Rauðu djöflarnir

Meistaradeild Evrópu

Manchester United 1:1 Bayern München

skrifaði þann | 26 ummæli

1-1 úrslitin eftir hörkuleik. Þessi leikur var eiginlega skólabókardæmi um það hvernig á að spila gegn liðum undir Pep Guardiola. Byrja af krafti, spila svo hörkuvörn á meðan andstæðingurinn spilar boltanum á milli sín og reynir að finna glufur. Reyna svo eftir fremsta megni að sækja hratt og ná marki. Þetta gekk næstum því allt eftir. Næstum því.

Það er ýmislegt sem stendur upp úr í þessum leik.

Í fyrsta lagi: Danny Welbeck skoraði fullkomlega magnað mark á þriðju mínútu. Það var fullkomlega löglegt en dómarinn ákvað af einhverjum ástæðum að dæma það af vegna þess að varnarmaður Bayern setti andlitið á sjálfum sér í svona 1 metra hæð yfir jörðina. Það var ekki Danny Welbeck að kenna, langt í frá og við því rændir fullkomnri byrjun

Í öðru lagi: Danny Welbeck, sem spilaði þennar leik reyndar alveg frábærlega, komst í algjört dauðafæri gegn Neuer, eiginlega eins mikið einn á einn og hægt er að fá í fótboltanum. Hann reyndi hinsvegar að vippa yfir Neuer í staðinn fyrir að fylgja bara gömlu reglunni: Hægri fótur, hægra horn. Neuer er frábær markmaður og lætur ekki plata sig svona auðveldlega.

Í þriðja lagi: Hversu góður voru Jones og Büttner í þessum leik? Þeir gjörsamlega lokuðu á kantmenn Bayern í leiknum. Vidic og Rio stóðu sig einnig mjög vel. Þessi varnarlína reyndist mun betur en allir þorðu að vona.

Í fjórða lagi: Nemanja Vidic! Hversu fáranlega gott mark var þetta. Hann tók þennan skalla eins og Michael Jordan hefði verið með boltann og 4 sekúndur eftir í körfuboltaleik. Fyrirliðamark frá fyrirliðanum okkar og gæti reynst dýrmætt þegar uppi er staðið.

Í fimmta lagi: Augnabliks einbeitingarleysi í vörninni og Bayern náði í dýrkeypt útivallarmark. Sending barst fyrir, Mandzukicið skallað boltann út í teiginn þar sem Fellaini hafði ekki nennt að elta sinn mann. Bastian Schweinsteiger mætti á svæðið og hamraði hann upp í þaknetið.

Í sjötta lagi: Javi Martinez fékk gult spjald og er þar af leiðandi kominn í bann. Schweinsteiger fékk einnig rautt spjald á lokamínútunum og verður einnig í banni. Nú, þetta Bayern lið er auðvitað stútfullt af gæðum, það sást best þegar Götze kom inn á á meðan við settum Young inn á, en þessir leikmenn eru lykilmenn í liðinu og fínt að vera laus við þá í seinni leiknum eftir viku.

Eftir rúma viku höldum við því til München til að spila seinni leikinn með mun betri stöðu en nokkur maður þorði að vona. Menn afskrifa aldrei Manchester United og ef við náum að pota inn einu marki á Allinz-Arena er allt hægt. Meistaradeildar-Moyes sér um þetta fyrir okkur.

Liðin voru svona:

United

De Gea

Jones Rio Vidic Büttner

Valencia Carrick Fellaini Giggs Welbeck

Rooney

Bekkur:Lindegaard, Hernandez, Nani, Young, Fletcher, Januzaj, Kagawa.

