Rauðu djöflarnir

Pistlar Ritstjóraálit Sagan Stjórinn

Sumt af því besta, og versta, frá Ferguson árunum

skrifaði þann | 5 ummæli

Það væri hægt að búa til 20 diska DVD safn af því besta, og versta, frá Ferguson árunum. Þess vegna er hér farin hin leiðin og ritstjórar kusu 5 bestu eða verstu í örfáum flokkum:

Bestu kaupin

1. Eric Cantona (5 atkvæði)

1. Cristiano Ronaldo (5 atkvæði)

1. Peter Schmeichel (5 atkvæði)

Allir ritstjórarnir sammála um að þessir kappar væru ein af fimm bestu kaupum Ferguson.

4. Roy Keane (3 atkvæði)

Þegar þú vinnur titil, hvað er þá betra að gera en að kaupa besta leikmanninn á markaðnum? (Hint, hint, Mr Moyes)

5. Ole Gunnar Solskjær (2 atkvæði)

5. Nemanja Vidic (2 atkvæði)

Aðrir: Denis Irwin, Wayne Rooney, Edwin van der Sar

Verstu kaupin

Hér vorum við aftur nokkuð sammála

1. Bébé (5 atkvæði)

1. Kléberson (5 atkvæði)

1. Juan Sebastian Verón (5 atkvæði)

(sumir reyndar gleymdu atkvæði sínu og sóru um helgina að það væri bara ekki rétt að Verón ætti að vera á þessum lista. En það er of seint fyrir m…hann að breyta!

4. Eric Djemba-Djemba (2 atkvæði)

4. Ralph Milne (2 atkvæði)

4. Massimo Taibi (2 atkvæði)

Aðrir: David Bellion, Diego Forlán, Liam Miller,  Alan Smith

Besta tímabilið

1. 1998-99 (4 atkvæði)

Það er ekki hægt að horfa framhjá tímabilinu 98-99 þegar þrennan vannst. Það er hreint út sagt ótrúlegt að maður hafi ekki drepist úr hjartaáfalli þann veturinn því dramatíkin var í botni í nánast öllum leikjum frá áramótum það tímabilið.

2. 1993-94 (1 atkvæði)

Stressið frá árinu áður farið, almanaksárið 1993 stórfenglegt, hársbreidd frá þrennunni og fyrsta tvennan, á tíma þegar tvennan virkilega skipti máli og var annað merki um að við værum komnir á stallinn. Og besta byrjunarlið sem United hefur stillt upp.

Besta andartakið

1. And Solskjær has won it (5 atkvæði)

2. Steve Bruce gegn Wednesday (4 atkvæði)

Annað: Bikarmeistarar 1990, Tvennan ’96, Evróputitilinn 2008

„Það eru svo mörg móment sem maðurinn hefur skapað að það er vonlaust að velja eitthvað eitt. “

Besta liðið

(atkvæði í sviga)

Schmeichel (5)

G.Neville (5) Ferdinand (3) Vidic (4) Irwin (4)

Ronaldo (5) Keane (5) Scholes (5) Giggs (5)

Cantona (5) Rooney (2)

Aðrir: Patrice Evra, Steve Bruce, Jaap Stam, David Beckham, Robin van Persie

Tveir ritstjórar tilnefndu varamenn og bætast þá við Edwin van der Sar, Michael Carrick, Andrei Kantsjelskís, Paul McGrath, Bryan Robson og auðvitað Ole Gunnar Solskjær.

Reyndar fékk Ronaldo 3 atkvæði á hægri kant og tvö í senter, Beckham 2 í hægri kant og Rooney 2 í senter. Því var látið ráða að Ronaldo fékk fleiri atkvæði sem kantmaður og settur þar. Þá var bara pláss fyrir Rooney í senter. Þetta er með öllu óskylt því að talningamaður setti Ronaldo í hægri kant, enda sleppti talningamaður BÆÐI Beckham og Rooney.

Ótrúlegt samt að á 27 árum þegar orðið hafa til amk 3 stórkostleg lið séum við samt svo sammála að sjö leikmenn fái öll atkvæði. Hjálpar reyndar að ’99 miðjan sé almennt talin ein besta miðja allra tíma í enskri knattspyrnu. En samt.

Ég ætla að láta vera að nefna á nafn piltinn sem fékk svarið við fyrstu tillögunni sinn „Enginn Cantona?“ og svaraði „shiiiiiit ég bara gleymdi…“. Honum, og mér, til varnar var lokaliðið hans öðruvísi á fleiri máta en bara að bæta inn Le Dieu

Svona færsla hreinlega öskrar á smá umræðu!

