Rauðu djöflarnir

Manchester United 4:0 Norwich City

ellioman skrifaði þann 29. október, 2013 | 15 ummæli

United tók á móti Norwich City í fjórðu umferð Capital One bikarkeppninni. Fyrir leikinn töluðu flestir stuðningsmenn um áhuga sinn að fá að sjá Januzaj og Zaha í liði United. Moyes ákvað að vera góður gæji og uppfyllti óskir þeirra.

Byrjunarlið United var skipað svona

Lindegaard

Rafael Ferdinand Vidic Büttner

Zaha Jones Cleverley Young

Januzaj

Chicharito

og á bekknum voru þeir Amos, Anderson, Rooney, Giggs, Smalling, Fabio og Valencia.

Leikurinn byrjaði á rólegu nótunum. Norwich reyndu að fylgja fordæmi annarra liða sem hafa mætt United, þ.e.a.s. að pressa liðið en þar sem þeirra kaliber er langt fyrir neðan United þá skilaði það litlum árangri í kvöld.

Á 19 mín var svo dæmt víti á Norwich fyrir brot á Januzaj inn í teig. Alveg skelfilega kjánalegt brot hjá Leroy Fer í vörn Norwich. Á vítapunktinn steig herra Hernandez og skoraði örugglega framhjá Bunn í marki Norwich.

Eftir þetta róaðist leikurinn þónokkuð og gerðist í raun lítið marktækt í fyrri hálfleik. Januzaj þótti mér langbesti leikmaður United í fyrri hálfleik. Þessi drengur stefnir í að verða frábær leikmaður fyrir liðið. Seinni hálfleikurinn byrjaði jafn rólega og sá fyrri endaði.

Þar til á 54 mín þegar Buttner fær boltann vinstra megin við vítateig Norwich, á fína fyrirgjöf á Hernandez sem nær góðum skalla á markið en Bunn nær að verja en Hernandez nær frákastinu og skallar örugglega í netið. 2-0 fyrir United.

Hernandez er kominn með 12 mörk í síðustu 16 leikjum sem hann hefur byrjað. Það er hrikalega góð tölfræði og skiljanlegt að fólk vilji sjá hann spila meira.

Á 56′ mín urðu áhorfendur hræddir er sá óskemmtilegi atburður gerðist að Snodgrass, leikmaður Norwich, og Rafael skullu saman inn í vítateig United með þeim afleiðingum að Snodgrass fékk heilahristing og þurfti að liggja þar í uþb 10 mínútur á meðan hlúið var að honum og hann gerður klár fyrir flutning af vellinum.

Fallegasta mark United kom á 88′ mín þegar boltinn dettur til herra Phil Jones í vítateignum, eftir fyrirgjöf frá Rafael, sem nær þessu þrususkoti sem endar í markinu. 3-0!

Besti leikmaður leiksins, Adnan Januzaj, var svo tekinn af velli á 90′ mín og í hans stað kom Fabio. Ég hef ekki falið þá skoðun mína að Fabio á skilið fleiri tækifæri með liðinu og vonaði ég að hann myndi gera eitthvað minnistætt á þessum örfáu mínútum sem hann fékk í dag.

Það tók hann ekki langan tíma. Á 90′ mín hleypur Fabio af stað, Rooney, sem kom inn á fyrir Zaha á 78′ mín, gefur fyrir alveg stórkostlega sendingu í anda Scholes og nær Fabio að taka á móti boltanum og koma honum í netið. 4-0 fyrir United og frábær innkoma hjá Fabio.

Það urðu svo lokatölurnar í þessum fína leik og er United komið áfram í Capital One bikarkeppninni. Á morgun verður dregið fyrir fimmtu umferð keppninnar og fáum við þá að vita hver næsti mótherji United verður. Næsti leikur United verður hinsvegar gegn Fulham næsta laugardag (2.nóv) á Craven Cottage.

Norwich í deildarbikarnum.

Tryggvi Páll skrifaði þann 28. október, 2013 | 9 ummæli

Á morgun kemur Norwich í heimsókn á Old Trafford í 4.umferð deildarbikarsins eða Capital One Cup eins og hann heitir víst fullu nafni. Við slógum auðvitað Liverpool út í þessari keppni og Norwich hefur sigrast á Bury og Watford til þess að komast í þessa umferð. Rétt er að vekja athygli á því að nú er kominn vetrartími á Englandi og er klukkan nú það sama þar og hér á klakanum. Leikurinn er því klukkan 19.45.