Bayern

Neuer

Rafinha Javí Martinez Boateng Alaba

Lahm

Schweinsteiger

Robben Kroos Riberý

Müller

Bekkur: Starke – van Buyten, Mandzukić, Shaqiri, Pizarro, Götze, Højbjerg

Meistaradeild Evrópu

Evrópu- og Þýskalandsmeistarar Bayern München í heimsókn

skrifaði þann | 9 ummæli

Manchester United - Bayern München Það er 1. apríl 2014. Josep ‘Pep’ Guardiola leiðir lið sitt út á Old Trafford. Rúmt ár er liðið frá því að Sir Alex Ferguson hitti Guardiola á laun í New York þar sem Guardiola naut langþráðs frís frá fótboltastreði. Það var síðasta stórvirki Sir Alex Ferguson sem framkvæmdastjóri Manchester United að sannfæra þennan frábæra framkvæmdastjóra um að Project United væri nógu stórt og áhugavert til að hvíldin tæki enda.

Og nú erum við að sjá uppskeruna. Evrópumeistarar Bayern München koma í heimsókn á Old Trafford og nýkrýndir meistarar Englands og Þýskalands takast á í stórleik umferðarinnar. Það sáu flestir fyrir að Thiago Alcântara sem kom frá Barcelona til síns gamla stjóra myndi færa fjör í miðju United, en það hafa verið Diego Costa sem fæstir þekktu og kom frá Atlético og Gérard Pique sem sneri öllum að óvörum aftur á Old Trafford sem hafa verið lykillinn í sigurgöngu Manchester United sem nú hefur staðið óslitið frá áramótum.

Já alveg eins og Pamela í Dallas forðum erum við að vakna upp við það að það sem við héldum að væri ömurlegasti vetur í manna minnum var bara slæm martröð það er Josep ‘Bobby’ Guardiola sem er að koma út úr sturt… búningsklefanum í dag sem framkvæmdastjóri Manchester United.

Guardiola

Þetta var allt saman bara draumur.

Og svo vaknaði ég og það var bara draumur að þetta væri bara draumur.

Einhverra hluta vegna heillaði Bayern München, eignarhald, stjórn og unglingastarf þeirra Guardiola meira en hugsanleg sölumennska Sir Alex og niðurstaðan er sú að Bayern München hefur tryggt sér Þýskalandsmeistaratitilinn og ekki kominn apríl. Titillinn var í höfn þegar sjö leikir voru eftir sem er nýtt met í Þýskalandi. Gamla metið var sex leikir… sett af Bayern í fyrra. Bayern hefur ekki tapað leik í deildinni í vetur, gert þrjú jafntefli og þangað til þeir gerðu 3-3 jafntefli við Hoffenheim í mögnuðum leik um helgina höfðu þeir unnið síðustu 19 leiki (nýtt met), og unnið síðustu 10 útileiki (nýtt met). Í þessum nítján sigurleikjum skoruðu þeir tvö mörk eða fleiri í öllum. Nýtt met. Þeir þurfa að vinna fjó… æ nei ég nenni þessu ekki: Restin af metaslættinum er hér.

Í Meistaradeildinni er Bayern þegar búið að sjá á bak tveim enskum liðum, mættu Manchester City í riðlinum, unnu 3-1 í Manchester en töpuðu eina leik sínum á tímabilinu þegar City kom á Allianz Arena og vann 3-2.

Í 16 liða úrslitum slógu þeir svo Arsenal út með 2-0 sigri á Emirates og 1-1 jafntefli á Allianz.

Veðbankar eru að bjóða 5/1 á United sigur (sem lesist sem stuðull upp á 6 á íslenska mátann) sem eru verstu líkur á United heimasigri sem sést hafa í manna minnum.

Þannig að það sem til þarf á morgun er kraftaverk.

Thiago meiddist um helgina en annars gæti liðið sem ætlar að mala Manchester United mélinu smærra litið svona út, en þetta er liðið sem vann Hertha Berlin til að tryggja titilinn

Neuer

Rafinha Javí Martinez Dante Alaba

Lahm

Schweinsteiger

Robben Kroos Götze

Müller

Og þá eru ónefndir Franck Ribéry, Mario Mandžukić, Shaqiri og fleiri.

