Rauðu djöflarnir

Lið United

Varamenn: Butland, Maguire, Malacia, Williams, Eriksen, Pellistri, Sancho, Sabitzer, Weghorst

Antony átti að koma United yfir eftir mínútu en skot hans frá teig fór rétt framhjá og tveimur mínútum síðar sendi Lindelöf of laust á Wan-Bissaka og Mitoma komst á milli, innfyrir og skaut svo beint í höfuðui á De Gea. Hann fékk aðhlynningu í nokkrar mínútur og hélt áfram .

Fyrri hálfleikurinn var ágætur hjá báðum liðum, United fékk þokkaleg færi án þess að nýta neitt þeirra en Brighton voru ferskir að vanda. 0-0 nokkuð sanngjörn staða í hálfleik.

Seinni hálfleikur var svipaður, Andre Marriner setti smá svip á leikinn með furðulegum dómum en fátt markvert gerðist, fyrr en De Gea varði tvö langskot á lokamínútunum og svo enn eitt þegar Brighton gerði harða hrið að markinu. En VAR skoðaði aðdragandann, Marriner fór í skjáinn og dæmdi réttilega að Luke Shaw hefði slæmt hendi í boltann.

Mac Allister gerði engin mistök og í stað þess að fá mikilvægt stig tapaði United mikilvægum leik. Pressa Brighton síðustu mínútur leiksins gaf sigurinn.

 

Embed from Getty Images

Manchester United mætir Brighton öðru sinni á stuttum tíma, að þessu sinni í ensku úrvalsdeildinni og í Brighton. Sigurinn gegn Aston Villa um síðustu helgi var gott skref í átt að Meistaradeildarsæti á næstu leiktíð og sigur á morgun myndi gera stöðuna enn betri.

Litlar breytingar eru á ástandi leikmanna United eftir helgina, sem eru góð tíðindi þar sem töluverð meiðsli hafa hrjáð hópinn síðustu vikur. Harry Maguire var varamaður gegn Aston Villa og verður það líklega áfram þar sem þeir Viktor Lindelöf og Luke Shaw hafa haldið hreinu í tveimur af þeim þremur leikjum sem þeir hafa leikið saman sem miðverðir.

Staðan gæti farið að batna verulega og á fréttamannafundi í morgun gaf Erik ten Hag til kynna að Raphael Varane gæti orðið leikfær í næstu viku. Hann yrði þar með væntanlega á undan Scott McTominay í röðinni. Áfram er beðið eftir Alejandro Garnacho sem hefur æft undanfarna viku en telst ekki enn leikfær. Þá var haft eftir Donny van der Beek í vikunni að endurhæfing hans gengi vel, þótt ekkert sé minnst á annað en hann verði frá út leiktiðina.

Stærstu ákvarðanir ten Hag snúast væntanlega um hvernig hann hreyfir við liðinu til að halda öllum ferskum. Markus Rashford hefur byrjað frammi í síðustu tveimur leikjum og um helgina byrjaði Marcel Sabitzer á miðjunni en Christian Eriksen var hvíldur.

Af leikmönnum Brighton er það að frétta að framherjinn Evan Ferguson fer í læknisskoðun fyrir leik en hann hefur verið frá síðan um miðjan apríl. Joel Veltman fór meiddur út af í 6-0 sigrinum á Wolves um helgina og verður vart með.

United hafði betur gegn Brighton í undanúrslitum enska bikarsins fyrir tíu dögum eftir vítaspyrnukeppni. United hefur annars ekki gengið sérstaklega vel gegn Brighton, tapið á Old Trafford í fyrstu umferð deildarinnar í haust situr eflaust enn í mörgum.

Í tölfræði samantekt á vef Brighton er þó vikið að öflugri vörn United og bent á þá staðreynd að liðið hefur ekki fengið á sig mark í 26 leikjum í vetur, þegar allar keppnir eru taldar með. Aðeins Barcelona, sem haldið hefur hreinu 27 sinnum, er með betri árangur í Evrópu.