Augu allra hefur auðvitað beinst að frammistöðu liðsins í deildinni en það má þó ekki draga úr mikilvægi þess að liðið standi sig vel í þessum bikarkeppnum. Það er stórt gat í ferilskrá David Moyes undir fyrirsögninni: Unnir bikarar. Deildarbikarinn er ekki merkilegasta keppni í heimi en árangur í henni vetur gæti komið David Moyes á bragðið og gert eitthvað aðeins til að friða þá sem finnst hann alveg ómögulegur stjóri. Árangur í þessari keppni á þessu tímabili gæti því verið ágætis grunnur til þess að byggja á fyrir næstu tímabil.

Fyrst þarf hinsvegar að sigra Norwich.

Norwich situr í 18. sæti deildarinnar og er í þessum pakka sem mun líklega vera í kringum fallsæti allt tímabilið. Þeir eru aðeins fyrir ofan áberandi lélegustu lið deildarinnar, Crystal Palace og Sunderland. Það segir hinsvegar ýmislegt hvað deildin er jöfn að það eru aðeins 3 stig sem skilja að Norwich og Swansea sem eru í 11. sæti.

Norwich hefur mætt neðrideildar liðum á leið sinni í þessa viðureign og lentu m.a. í talsverðu basli með Watford og unnu þann leik í framlengingu eftir að hafa verið 2-0 undir fram að 77. mínútu. Þeir keyptu talsvert mikið af leikmönnum fyrir þetta tímabil en eru þó með ekki með afgerandi leikmann. Ricky wan Wolfswinkel, sem einhverntímann var orðaður við okkar lið, átti að vera sá leikmaður en hann hefur aðeins skorað 1 mark. Þeir eru þó með leikmenn sem eru þess eðlis að geta breytt gangi leiksins ef þeir nenna að mæta á svæðið eins og Nathan Redmond og Robert Snodgrass.

Ég býst fastlega við því að David Moyes nýti hópinn í þessum leik og leyfi þeim sem hafa verið að spila minna á tímabilinu að spreyta sig. Leikmenn á borð við Lindegaard, Büttner, Anderson, Zaha og Chicharito ættu allir að fá tækifæri. Einhverjar sögusagnir eru í gangi um að Rio og Vidic séu enn smávægilega meiddir, annars ætti annarhvor þeirra væntanlega að spila.

Lindegaard

Rafael Evans Smalling Büttner

Zaha Anderson Cleverley Januzaj

Chicharito Welbeck

Januzaj var hvíldur um helgina og er væntanlega sprækur og telja menn líklegt að Wilfried Zaha fái loksins að snerta grasið á Old Trafford eftir mjög langa fjarveru sem enginn virðist geta útskýrt. Annað skýrir sig sjálft.

Liðið virðist spila betur í kvöldleikjum heldur en á daginn og að auki virðist Moyes kunna ágætlega við sig í bikarkeppnunum. Þetta ætti því að vera þægilegur sigur okkar manna. En eins og við höfum séð í vetur eru andstæðingarnir steinhættir að mæta á Old Trafford með hjartað í buxunum. Það getur því allt gerst eins og menn sáu um helgina þegar lélegasta sóknarlið deildarinnar kom í heimsókn og óð í færum.

Samt sem áður treysti ég Moyes og félögum til að sigla þessu heim og koma okkur í næstu umferð. Spái 3-1 sigri og Zaha spænir upp Norwich-liðið og setur þrennu, hvorki meira né minna.

Enska úrvalsdeildin

Man Utd 3-2 Stoke

Tryggvi Páll skrifaði þann 26. október, 2013 | 26 ummæli

Það var aldrei nein hætta á ferðum. David Moyes stillti upp eftirfarandi liði:

De Gea

Smalling Evans Jones Evra

Carrick Cleverley

Nani Rooney Kagawa

RvP

Bekkur: Lindegaard, Rafael, Hernandez, Young, Valencia, Fellaini, Januzaj.

Það blés ekkert byrlega fyrir okkar mönnum í fyrri hálfleik. Liðið var að spila tiltölulega hægan bolta og skapaði sér lítil sem engin færi. Stokeverjum fannst það bara fínt, sátu til baka og beittu skyndisóknum og gerðu það vel. David De Gea átti minnsta kosti þrjár stórkostlegar vörslur eftir skyndisóknir Stoke, hann bókstaflega hélt okkur inní leiknum. Strax á fjórðu mínútu leiksins skoraði Peter Crouch fyrsta mark leiksins eftir að Marko Arnautovic labbaði framhjá varnarmönnum United. Svona gekk þetta út hálfleikinn. United tókst að jafna með marki frá Robin van Persie á markamínútunni 43. og hélt maður þá að núna myndu menn sigla þessu heim. Arnautovic var þó á öðru máli og klíndi boltanum sláinn inn úr aukaspyrnu rétt fyrir lok fyrri hálfleiks.

