Rauðu djöflarnir

Lesefni Slúður

Hvað er að frétta?

skrifaði þann | 6 ummæli

Ef það er eitthvað að gerast hjá United þessa daga fer það fram bak við tjöldin. Louis van Gaal er auðvitað á fullu að vinna með Hollendingum fyrir HM og við reiknum fastlega með að Ed Woodward sé að vinna á fullu í leikmannamálum.

Það er rétt að benda á að það að undirritaður tók þátt í sérstakri hringborðsumræðu í podkasti hjá kollegum okkar á kop.is. Þar var, aldrei þessu vant, lítið sem ekkert talað um Liverpool og fókusinn aðallega á United og önnur lið í deildinni. Þess virði að kíkja á það fyrir þá sem eru í algjöru svelti hvað varðar umræðu um enska boltann.

Það er líklega helst að frétta af United að Malcolm Glazer, faðir Glazer-fjölskyldunnar, lést í gær, 85 ára að aldri. Hann fékk heilablóðfall fyrir nokkru. Ólíklegt er að þetta hafi mikil áhrif á eignarhald United eða starfsemi félagsins þar sem synir hans Avram og Joel hafa að mestu séð um eignarhald Glazeranna á Manchester United. Menn hafa tekið þessum fregnum misvel, eigandi Derby telur að Glazerarnir hafi rutt brautina fyrir aðra erlenda eigendur á meðan Twitter var ekkert sérlega fallegur staður svona rétt á meðan fregnir af fráfalli Malcolm Glazer voru að brjótast út.

Það er lítið kjöt á beinunum hvað varðar leikmannamál, að minnsta kosti opinberlega. Louis van Gaal endaði auðvitað áhuga United á Toni Kroos og við gerum fastlega ráð fyrir því að eltingarleikurinn við Luke Shaw haldi áfram en fregnir hafa borist af því að það verði klárað eftir Heimsmeistarakeppnina. Eitthvað hefur verið hvíslað um að United hafi áhuga á Fabregas og Marca greindi frá því í gær að David de Gea sé á fullu að sannfæra Fabregas um að ganga til liðs við United. De Gea var auðvitað virkur í því að fá Mata til liðs við félagið í janúar, ekki slæmt að hafa svona markmann sem moonlightar sem umboðsmaður. Í vikunni var Twitter fullt af sögusögnum að United ætli sér að kaupa Miranda, miðvörð Atletico Madrid, en svo hefur ekkert heyrst meira af því.

Það verður líka þess virði að fylgjast með hollenska landsliðinu á HM, ekki bara til þess að sjá Louis van Gaal að störfum heldur einnig til að fylgjast með mögulegum leikmönnum United. Slúðrið á Englandi segir að van Gaal vilji fá miðvörðinn Bruno Martins Indi og Jordan Clasie frá Feyenoord en þeir munu báðir taka þátt í HM. Það eru þá hæg heimatökin fyrir van Gaal ef hann hefur áhuga á þessum leikmönnum.

Það hafa margir orðið til að spá í hvað við þurfum í sumar. Michael Cox frá Zonal Marking er ansi naskur sérfræðingur og greinir hvað United gæti þurft.

Við vonum auðvitað að hægt verði að klára eitthvað fyrir HM en við verðum þó ef til vill að sætta okkur við það að HM muni líklega koma í veg fyrir það.

Leikmenn Pistlar

Ryan Giggs 1991-2014

skrifaði þann | 9 ummæli

Ferguson & Giggs„My first sight was of him floating over the pitch so effortlessly you would have sworn his feet weren’t touching the ground. He carried his head high and looked as relaxed on the park as a dog chasing a piece of silver paper in the wind“.

Þegar kemur að tilvitnum úr sögu Manchester United eru það líklega aðeins togaraeltandi mávar sem slá þessi orð Sir Alex Ferguson af toppnum. Það þarf varla að kynna Ryan Giggs fyrir ykkur. Stór hluti stuðningsmanna Manchester United þekkir ekki lífið án Ryan Giggs og hefur fylgt þessum frábæra leikmanni alla tíð.