Guardiola hefur spilað mjög fjölbreyttar uppstillingar í vetur, vörnin og Lahm verið fastir punktar en að öðru leiti hefur hann verið óhræddur við að nota mismunandi uppstillingar.

Bæði Müller og Götze hafa spilað sem fremsti maður og þá sem ‘false nine’, dottið aftur þegar við á, Mandžukić er aðalsenterinn þegar spila á með alvöru slíkan, og Kroos hefur verið að stjórna leikjum undanfarið. Robben, Lahm, Mandžukić, Müller og Neuer voru allir hvíldir móti Hoffenheim, en Lahm, Mandžukić og Robben komu allir inn á þegar ekki gekk sem skyldi.

Og hvað gera United menn þá?

De Gea

Jones Carrick Vidic Rafael

Young Fellaini Fletcher Cleverley Welbeck

Rooney

Sumir hafa lagt til að spila 3-5-2 með Jones, Carrick og Vidic í vörninni, Rafael vinstra megin og Valencia hægra megin en það er ólíklegt að við sjáum það enda ekki taktík sem liðið er vant.

Rafael var verulega slakur á laugardaginn og fór svo útaf meiddur þannig það er spurning hvort hann verður með. Þá verður Büttner í bakverðinum sem er ekki beinlínis tilhlökkunarefni móti Arjen Robben.

Hreyfingar Mata og Kagawa á laugardaginn voru verulega skemmtilegar en eru ekki í boði á morgun þannig að ég skýt á að vinnusemi Welbeck og youngsemi Young verði fyrir valinu á köntunum og síðan verði hlaðið í þriggja manna miðju. Það væri gaman að sjá Giggs þar inni, en slúður um að ósætti sé milli hans og Moyes er nú að gerast háværara, þannig að þar er spurningamerki.

Ég sagði fyrir dráttinn að ég vildi sjá United fá Bayern, Real eða Barcelona og mér varð að ósk minni. Manchester United – Bayern München er risaleikur, nú er það verkefni David Moyes og leikmanna að standa undir nafni og sýna að þeir séu Manchester United.

Við endum þetta á mynd úr einkasafni yfirritaðs:

Barcelona 1999

Það er kominn sumartími í Evrópu og leikurinn byrjar því kl. 18:45 að íslenskum tíma.

Enska úrvalsdeildin

Manchester United 4:1 Aston Villa

skrifaði þann | 14 ummæli

mata gegn villaÍ dag sáum við United spila gegn Aston Villa á Old Trafford. United vann leikinn með fjórum mörkum gegn einu með mörkum frá Rooney(2), Mata og Chicharito.

Fyrir leik var fólk smeykt fyrir því að leiknum yrði seinkað vegna umferðartafa nálægt Old Trafford. En sem betur kom ekki til þess og leikurinn hófst á eðlilegum tíma. Moyes ákvað að stilla liðinu upp á þennan máta:

De Gea

Rafael Jones Vidic Buttner

Fletcher Fellaini

Young  Mata  Kagawa

Rooney

og á bekknum voru þeir Amos, Giggs, Chicharito, Carrick, Nani, Welbeck, Januzaj. Með öðrum orðum, sama miðja og framlína sem hann notaði í tvö núll sigri United gegn West Ham fyrir viku síðan. Stuttu síðar sá maður þessa tölfræði á Twitter:

 

Fyrri hálfleikurinn byrjaði illa fyrir okkar menn. Ekkert spil að ganga upp, sendingar sífellt að klikka, vörðumst ágætlega en lítið spennandi að gerast. Þetta er til dæmis mjög lýsandi fyrir fyrstu tíu mínúturnar:

 

Svo til að kóróna þessa vondu byrjun þá brýtur Rafael klaufalega af sér á tólftu mínútu , rétt fyrir utan vítateig United og fær gult spjald. Aukaspyrnuna tekur Westmann sem á þessa flottu spyrnu sem De Gea rétt nær að snerta og verja inn í markið. Staðan núll eitt eftir þrettán mínútur. (vídeó).