Seinni hálfleikur spilaðist nákvæmlega eins. United dólaði sér hægt og rólega fyrir framan teiginn og Stoke varðist fimlega. Það var ekki fyrr en að Moyes fór að nýta skiptingarnar að eitthvað fór að gerast. Januzaj kom inná fyrir Nani sem átti hrikalega dapran leik. Chicharito kom inn fyrir Cleverley og Rooney fór á miðjuna og að lokum kom Valencia inn fyrir Smalling. Hraðinn jókst örlítið hjá okkar mönnum og á tveggja mínútna kafla undir lok leiksins sigldum við sigrinum heim. Rooney tókst að jafna leikinn með glæsilegan skalla eftir hornspyrnu. Chicharito tryggði svo sigurinn með laglegu marki eftir fyrirgjöf.

3-2 sigur staðreynd.

Þetta var nú samt ekkert endalaus flugeldasýning frá okkar mönnum. Það er hægt að lýsa sóknarleik okkar mönnum allan leikinn svona:

Koma boltanum á kantinn
Gefa fyrir
Vona það besta

Aftur og aftur. Rinse and repeat.

Frekar einhæft og fyrirsjáanlegt enda tókst Stoke-liðinu að skalla 97% af þessum boltum í burtu. Huth og Shawcross eru örugglega hæsta miðvarðarpar deildarinnar og skölluðu megnið af fyrirgjöfunum í burtu. Það tókst hinsvegar tvisvar að koma boltanum í netið eftir þetta og það tryggði okkur sigurinn á endanum. Við þurfum samt að finna einhverjar fleiri leiðir til þess að sækja ef einhver árangur á að nást í vetur. Þetta Stoke-lið hafði ekki skorað í þremur leikjum í röð en auðvitað brustu allar flóðgáttir á Old Trafford. Í fyrri hálfleik hefði Stoke getað komist í 3-0 ef það hefði ekki verið fyrir Big Dave í markinu.

Afhverju mæta samt lið á Old Trafford og halda bara að það sé í lagi að þau taki 3 stig heim með sér? Það var talað um að þegar Sir Alex var stjóri væru andstæðingarnir oftar en ekki búnir að tapa þegar þeir mættu í búningsklefana. Þeir höfðu enga trú á því að þeir gætu gert eitthvað. Nú virðist andstæðan við þetta vera að gerast. Lið hafa fulla trú á því að þau geti unnið United og virðast því leggja sig aukalega fram í leikjunum á Old Trafford því þeir finna lyktina af særðu dýri. Þetta sá maður hjá Stoke í dag, Southampton um síðustu helgi og WBA þar á undan.

Sem betur fer sá Moyes við þessu fyrir rest og það á að hrósa Moyes fyrir þessar skiptingar sem skiptu sköpum og færðu okkur þessi þrjú stig. Þetta var klassískt United comeback sem var eitt af einkennum stjóratíðar United. Er þetta vendipunkturinn fyrir Moyes?

Maður leiksins: Wayne Rooney. Berst eins og ljón og keyrir liðið áfram. Þvílíkt meistaraverk hjá Moyes að halda honum hjá United eftir sumarið.

Enska úrvalsdeildin

Stoke kemur í heimsókn

Tryggvi Páll skrifaði þann 25. október, 2013 | 2 ummæli

Manchester United - Stoke City Á morgun heldur keppni í Úrvalsdeildinni áfram og fáum við Stoke í heimsókn á morgun kl. 14:00.

Gengi liðsins í deildinni hefur verið upp og ofan frá því í leiknum gegn City í september. Í deildinni höfum við mætt WBA, Sunderland og Southampton þar sem krafan um 9 stig var fullkomlega réttmæt. Við náðum hinsvegar aðeins í 4 stig í þessum leikjum. Afhverju?

Liðið er kannski ekki að spila einhvern glimrandi bolta um þessar mundir en í leikjunum gegn þessum liðum sem taldir eru upp hér að ofan höfum við verið betri aðilinn. Raunar má heimfæra það upp á alla leiki þessa tímabils að undanskildum City leiknum auðvitað. Það sem hrjáði okkar í upphafi tímabils var algjör skortur á sköpun færa. Við vorum betri aðilinn í leikjum liðsins en steingeldir fram á við. Frá opnunarleiknum gegn Swansea þann 17. ágúst sl. skoraði liðið ekki mark nema eftir fast leikatriði þangað til gegn Sunderland þann 5. október sl. Það er einn og hálfur mánuður án þess að skora mark úr opnu spili, gott fólk!

