Rauðu djöflarnir

United fór á Emirates í dag með enn eina miðvarðasamsetninguna og afturhvarf til 5-3-2 leikaðferðarinnar. Nauðsynlegt vegna þessara hrikalegu meiðsla sem verið hafa að hrjá liðið

Bekkur:
Lindegaard, Fletcher, Herrera, Young, Mata, Januzaj, Wilson

Lið Arsenal er svo skipað:
Szczesny, Chambers, Mertesacker, Monreal, Gibbs, Ramsey, Arteta, Wilshere, Oxlade-Chamberlain, Welbeck, Sanchez

Arsenal byrjaði mun betur í leiknum og það hjálpaði ekki að strax á fjórðu mínútu komu 40. meiðsli United í vetur. Já, fertugustu. Luke Shaw sneri sig illa á ökkla og gat ekki haldið áfram. Hann haltraði þó um í tíu mínútur þangað til að hann var tekinn útaf fyrir Ashley Young.

Í millitíðinni hefði Arsenal verið búið að skora og fá víti. Jack Wilshere var að verki í bæði skiptin. Fyrst fékk hann sendingu innfyrir en var of lengi að hlutunum og á endanum var skotið ekki nógu gott, David de Gea varði mjög vel. Síðan átti hann í höggi við Luke Shaw, Shaw virtist hafa meiri áhuga á manninum en boltanum. Úti á velli hefði verið dæmt, en inni í teig var þetta ekki alveg nógu afgerandi brot.

Áfram hélt Arsenal að drottna yfir leiknum. United komst ekkert áfram og vörn United var gríðarlega brothætt. Smalling var þar manna skástur en Blackett verstur. De Gea var hins vegar frábær og varði allt sem á markið kom. Ein besta varslan kom þegar Oxlade-Chamberlain fékk stungusendingu, en De Gea kom vel útá móti og blokkaði á endanum skotið.

https://vine.co/v/OJlm1eIV2q0

Þegar hálftími var liðinn var Wilshere enn og aftur að verki, en í þetta sinn af því hann átti að fá rauða spjaldið. Wilshere braut klaufalega á Fellaini, brjálaðist í átt að dómaranum þegar flautan gall og þegar Fellaini koma á eftir honum með hrópum sneri Wilshere sér við og skallaði Fellaini. Nú er Fellaini höfðinu hærri og því fór skallinn í bringuna á Fellaini sem brást forviða við.

United náði uppúr þessu allt í einu nokkru spili með Wayne Rooney og Ángel Di María í broddi fylkingar. En færin sáust ekki og það var Arsenal sem var frekar ógnandi undir lok hálfleiksins.

United var gríðarheppið að sleppa með jafnt inn í hléiið og gat eingöngu þakkað David de Gea það.

Jack Wilshere lauk þátttöku sinni í leiknum snemma í seinni hálfleik þökk sé dúndrandi tæklingu Paddy McNair sem hitti hann beint í fótinn. Varla var hann farinn útaf fyrr en að United skoraði það sem ég kallaði á Twitter:

Þetta er ósanngjarnasta og viðbjóðslegasta og yndislegasta mark sem ég hef séð #djöflarnir

— Björn Friðgeir Björnsson (@bjornfr) November 22, 2014

United sótti upp vinstra megin, Di María gaf inn á teiginn þar sem Fellaini lúrði rangstæður. Gibbs komst framfyrir Fellaini og sá síðarnefndi ýtti á Gibbs sem lenti þá í samstuði við Szczesny um leið og Szczesny kýldi frá. Boltinn barst til Valencia sem nelgdi fyrir eins og alltaf, og í þetta sinn var Gibbs enn hálf vankaður, slæmdi fæti í boltann og stýrði honum í netið. Hrikalegt sjálfsmark og auðvitað alfarið gegn gangi leiksins, enda United ekki búnir að eiga skot á mark!

Szczesny þurfti að fara útaf eftir þetta samstuð og það verður að segjast að það er gott að sjá að læknar liðanna eru farnir að taka höfuðhögg alvarlega.

Arsenal sótti auðvitað stanslaust eftir þetta og United pakkaði. Nú var þó Smalling búinn að taka sig saman í andlitinu og hélt vörninni á floti. Fellaini og Carrick komu sterkir til hjálpar og Ashley Young átti bara prýðisleik. En Arsenal fékk samt færin og það var sem fyrr De Gea semhélt liðinu á floti með öruggum markvörslum.

Önnur skipting United kom á 75. mínútu. Robin van Persie var búinn að vera ósýnilegur í leiknum og James Wilson kom inná. Wilson hlýtur að byrja næsta leik gegn Hull.

Sókn Arsenal þyngdist og United bakkaði. Það var samt augljóst hvað United spilaði uppá. Rooney og Di María voru sífellt að hreyfa sig frammi við miðju og það bar árangur á 86. mínútu. Arsenal voru orðnir of gráðugir og þegar boltinn barst til Fellaini rétt utan teigs þurfti ekki nema eina nákvæma sendingu frá honum á Di María og Ángel og Rooney voru komnir tveir á móti einum. Di María sendi á Rooney sem spilaði inn í teig og vippaði létt yfir Damian Martinez varamarkvörð Arsenal. Sigurinn þá í höfn, en ekki alveg.

Vegna mikilla meiðsla í seinni hálfleik bætti dómarinn við heilum átta mínútum. United var næstum komið í 3-0 með spegilmynd af öðru markinu, stunga Rooney á Di María sem var á eigin vallarhelming með engan Arsenal mann milli sín og markmanns. Di María fór alla leið uppí teig, en í stað þess að leika á markmanninn reyndi hann vippuna og hún fór framhjá.

Það fór því um mann þegar Arsenal skoraði strax. Giroud komst í of gott færi og De Gea náði aðeins að stýra þrususkotinu í netið. Síðustu þrjár mínúturnar voru þrungnar spennu en sigurinn var United.

Þetta er einn svakalegasti, og fyndnasti leikur sem ég hef séð. United mætti til leiks með hálfvængbrotið lið eins og svo oft áður, náði engan veginn upp neinu spili, en fór með öll stigin heim. United skoraði tvö mörk en áttu ekki nema eitt skot á rammann. Það voru sem fyrr segir nokkrir leikmenn sem stóðu sig þokkalega, aðrir sem voru arfaslakir og einn sem var lang-, lang-, LANGbestur

 

Engu að síður var Louis van Gaal ekkert að missa sig í hrósinu. Hann sagði jú De Gea hafði verið mjög góðan í viðtali við Sky, en við blaðamenn sagði hann líka

Van Gaal not totally satisfied with De Gea. Says he has many qualities but needs to improve in other areas. "I'm not praising, believe me."

— Daniel Taylor (@DTathletic) November 22, 2014

Þar á Louis án efa við boltadreifingu De Gea sem má bæta sig á því sviði Engu að síður segi ég:

Semja við hann! Strax!

Við þurfum þennan markmann næstu 15 árin!