Eins og við sáum allmikið á síðustu leiktíð, þá þurfti United að lenda undir til þess að vakna og byrja að berjast. Á tuttugustu mínútu fær Kagawa boltann vinstra megin við vítateig Villa, kemur með þessa gullfallegu fyrirgjöf á Wayne Rooney, sem af einhverjum óskiljanlegum ástæðum var aleinn og yfirgefinn inn í vítateig Villa og skallaði hann boltann hnitmiðað inn í mark Villa (Vídeó). Staðan eitt eitt eftir tuttugu mínútur og fyrsta mark Rooney á Old Trafford síðan í október 2013.

Eftir þetta lullaðist leikurinn áfram án þess í raun að eitthvað markvert hafi gerst. Eitt var þó áberandi, Kagawa var að spila sinn besta leik í langan tíma og var svo sannarlega að sýna Moyes að hann á skilið fleiri tækifæri með liðinu. Virkilega sprækur.

Á 44′ mínútu á Kagawa frábæra sendingu á Mata inn í teig sem í kjölfarið var felldur klaufalega af Bacuna. Rooney var maðurinn til að taka spyrnuna og verður að segjast að þetta var alveg frábær vítaspyrna hjá drengnum sem hefur klúðrað allnokkrum fyrir liðið. Algjörlega óverjandi fyrir Guzan. (Vídeó)

Í hálfleik ákvað Moyes að taka Rafael af velli og setja Carrick inn á. Ekki veit ég hvort Rafael hafi verið að glíma við einhver meiðsl en hann var slappur í dag eins og því miður oft á þessu tímabili. Jones tók stöðu Rafael í hægri bak og Carrick stöðu Jones.

Villa byrjaði seinni hálfleik betur og á 49′ mín kemst Benteke í algjört dauðafæri en nær einhvernveginn að hitta ekki boltan þegar hann var kominn einn á móti De Gea. Átta mínútum síðar átti United ágætis sókn sem endaði í miklum darraðadansi inn í teig og boltinn rataði til Mata sem kom honum snyrtilega inn í mark Villa. Fyrsta mark Mata fyrir United og staðan orðin 3-1 fyrir United. (Vídeó)

Eins og kom fram á fréttamannafundinum í gær þá er Moyes búinn að vera hvíla Januzaj síðustu vikur. Drengurinn víst dauðþreyttur og ekki vanur þessu álagi. Það var því gaman að sjá hann koma inn á fyrir Kagawa á 68′ mínútu og spila nákvæmlega eins og áður, óhræddur að taka menn á og ógna. Verður svo gaman að sjá drenginn spila fyrir liðið næstu ár. Stuttu síðar átti Rooney svo dauðafæri sem Guzan varði vel og þá ákvað Moyes að taka hann af velli á 75′ mínútu og setja Chicharito inn í staðinn. Flott frammistaða hjá Rooney í dag og tvö mörk, meira svoleiðis gegn Bayern.

Fyrir leikinn var Rooney með þessa tölfræði:

 

Tvö mörk í viðbót í dag sýna okkur að hann er langmikilvægasti leikmaður liðsins hvað varðar markaskorun á þessu tímabili. Þótt maður hafi gríðarlega gaman af því að sjá leikmann United vera skora mörg mörk og standa sig vel þá er þetta skelfileg tölfræði fyrir liðið. Það á enginn leikmaður að vera með 50% markahlutfall liðsins á einu tímabili (nema hann heitir Ronaldo eða Messi og skori yfir 50 mörk á tímabili).