Enska úrvalsdeildin

WBA 5:5 Manchester United

skrifaði þann | 5 ummæli

West Bromwich Albion - Manchester UnitedÞetta var svakalegur kveðjuleikur sem Sir Alex Ferguson og Paul Scholes fengu í dag á The Hawthorns. Það gerist ekki oft að maður sér United skora fimm mörk án þess að sigra fótboltaleik, hvað þá að fá á sig fimm mörk í einum og sama leiknum. Það var hinsvegar raunin í dag. United og West Bromwich gerðu jafntefli í tíu marka leik. TÍU! Það hefði nú óneitanlega verið mun skemmtilegra að sjá liðið kveðja Ferguson með flottum sigri en svona er þetta. Titilinn er kominn í hús og menn greinilega farnir í sumarfrí.

United byrjuðu leikinn gríðarvel, spiluðu eins og englar og voru komnir í 3-0 eftir hálftíma leik, skalli Kagawa, sjálfsmark Jonas Olsson og mark Büttners sáu til þess og allt leit út fyrir að draumaskiptingarnar, Scholes, Giggs og Adnan Januzaj yrðu að veruleika. En sitt hvoru megin við hálfleik minnkuðu James Morrison og Lukaku, sem kom inná í hálfleik, muninn og fór að fara um suma. Van Persie svaraði samt strax og síðan bætti Chicharito við marki. Scholes og Giggs komu inná og það var partístemming. En þegar 10 mínútur voru eftir skoruðu Lukaku og Mulumbu mörk á sömu mínútunni. Fergie sagði stopp, drap draum okkar um Januzaj en setti Rio inna í staðinn til að stoppa þetta. En það kom fyrir ekki og eftir enn eitt klúðrið í vörninni jafnaði Lukaku.

Bjössi nefndi áðan við mig að Ferguson myndi nú örugglega koma með eina kveðju hairdryer ræðu til drengjanna sem líklega verður á þessum nótum: „Ef þið haldið að þið getið spilað svona því ég er að hætta…“. Það er varla hægt annað þegar United fær á sig fimm mörk þar sem mörg af þeim voru einstaklega klúðursleg. Það er að sjálfsögðu algjörlega óásættanlegt og hefur kallinn eflaust látið heyra í sér.

En þar sem þessi leikur skipti afskaplega litlu máli, þá er lítil þörf á því að greina hann frekar. (Kannski var það soldið hugsunarhátturinn hjá liðinu í dag?). Ég nefndi í upphituninni að við ætlum að gera smá uppgjör á tímabilinu á næstunni og birtum við það hér á síðunni mjög bráðlega og verðum síður en svo sofandi í sumar.

Það er þrennt í viðbót sem mig langaði að taka fyrir sérstaklega í þessar leikskýrslu.

1. Æðislegir stuðningsmenn

Stuðningsmenn United voru alveg frábærir í dag. Það gerist ekki oft að stuðningsmenn nái á syngjá það hátt að ég eigi erfitt með að heyra í lýsendunum. Það var samt raunin í dag er þeir sungu hátt og skýrt í þeim allan leikinn og var maður byrjaður að raula með lögunum hér í stofunni.

Moyes söngurinn var nottla alveg geggjaður og verður gaman að heyra hann sunginn á næsta tímabili (og vonandi í fjöldamörg ár til viðbótar). #TeamMoyes er semsagt komið á fullt skrið.


https://twitter.com/raududjoflarnir/status/336140557032239105

https://twitter.com/UtdRantcast/status/336140464480727041

2. Kagawa vs. Rooney

Maður leiksins hjá mér í dag var herra Shinji Kagawa. Mér fannst hann spila alveg frábærlega í dag í stöðu Wayne Rooney í dag. Eftir að hafa horft á hann brillera í fyrri hálfleik fór ég ósjálfrátt að hugsa út í vesenið sem við virðumst vera glíma við með Rooney. Ef Kagawa heldur áfram að spila svona vel, og ég fullyrði að hann verður betri á næsta tímabili, munum við þá sakna Rooney ef hann skyldi fara?