Með innkomu Adnan Januzaj í byrjunarliði blésu ferskir vindar um liðið. Hann skoraði gegn Sunderland og braut þessi álög sem lágu á liðinu. Síðan þá hefur liðið haldið áfram að vera betri aðilinn í leikjum liðsins en jafnframt farið að skapa sér færi. Þrátt fyrir að við höfum tapað stigum gegn Southampton áttum við að vera löngu búnir að klára leikinn enda fengu menn nóg af tækifærum til þess. Það sama var uppi á teningnum gegn R. Sociedad í vikunnu. Sá leikur hefði átt að enda 3 til 4-0 fyrir okkar mönnum. Menn eru því farnir að skapa færin. Næst er því bara að fara að nýta þau.

Það er því ljóst að Moyes og félagar hafa verið að vinna í þessu á æfingarsvæðinu enda hefur leikur liðsins snarbatnað frá því að við töpuðuð gegn WBA. Hluti af þessu er hvíldin á Rio og Vidic. Það er farið á hægjast á þeim og því þurfa þeir alltaf að detta neðar og neðar á völlinn til að bæta sér það upp. Það þýðir að allt liðið þarf að færa sig neðar á völlinn til að verjast. Með því að spila einhverjum af Smalling/Jones/Evans saman getur liðið spilað mun hærra á vellinum, minna bil myndast á milli miðju og varnar og miðju og sóknar og því auðveldara fyrir liðið að verjast og umfram allt að sækja sem heild.

En nóg um þessar vangaveltur. Tölum aðeins um andstæðinginn.

Andstæðingurinn.

Stoke er auðvitað ekki lengur Stoke. Það er búið að særa Tony Pulis út úr þessari deild og þrátt fyrir að mannskapurinn sé að stærstum hluta sá sami þá er áherslan á þennan trukkabolta Pulis orðin minni hjá Stoke með tilkomu Mark Hughes í stjórasætið. Liðið reynir að halda boltanum meira en áður, er ekki jafn gróft og varnarlínan er hærri á vellinum áður. Svo geta þeir víst ekkert í föstum leikatriðum lengur. Mark Hughes virðist því í raun vera að reyna það ómögulega: Að breyta Stoke í knattspyrnulið.

Hversu vel er það að takast? Ekkert sérstaklega. Liðið situr í 16. sæti með 8 stig og er í neðsta sæti þegar kemur að markaskorun með aðeins fjögur mörk til þessa. Mönnum hefur ekki tekist að koma tuðrunni í netið í síðustu þremur leikjum liðsins. Liðinu skortir algjörlega afgerandi markaskorara, í það minnsta sæmilegan framherja. Enginn af þeim hefur komið boltanum yfir línuna og það er enginn leikmaður liðsins með meira en eitt mark skorað. Það gengur ekki upp til lengdar. Það sem heldur þeim á floti er varnarleikurinn. Liðið er í 5. sæti varnarlega séð. Hljómar kunnuglega?

Stoke eru auðvitað fastir fyrir ennþá enda ekki hægt að fjarlægja eitrunaráhrif Tony Pulis á örfáum mánuðum, það er margra ára verk. Hughes er þó að reyna en honum hefur ekki tekist að snúa við þeirri þróun sem átti sér stað á lokametrum stjóratíðar Pulis. Liðið hefur aðeins unnið 3 af síðustu 32 leikjum liðsins. Þeim hefur þó tekist að stríða stærri liðunum á þessu tímabili, voru óheppnir að stela ekki þremur stigum gegn City og þrátt fyrir að tapa gegn Arsenal 3-1 voru þeir síst verri aðilinn í leiknum.

Stoke-liðið hefur þó að öllu jöfnu ekkert sérstaklega gaman að því að mæta á Old Trafford. Til að sýna fram á það skulum við færa okkur yfir í tölfræðihluta þessarar upphitunar.

Tölfræði!