Ryan Giggs ungurRyan Giggs skrifaði undir atvinnumannasamning við Manchester United 1. desember 1990, tveim dögum eftir 17 afmælisdag sinn og lék sinn fyrsta leik fyrir aðalliðið fjórum mánuðum seinna, 2. mars 1991. Frá því að Sir Alex Ferguson tók við United hafði hann lagt ofuráherslu á að byggja aftur upp unglingastarf liðsins sem fyrri stjórar höfðu leyft að drabbast niður. Tveim árum fyrr höfðu nokkrir ungir strákar komið fram þegar erfiðlega gekk veturinn 1988-9 og heillað stuðningsmenn en enginn þeirra náði árangri sem heitið gat, utan að Mark Robins og Lee Martin hjálpuðu til við að vinna bikarinn 1990. Ryan Giggs var fyrsta merkið um að eitthvað væri virkilega að gerast meira á unglingasviðinu.

Frá fyrsta leik vissu stuðningsmenn að þarna var á ferðinni einstakur leikmaður. Þetta fyrsta vor hans var hann þó ekki í aðalhlutverki. Lee Sharpe var eldri og enn stjörnukanturinn í hópnum. Sharpe hélt Giggs utan við hópinn í úrslitaleiknum í Evrópukeppni bikarhafa, en það var líka í síðasta skipti sem það var.

Árið eftir, 1992,  var ár vonbrigðanna og United missti af titlinum. En Ryan Giggs var fastamaður í liði United, var valinn ungi leikmaður ársins af leikmönnum og sló taktinn fyrir næstu ár. Titlarnir röðuðust inn og glæsimörkin komu hvert á fætur öðru.

Hápunkti var náð þann 14. apríl 1999

https://www.youtube.com/watch?v=quI_LkMj4HI

Besta mark aldarinnar sögðu sumir og það er erfitt að mæla því í mót.

Ryan Giggs með Evrópubikarinn 1999Rúmum mánuði síðar var Manchester United búið að vinna þrennuna og Giggs var á hátindi ferilsins 25 ára að aldri sem hluti af ‘bestu miðju allra tíma’

Næstu tvö árin duttu fyrirhafnarlausir titlar inn, eitt ár í hlé og svo enn einn titillinn og þetta var allt svo auðvelt, þó að hann missti vissulega þó nokkuð af leikjum úr vegna meiðsla. En 2003 var Ryan Giggs orðinn þrítugur. og eins og United dalaði á milli 2003 og 2007 þá dalaði Ryan Giggs líka. Þó að hann hefði byrjað jógaæfingarnar sem fleyttu honum á endanum á fimmtugsaldur sem leikmanni þá voru meiðsli fyrri ára farin að setja á hann mark og hann missti hraða. Á þessum árum var hann oft skotmark þeirra sem voru að leita að ástæðum fyrir slöku gengi og ekki alltaf að ástæðulausu, þó að vissulega hafi hann liðið fyrir það að það var ekki verið að bera hann saman við aðra leikmenn, heldur hans eigin stórfengleik á fyrri árum.

En það er eðli frábærra leikmanna að geta aðlagast aðstæðum. Þegar Ronaldo var orðinn besti kantmaður í heimi og Manchester United fór að spila 4-3-3 með þá Tevez, Rooney og Ronaldo frammi (sem breyttist stundum í 4-0-6 eða 4-6-0) var orðið pláss fyrir Ryan Giggs á miðjunni sem séðan og útsjónarsaman leikstjórnanda sem þurfti minna á hraðanum að halda og var lykilmaður í liðinu sem vann titilinn þrjú ár í röð. Það verður þó að viðurkennast að það hafði meira með heiðurinn að gera, og það að enginn afgerandi framúrskarandi leikmaður var á sviðinu að Ryan Giggs var valinn leikmaður ársins 2009 af leikmönnum.

Ryan Giggs með Evrópubikarinn 2008Í millitíðinni hafði Giggs slegið heildarleikjamet Bobby Charlton þegar hann lék sinn 759. leik fyrir United, og valdi til þess ekki minna svið en úrslitaleik Meistaradeildar Evrópu vorið 2008 þar sem hann skoraði úr síðasta víti United í vítakeppninni og sá síðan Van der Sar færa United titilinn.

