Rauðu djöflarnir

Það er orðið opinbert, David Moyes er arftaki Sir Alex Ferguson sem knattspyrnustjóri Manchester United og mun hann taka við stjórnartaumunum að tímabili loknu. Ég segi þetta aftur: David Moyes er arftaki Sir Alex Ferguson sem knattspyrnustjóri Manchester United. Takið ykkur smástund í að melta þetta.

Fljótlega eftir að staðfesting barst um að Sir Alex myndi setjast í helgan stein komu helst þrír menn til greina, David Moyes, Jose Mourinho og Jurgen Klopp. Fljótlega uppúr hádegi í gær varð það þó alltaf skýrara og skýrara að það yrði David Moyes sem myndi taka við keflinu. Rétt áður en tilkynning barst þess efnis að Moyes væri nýr stjóri United virðist fréttadeild United aðeins hafa farið framúr sjálfri sér og birti hún tengil yfir á Facebook-síðu félagsins þar sem Moyes var boðinn velkominn og aðdáendur gátu skilið eftir skilaboð til hans. Fljótlega eftir það birti Twitter-síða Everton þetta:

https://twitter.com/Everton/status/332489431334416386

United lét okkur bíða í dágóða stund áður en þeir birtu staðfestingu á því sem allir vissu en hún kom klukkan 3 í dag:

https://twitter.com/ManUtd_PO/status/332511735988756480

Moyes fær 6 ára samning og tekur við stjórnartaumunum þann 1.júlí nk.

Hann tekur við níðþungu kefli, svo vægt sé til orða tekið. Moyes tekur við sigursælasta knattspyrnufélagi Englands af besta knattspyrnustjóra allra tíma. Engin pressa, félagi. Það er ekki ofsögum sagt að þetta séu líklega dýpstu og stærstu fótspor sem einhver þjálfari eða framkvæmdastjóri þarf að feta í sögu íþrótta. Aftur, enginn pressa.

Ég hef yfirleitt talað fyrir því að þegar tyggjópakkinn færi á hilluna hjá Sir Alex yrði fenginn til liðsins reynslumikill stjóri með góða ferilskrá en umfram allt maður sem væri víst að gæti höndlað þá gríðarlegu pressu sem mun falla á herðar næsta stjóra. Ég dáðist að Pep Guardiola en í laumi vonaðist ég alltaf til að Jose Mourinho myndi taka við félaginu. Með hann við stjórnvölinn væri nánast hægt að tryggja það að Manchester United yrði áfram það stórveldi sem það er í dag. Það er nefnilega svo mikilvægt að það viðhaldist. Liverpool heldur t.d. ennþá í stórveldismerkimiðann sinn frá Shankly-Dalglish tímanum þrátt fyrir að í dag sé ekki mikil innistæða fyrir því, allavega hvað varðar árangur á knattspyrnuvellinum. Það er staða sem við viljum ekki sjá Manchester United í.

Maðurinn sem á að sjá til þess að Manchester United haldi sér á toppnum er David Moyes. Hann er, eins og góðra knattspyrnustjóra siður er, fæddur í Glasgow.  Hann hefur líklega alltaf ætlað sér að verða knattspyrnuþjálfari enda var hann aðeins 22 ára þegar hann tók sín fyrstu þjálfararéttindi. Hann átti, líkt og Sir Alex, tiltölulega ómerkilegan en þokkalega farsælan feril sem leikmaður. Hann spilaði sem miðvörður með félögum eins og Celtic, Bristol City, Dunfermline og Preston. Það var hjá Preston sem hann fékk sitt fyrsta tækifæri sem knattspyrnustjóri árið 1998, þá 34 ára gamall. Liðið var þá í þriðju deild og spilaði drepleiðinlegan háloftabolta. Moyes tók til í félaginu, breytti leikstíl þess og innan tveggja ára var liðið komið í 1. deildina. Í 1. deildinni var liðið í bullandi baráttu um að komast í úrvalsdeildina en gátu þó ekki tekið skrefið til fulls.

Eftir þennan fantafína árangur með Preston var það aðeins tímaspursmál hvenær lið í Úrvalsdeildinni myndi næla sér í þennan stjóra. Í mars 2002 tók hann svo við stjórninni hjá Everton. Hann tók við þeim í slæmum málum og bjargaði þeim frá falli. Næsta tímabil var hann kosinn Knattspyrnustjóri ársins eftir að stýrt algjörum viðsnúningi Everton sem voru mjög nálægt Evrópusæti. Næstu tímabil var liðið svolítið jó-jó lið þar sem liðið fór upp og niður um sæti en frá tímabilinu 2006/2007 hefur Moyes hefur náð að gera Everton að stöðugu afli innan ensku deildarinnar og aldrei neðar en í 8. sæti. Hann hefur þrisvar sinnum verið kjörinn Knattspyrnustjóri ársins sem er bærilegur árangur miðað við þá fjármuni sem hann hefur haft úr að moða.

