Rauðu djöflarnir

Enska úrvalsdeildin

Vængbrotnir Rauðir djöflar heimsækja Stamford Bridge

skrifaði þann | 6 ummæli

Chelsea - Manchester UnitedÁ morgun leika Manchester Utd við Chelsea á útivelli. Robin van Persie verður ekki með og ekki heldur Wayne Rooney. Ashley Young er líka meiddur sem veikir liðið líklega ekki neitt og sem fyrr eru Fellainio og Nani frá ásamt Phil Jones og Patrice Evra. Jonny Evans og Rio Ferdinand eru líklega leikfærir.

Ég held að ég hafi aldrei verið jafn svartsýnn fyrir stórleik hjá United í þau rúmu 20 ár sem ég hef stutt liðið. Það er ekki eins og liðið hafi aldrei lent í meiðslakrísum fyrr en liðið hafði alltaf magnaðan baráttuanda sem Alex Ferguson barði í það. Það er helsti munurinn á liðinu núna og undanfarin ár að liðið virðist ekki vilja leggja sig 110% fram fyrir David Moyes eða að þeir eru einfaldlega ekki jafn hræddir við að spila illa fyrir hann og fyrir Ferguson.

Meiðslalistinn hjá Chelsea er stuttur Frank Lampard verður mögulega leikfær á morgun en eitthvað lengra verður í Branislav Ivanovic og svo er Marco van Ginkel frá fram í júní.

Ég ætla ekki einu sinni að ræða eitthvað sérstaklega um markvarðarstöðuna þar sem hún er sjálfvalin þessa dagana enda hefur David de Gea verið frábær og stimplað sig inn sem einn besti ef ekki sá besti í deildinni. Vörnin er annað mál, Rafael verður að öllum líkindum í hægri bakverðinum og Alexander Büttner vinstra megin. Persónulega trúi ég varla mínum eigin orðum þegar ég fullyrði að Rio Ferdinand eigi ekkert erindi í svona leiki lengur og býst ég við honum á bekknum. Ég er nokkuð viss um að Jonny Evans og Chris Smalling verði í hjarta varnarinnar. Chelsea er með þannig lið að það borgar sig fyrir okkur að hafa akkeri á miðjunni, jafnvel tvö og það verða líklega (og vonandi) Darren Fletcher og Michael Carrick. Fyrir fram þá býst ég við 3 manna línu þar sem Antonio Valencia verður hægra megin, Shinji Kagawa sem leikstjórnandi og Adnan Januzaj vinstra megin. Þrátt fyrir magnað record hjá Javier Hernandez gegn Chelsea þá býst ég samt við að Danny Welbeck muni byrja uppi á topp.

Liðið mund þá líta út nokkurn veginn svona:

De Gea

RAFAEL SMALLING EVANS BUTTNER

CARRICK FLETCHER

VALENCIA KAGAWA JANUZAJ

WELBECK

Leikurinn hefst kl.16:00

Enska úrvalsdeildin

Manchester United 2:0 Swansea City

skrifaði þann | 17 ummæli

Jæja það var mikill léttir að sjá United vinna Swansea nú rétt í þessu, sérstaklega eftir að maður sá að Tottenham, Everton og Chelsea unnu sína leiki fyrr í dag. Þetta tekur töluverða pressu af af liðinu og stuðningsmenn liðsins geta slakað aðeins á neikvæðninni næstu vikuna.

Liðið sem byrjaði leikinn leit svona út:

De Gea

Rafael Smalling Vidic Evra

Valencia Carrick Fletcher Kagawa

Welbeck Januzaj

Varamenn: Lindegaard, Büttner, Cleverley, Giggs, Lingard, Zaha, Hernandez

Þessi uppstilling var engan veginn að ganga upp. Leikmenn voru mjög „passífir“ allan fyrri hálfleikinn, leyfðu Swansea að dúlla sér með boltann á miðjunni og voru mjög bitlausir fram á við, sköpuðu sér aðeins eitt gott færi sem Welbeck nýtti ekki. Það var því þungt í manni hljóðið í hálfleik, baráttan sem maður kallaði eftir var ekki til staðar og maður fór að búa sig undir það versta.