Það hefði einhver haldið að þarna væri hinn fullkomni endapunktur en því fór fjarri. Sex tímabil í viðbót, 204 leikir, 24 mörk og þrír titlar. Eftir þrjátíu og fimm ára aldur.

Og svo lauk hann ferlinum með að vera spilandi framkvæmdastjóri.

Það er hægt að ræða það fram og til baka hver hafi verið hæfileikaríkasti leikmaður United frá upphafi og hver var mesta goðsögnin. Var það Meredith? Edwards? Charlton? Law? Best? Robson? Cantona? Ronaldo? Giggs? Hver veit, hver kynslóð á sína goðsögn, hver aðdáandi sinn uppáhaldsleikmann og þar sem við erum Manchester United mun í framtíðinni bætast á þennan lista. Hitt er víst að stórkostlegasta og sigursælasta ferli nokkurs leikmanns í Englandi er lokið. Takk fyrir okkur, Ryan Giggs

Ryan Giggs

Lesefni Stjórinn

Viðbrögð tístheimsins

skrifaði þann | Engin ummæli

Það er rétt að minna á stórgóða yfirferð okkar um Louis van Gaal og hverju við megum vænta af honum á næstu tímabilum. Ráðning van Gaal er þó ekki eina stórfrétt dagsins því að Ryan Giggs var að leggja skónna sína á hilluna til þess að verða aðstoðarmaður van Gaal. Við munum gera ferli hans betri skil síðar meir en þangað til er ekki úr vegi að kíkja á hvað tístheimur hefur haft að segja um tíðindi dagsins:

Stjórinn

Louis van Gaal er nýr framkvæmdastjóri Manchester United *staðfest*

skrifaði þann | 6 ummæli

LVG

Louis van Gaal hefur verið ráðinn framkvæmdastjóri Manchester United. Samningur Van Gaal er til þriggja ára. Eftir fund Van Gaal og Ryan Giggs í Hollandi virtist ljóst að Ryan Giggs en ekki Patrick Kluivert yrði aðstoðarmaður Van Gaal og það er nú staðfest.

Þeim til aðstoðar verða Frans Hoek og Marcel Bout. Hoek er markmannsþjálfari Hollendinga nú og hefur áður séð um þjálfun markmanna á borð við Edwin van der Sar og Victor Valdez. Marcel Bout verður aðstoðarþjálfari með áherslu á kortlagningu andstæðinganna og var m.a. með Van Gaal hjá Bayern og hélt þar áfram þó Van Gaal hætti og var fram á síðasta ár.

Um ráðninguna hefur Van Gaal þetta að segja

It was always a wish for me to work in the Premier League. To work as a manager for Manchester United, the biggest club in the world, makes me very proud. I have managed in games at Old Trafford before and know what an incredible arena Old Trafford is and how passionate and knowledgeable the fans are. This club has big ambitions; I too have big ambitions. Together I’m sure we will make history.

Sagt var að Manchester United hefði haft samband tveim vikum áður en Moyes var rekinn en Van Gaal vildi ekki við þá tala fyrr gengið hefði verið frá þeim málum. Fljótlega eftir að Moyes var rekinn komu fyrstu fréttir um að samkomulag hefði náðst og síðustu þjár vikur hafa farið í endalaust slúður. en ekkert hefur verið staðfest fyrr en nú. Getum er leitt að í upphafi hafi United haft samband við aðra, sagt var að Ancelotti hafi verið boðinn samningur, og hugsanlega Guardiola, en fyrst þeir vildu ekki starfið er Van Gaal sá sem stendur uppi með pálmann í höndunum. Eða þannig.