Ef förum út í þá kosti sem David Moyes býr yfir er sá fyrsti og jafnframt sá mikilvægasti að hann er frá Glasgow, knattspyrnuþjálfarahöfuðborg heimsins.  Pabbi Moyes vann meira í sömu skipasmíðastöð og pabbi Ferguson! Hann er augljóslega hæfileikaríkur knattspyrnustjóri sem árangur hans í úrvalsdeildina sýnir svart á hvítu. Hann hefur gott auga fyrir ungum leikmönnum og er óhræddur við að gefa þeim tækifæri og koma þeim upp í aðalliðið sbr. Wayne Rooney, og Jack Rodwell. Það er gríðarlega mikilvægt atriði fyrir næsta knattspyrnustjóra Manchester United. Enginn knattspyrnustjóri státar af betri árangri í þessum málum en Sir Alex Ferguson og stór ástæða fyrir hinum gríðarmikla árangri United undir hans stjórn. Moyes er einnig óhræddur við að spila þessa mikilvægu hugarleiki, skemmst er að minnast þess þegar hann setti svo mikla pressu á dómarana fyrir leik Everton og Manchester United í undanúrslitum FA-bikarsins árið 2009 að þeir voru hreinlega skíthræddir við að dæma nokkurn skapaðan hlut á Everton í leiknum.

Ég hef einnig heyrt því fleygt að mikilvægt sé að Ferguson skipti sér ekki af félaginu. Sir Matt Busby var alltaf viðriðin félagið sem menn telja hafa haft slæm áhrif á eftirmenn hans. Liverpool skar hinsvegar alveg á Shankly, nokkuð harkalegt en skilaði árangri og gerði eftirmönnum hans kleyft að vinna úr sínum hugmyndum á sínum eigin forsendum. Ef Mourinho, Klopp eða álíka nöfn hefðu verið ráðin held ég að Ferguson hefði þurft að slíta sig frá klúbbnum. Þeir hefðu ekki viljað hafa hann á öxlinni og það hefði gert þeim starf sitt erfiðara fyrir. Þeir eru það stór nöfn með það mikla reynslu að þeir hefðu þurft að fá að vinna með liðið algjörlega á sínum forsendum og þyrftu í raun ekkert á Sir Alex að halda. Ég tel að þetta gildi ekki að jafn miklu leyti um David Moyes. Hann hefur sjálfur talað um hversu oft hann hafi getað talað við Ferguson og leitað ráða hjá honum þegar illa gekk hjá Everton. Hann er vanur að leita ráða hjá Sir Alex og í þessu tilviki tel ég það ljóst að nærvera Sir Alex muni frekar gagnast nýjum knattspyrnustjóra en ekki. Sir Alex þekkir sögu klúbbsins og gerir sér grein fyrir því að hann má ekki skipta sér of mikið af. Auðvitað er mikilvægt að Moyes fái að gera hlutina eftir sínu höfði en hann er jafnframt ekki með reynsluna af því að stjórna á þessu stigi knattspyrnunnar líkt og t.d. Mourinho og hann mun því án græða á því að geta leitað til fyrirrennara síns.

En fíllinn í herberginu er auðvitað sá að maðurinn hefur auðvitað ekki unnið nokkurn skapaðan hlut. Ekkert. Hann á enga medalíu og enga bikara á ferilskránni. Hún er galtóm, nánast. Það eina sem hann hefur gert er að taka klúbba í erfiðleikum sem hafa lítil fjárráð og fært þeim stöðugleika og góðan árangur, ekki glæsilegan árangur heldur góðan árangur. Hann hefur jafnframt enga teljandi reynslu á því að stjórna liði í Evrópukeppni og hvað þá að stýra liði fullu af moldríkum stórstjörnum. Hingað til hefur hann bara stjórnað sæmilega ríkum smástjörnum. Þetta eru hlutirnir sem valda manni áhyggjum, miklum áhyggjum. Ég skal alveg viðurkenna það: Ég er drullustressaður yfir þessari ráðningu og ég væri mun minna áhyggjufyllri ef við hefðum ráðið Mourinho eða Klopp.

Ráðningin er því afar áhættusöm. Hefur Moyes það sem til þarf til þess að stýra þessu félagi? Það veit það enginn en David Moyes hefur þó sýnt fram á að hann er hæfileikaríkur knattspyrnustjóri með karakter og hæfileika til þess að koma auga á efnilega leikmenn. Hann stýrði ekki bara 11 mönnum á grasinu hjá Everton. Hann stýrði öllu félaginu og það er það sem stjóri United þarf að gera. Hjá Manchester United getur hann hinsvegar ekki falið sig á bakvið skort á fjárráðum, hann verður að ná árangri og hann hefur þá peninga sem til þarf.  Hann hefur náð fínum árangri með Everton en það er ekki nóg hjá Manchester United, aðeins það besta gildir hér á bæ. Pressan á að ná árangri fljótt verður einnig gríðarleg. Hvað gerist t.d. ef United byrjar tímabilið illa? Það tók Sir Alex nokkur ár að ná árangri með liðið. Hvað fær Moyes langan tíma? Þetta eru mikilvægar spurningar og ég vona að honum verði gefinn tími til þess að sanna sig, bæði af okkur stuðningsmönnum sem og fjölmiðlamönnum.

David Moyes þarf þó að sýna það að hann sé tilbúinn til þess að stíga næsta skref á ferlinum, að hann sé tilbúinn til þess að feta í fótspor mesta knattspyrnuþjálfara allra tíma. Það verður gríðarlega erfitt verkefni en með þennan leikmannahóp sem við höfum, peninga til þess að styrkja liðið og Sir Alex á hraðvalinu gæti þetta tekist vel upp.

Við stöndum allavega þétt við bakið á honum og bjóðum David hjartanlega velkominn til félagsins.