynd að í síðustu fimm úrvalsdeildarleikjum hefur ekkert lið fengið jafn mörg stig og Manchester United. United er þó enn bara í 6. sæti deildarinnar 7 stigum á eftir toppliði Manchester City.

Þrátt fyrir landsleikjahlé þá virðist drama-ið samt sem áður fylgja United, nú halda blaðasnápar og twitterstrákar því fram að Ten Hag og Varane talist varla við þar sem Varane hefur ekki spilað mikið undanfarið. Þá virðast yfirvonandi kaup Jim Ratcliffe á hluta félagsins ekki vera alveg jafn yfirvofandi og talið var fyrir landsleikjahlé, svo virðist sem það gæti beðið fram í janúar.

Landsleikjahléið var þó ótrúlegt en satt dramatískari fyrir mótherja United um helgina, Everton, heldur en fyrir rauðu djöflana. Everton gerðust nefnilega sekir um að hafa brotið Financial Fair Play (FFP) reglurnar, en félagið tilkynnti talsvert meira tap en úrvalsdeildin leyfir. Úrvalsdeildin ákvað því að draga 10 stig af Everton og situr liðið því í næst seinasta sæti deildarinnar. Það virðist skipta máli hvursu blátt liðið er þegar að því kemur að dæma í FFP málum hjá FA.

Oft er talað um það að vont sé að mæta liðum sem eru nýbúin að skipta um þjálfara (e. new manager bounce), ætli það sé ekki enn verra að mæta liði sem er nýbúið að missa rúmlega 70% af stigunum sínum. Fyrir allt þetta fíaskó sat Everton í 14. sæti deildarinnar, en liðið er búið að vera á fínu róli eftir slæma byrjun á tímabilinu. Liðið er búið að vinna þrjá af síðustu fimm leikjum í deild. Miðað við að spilamennska United hefur verið slök á þessu tímabili og að því virðist ómögulegt fyrir liðið að skora þá er ekki beint draumurinn að mæta særðu liði sem Sean Dyche stýrir. Það eru vissulega mörg lið í þessari deild sem eru talsvert betri en Everton, en Sean Dyche er þekktur fyrir að kunna að múra fyrir  og þegar að lið hans fá alvöru mótiveringu þá veita þau yfirleitt ágætis baráttu.

Meiðslalistinn hjá United er enn þá talsvert langur en það virðist þó sem svo að hann gæti farið að styttast. Luke Shaw er farinn að æfa sem og Tyrell Malacia ekki er víst hvort þeir verði tilbúnir í leikinn á sunnudag. Jonny Evans og Rasmus Højlund meiddust fyrir landsleikjahlé og eru báðir tæpir en ættu þó að vera í hóp. Talsvert lengra er þó í að Eriksen, Casemiro og Martinez verði tilbúnir til leiks en síðarinefndu tveir munu ekki spila fyrr en í byrjun næsta árs. Miðað við þær fréttir sem undirritaður hefur lesið þá virðist Andre Onana vera tilbúinn þrátt fyrir að hafa farið útaf meiddur í leik með Cameroon. Meiðslakrísa United er orðinn það mikil að jafnvel ámeðan ég skrifaði þessa efnisgrein í þessari upphitun bættist við leikmaður á meiðslalistann. Þetta er dagsatt FotMob endurhlóð sig á meðan ég skrifaði þessa efnisgrein og bætti Pellistri við á listann, hann er því greinilega líka tæpur núna. Síðast en ekki síst bárust þær fréttir að Mason Mount væri líka meiddur og frá í u.þ.b. mánuð, þetta er eiginlega orðið fáránlegt.

Líklegt byrjunarlið

Svona spái ég liðinu á sunnudag, mér sýnist Ten Hag vera alveg kominn á Maguire vagninn og farinn af Varane lestinni. Mér finnst ólíklegt að Shaw byrji leikinn en held að komi mögulega við sögu. Það er erfitt að stilla upp miðjunni, mér finnst flest allir leikmenn hafa verið vonbrigði á þessu tímabili en ég held að það sé alveg öruggt að bæði McTominay, Rashford og Bruno byrji allir. Svo er það spurningin hversu heill Højlund er, miðað við það sem er til á bekknum þá held ég að það sé nauðsynlegt að hann starti. Þá hafa einhverjið haldið því fram að Erik Ten Hag muni gefa Kobbie Mainoo sitt fyrsta start á tímabilinu.

Að lokum

Sigur um helgina er mjög mikilvægur, 4 af 5 liðunum sem eru fyrir ofan United í töflunni eiga viðureignir á móti hvoru öðru og því er þetta kjörið tækifæri til þess að saxa á forskot þessara liða. Það sem ég held þó að flest allir United stuðningsmenn vonist eftir er að liðið spili skemmtilegan fótbolta og séu ekki í bölvuðu ströggli á 75. mínútu við að troða inn einu marki. Auðvitað vil ég frekar að United liðið vinni þó að það sé ljótur sigur, en spilamennskan er orðin talsvert þreytt. Framherjar og framliggjandi leikmenn United þurfa líka að fara að stimpla sig inn í vinnuna þessi markaþurrð er orðin vel frústrerandi ég tala nú ekki um þegar þessir leikmenn klúðra nokkrum dauðafærum í leik eins og gegn Luton. John Brooks er dómari vonandi verður ekkert VAR fíaskó í þessum leik, Luton leikurinn var fínn að því leiti að VAR hafði bara hægt um sig.