Járnhásætið er gert úr sverðum fallinna óvina fyrri kónga. Er það þannig úr garði gert að aldrei er hægt að slaka á án þess að særast af beittu sverði.
Járnhásætið er gert úr sverðum fallinna óvina fyrri kónga.
Er það þannig úr garði gert að aldrei er hægt að slaka á án þess að særast af beittu sverði. @ShamusMcoy

Van Gaal mun taka við Manchester United eftir að Hollendingar falla úr keppni á HM (nú, eða vinna styttuna). Þó er þess vænst að hann sé búinn að fá United innkaupalista til að fara eftir enda hefur leikmannaslúður verið á fullu þessar vikur. Meðal þess sem slúðrað hefur verið er að Van Gaal ku líta helst til Þýskalands með þessi kaup, svo sem þá Kroos og Mats Hummels en fyrst mun United koma með betra boð í Luke Shaw eftir að 27 milljón punda boðinu var hafnað. Nú á að reyna 30 milljónir. Svo hafa hollensk nöfn verið að dúkka upp. Kevin Strootman er meiddur fram á síðsumar eftir frábært tímabil með AS Roma. Strootman fór til Roma fyrir 17m evra eftir að United hafði fylgst með honum í áraraðir. Moyes vildi hann ekki þá en nú er talað um allt að 40m evra boð. Dýr töf það ef af verður. Bruno Martins Indi er 22 ára miðvörður í hollenska landsliðinu og Van Gaal ku vilja hann lílka.

En nóg um það og meira um Van Gaal.

Van Gaal vinnur Meistaradeildina með Ajax
Van Gaal vinnur Meistaradeildina með Ajax

Aloysius Paulus Maria van Gaal er 62 ára Hollendingur. Ferill hans sem leikmaður var ekki merkilegur, lengst var hann hjá Sparta Rotterdam. Eftir að hafa lokið ferlinum hjá AZ Alkmaar gerðist hann aðstoðarstjóri þar og síðar hjá Leo Beenhakker hjá Ajax. Hann tók við framkvæmdastjórastöðunni af Beenhakker árið 1991 og stýrði félaginu gegnum seinni gullaldarár þess. Undir hans stjórn varð Ajax þrisvar meistari, vann UEFA bikarinn, komust í úrslit í Meistaradeildinni árin 1995 og 1996. Fyrra árið vann Ajax Milan í úrslitum 1-0 með marki Patrick Kluivert sem einmitt verður ekki aðstoðarstjóri Van Gaal hjá United þrátt að líkur væru á því í upphafi. Þetta Ajax lið var eitt skemmtilegasta lið tíunda áratugarins og að langmestu leyti byggt á hollenskum leikmönnum, flestum uppöldum. Eftir sigurinn í Meistaradeildinni hirti Ajax síðan bæði Ofurbikar Evrópu og heimsbikar félagsliða. Árið eftir töpuðu þeir svo úrslitaleiknum í vítaspyrnukeppni gegn Juventus.

Van Gaal gerði Pujol að fyrirliða Barcelona
Van Gaal gerði Carles Pujol að fyrirliða Barcelona í seinna skiptið sem hann var hjá Barcelona

Eftir þetta sigurtímabil þar sem hann var að láta allar þessar tilvonandi stórstjörnur spila dúndurskemmtilegan fótbolta tók hann við Barcelona árið 1997. Tveir titlar komu í hús en honum fannst erfitt að koma sínu leikskipulagi fram gegn ‘Barcelona stílnum’, samband hans við blaðamenn var stirt og eftir að hafa tapað titlinum til Deportivo vorið 2000 sagði hann upp störfum og tók við hollenska landsliðinu. Meðal þeirra sem stigu sín fyrstu skref í Barcelona liðinu undir stjórn Van Gaal var 18 ára gutti að nafni Xavier Hernandez, betur þekktur einfaldlega sem Xavi.

Ekki gekk þessi stefnubreyting Van Gaal sem skyldi, hollenska landsliðinu mistókst að komast á HM í fyrsta sinn í 16 ár og Van Gaal hætti. Vorið 2002 var uppi orðrómur að hann myndi taka við United þegar Sir Alex hætti þá um vorið eins og áætlað var. Sir Alex hætti auðvitað ekki og af þessu varð ekki. Í stað þess fór Van Gaal aftur til Barcelona haustið 2002. Sú vera var enn endasleppari en sú fyrri. Liðið sýndi afspyrnuslakan árangur og stjórnin gafst upp og rak Van Gaal í janúar 2003 þegar liðið var þrem stigum frá fallsæti. Van Gaal tókst þó að sýna traust sitt á efnilega unga menn. Í þetta sinn hét 18 ára unglingurinn sem Van Gaal gaf tækifærið Andrés Iniesta.