Seinni hálfleikur reyndist vera algjör andstæða við þann fyrri. Moyes hafði breytti yfir í 4-2-3-1, þar sem Kagawa datt í holuna sína og Carrick og Fletcher sópuðu upp alla sóknartilburði Swansea. Leikmenn voru mun grimmari á alla bolta og spiluðu sirka 20 metrum hærra á vellinum. Það tók aðeins tvær mínútur að brjóta ísinn og skora þegar Valencia fylgdi eftir skalla frá Kagawa. Kærkomið mark hjá Valencia.

https://twitter.com/OptaJoe/status/422075889409486848

Eftir þetta þá réði United öllu á vellinum. Swansea hélt reyndar boltanum ágætlega (voru 60% með boltann í leiknum) en áttu engin færi. Um leið og Bony fékk boltann í lappirnar þá var Vidic mættur um leið. Januzaj og Kagawa (og jafnvel Evra af öllum mönnum) voru mjög sprækir að búa til hluti og það fór svo að á 59 mínútu bætir Welbeck við öðru marki eftir mishepnað skot frá Evra. 2-0 og stressið sem plagað hefur alla United menn undanfarið fór að dvína.

https://twitter.com/OptaJoe/status/422077487015657472

United hætti ekki eftir þetta, héldu áfram að sækja og hefðu hæglega getað skorað 2-3 mörk í viðbót, til dæmis þegar Smalling setti boltann yfir fyrir opnu marki. En fleiri mörk litu ekki dagsins ljós og niðurstaðan því 2-0, og eins og ég sagði, mjög kærkominn sigur eftir erfiða byrjun á árinu. Maður leiksins að mínu mati var Januzaj. Sérstaklega var hann frábær á vinstri kantinum í seinni hálfleik, þar sem hann startaði stórhættulegum sóknum hvað eftir annað með snilldar sendingum. Einnig verður maður að minnast á Kagawa, sem var sérstaklega spræku þegar hann var kominn í sína stöðu í seinni hálfleik og svo Fletcher, sem kláraði 93% af sendingunum sínum í kvöld, hversu mikilvægt gæti það orðið fyrir okkur öll að sjá hann í sínum gamla formi núna fram í maí. Ussss!

https://twitter.com/CARRICKISMYICON/status/422091326239571968

Frábært! Þetta græjar helgina fyrir manni, og eftir viku er svo stórleikur gegn Chelsea á Stamford Bridge. Förum og vinnum þann leik takk fyrir!

Enska úrvalsdeildin

Hefnd gegn Swansea á morgun!

skrifaði þann | 6 ummæli

Á morgun tekur United á móti Swansea í annað skipti á innan við viku. Við þurfum ekkert að ræða það neitt frekar hvernig leikurinn spilaðist síðasta sunnudag, enda einn af lágpunktum tímabilsins (hingað til allavega). Ef ég væri leikmaður United þá væri ég mjög æstur í að spila þennan leik á morgun og hefna fyrir „ruglið“ um síðustu helgi. Það verður því forvitnilegt að sjá hvaða leikmenn mæta dýrvitlausir til leiks og hverjir ekki (ef einhverjir). Ef þetta er ekki tækifærið fyrir leikmenn liðsins til að sýna öllum hvað þeim virkilega finnst um gengið undanfarna daga, já þá veit ég ekki hvað þarf til að vekja þessa menn.

Skoðum aðeins hvernig byrjunarliðið gæti orðið. Rooney* ætti að vera kominn aftur, og kannski Phil Jones líka, en Evans og Ferdinand eru báðir meiddir. Spáum þessu svona:

De Gea

Rafael Smalling Vidic Evra

Carrick Cleverley

Valencia Rooney Januzaj

Welbeck

Já þetta verður athyglisverður leikur, tja eins og allir leikir liðsins þessa dagana. Ef ég sé einn United leikmann inn á vellinum með hangandi haus þá hrynur sá maður í áliti hjá mér. Ég ætla ekki að gera kröfu um einhvern 5-0 sigur, ég vil bara sjá menn leggja allt í sölurnar, þetta er tíminn til þess. Ég vil sjá liðið spila eins og þeir gerðu gegn Arsenal á Old Trafford, því ef við sjáum svoleiðis baráttu, þá getur þetta hæglega orðið 5-0 sigur!