Á 91′ mínútu á Januzaj alveg frábært hlaup inn í vítateig Aston Villa og sendir þessa laglegu sendingu á Chicharito sem kemur boltanum í netið (Vídeó). Frábært mark en skemmdi smá fyrir mér að sjá Chicharito fagna. Maður fékk þá tilfinningu að hann væri í raun að kveðja liðið (svipað og maður sá þegar Fabio skoraði sitt síðasta mark fyrir United). Tveimur mínútum síðar flautaði dómari leiksins til leiksloka og 4-1 sigur niðurstaðan.

Flott þrjú stig í dag, United tveimur stigum á eftir Tottenham sem á leik til góða og þremur stigum á eftir Everton sem á tvo leiki til góða. Næst sjáum við liðið mæta Bayern Munich (Sem mætir Hoffenheim í dag ef einhver hefur áhuga) á Old Trafford næsta þriðjudag í meistaradeildinni. sá leikur verður svakalegur… úff…

Enska úrvalsdeildin

United tekur á móti Aston Villa

skrifaði þann | 8 ummæli

Manchester United - Aston VillaÉg ætla ekki að nefna niðurlæginguna sem við upplifðum í vikunni. Ég ætla ekki að nefna hluti eins og að byrjunarlið United kostaði £184m á móti £161m hjá City. Ætla ekki að nefna það að United hefur núna tapað tíu leikjum á þessu tímabili og stefnir í lægsta stigafjölda í meira en 22 ár. Ég ætla ekki að nefna það að Fellaini gæti farið í bann fyrir að hrækja á Zabaleta.

Ef þið viljið sökkva ykkur inn í leiðindi þessarar viku þá getið þið til dæmi lesið þetta hér… eða þetta… kannski þetta… jafnvel þetta hér… eða grátið yfir þessu… máski þetta… ef til vill þetta… þetta hér… grátið enn meira yfir þessu… eða þetta… eða horft á þetta… eða liðið illa yfir þessari mynd… eða hlustað á Neville… eða farið að hágráta yfir þessu… eða bara sleppt því?

Nó sörrí bob! Í dag ætlum við að setja slíkar umræður í frystinn. Eða nei, leyfið mér að segja eitt áður en við frystum þetta. Þessi *BEEEEP* fáni og þessi *BEEEEEEEP* flugvél. Ég veit að flest ef ekki allir eru komnir með nóg af hr.Moyes núna og verður sumarið verður eflaust pakkfullt af ömurlegum umræðum um kallinn. En þessi flugvél og þessi fáni er eitthvað kjánalegasta sem ég hef séð í langan tíma! Ef þetta væri einhver annar klúbbur þá væri svo gaman hjá okkur núna að gera grín að þessum stuðningsmönnum. En nei, í þetta skiptið erum við aðhlátursefnið.

Sorrí, þetta er ekkert nema kjánahrollur og er einfaldlega sorglegt að sjá. Enda er fleira fólk en ég að furða sig á þessu. Djöfull erum við illa stödd þegar í hverri viku er gert grín að okkur og það er enn verra þegar grínið snýst að okkur stuðningsmönnum liðsins.

En jæja, lok lok og læs. Þessi umræða komin í frystinn og bíður betri daga (eða verri?). Kemur mér bara í vont skap. Nú hlustar maður bara á það sem MUFC Ticket Exchange skrifaði á twitter:

 

Upphitunin

Sjáum nú til, Aston Villa mætir til leiks á Old Trafford á morgun, sem þeir hafa gert sjötíu og átta sinnum. Í þeim viðureignum hafa þeir unnið níu sinnum, gert sautján jafntefli og tapað fimmtíu og tvisvar sinnum. United hefur semsagt unnið tvo þriðju af öllum viðureignum sínum gegn Villa á Old Trafford. Nú vonum við einfaldlega að við náum að auka þá tölfræði okkur í vil á morgun. United hefur tapað einungis einu sinni í síðustu þrjátíu og sex deildarleikjum gegn Villa þannig að tölfræðin er okkur í hag (Ekki að hún hafi hjálpað okkur í vetur, en við tölum ekki um það í dag).