Þá var komið að smá endurnýjun, næsta stopp AZ Alkmaar og  fjögur ára vera hans þar endaði á að skila deildartitli þar 2009. Þetta var nóg til að næsta stórlið bankaði uppá, München var næsta stopp. Fyrra ár hans með Bayern var gott, hann notaði unga leikmenn, skilaði meistaratitli og tapaði Meistaradeildarúrslitum fyrir Inter. En næsti vetur gekk ver, og endaði á að honum var sagt upp störfum.

Þá var bara að taka við Hollandi aftur, og í þetta sinn hefur það gengið betur, Holland vann alla leiki utan einn í undankeppni HM og Van Gaal verður með þá á HM í sumar.

Tottenham hefur verið að bera víurnar í Van Gaal í vetur og í þeirra herbúðum finnst mönnum sem Van Gaal hafi aldrei gefið svar af því hann hafi verið að bíða eftir akkúrat þessu: Að Moyes yrði rekinn og Van Gaal fengi tækifærið sem gekk honum úr greipum 2002. Slúðrið segir að auki að Robin van Persie hafi sagt Van Gaal að bíða með að taka við Spurs, það gæti dregið til tíðinda. Van Gaal þykir enda líklegur til að verðlauna Van Persie með fyrirliðabandinu.

Ef horft er á feril Van Gaal standa nokkrir hlutir upp úr. Hann kann að vinna titla, óhræddur við að nota unga leikmenn og hefur haldið tryggð við sitt leikskipulag, sem byggir á sóknarbolta og miklu spili. Allt þetta er eitthvað sem við viljum að stjóri Manchester United hafi. Van Gaal er að auki þekktur fyrir að lenda upp á kant við a.m.k. eina stórstjörnu í hverju liðið (Rivaldo, Luca Toni) og persónlega mætti hann alveg rífast svolítið í Rooney. Enda virðist nú ólíklegt að Rooney verði fyrirliði, enda leggur Van Gaal mikið uppúr því að fyrirliði hafi persónuleika sem honum líkar við. Óhollendingslegri leikmann en Rooney er erfitt að ímynda sér og það er fyrir Hollendingur sem Van Gaal þekkir vel.

Á hinn bóginn er ljóst að ferill hans er fjarri því laus við galla og jafnvel þó hann væri yngri en 62ja ára sæi ég ekki fyrir mér að hann yrði langtímastjóri með haug af titlum. Van Gaal er þekktur fyrir að nýta 4-3-3 með senter og tveim köntum og leggur áherslu á tíuna, annað hvort sem annan senter eða þriðja miðjumann og svo tvo á miðjunni. Mata og Rooney ættu að berjast um tíuna, en eitt er víst: Fyrirliðinn Robin van Persie mun ekki þurfa að kvarta.

Frekari lesningu má að sjálfsögðu finna víða á víðlendum Alnetsins:

Hér er nýleg greining á því hvernig hann gæti látið United spila, FourFourTwo skrifaði um Van Gaal síðasta haust, tók saman feril hans og hvernig hann vill að knattspyrna sé spiluð og síðan er hægt að lesa langt og ansi áhugavert viðtal við hann sjálfan frá AZ árunum þar sem einnig er kafað er í taktík.

Árið 1997 kom út bók þar sem Van Gaal og fleiri þjálfarar frá Ajax fóru yfir þjálfunaraðferðir. Daily Telegraph birtir útdrátt úr bókinni.

Hlustum að lokum á viðtal við Van Gaal frá í vetur þar sem hann fer yfir það hvers vegna hann sé einn af þeim bestu

Það verður sannarlega spennandi að fylgjast með Van Gaal takast á við stjórastöðuna hjá ‘stærsta klúbbi í heimi’ eins og hann kallaði United í síðustu viku. Eitt ætti að vera nokkuð öruggt: United ætti ekki að spila leiðinlega knattspyrnu og við vonum hann hafi jafnmikinn áhuga á ungum leikmönnum og þetta myndskeið bendir til.