Annars er það eitt að hefna fyrir tapið í bikarnum um síðustu helgi og svo er það annað að halda áfram að elta efstu sex liðin í deildinni. Flest þeirra eiga leiki í „auðveldari kantinum“ þannig að við megum ekki við því að missa þau lengra framúr okkur.

taflan

Leikurinn byrjar klukkan 17:30. ÁFRAM MANCHESTER UNITED!

* Uppfært: Það hefur verið gefið út að Rooney hefur verið sendur í frí til að ná sér góðum af nárameiðslum, hann spilar því ekki á morgun. Ætli Kagawa sé ekki líklegastur til að koma inn fyrir hann.

Slúður

Góðu fréttunum rignir inn

skrifaði þann | 21 ummæli

Já, það er ekkert nema jákvæðir straumar sem streyma frá Old Trafford þessa dagana.

Chris Smalling tók þá upplýstu ákvörðun um að klæða sig upp sem sjálfsmorðsprengjumaður í búningapartý á dögunum. „Blaðamenn“ The Sun voru auðvitað ekki lengi að komast að þessu og birtu þetta á forsíðu blaðsins. Smalling var snöggur að biðjast afsökunar á þessu og sagði þetta misheppnað grín, hann hafi ætlað að þykjast vera svokölluð Jäger-Bomb. Fallega gert hjá honum að taka sviðsljósið af Moyes í smástund.

Í öllu alvarlegri fréttum er það helst að á vef Guardian er birt grein þar sem talað er um að sumir leikmenn Manchester United hafi efasemdir um að Moyes geti snúið gengi liðsins við. Blaðamenn Guardian verða að teljast með þeim áreiðanlegri í þessum efnum og ef satt reynist er þetta afar slæmt fyrir félagið og ekki vænlegt til árangurs.patrio Í greininni er talað um að leikmenn séu ósáttir við að Moyes vilji fá nýjan vinstri bakvörð í stað Evra sem er gríðarlega vinsæll í klefanum. Rio Ferdinand hefur einnig gefið út að hann sé óánægður með þá venju Moyes að gefa út liðið rétt fyrir leiktíma. Leiða má líkur að því að þeir tveir séu forsprakkar í þessum efasemdum um Moyes. Það er slæmt enda eru þetta reynslumiklir menn sem hinir yngri í klefanum líta upp til. Maður veltir því þó fyrir sér hvort að þessir leikmenn ættu ef til vill að líta í eigin barm enda fáir spilað jafn illa á þessari leiktíð en akkúrat þeir tveir.

Mikið hefur verið skrifað um sök Moyes á slæmu gengi liðsins og er hann alls ekki saklaus í þeim efnum, rétt eins og 680 milljóna punda kostnaður við yfirtöku Glazer-druslanna og algjör vanfjárfesting í leikmannahóp liðsins. En hvar koma leikmennirnir inn í þetta? Eiga þeir ekki einhverja sök á slæmu gengi liðsins?

Get me out of here!
Screw this, I’m leaving!

Það eru þeir sem spila leikina og það eru þeir sem hafa oft á tíðum gert sig seka um frekar slæm einstaklingsmistök. Eru þeir kannski svo góðu vanir að þeir geti ekki höndlað alvöru mótlæti? Ég er á því að Moyes fái allavega þrjú ár í stjórasætinu sama hvað gerist og ég held að þetta tímabil verði mjög lærdómsríkt fyrir hann, sérstaklega hvað varðar leikmannahópinn. Það er að koma í ljós hvaða leikmenn eru orðnir saddir og hverjir séu til í slaginn. Það kæmi mér allavega ekki á óvart ef það yrði mikil hreingerning í leikmannahópnum í sumar.

Áður en ég verð ásakur um of mikla ást á Moyes sýni ég ykkur þessa upplýsandi myndir um spilamennsku liðsins sem er gríðarlega einhæf og þar spilar Moyes stórt hlutverk.

 

https://twitter.com/iainod/status/421190617025495040

https://twitter.com/iainod/status/421190763389915137

Þarna sést berlega tvennt sem einkennir spilamennsku liðsins undir stjórn Moyes. Miðjumennirnir eru nánast ekki til staðar og það snýst allt um að gefa út á kantinn og koma boltanum fyrir. Rinse and repeat. Í hverjum einasta fokking leik. Þetta er svo einhæft og fyrirsjáanlegt og svo leiðinlegt að horfa á. Væri gaman að sjá Moyes reyna að fá liðið til þess að prófa eitthvað nýtt. Það er alltof auðvelt að verjast liðinu þegar það spilar alltaf nákvæmlega sama fótbolta, aftur og aftur og aftur.