Svarið er að sjálfsögðu já. Rooney er frábær leikmaður sem hefur spilað gríðarlega vel fyrir United í núna níu ár og að sjálfsögðu myndu öll lið sakna slíks leikmanns ef hann færi. Málið er hinsvegar þannig að ég held að Kagawa, ef hann heldur áfram sínu striki, muni fylla skarðið sem Rooney skilur eftir sig nokkuð vel. Þetta er amk umhugsunarefni. Persónulega vona ég að Rooney hætti þessari vitleysu og haldi áfram með liðinu en það er afskaplega erfitt að sjá það gerast þar sem þetta er í annað skipti sem drengurinn biður um að vera seldur frá United.

3. Þakka fyrir mig!

Það verður virkilega skrítið að horfa á United spila knattspyrnuleiki án þess að sjá Ferguson á hliðarlínunni að stjórna liðinu og Paul Scholes á vellinum að stjórna miðjunni. Það er alveg ótrúlegt að hugsa til þess hversu margar og svakalegar minningar þessir tveir hafa skapað fyrir okkur í gegnum árin og neita ég því ekki að maður er hálfdapur að skrifa þessa málsgrein.

Þótt þeir muni aldrei sjá þetta þá vil ég samt hafa þetta einhversstaðar skrifað:


Takk fyrir mig!
Kveðja,
Elvar Örn Unnþórsson


Nokkur vel valin tíst

Ég enda þetta svo á nokkrum vel völdum tístum…


https://twitter.com/WBAFCofficial/status/336141901633822720

https://twitter.com/raududjoflarnir/status/336149583417708544

https://twitter.com/RedMancunian/status/336141118855077889

https://twitter.com/ofurmaggi/status/336137513854988288

https://twitter.com/HearUnitedSing/status/336153943342202880

https://twitter.com/AboutManUtd/status/336172477791227904

https://twitter.com/mrmujac/status/336121604943785984

https://twitter.com/WBAFCofficial/status/336162379878518785

Enska úrvalsdeildin

Byrjunarliðið gegn West Brom

skrifaði þann | 3 ummæli

Svona leit fyrsta byrjunarlið Ferguson hjá Manchester United út:

Turner

Duxbury Moran McGrath Albiston

Hogg Blackmore Moses Barnes

Davenport Stapleton

Og svona verður það síðasta:

Lindegaard

Valencia Jones Evans Buttner

Anderson Cleverley Carrick Kagawa

van Persie Chicharito

Bekkur: De Gea, Evra, Ferdinand, Giggs, Vidic, Scholes, Januzaj

Enginn Rooney í dag og ástæðan á víst að vera:


https://twitter.com/SkySportsNews/status/336054796719112192

Held því miður að við sjáum hann ekki spila aftur í rauðu þó ég voni svo innilega að ég hafi rangt fyrir mér. En dagurinn í dag snýst ekki um hann. Í dag kveðjum við þessa tvo.

Paul Scholes og Sir Alex Ferguson

Nú er bara að sitja, horfa á leikinn og kveðja þessa tvo meistara. Ef ykkur vantar lesefni til að stytta ykkur stundir á meðan þið bíðið:

Munið svo. #Djöflarnir #Djöflarnir #Djöflarnir #Djöflarnir

Enska úrvalsdeildin

United heimsækir West Bromwich Albion

skrifaði þann | 4 ummæli

West Bromwich Albion - Manchester UnitedÞá er komið að því, síðasti leikur tímabilsins er runninn upp og sumarfríið blasir við. Það klikkar ekki að á hverju ári þegar að þessum tímapunkti kemur verður maður leiður yfir fótboltaleysi sumarsins. Svo þegar fólk segir manni að slaka á og að það hljóti nú að vera hægt að bíða rólegur í þrjá mánuði, hugsa ég til spaka mannsins þegar sagt var við hann: „Við erum með dóttir þína. Hún er örugg en hvort henni verði haldið þannig ræðst af þér. Þú ætlar að vera samvinnuþýður og fá hana til baka, rétt?“ og hann svaraði svo snilldarlega: „Rangt!“.

Ykkur til upplýsinga, þá munum við hjá Rauðu Djöflunum koma með á næstunni nokkrar greinar til að gera upp tímabilið ásamt því að ræða um sumarið og væntanlegar breytingar innan félagsins. Ritstjórnarteymið mun þar af leiðandi fylgja þessari frægu ráðleggingu spaka mannsins sem sagði: „Hleypið út smá gufu!“.