Louis_van_Gaal_en_Willem_van_H_c9db43e506af3030655bd0d1acb58c60[1]

Leikmenn Pistlar

Rio og Vidic

skrifaði þann | 2 ummæli

Það er ansi margt að gerast á Old Trafford þessa dagana. Á næstu dögum verður nýr stjóri kynntur til leiks og stjórnin virðist vera á fullu í að vinna að leikmannamálum og þjálfaramálum. Samningaviðræður eru í gangi um kaup á Luke Shaw frá Southampton, auk þess sem að svo virðist sem Phil Neville og Chris Woods séu á förum frá félaginu. Einnig eru sögusagnir um að Rene Meulensteen verði í þjálfarateymi Louis van Gaal, það yrði frábær viðbót enda Rene einn af arkítektunum á bakvið spilamennsku United þegar hún var upp á sitt besta frá ca. 2006-2010.

Þetta eru hinsvegar allt sögusagnir og óstaðfest, í bili í það minnsta. Það sem er hinsvegar á kristaltæru er það að Rio Ferdinand og Nemanja Vidic eru á förum frá félaginu. Vidic er á leiðinni til Inter Milan og óvíst er hvort að Rio leggi skóna á hilluna eða hvort hann haldi áfram að spila. Þessir tveir leikmenn hafa verið miklir máttarstólpar í vörn United frá því að þeir gengu til liðs við félagið og m.a. vegna hversu traustir varnarmenn þeir voru gátu leikmenn eins og Ronaldo, Rooney, Tevez, Berbatov, Nani og fleiri leikið lausum hala fram á við. Það er því ekki úr vegi að renna aðeins yfir feril þeirra hjá United.

Rio Ferdinand

Rio Ferdinand braust fram á sjónarsviðið hjá West Ham United, einn af mörgum enskum gæðaleikmönnum sem komið hafa þaðan. Þaðan fór hann til Leeds árið 2000 og var mikilvægur hluti af Leeds-liðinu sem var mjög sterkt á þeim tíma, gerði harða atlögu að enska titlinum og komst m.a. í undanúrslit UEFA-bikarsins og Meistaradeildarinnar tímabilin 1999/2000 og 2000/2001. Það var hinsvegar dýrt spaug fyrir liðið enda er það enn þann dag í dag að greiða reikninginn fyrir þetta tímabil í sögu félagsins. Eftir að liðinu mistókst að komast í Meistaradeildina þurfti að selja leikmenn og Sir Alex Ferguson var ekki lengi að grípa það tækifæri. Eftir HM í S-Kóreu og Japan þar sem Ferdinand hafði verið einn af betri leikmönnum Englands. Manchester United keypti Rio á 30 milljónir punda og varð hann þar með dýrasti leikmaður í sögu United og dýrasti varnarmaður í heiminum.

riosaf

Ferdinand varð mikilvægur leikmaður fyrir Manchester United en fyrst um sinn átti hann í nokkrum erfiðleikum, hann var mikið meiddur á fyrsta tímabilinu og í upphafi tímabilsins 2002/2003 missti hann af lyfjaprófi og var dæmdur í 8-mánaða bann, þrátt fyrir að hafa boðist til þess að taka lyfjaprófið sama dag og hann átti að fara í það. Nokkuð harður dómur, sérstaklega í ljósi þess að mánuði áður hafði leikmaður Manchester City misst af lyfjaprófi en fengið aðeins 2000 punda sekt fyrir vikið. Knattspyrnusamband Englands hefur þó aldrei verið þekkt fyrir mikið samræmi og hefur líklega ákveðið að gera þyrfti jafn þekktan leikmann og Rio Ferdinand að fordæmi í þessum málum. Þetta gerði það að verkum að Rio missti af öllu leiktímabilinu og sneri ekki aftur á fótboltavöllinn fyrr en ári seinna.

Á þessum tíma var lið Manchester United í töluverðri lægð. Jose Mourinho umturnaði enska boltanum þegar hann tók við Chelsea og framtíðin virtist ekkert sérstaklega björt fyrir Rio og félaga. Roy Keane var til dæmis ekkert sérstaklega hrifinn af Rio Ferdinand. Í frægu viðtali við MUTV árið 2005 hraunaði hann allhressilega yfir nokkra leikmenn United í kjölfar 4-1 taps gegn Middlesboro. Viðtalið var aldrei sýnt en fljótt spurðist út um hverja hann hefði hann hefði verið að tala. Rio Ferdiand fékk víst hörðustu gagnrýnina og á Roy Keane að hafa sagt þetta um hann:

Just because you are paid £120,000-a-week and play well for 20 minutes against Tottenham, you think you are a superstar.