Við viljum einnig vekja athygli á því að síðan er komin með nýjan og stórglæsilegan banner og var það öðlingurinn og eðaldrengurinn Orri Eyþórsson sem tók þetta verkefni að sér. Kunnum við honum bestu þakkir fyrir það.

Enska deildarbikarkeppnin

Sunderland 2:1 Manchester United

skrifaði þann | 36 ummæli

Gamanið heldur áfram. Liðið var svona:

De Gea

Rafael Evans Vidic Evra

Cleverley Carrick

Valencia Giggs Januzaj

Welbeck

Bekkur: Lindegaard, Smalling, Hernandez, Fletcher, Kagawa, Büttner, Zaha.

Sunderland: Mannone, Bardsley, Alonso, Brown, O’Shea (C), Larsson, Cattermole, Ki, Giaccherini, Borini, Fletcher.

Fyrri hálfleikur var alveg sérstaklega lélegur af hálfu beggja liða en þó sérstaklega af okkar hálfu. Það gerðist akkúrat ekkert fyrr en á 25. mínútu að Moyes færði Januzaj fyrir aftan framherjann og setti Giggs út á kant. Januzaj var eini leikmaðurinn í okkar liði sem var að reyna eitthvað og eftir þessa tilfærslu var hann meira í boltanum og var sprækur. Hann skoraði mark sem var réttilega dæmt af vegna rangstöðu. Eins og venjulega þó misstu okkar menn einbeitinguna undir lok hálfleiksins og fengu á sig mark. Larsson þrykkti aukaspyrnu inní teiginn þar sem Wes Brown kom boltanum inn í markteig þar sem Phil Bardsley og Ryan Giggs voru að kljást. Boltinn barst í markið og líklega mun þetta mark skrifast á Giggs. Við þekkjum þetta handrit og í sannleika sagt er maður að verða dauðþreyttur á því.

Seinni hálfleikur byrjaði vel því í upphafi hans hamraði Nemjana Vidic boltann inn í markið eftir horn og staðan því 1-1. Seinni hálfleikur var örlítið líflegri en sá fyrri. Við vorum meira með boltann en eins og vanalega gerðist voðalega lítið. Það virkar víst ekkert sérstaklega vel að vera bara með eina leið til að sækja að markinu: Koma boltanum út á kant. Gefa hann fyrir. Fatta menn ekkert að þetta virkar ekki þegar enginn af kantmönnum okkar er fær um að gefa skítsæmilegan bolta fyrir?

Sunderland-menn fengu svo víti sem í besta falli var ódýrt. Tom Cleverley flæktist í Adam Johnson sem var ekkert að berjast við að standa í lappirnar. Andre Marriner dæmdi víti, Fabio Borini steig á punktinn og skoraði af fádæma öryggi. 2-1 fyrir Sunderland.

Eftir þetta lágu okkar menn á Sunderland-mönnum en það var auðvelt fyrir þá að verjast sóknartilburðum okkar manna, enda er sóknarleikurinn svo fyrirsjáanlegur að það hlýtur að vera verulega auðvelt fyrir lið að undirbúa sig fyrir leiki við United. Það eina sem þau þurfa að gera er að vera þéttir á miðjunni, leyfa vængmönnumum okkar að fá boltann og pressa þá. Einfalt, eins og sóknarleikurinn okkar.

Sunderland vann því fyrstu lotu 2-1. Seinni leikurinn er á Old Trafford eftir réttar tvær vikur. Miðað við heimavallagengi okkar á tímabilinu ætla ég ekki að reikna með sigri þar.

Ljósi punkturinn í þessum leik er Adnan Januzaj sem hætti aldrei að reyna að gera eitthvað og var hann sá eini í liðinu sem sýndi eitthvað frumkvæði, allir hinir voru bara með.

Við spilum svo við Swansea á laugardaginn. Ég reikna með að Laudrup sé með sína menn á fullu á æfingasvæðinu að æfa hvernig eigi að verjast lélegum og einhæfum sóknarleik.