Það verður samt lítið sumarfrí hjá Manchester United þar sem liðið er að ganga í gegnum eina mestu breytingu í sögu félagsins. Leikurinn á morgun verður sá fimmtán-hundraðasti hjá Ferguson við stjórnvölinn hjá United og því miður sá allra síðasti. Svo til að bæta gráu ofan á svart ætlar einn allrabesti miðjumaður í sögu United að leggja skóna á hilluna í annað skiptið. Það er því nóg ástæða til þess að horfa á liðið spila í síðasta skipti á þessu tímabili sem verður gegn West Bromwich Albion á heimavelli þeirra, The Hawthorns.

Í gær fékk Ferguson sérstök heiðursverðlaun fyrir framlag sitt til ensku deildarinnar síðustu 26 ár. Að auki var hann svo valinn besti stjóri ensku deildarinnar á þessu tímabili og er það í ellefta skipti sem hann vinnur þau verðlaun. Fyrst vann hann þau árið 1994 og svo fylgdu árin 1996, 1997, 1999, 2000, 2003, 2007, 2008, 2009, 2011 og nú 2013. Flottur endir hjá langbesta stjóra í sögu fótboltans. Verðlaunin verða svo afhend stuttu fyrir leikinn á morgun en myndin hér á hægri hönd var tekin í gær þegar kappinn tók við Merit verðlaunum á Carrington æfingarsvæðinu.

Fyrir langa löngu, nánar tiltekið tuttugu og sjö árum, sjö mánuðum og fjórtán dögum, var vinur minn að ganga í gegnum mikla erfiðleika í sínu lífi og ýmsir voru að valda honum ama og erfiðleikum. Einum þeirra gaf hann hátíðlegt loforð sem tekið var hæfilegt mark á, þó menn hefðu ef til vill betur gert það, enda vinur minn maður orða sinna. Þó kom svo nokkru síðar að vinur minn var minntur á loforðið. Þá höfðu aðstæður þó breyst og vinur minn neyddist til að ganga á bak orða sinna og gat ekkert sagt nema : „Ég laug!“. Af hverju vitna ég í þessa lygi félaga míns? Jú, því það væri lygi hjá mér að halda því fram að þessi leikur muni snúast um eitthvað annað en snillinginn Sör Alex Ferguson.

Ég ætla samt að gera tilraun til að gera leikinn örlítið spennandi fyrir ykkur. Ótrúlegt en satt þá hafa bæði lið góðar ástæður til að spila vel og ná þessum þremur stigum sem í boði eru. Hvaða ástæður? Jú, fyrir United þá myndi sigur jafna stigamet liðsins (91 stig sama og tímabilið ’99-’00), bæta klúbbsmetið í fjölda sigra í úrvalsdeildinni á einu tímabili og sem bónus þá myndi mark frá t.d. Scholes betrumbæta metið sem United setti í síðasta leik, með fjölda leikmanna sem hafa skorað mark fyrir eitt lið á einu tímabili. Gleymum svo ekki að leikmennirnir vilja kveðja Ferguson með sigri. Fyrir WBA þá vilja þeir tryggja sér áttunda sætið og ná besta árangri liðsins í úrvalsdeildinni sem svo skemmtilega yrði einnig besti árangur liðsins síðan 1981.

Meiðsli/Veikindi/Leikbönn

Hjá United….

  • C Smalling (Fótur, uppskurður) => Tilbúinn: Óvitað
  • N. Powell (Óvitað, uppskurður) => Tilbúinn: Óvitað
  • A Young (Ökkli/Fótur) => Tilbúinn: Óvitað
  • D. Fletcher (Sáraristilbólga) => Tilbúinn: Óvitað

Hjá West Bromwich Albion….

  • S. Reid (Ökkli/Fótur) => Tilbúinn: 19 maí
  • G. Reyes (Hné) => Tilbúinn: Óvitað
  • G. Thorne (Hné) => Tilbúinn: Óvitað
  • Z Gera. (Hné) => Tilbúinn: Óvitað
Lykilmaður WBA


Gareth McAuley. Þessi þrjátíu og þriggja ára leikmaður hefur verið frábær í vörninni WBA á þessu tímabili. Á galafagnaði leikmanna WBA og var hann valinn besti leikmaður liðsins á þessu tímabili af bæði leikmönnunum og af stuðningsmönnum. Það kom því ekki á óvart að WBA hafi fengið kappann til að skrifa undir nýjan tveggja ára samning.

Líkleg byrjunarlið

Ferguson gaf það til kynna á fréttamannafundinum að það yrðu gerðar breytingar á liðinu og að hann myndi leyfa nokkrum af yngri leikmönnum liðsins að spila á morgun.

