Rauðu djöflarnir

Byrjunarliðið nú í upphafi tímabils velur sig því sem næst sjálft

Varamenn: Henderson, Dalot, Lindelöf (46.), Maguire, Erikssen (67.), McTominay (88.), Pellistri (77.), Martial, Sancho (67.)

Það kann að vera að bekkurinn sé ekki nógusterkur en ef við fáum miðvörð og miðjumann og svo Kobbie Mainoo og Höjlund verður þetta strax betra

Wolves leit svona út

Fyrstu tuttugu mínúturnar í leiknum gekki boltinn fram og til baka en hvorugt lið náði að skapa alvöru færi, Wolves voru svo sem alveg jafn nálægt því og United, reyndu alveg að sækja. Af kantmönnunum sást meira til Antony en hann átti erfitt með að koma með góðar sendingar, hlaup hans enduðu alla jafna á því að hann sendi bolta sem endaði í vörn Úlfanna. Fyrsta skotið að ráði var meira að segja andstæðinganna, Sarabia komst í alveg þokkalega stöðu, skotið fór aðeins í Varane og rétt framhjá fjær stöng. Smá fjör í teignum eftir hornið en ekkert hættulegt. Enn og aftur var það Wolves sem ógnaði, stungusending, Cunha stakk Martines af og skaut, aftur fór skot Wolves rétt framhjá fjær stöng. United langt frá því að vera sannfærandi.

En undir lok hálfleiksins komst aðeins meiri ákafi í sóknir United og þeir fóru að komast meira upp að og inn í vítateig. Það urðu þó engin færi úr því og leikurinn markalaus í hálfleik og ef einhverjir áttu að vera svekktir yfir því voru það Úlfarnir.

Lisandro Martines fékk gult spjald í fyrri hálfleik og Viktor Lindelöf kom inná, en það voru ekki liðnar fjórar mínútur þegar Cunha átti að koma Wolves yfir. Frábær sókn, sending inn á teiginn var framlengt, og Cunha var á markteigshorninu en skaut í stöngina utanverða í opnu færi. United stálheppið þar!

Cunha var svo enn á ferðinni þegar hann óð upp völlinn og fékk að taka skot utan teigs óáreittur, Onana skutlaði sér og hefði átt að gera betur en að stýra boltanum í horn. Úr því varð svo ekkert.

Embed from Getty Images

Ten Hag reyndi að hreista aðeins upp í þessu með að setja Eriksen og Sancho inn á fyrir Mount og Garnacho, hvorugur þeirra hafði nokkuð gert af viti. Það verður að segja að það hafi tekist því á 76. mínútu skoraði Varane. United var búið að sækja á og Bruno vippaði boltanum inn á teiginn, Wan-Bissaka tók boltann viðstöðulaust og gaf fyrir og þar var Varane og skallaði inn af markteig. Kannske ekki besta vörnin en fínt mark.

Pellistri kom inná fyrir Antony en sást lítið, því Wolves sóttu mikið á síðasta kortérið. Ten Hag gerði varnarsinnaða breytingu og setti McTominay inn á fyrir Rashford.

Embed from Getty Images

Wolves var í stöðugri sókn síðustu mínturnar af sjö mínútna viðbótartíma og voru svekktir að fá ekki víti þegar Onana kom stökk út og fór beint í Kalajdzic án þess að ná til boltans. VAR sleppti því, frekar óvænt og United hélt út

Að leik loknum

Þetta var vont. Þetta var rosalega vont. Það er varla nokkur leikmaður sem fær plús í kladdann nema Varane að hafa hangið frammi eftir að horn rann út í sandinn og skorað markið eins og hver annar senter af gamla skólanum. Miðja Wolves var sterkari fljótari og grimmari og ef Ten Hag ætlast til að United haldi boltanum og stjórni leiknum eru erfiðir dagar á æfingasvæðinu framundan hjá leikmönnum, það verða engin grið gefin. Onana var þokkalegur en hefði átt að fá á sig víti, eina björgunin er sú að sögulega hafa markmenn fengið að koma svona út og fara í sóknarmenn án þess að dæmt sé á þá en Wolves mega alveg vera súrir.

Betur má ef duga skal, næsti leikur er á laugardaginn á Tottenham Hotspur Stadium. Það gæti orðið langur laugardagur á Ölveri.

Loksins er sumrinu að ljúka og boltinn að byrja að rúlla. Við höfum verið þöglir í sumar og því ekki farið yfir það eina sem gerist á sumrin – leikmannamálin. Þetta hefur verið frekar einfalt allt í sumar. Kaupin voru gerð tiltölulega hávaðalaust og þó kannske sumum finnist að United hafi ofborgað eins og venjulega, þá er það líklega bara tja, eins og venjulega. United skattur. Áfram er haldið að hreinsa út, og eins og venjulega fæst ekki nógu mikið fyrir þá sem fara enda fæstir dáðadrengir.