 

Ansi hörð orð sögð á þeim tímapunkti sem verður ekki lýst á annan hátt en að hafa verið lægsti punktur í sögu stjóratíðar Sir Alex Ferguson. Þegar neyðin er stærst er hjálpin næst segir einhverstaðar og skömmu eftir að Roy Keane hélt til Celtic keypti Sir Alex ákveðin ungan serbneskan miðvörð. Fram að því hafði Rio Ferdinand tæpast haft við hliðin á sér miðvörð í háum gæðaflokki. Mikael Silvestre, Laurent Blanc, Wes Brown og John O’Shea höfðu allir skipt stöðunni með sér en enginn þeirra náði að eigna sér stöðuna við hliðina á Rio á afgerandi hátt. Blanc var of gamall, O’Shea of fjölhæfur, Brown of brothættur og Silvestre ekki nógu góður. Það var ekki fyrr en Nemanja Vidic steig fram á sjónarsviðið að eitt besta miðvarðapar allra tíma varð til.

Nemanja Vidic

Sir Alex kom flestum að óvörum þegar tilkynnt var um kaupin á serbneskum miðverði frá Spartak Moskvu sem enginn hafði heyrt um. Vidic kom til liðsins í janúarglugganum 2006 fyrir 7 milljónir punda og fæstir bjuggust við miklu af honum til þess að byrja með. Hann kom á sama tíma og Patrice Evra til félagsins og fyrsti alvöru leikurinn þeirra var Manchester-slagurinn. Þeir áttu báðir skelfilegan leik og liðið tapaði 4-1. Fátt benti til þess að Nemanja Vidic myndi verða lykilmaður Manchester United um ókomna tíð. Rio sjálfur hafði efasemdir um Vidic í fyrstu eins og hann lét í ljós á Facebook eftir að Vidic var kvaddur:

It took time for us to grow into a dominant force after a start where even I questioned if he was right guy to come in after his first few training sessions!

 

Bæði Vidic og Patrice Evra hafa sagt hvað fyrstu mánuðirnir hafi verið erfiðir fyrir þá. Vidic sagði þetta í nýlegu viðtali um erfiða byrjun þeirra félaga:

For us, the league was much quicker, the players were much stronger and in the first few weeks I found that really hard. I remember Patrice saying ‘can we succeed here? Maybe it is better for us to go back to the places we were at before. But afterwards, we start training harder and we got used to it.

 

Fyrsta tímabilið þeirra gekk brösulega saman en sem betur fer hafði Sir Alex trú á Vidic og tímabilið á næsta tímabili spiluðu þeir félagar lykilhlutverk í að endurheimta úrvalsdeildartitilinn eftir þriggja ára fjarveru hans frá heimahögunum. En á næsta tímabili voru Rio Ferdinand og Nemanja Vidic ekki lengi að smella saman. Það hjálpaði auðvitað mikið til að Sir Alex hafði loksins fundið arftaka Peter Schmeichel í markinu eftir mikið rót í þeirri stöðu þar sem Barthez og Howard voru einfaldlega ekki nógu góðir markmenn. Edwin van der Saar kom frá Fulham og Patrice Evra, líkt og Vidic, var búinn að hrista af sér slenið. Þessir fjórir ásamt Gary Neville og Wes Brown í hægri bakverðinum mynduðu afar stöðuga vörn þar sem miðverðirnir Vidic og Rio spiluðu stærsta hlutverkið.