„I don’t have any injury problems. I’ll make a few changes – maybe a few younger players will play. Anders Lindegaard will be in goal. I don’t have Rafael so I need to make a decision about right-back. I want to play Jones and Evans at centre-back – they could be the future. Rio (Ferdinand) and (Nemanja) Vidic will have to have a place on the bench! I’m looking forward to it. It’s going to be great.“

Þessi yfirlýsing ásamt fréttinni um að Powell og Smalling hafi báðir farið í aðgerð, auðveldar mér aðeins vinnuna með byrjunarliðsspána. Hér er mitt gisk…

Lindegaard

Vermijl Jones Evans Büttner

Welbeck Cleverley Scholes Kagawa Giggs

Chicharito

Svo vona ég að Adnan Januzaj, sem á dögunum var valinn besti ungi leikmaður United á þessu tímabili, fái að sitja á bekknum og spili jafnvel einhverjar mínútur.

Að lokum

Enda þetta svo með nokkrum skemmtilegum staðreyndum sem mig langaði að deila með ykkur.

  • West Brom hefur aldrei unnið Manchester United í úrvalsdeildinni. Þrettán leikir, 11 sigrar hjá United og tvö jafntefli.
  • United tapaði síðast gegn WBA árið 1984 í mars. Sá leikur endaði 2-0.
  • Markahæsti leikur liðanna var árið 1968, mánuði áður en United varð Evrópumeistari, sem endaði 6-3 fyrir West Brom.
  • West Brom hafa tapað síðustu þrem leikjum og ekki skorað í síðustu tveim.
  • West Brom hefur aðeins unnið einn leik af síðustu átta. Einn sigur, tvö jafntefli og fimm töp.
  • Stigamet West Brom í úrvalsdeildinni er 47 stig og hafa þeir nú þegar bætt það (eru með 48 stig).
  • Rio Ferdinand skoraði gegn Swansea um síðustu helgi. Hann hafði ekki skorað mark fyrir United í 1947 daga eða síðan janúar 2008.
  • Ryan Giggs hefur spilað í 77% af öllum 809 úrvalsdeildarleikjum Manchester United.
  • United hefur skorað 15 mörk úr hornum á þessu tímabili.
  • Aðeins Arsenal (18) og Tottenham (17) hafa skorað fleiri mörk en United (16) á síðustu 15 mínútunum.

https://twitter.com/nickcoppack/status/328812014107516928

https://twitter.com/ManUtd_Fact/status/335116450077487104

https://twitter.com/OptaJoe/status/335066063475724288

Pistlar Sagan Stjórinn

Fæddur árið 17 f.F.

skrifaði þann | 8 ummæli

Samkvæmt dagatalinu er ég sá eini af ritstjórninni sem man árin fyrir Fergie, enda fæddur 1969, 17 árum fyrir Ferguson. Ólíkt Ómari Ragnarssyni sem komst fram til átta ára aldurs í fyrsta bindi ævisögunnar, get ég hins vegar ekki sagt að ég sé minnugur á atburði. Ég veit það t.a.m. bara af því eldri frændur rifja það alltaf upp að fyrsta sem ég veit um að ég sé United maður er að ég á að hafa grenjað óhuggandi þegar United tapaði fyrir Southampton í bikarúrslitunum ’76. Annars man ég þetta ósköp lítið næstu árin. Maður horfði á útdrætti úr vikugömlum enskum leikjum á laugardögum, las um þetta í Mogga og fylgdist svolítið með. 1982 byrjaði ég að lesa Shoot! og fékk fagra mynd af öllum leikmönnum og liðum, enginn var lélegur, bara stundum smá vonbrigði. Sama ár komu fyrstu beinu útsendingarnar og um haustið byrjaði RÚV að sýna einn leik í viku.

Stóri Ron var kominn til United, búinn að veifa veskinu og spandera í Bryan Robson og Remi Moses og var að reyna að gera þetta svolítið spennandi. Sumarið 1982 kom United til Íslands, og Hótel Loftleiðir fylltist af guttum að snapa eiginhandaráritanir. United rústaði Val og KA, jafnvel þó sá Best-i væri með Val og KA. Vorið 1983 hefði ég séð United lyfta bikar í fyrsta skipti í beinni útsendingu, nema það að aðeins úrslitaleikurinn á laugardeginum var í beinni útsendingu, ekki aukaleikurinn á fimmtudeginum. Aftur segir það aðeins til um minni mitt að ég ákvað að líta á dagskrána það kvöld til að skoða hvað hefði komið í staðinn og fyrst þá mundi ég augljósu ástæðuna. Það var jú barasta ekkert sjónvarp á fimmtudögum!