United er fyrir leikinn í fjórða sæti með 63 stig úr 32 leikjum. Brighton er í áttunda sæti með 52 stig úr 31 leik. Liðið er því tæknilega enn í baráttu um Meistaradeildarsæti og sannarlega í bullandi baráttu um Evrópusæti. Eftir úrslit síðustu helgar er Liverpool það lið sem helst á möguleika á að elta United, það var með 56 stig úr 33 leikjum þegar leikur þess gegn West Ham hófst í kvöld en West Ham er mótherji United næsta sunnudag.

Sigur gegn Brighton yrði því stórt skref í átt að Meistaradeildarsæti. Leikurinn hefst klukkan 19:00.

Embed from Getty Images

Manchester United virtist ætla að halda áfram að auka ógæfu Tottenham og fara langt með að klára baráttuna í meistaradeildarsæti þegar liðið var 0-2 yfir í hálfleik á Hotspur Way í kvöld. Þversláin og orkuleysi kostaði United síðan tvö stig í seinni hálfleik.

Stærsta breytingin á byrjunarliði United síðan í bikarleiknum gegn Brighton var að Anthony Martial var settur á bekkinn. Jadon Sancho kom inn á vinstri kantinn og Marcus Rashford fór fram. Harry Maguire meiddist á æfingu og var því ekki í hóp en Bruno Fernandes náði sér af meiðslum sem hann hlaut gegn Brighton.

Augun voru þó á Tottenham sem á sunnudag steinlá 6-1 gegn Newcastle, henti í kjölfarið út bráðabirgðastjóranum og bað Ryan Mason um að redda málum út tímabilið.

United komst yfir strax á sjöundu mínútu. Boltinn varst til vinstri í teignum á Sancho, sem tók eina snertingu til hægri og sendi boltann í fjærhornið. Hann fékk sambærilegt færi mínútu síðar, reyndar tvö í sömu sókninni. Varnarmenn Spurs komust fyrir fyrra skotið, hið seinna var skallað frá á marklínu.

Manchester United spilaði ljómandi vel í fyrri hálfleik. Leikmenn liðsins voru yfirvegaðir og öruggir með boltann og náðu þannig yfirleitt alltaf að búa sér til nægt svæði til að senda á samherja. Eftir hálftíma var liðið búið að eiga tæplega 100 fleiri sendingar en mótherjarnir. Það var líka áhugavert að sjá færslurnar í sókninni, Aaron Wan-Bissaka var oft hlaupinn inn á miðjan teiginn.

Sjáumst í sumar

Tottenham liðið var hálf sofandi, ef frá er skilinn Richarlison sem með hraða og styrk olli Viktor Lindelöf nokkrum vandræðum. Blessunarlega voru samherjar hans þó alltaf skrefi á eftir þegar hann náði að senda boltann fyrir markið.

Á 43. mínútu slapp Ivan Perisic inn fyrir vörn United vinstra megin. Í stað þess að stýra boltanum skaut hann föstu skoti beint á De Gea. United vann frákastið niður í horninu og Bruno átti langa sendingu fram á Rashford sem hafði betur í kapphlaupi vil Eric Dier, komst inn á teiginn til vinstri og hamraði boltann í netið.

United var því með öll tök á leiknum í hálfleik og einhverjir Spurs bauluðu á lið sitt. Stuðnignsmenn United höfðu hins vegar sungið „sjáumst í júní“ til Harry Kane.

Taflið snýst við

En liðin skiptu um hlutverk í hálfleik og strax í þeim seinni hófst stórsókn Tottenham. Spurs fékk strax tvær góðar hornspyrnur og svo færi fljótlega upp úr þeirri þriðju. Öryggið og þolinmæðin sem einkennt höfðu leik United umbreyttist í værð og kæruleysi. Návígin og kapphlaupin fóru að tapast, sendingarnar urðu lausar og ekki á samherja.

Eftir tíu mínútur í seinni hálfleik kom frábær skipting yfir til vinstri á Perisic, sem var þar með mikið svæði. Hann sendi fyrir markið og svo virtist sem stuggað væri við Richarlison við markið. United náði þó ekki að koma boltanum frá heldur barst hann út til Pedo Porro sem hamraði hann upp í nærhornið.