Síðasti útisigur Stoke á Manchester United átti sér stað árið 1976.
Síðan þá hefur Stoke 12 sinnum komið á Old Trafford í deildinni. Þeir hafa tapað 11 sinnum og nælt sér í eitt jafntefli
Manchester United hefur unnið síðustu 9 leiki þessara liða á Old Trafford.
Manchester United hefur einnig unnið 9 af síðustu 10 viðureignum þessara liða í öllum keppnum.
Robin van Persie er sjóðandi heitur gegn Stoke. Hann hefur skorað 8 mörk í síðustu 6 leikjum sem hann hefur tekið þátt í gegn Stoke.

Uppstilling.

Tom Cleverley og Darren Fletcher eru frá vegna meiðsla. Robin van Persie og Danny Welbeck eru tæpir en eiga séns á því að ná leiknum. Allir aðrir eru frískir.

Á heildina litið stóð liðið sig vel gegn Real Sociedad og ég sé ekki mikla ástæðu til þess að hræra mikið í liðinu. Evans og Jones stóðu sig vel í miðvarðarparinu og engin ástæða til þess að hleypa Rio og Vidic í byrjunarliðið þó þeir séu lausir við meiðsli. Varnarlínan ætti því að haldast óbreytt.

Giggs spilaði allar 90. mínúturnar á fullu gegn R. Sociedad og verður líklega ekki með á morgun. Carrick er fyrsti maður á blað og eina spurningin hver verður hliðina á honum á miðjunni. Líklegast verður það Marouane Fellaini en Anderson virðist ekki hafa heillað Moyes mikið. Nani spilar alltaf vel gegn Stoke og ætti að byrja inná hægra megin. Ég held að Januzaj ætti að fá að hvíla í þessum leik með það markmiði að byrja honum inná gegn Norwich í deildarbikarnum í næstu viku. Kagawa var verulega sprækur gegn Sociedad og á skilið að fá að byrja þennan leik. Moyes hrósaði honum mikið eftir leikinn og launar honum vonandi frammistöðunni með því að byrja honum gegn Stoke.

Ef Robin van Persie er eitthvað tæpur ætti Moyes bara að hvíla hann og annaðhvort gefa Chicharito annað tækifæri eða setja Rooney sem fremsta mann og Kagawa fyrir aftan hann í holunni. Hvernig væri það nú?

Spái byrjunarliðinu svona:

De Gea

Rafael Evans Jones Evra

Carrick Fellaini

Nani Rooney Kagawa

Chicharito

Við ættum auðvitað að sigra þennan leik og við munum gera það ef liðið heldur áfram að skapa færi eins og í síðustu tveimur leikjum. Moyes mun leggja áherslu á að menn séu ekki kærulausir í markteig andstæðinganna. Við erum að mæta lélegasta sóknarliði deildinnnar og ættum því ekki að fá á okkur mark. Ef við skorum mark snemma leiks vil ég sjá okkar menn klára leikinn fljótlega eftir það með fleiri mörkum. Það er algjör óþarfi að skora eitt mark og halda að það sé nóg, það kom illilega í bakið á okkur seinustu helgi.

Spá.

Set 3-0 á þetta. Kagawa með tvo og Fellaini skorar með afró-inu.

Leikurinn hefst kl. 14:00. Dómari er Lee Mason.

Meistaradeild Evrópu

Manchester United 1:0 Real Sociedad

Magnús Þór skrifaði þann 23. október, 2013 | 13 ummæli

Það var gaman að sjá Own Goal mæta hressan til leiks í kvöld. Hann skoraði ófá mörkin fyrir okkur um árið.

Þessi sigur var sanngjarn, vægast sagt. Liðið spilaði mjög vel og ekki síst vörnin. Evans og Jones voru alveg með þetta og spurningin er hvenær en ekki hvort þeir muni verða miðvarðarpar númer eitt. Sociedad áttu engin alvöru færi, mestallt voru skottilraunir utan af velli sem besti markvörður ensku úrvalsdeildarinnar átti ekki í vandræðum með.

Shinji Kagawa fékk loks tækifæri undir lok leiksins að spila sína stöðu í holunni eftir að Rooney var færður í senterinn, fram að því lék hann á vinstri kantinum. Með smá leikæfingu getur hann orðið stórhættulegur.

Það er svolítið ósanngjarnt að vinna leikinn bara 1:0 og tæknilegt skora engin mörk sjálfir en markvörður gestanna var í stuði eins og vill oft gerast gegn Manchester United.

Ryan Giggs spilaði allan leikinn á miðjunni með Carrick og hljóp manna mest eða um 11,5 km og var með 85% sendingahlutfall og velski seiðkarlinn heldur áfram að koma á óvart korter í fertugt.

Maður leiksins

Að mínu mati er Wayne Rooney maður leiksins.