Útlitið virtist bjart, allir leikmenn voru greinilega frábærir leikmenn, og þetta Liverpool-lið hlaut að vera á niðurleið. Veturinn 1983-4 var Evrópukeppni-bikarhafa-veturinn, man fátt annað en að vakna einn morgun og komast að því í Mogga að United hefði unnið Barcelona 3-0 og væri komið í undanúrslit. Ég man minna eftir því að lesa um jafntefli og tap gegn Juventus í undanúrslitunum. Eitthvað leiðindalið vann víst deild og Evrópukeppni þetta árið, en ekki man ég eftir því frekar en aðrir.

Strachan-Olsen-Brazil-Robson

En áfram hélt vonin. Um sumarið komu Strachan, Olsen og Brazil til United, og ég hafði aldrei séð jafn flotta mynd í Shoot! og þessa, þvílík snilldarkaup! Nú hlaut þetta að fara að smella!

Veturinn eftir byrjaði með 4 jafnteflum, hafði viðkomu í að tapa í vítakeppni gegn ungverska liðinu Videoton í UEFA bikarnum, en endað í sólinni á Wembley þar sem Norman Whiteside tryggði bikarsigur gegn Everton, sem einhverra hluta vegna hafði allt einu byggt miklu betra lið en okkar og orðið meistarar á glæsilegan hátt. Ég skildi þetta ekki alveg…

Haustið 1985 small þetta. Loksins loksins loksins. Tíu sigrar í röð! Hvílík vél! Mark Hughes orðinn besti senter í heimi, miðjan stórfengleg með Robson og Whiteside og vörnin örugg með klettinn Paul McGrath. 10 stiga forysta í nóvember! En borgin sú var byggð á sandi. Og bjór. Allir fyrrnefndir voru í raun mestu byttur (einhverra hluta vegna var Shoot! ekki mikið að ræða það og vikulegar greinar Bryan Robson voru allar um hvað þetta væri nú allt frábært. Nú eða hann talaði bara um enska landsliðið), Hughes var seldur á miðju tímabili til Barcelona, þó það mætti ekki segja frá fyrr en hann færi um sumarið, og fannst það svo sorglegt að hann þjóraði enn meira og Big Ron tsjillaði í sólbekknum í skrifstofunni sinni frekar en að taka á málunum. United endaði í fjórða sæti, 12 stigum á eftir Liverpool.

Þetta gat bara haft einn endi. Þeir sem lásu DV hefðu átt að vera með á nótunum strax í október, enda lásu blaðamenn þar skosku blöðin, en 5. nóvember 1986 var staðan í deildinni svona:

og United hafði tapað fyrir Southampton í deildarbikarnum 1-4. Það var nóg komið. Big Ron tók hatt sinn og sólbekk, Bobby Charlton og Martin Edwards rúntuðu til Skotlands og sögðu Alex Ferguson að koma strax með suður. Charlton var búinn að lauma þessari hugmynd í kollinn á Ferguson í Mexíkó þá um sumarið þegar Fergie var að stýra Skotlandi í HM og Ferguson þurfti ekkert að hugsa sig um þegar alvörulið kom og þurfti hjálp. Ólíkt því þegar Arsenal vildi fá hann.

Mogginn var sem fyrr aðalheimildin, og fjallaði mjög ítarlega um ráðninguna eins og sjá má. Shoot! bjargaði málunum og opnugrein Robson um Fergie og Big Ron var djúp og ítarleg… eða ekki. Robson sagði Alex vera þöglari en Ron, hugsandi mann sem eyðir ekki orðum í óþarfa. Annað hvort vill svo ólíklega til að það hafi verið nokkrar vikur þarna í byrjun þar sem ekki var kveikt á hárblásaranum, eða hitt, að Shoot! fékk ekki sannleikann, hráan og ósminkaðan.

Fyrstu ár Ferguson eru síðan efni í aðra grein en skemmst frá því að segja að breytingarnar tóku tíma. En þá fengu stjórar aðeins meiri tíma en nú og Ferguson fékk þann tíma sem þurfti. Það er eina lexían sem hægt er að draga af þessu yfirliti um árin fyrir Fergie. Moyes tekur vissulega við örlítið betra búi, en ef við viljum fá stjóra sem endist, þarf hann að fá tíma til að móta liðið að sínu höfði.