Sagan hefði verið önnur ef United hefði nýtt færið sem gafst í næstu sókn. United fór í góða sókn, Bruno fékk boltann í vítateigsboganum, klobbaði varnarmann á leið á marki en lyfti svo boltanum í þverslána. Wan-Bissaka fékk færi til að fylgja á eftir en náði ekki krafti í skallann og Spurs bjargaði í horn.

Gagnslausar skiptingar

Erik ten Hag taldi sig eflaust vera að grípa inn í þegar hann skipti Sancho og Eriksen út af á 61. mínútu fyrir Fred og Anthony Martial. Eriksen hafði stýrt leik United í fyrri hálfleik en var mögulega farinn að þreystast. Sancho hafði átt ágætar rispur upp vinstri kantinn. Skemmst er frá því að segja að hvorki Martial né Fred náðu nokkru sambandi við leikinn, aðeins 71% sendinga Fred rataði á samherja sem var lægsta hlutfallið hjá útileikmanni United í kvöld.

Ten Hag skipti síðar Anthony, sem lítið sást til og Wan-Bissaka, sem gaf Perisic alltof mikið pláss ,út tíu mínútum síðar fyrir Tyrrell Malacia og Wout Weghorst. Hlutverk Weghorst virtist þó óljóst, hann var oftast í kringum við miðjuna og lagði sig vissulega fram í varnarhlutverki en hvort hann var besti kosturinn í það eða hvað ten Hag var að hugsa þá stundina verður hann að svara fyrir.

Tottenham fékk áfram að sækja, rétt fyrir seinni skiptinguna skallaði Dier framhjá eftir að hafa verið frír á markteig. Það kom því ekki á óvart þegar Tottenham jafnaði á 79. mínútu. Rashford tapaði skallaeinvígi eftir útspark de Gea, boltinn fór beint til Kane sem renndi honum yfir á fjærstöngina þar sem Heung-min Son kom aðvífandi og skoraði.

United átti heldur meira í leiknum síðustu tíu mínúturnar en varð aldrei verulega ógnandi. Síðasta færið kom á 93. mínútu Luke Shaw vippaði boltanum yfir á fjærstöng á Casemior sem skallaði yfir.

Hver er þá staðan?

Það er verulega súrt að hafa misst niður tveggja marka forskot í mikilvægum leik. Þótt vikan hafi verið full af fréttum um vandræði í herbúðum Tottenham er staðreyndin samt sú að Lundúnaliðið er það lið sem til þessa hefur helst hefur bankað á dyrnar að ýta Manchester United út úr Meistaradeildarsæti. Sigur í kvöld hefði gefið United níu stiga bil og tvo leiki til góða. Sex stiga bil og tveir leikir til góða er samt ekki slæm staða. Fleiri lið eru þó í kring, til dæmis Liverpool sem er sjö stigum frá United sem á þó líka leik til góða þar. Úrslitin eru heldur ekki hjálpleg í baráttunni við Newcastle um þriðja sætið. Newcastle er á mikilli siglingu, vann Everton 4-1 í kvöld og er þar með 10-2 markatölu í síðustu tveimur leikjum. Newcastle er þremur stigum á undan en United á leik til góða. Eitt þeirra liða sem er í eltingaleiknum, Aston Villa, er næsti andstæðingur United á Old Trafford á sunnudag.

En þótt United eigi alla þessa leiki inni þá eru það stig sem engan vegin eru í hendi. Það eru þreytumerki á leik liðsins, og kannski að undra miðað við að hópurinn var kannski aldrei sérstaklega breiður auk þess sem töluvert er um meiðsli um þessar mundir. Orkuleysið í seinni hálfleik í kvöld var algjört. Kannski er það lukka að Evrópudeildin er úr sögunni þannig ekki þurfi að berjast í henni í miðri viku svo leikmenn geti dregið andann milli deildarleikja.

Erfitt er að nefna einstaka leikmenn United fyrir góðan leik í kvöld. Þeir spiluðu allir frábæran fyrri hálfleik en afleitan seinni.

Lið United: De Gea, Wan-Bissaka (Malacia 71), Lindelöf, Shaw, Casemiro, Eriksen (Fred 61), Bruno, Sancho (Martial 61), Anthony (Weghorts 71), Rashford.