Aston Villa situr þessa stundina í tólfta sæti, sautján stigum á eftir United en með leik til góða. Í síðustu sex deildarleikjum hafa þeir unnið tvo, gert eitt jafntefli, tapað þremur og fengið sjö stig. Hinsvegar hafa þeir í síðustu sex útileikjum unnið einu sinni, gert tvö jafntefli, tapað þrisvar og fengið fimm stig. Á sama tíma hefur United í síðustu sex deildarleikjum unnið þrjá, gert eitt jafntefli, tapað tveimur og fengið tíu stig. Því miður hefur liðið spilað alveg hræðilega á Old Trafford á þessu tímabili, einungis fengið tuttug og eitt stig af fjörtíu og fimm mögulegum. Hull City er með betri árangur á heimavelli en United (en við tölum ekki um það í dag).

Hjá Aston villa eru Weimann, El Ahmadi, Kozák, Okore og N’Zogbia á meiðslalista en hjá United vitum við að Van Persie mun alls ekki spila og litlar líkur eru á að Vidic, Evans og Smalling mæti til leiks.

Með þá vitneskju að leiðarljósi ætla ég að spá byrjunarliðinu svona:

De Gea

Rafael Ferdinand Jones Evra

Valencia Carrick Fellaini Welbeck

Mata

Rooney

Ég veit þið viljið hakka mig fyrir þetta byrjunarlið en í alvöru, hvernig haldið þið að hann stilli liðinu upp? Chicharito og Kagawa fá aldrei sjensa, Januzaj er búinn að vera dauðþreyttur og því hvíldur, verðum helst að nota Ferdinand, o.s.frv. Frekar ömurleg staða hjá okkur þessa stundina með leikmenn (en við tölum ekki um það í dag).

Sjö leikir eftir að þessum meðtöldum:

  • 29. mars – Aston Villa (H)
  • 5. apríl – Newcastle (Ú)
  • 20. apríl – Everton (Ú)
  • 26. apríl – Norwich (H)
  • 3. maí – Sunderland (H)
  • 6. maí – Hull (H)
  • 11. maí – Southampton (Ú)

sem þýðir að United hefur möguleika á að krækja sér í tuttugu og eitt stig gegn liðum sem það á í raun alltaf að sigra (Everton skiljanlega erfiðasti leikurinn af þessu sjö). Nú vonar maður bara að liðið komist á smá gott ról hérna í lokin svo við förum ekki hágrátandi inn í sumarið. Og þá getum við farið að tala um hlutina!

Moyes á blaðamannafundi

 

 

Leikurinn hefst kl 12:45 á morgun, laugardag.

Enska úrvalsdeildin

Manchester United 0:3 Manchester City

skrifaði þann | 24 ummæli

Svona voru byrjunarliðin:

De Gea

Rafael Rio Jones Evra

Mata Carrick Cleverley Fellaini Welbeck

Rooney

Bekkur: Lindegaard, Büttner, Fletcher, Kagawa, Young, Valencia, Hernandez

Hart

Zabaleta Kompany Demichelis Clichy

Fernardinho Touré

Navas Silva Nasri

Dzeko

Leikurinn byrjaði eins illa og hægt er að ímynda sér. Leikurinn var ekki mínútu gamall þegar Manchester City var komið yfir. Vörnin hjá United var sofandi, Nasri spólaði sig í gegn, skaut í stöng og frákastið endaði hjá Edin Dzeko sem lagði boltann í autt markið. 0-1 fyrir City. Hræðileg byrjun.