vidicade

Á tímabilunum 2007 til 2010 fékk liðið á sig minna en 30 mörk í deildinni og tímabilið 2008-2009 fékk liðið ekki á sig mark í 14 leikjum í röð. Á því tímabili þar sem Rio og Vidic voru upp á sitt besta spilaði liðið besta varnarleikinn í deildinni og áttu þeir stóran þátt í velgengni liðsins á þessum tíma. Liðið vann Englandsmeistaratitilinn 2007,2008, 2009 og 2011, Meistaradeildina árið 2008 auk þess sem að komast í úrslit 2009 og 2011. Liðið vann deildarbikarinn 2006, 2009 og 2010 auk þess sem að liðið hampaði Heimsmeistaratitli félagsliða árið 2008. Allt þetta var byggt á öftustu varnarlínunni þar sem þessir félagar réðu ríkjum. Edwin van der Saar hafði þetta um þá félaga og varnarlínuna að segja:

I played with a lot of great defenders in my career, but I would say that the triangle with Rio and Vida was the best I had. I was much older and had the experience. With that, and the abilities of Rio and Nemanja, we were able to anticipate and help each other, and the relationship between the three of us worked very well.

 

Að mörgu leyti voru Rio og Vidic hið fullkomna miðvarðapar. Þeir bættu hvorn annan fullkomlega upp, Vidic var svokallaður no-nonsense varnarmaður. Gríðarlega öflugur í skallaeinvígum og tæklingum og las leikinn frábærlega, hann sá um skítverkin og bjarganirnar ef eitthvað slapp í gegn. Á móti kom að Rio var afslappaður og rólegur, alltaf á réttum stað til þess að stoppa hlutina ofar á vellinum. Ég efast um að við munum sjá betra miðvarðapar saman hjá Manchester United á nýjan leik. Sir Alex Ferguson sagði þetta um Rio og Vidic eftir tímabili 2007/2008 þar sem liðið vann deildina og Meistaradeildina og fékk aðeins á sig 22 mörk í deildinni:

I’ve always said the foundation for any championship-winning side is the defence. They’ve formed a great understanding. The secret is in their character, determination and attitude.

 

En því miður líður tíminn áfram og hann er algjörlega miskunarlaus. Eftir því sem þessir félagar urðu eldri misstu þeir eitt af því mikilvægasta sem varnarmaður í ensku úrvalsdeildinni getur haft, hraðann. Vidic varð fyrir slæmum meiðslum og Ferdinand, verandi eldri en Vidic, varð alltaf hægari og hægari.

And deeper and deeper. In fact, this is exactly what Rio Ferdinand has been doing in the past couple of years, and now Vidic has started doing it too. Those two were once the best defensive partnership in Europe – now, they only look comfortable when they can defend in the sanctity of the penalty box.

 

Þetta sagði Michael Cox um þá félaga árið 2011. Maður sá þá alltaf detta neðar og neðar á völlinn og það dró allt liðið neðar á völlinn. Þessi þróun hefur bara haldið áfram og ef til vill hefðum við átt að vera búin að kveðja þá félaga. Manchester United er miskunarlaus klúbbur þar sem ekkert gildir nema árangur, ef þú ert ekki nógu góður er þér fórnað fyrir næsta leikmann sem er nógu góður.

vidario

Núna eru þeir hinsvegar farnir og nú er loksins pláss fyrir Chris Smalling, Jonny Evans og Phil Jones að eigna sér þessar stöður í staðinn fyrir að vera sífellt í skugganum á Rio Ferdinand og Vidic. Þökk sé þeim vita þó þessir ungu arftakar þeirra væntanlega nákvæmlega hvað þarf að gera til þess að ná árangri.

Við sem höldum United tölum í sífellu um liðið sem vann Meistaradeildina árið 2008, hversu frábærlega sóknarsinnað það var, hversu frábæra knattspyrnu það spilaði, hversu góðir Wayne Rooney, Cristiano Ronaldo og Carlos Tevéz voru en ekkert af þessu hefði getað gerst nema fyrir þá staðreynd að fyrir liðið spilu bestu miðverðir í heiminum þess tíma. Varnarleikur þeirra gerði þessum leikmönnum kleyft að leika listir sínar fram á við. Fyrir það og allt það sem þeir gerðu fyrir United stöndum við í mikilli þakkarskuld við þá.

Ritstjórn Rauðu djöflanna óskar þeim velgengni hjá nýjum liðum og í hverju sem þeim munu taka sér fyrir hendur. Þeir munu alltaf fá hlýjar viðtökur á Old Trafford.

ferdavid