Mason Mount

Mason Mount kom frá Chelsea, átti eftir eitt ár á samningi og vildi ekki endurnýja og Chelsea þurfti því að selja. Mount var búinn að vera þar frá barnæsku, var valinn leikmaður ársins þar bæði tímabilin 2020/21 og 2021/2 en átti aðeins erfiðar uppdráttar í fyrra, skoraði lítið sem hann var þó þekktur fyrir og samningamálin voru að þvælast fyrir, Mount þótti Chelsea ekki meta sig að verðleikum eftir leikmannahringekjuna þar og ákvað því að yfirgefa uppeldisfélagið. Hann er á besta aldrei, aðeins 24. ára.. Mount hefur staðið sig ágætlega á undirbúningstímabilinu og engin ástæða til að ætla annað en að maður með 36 landsleiki gyrði sig í brók. Mount er hugsaður sem framliggjandi miðjumaður og mun kom fyrst og fremst í stað Christian Eriksen, spila framar en Casemiro og aftar en Bruno Fernandes en ætti þó að eiga auðvelt með að leysa þann síðarnefnda af. Ten Hag veit hvað hann er að gera, eins og með svo mörg kaup Ten Hag eru tengsl: Mount spilaði á láni með Vitesse í hollensku úrvalsdeildinni 2017/18.
Embed from Getty Images

André Onana

Um kosti og galla David de Gea hafa verið skrifuð óteljandi orð og óþarfi að fara nánar í það. Málið er einfalt: André Onana er nútíma markvörður sem tekur virkan þátt í uppbyggingu spils. Það er ólíklegt að hann eigi eftir að verja jafn ótrúlega og De Gea gerði stundum, en það er ekki það sem er spurt um fyrst og fremst í dag. Ten Hag vissi hvað hann vildi og sótti manninn sem hafði spilað fyrir hann öll árin hjá Ajax. Það er ólíklegt að hann vinni gullhanskann en það er á hreinu að spilið hjá liðinu verður allt öðruvísi. Svo er það líka varnarinnar að sjá til þess að verjast.
Embed from Getty Images

Rasmus Højlund

Það var aldrei að fara að gerast að United myndi sækja Harry Kane í greipar Daniel Levy, enda Kane ekki seldur fyrr en Levy gat verið nokkuð viss að United reyndi ekki að stela honum. Þess í stað kemur ungstirnið Rasmus Højlund frá Atalanta. Hann var seldur frá FCK til Sturm Graz í fyrra, frá Sturm Graz til Atalanta síðasta sumar, skoraði sex mörk í sex landsleikjum síðasta vetur og er nú kominn til United á, ja, tiltölulega háa upphæð. Smellubeitur hafa reynt að leggja þá skandinava Højlund og Haaland að jöfnu og þá til að búa til óraunhæfar væntingar svo hægt sé að ráðast á Højlund um leið og hann skorar ekki grimmt. Við hlustum ekki á slíkt. Højlund mun þurfa aðlögun ekki síst vegna þess að hann er ekki í leikformi enn og við verðum að vera alveg róleg. Það hefði vissulega verið frábært ef uppbyggingin sem við hefðum verið að sjá hefði verið fullkomnuð með risanafni sem myndi skora frá fyrsta degi, en þetta er jú uppbygging og við bíðum róleg eftir að Rasmus sýni sitt.
Embed from Getty Images

Næstu vikur

Sem fyrr sagði hafa sölurnar verið hægari. Fred kvaddi í vikunni og þökkum við honum framlag hans, Alls ekki jafn slakur og stundum var látið en ekki mikil framtíð í honum. Nú er horft til þess að losa Maguire en launapakkinn hans er vandamál þegar kemur að West Ham. Donny van de Beek gæti endað á láni til Ajax og nú er útlit fyrir að Scott McTominay fari hvergi.

Það eru þessar sölur sem þarf til til að þeir sem bíði með passana tilbúna komi. United er vissulega að ræða við Bayern um Benjamin Pavard sem myndi spila hægri miðvörð eða hægri bakk, og Sofyan Amrabat hefur beiðið spakur eftir að Ten Hag hringi. Það er einmitt Ten Hag tenging þar: Amrabat lék hjá Utrecht þegar Ten Hag stjórnaði þar.

Þetta kemur allt í ljós, en á morgun leikur United við Wolves í fyrsta leiknum

Lið United

United á við eitthvað af meiðslum að stríða og auðvitað ber þar fyrstan að nefna Rasmus Højlund. Það er leiðinlegt að Kobbie Mainoo missi af byrjun tímabilsins eftir frábæra frammistöðu í undirbúningsleikjunum en svo er það varamannabekkurinn sem er á meiðslabekknum, Malacia, Henderson, Heaton, Martial, og Amad.

Þetta er því næstum því sterkasta lið sem United getur stillt upp og við verðum að fara þess á leit við drengina að þeir byrji eins og á að byrja: Með öruggum sigri.

Wolves

Það hefur allt farið í skrúfuna hjá Wolves. Félagið hefur keypt of dýra leikmenn sem ekki hafa staðið sig og eru í stökustu FFP vandræðum. Fyrir vikið gátu þeir lítið sem ekkert keypt í sumar, og í síðustu viku raungerðist það sem legið hafði í loftinu, Julen Lopetegui gafst upp og samdi um starfslok og við tók fyrrverandi stjóri Bournemouth, Gary O’Neil. Liðinu er spáð svona á morgun

Mathias Cunha eru einu alvöru kaup sumarsins eftir að hafa verið á láni hjá liðinu síðasta vetur, en Matt Doherty er kominn til baka frá Athletico Madrid og gæti spilað. Rúben Neves er farinn til Saudi og Raúl Jiminez til Fulham og mikil reynsla horfin með þeim. Þetta lítur því vel út á pappírnum fyrir United, og sigur og að halda hreinu væri gott framhald á virkinu sem var reist á Old Trafford í fyrra þegar aðeins einn leikur tapaðist í deild og aðeins tíu mörk fengin á sig.

Leikurinn byrjar á slaginu sjö annað kvöld en ef eitthvað er að marka leiki helgarinnar má búast við nægum viðbótartíma í báðum hálfleikjum þannig úrslit verða ekki ljós fyrr en rúmlega níu! Simon Hooper er maðurinn sem sér til þess að allar tafir bætast við leiktímann.