United-menn héldu áfram þessum sofandahætti eftir markið. Sendingar voru lélegar, City-liðið pressaði hátt uppi og stressaðir United-leikmenn misstu boltann oft á hættulegum stöðum. City-menn komust 2-3 í álitleg færi vegna þess en voru ýmist klaufar eða David De Gea með sinn súkkulaðiúlnlið hélt okkur inn í leiknum. Á þessum leikkafla hefði City hæglega geta gert út um þennan leik.

Um miðjan hálfleik breyttist þetta þó. Okkar menn þorðu að halda boltanum aðeins og komust smám saman inn í leikinn. Mata, Rooney og Welbeck sáu um sóknarleikinn ásamt Fellaini. Þeir sköpuðu sér nokkur ágæt færi, fyrst fékk Fellaini boltann í fínni stöðu en hann náði ekki koma nægilega góðu skoti á markið. Juan Mata komst svo í mjög fínt færi í miðjum teignum en hann skóflaði boltanum yfir. United-menn stjórnuðu ferðinni það sem eftir lifði fyrri hálfleiks, City-menn ógnuðu þó en Michael Carrick braut upp sóknartilraunir City. Við lok fyrri hálfleiks leit þetta ekki jafn illa út og eftir fyrstu 10 mínútur leiksins. Maður vonaði því að United-menn myndu halda uppteknum hætti í seinni hálfleik.

Sú von var fljót að sigla í burtu. City-menn byrjuðu hálfleikinn betur og uppskáru mark eftir rúmar 10 mínútur. City-menn fengu horn, öll hornin þeirra hingað til höfðu farið á nærstöng og það breyttist ekki í þetta skiptið. Rio Ferdinand slökkti á sjálfum sér og hleypti Dzeko fram úr sér sem skoraði sitt annað mark í leiknum. Eftir seinna markið var þetta nánast búið. United reyndu af litlum mætti af sækja en sóknarleikurinn var ómarkviss og nánast tilviljunarkenndur. City-menn voru þéttir í vörn og drógu í sig alla þá pressu sem United reyndi að setja á þá. Moyes reyndi að hrista aðeins upp í þessu. Kagawa kom inn á fyrir Cleverley í hálfleik, Valencia kom inn á fyrir Fellaini og Hernandez kom inn á fyrir Welbeck. Yaya Touré nuddaði svo salti í sárin á 90. mínútu með því að skora þriðja mark leiksins. 0-3.

Þetta var ekki nóg góð frammistaða og endurspeglar bara í raun muninn á þessum liðum í dag. City-liðið er stútfullt af gæðum og refsaði grimmilega fyrir þau mistök sem okkar leikmenn gerðu í leiknum. Eins og svo oft áður var sóknarleikur United ómarkviss og tilviljunarkenndur. Það er eins og það vanti skipulag í sóknarleikinn og það er einhvernveginn alveg ljóst að Moyes leggur höfuðáherslu á varnarleikinn. Það hefur bersýnilega sést í vetur en það hefur ekki skilað neinu. Liðið spilar ekki góða vörn og áherslan á vörnina bitnar bara á sóknarleiknum.

Ef það var ekki augljóst fyrir þennan leik þá ættu allir að sjá það í kvöld að Rio Ferdinand er löngu búinn að vera sem fótboltamaður á þessu leveli. Hann var hrikalega dapur í þessum leik og það skiptir öllu fyrir David Moyes að finna miðvarðaparið sitt sem fyrst. Ég varð fyrir vonbrigðum með Juan Mata í kvöld, hann átti ekki góðan leik, átti lélegar sendingar og virtist vera hræddur við að taka áhættu í þessum leik. Kannski var það uppleggið og það er reyndar ekki eins og hann hafi haft mikið af möguleikum með sér í sóknarlínunni. Rooney lagði sig fram í leiknum líkt og Welbeck en það skilaði ekki miklu. Þetta lið þarf á mikilli endurbyggingu að halda, á fleiri vígstöðum en inni á vellinum, það er augljóst eftir þennan leik.

Eitt skref áfram, tvo aftur á bak. Það er þema þessa tímabils.