Rauðu djöflarnir

Leikmaður mánaðarins

David De Gea er leikmaður febrúarmánaðar!

skrifaði þann | 15 ummæli

Sökum anna hef ég dregið lappirnar í að tilkynna útslit í kosningu á leikmanni febrúarmánaðar. Úrslitin reyndar komu ekki mikið á óvart því lesendur Rauðu djöflanna voru sammála flestum öðrum stuðningsmönnum út í heimi í því að David De Gea var besti leikmaður United í febrúar. Hann sigraði þessa kosningu nokkuð örugglega, fékk 43% atkvæða en næstur í kjörinu var Rafael með 21%, en svo kom Giggs með 18%.

Þessi úrslit ættu ekki að koma neinum á óvart, De Gea fékk aðeins á sig tvö mörk í febrúar og hefur eins og staðan er í dag haldið hreinu í ensku deildinni í tæpar 600 mínútur. Hann til dæmis sýndi frábæra takta í fyrri leiknum gegn Real Madrid í Meistaradeildinni og getum við þakkað honum fyrir að Real skoraði aðeins eitt mark í þeim leik.

Um leið og Ferguson hætti að rótera De Gea og Lindegaard í öðrum hverjum leik hefur sjálfstraust De Gea vaxið og fyrir mér hefur hann sýnt það og sannað (enn og aftur) að hann er framtíðar markmaður liðsins. Allt tal um eitthvað annað er bara bull og vitleysa.

Enska úrvalsdeildin

Manchester United 1:0 Reading

skrifaði þann | 8 ummæli

Frá-há-há-bær dagur í dag! United sigrar Reading með einu marki gegn engu. Rooney með sigurmarkið á 21. mínútu og Rio Ferdinand (af öllum mönnum) með stoðsendinguna.

Þessi leikskýrsla í dag verður í styttri kantinum af tveimur ástæðum.
1. Ég var búinn að lofa konunni eitt kvöld án þess að glápa á tölvuskjá. 2. Þetta var svo svakalega dapur leikur í dag að það er bara ekki mikið til að skrifa um. Þessari skýrslu verður því skipt í tvennt. Fyrri hlutinn verður á neikvæðu nótunum þar sem ég tek fyrir það slæma en svo kem ég ykkur í góða skapið með því að benda ykkur á það jákvæða eftir leik dagsins.

Það slæma…

Höfum eitt á hreinu, þetta er alveg skelfilegur leikur til að skrifa skýrslu um.
Í upphituninni nefndi ég að United myndi líklega koma ferskt til leiks og að ég sæi fyrir mér stórsigur í líkingu við Norwich leikinn um daginn. Boy was I wrong! Þrátt fyrir sextán skot United þá var eins og ekkert væri í gangi allan leikinn. Eftir því sem leið á leikinn fékk ég aukna tilfinningu eins og allir leikmennirnir væru annaðhvort þunnir eða fá sér nokkrar róandi töflur (Allir fyrir utan Welbeck reyndar). United átti sextán skot í dag en einungis fjögur hittu á rammann. Þetta líklega skrifast sem þreyta en mikið vona ég að þetta landsleikjabreik nái að vekja drengina. Þegar aðstoðardómarinn sýndi að 5 mínútum hafði verið bætt við leikklukkuna var maður satt að segja bara fúll. Ég vildi bara segja þetta gott í dag.

Yfir leiknum var mér hinsvegar bent á góða ástæðu fyrir því að Van Persie virki svona þreyttur þessa dagana. Hann er nottla vanur því að tímabilið sé búið um þetta leyti :)

Þetta er samt allt of góður dagur til að einblýna á einhverja neikvæða hluti þannig að ég einfaldlega hætti núna og hoppa yfir í það skemmtilega!

Það góða…

Þessi dagur gat varla verið betri fyrir okkar menn. United sigrar Reading með einu marki gegn engu (Rooney, 21. mín), Everton spilaði frábærlega og sigraði City 2-0 og Southampton malar Liverpool liðið 3-1 sem gerir þeim stærfræðilega ómögulegt að vinna titilinn þetta árið (hahaha).

Hefur einhver heyrt minnst á Asmir Begovic nýlega? Í dag spilaði David De Gea sinn fimmtugasta deilarleik fyrir liðið og liðið þeim áfanga að spila yfir 538 mínútur (5 leikir og 88 mínútur) í deildinni án þess að fá á sig mark. Það er ekki hægt annað en að vera afskaplega kátur yfir því. sérstaklega eftir að hafa horft á United leka inn mörkum fyrr á leiktíðinni.

Rooney skoraði eina mark leiksins á 21. mínútu eftir hreint útsagt frábært hlaup hjá Rio Ferdinand (Hér er GIF hreyfimynd af hlaupinu og markinu). Það þýðir að Rooney þarf einungis þrjú mörk til að ná 200 mörkum fyrir United. Drengurinn er kominn með 197 mörk í 396 leikjum sem er ansi góð tölfræði miðað við að hann hefur þurft að spila ansi margar stöður fyrir liðið í gegnum tíðina.

Síðast en ekki síst er það staðan í deildinni. 15 stig! Fimmtán stig! FIMMTÁN STIG! Munurinn á United og City er kominn upp í 15 stig. Fimmtán stig!! Þetta er alveg ótrúlegt. City hefur einungis unnið 17 leiki af 29 í deildinni en samt eru þeir í öðru sæti. Nú eru níu leikir eftir og 27 stig í boði. United þarf að tapa fimm af þessum níu leikjum og City þarf að vinna upp 13 marka forskotið á United. Gleymum því svo ekki að City þarf að sigra alla sína leiki sem inniheldur lið eins og United, Spurs og Swansea. Þetta lítur semsagt vel út en ekki búið enn! Ég neita að taka þessu rólega fyrr en þetta er orðið öruggt!

Tíst

https://twitter.com/ManUnitedYouth/status/313002443116011521

https://twitter.com/sigurjon/status/313007415991869440

Besti leikmaður United í dag


Finnst afskaplega erfitt að velja besta leikmann United í dag en þar sem ég vil venja mig á að gera það eftir hvern leik þá ætla ég að velja Rio Ferdinand. Hann var algjör klettur í vörninni og þetta frábæra hlaup hans í fyrri hálfleik skapaði færið sem Rooney skoraði úr. Vonandi hættir hann þessu helv landsliðs rugli og ákveður að segja þetta gott með enska landsliðinu. United er að standa sig vel að halda honum heilum og ferskum fyrir þessa leiki og vil ég ekki sjá landsliðið eyðileggja þá vinnu.

Enska úrvalsdeildin

Byrjunarliðið gegn Reading

skrifaði þann | 7 ummæli

Tækifæri til að ná 15 (fimmtán) stiga forystu, og mennirnir sem axla þá ábyrgð eru:

De Gea

Smalling Ferdinand Vidic Büttner

Welbeck Giggs Anderson Young

Rooney

Van Persie

Varamenn:  Lindegaard, Evans, Valencia, Hernandez, Carrick, Powell, Kagawa

Jahá. Evra, Rafael og Cleverley hvíla og Carrick  er á bekknum.

En þetta er allt í lagi, Rooney og Robin klára þetta! Og Nick Powell!

Enska úrvalsdeildin

Reading á Old Trafford

skrifaði þann | 8 ummæli

Við erum komin vel á veg með seinni hluta tímabilsins. Það eru tíu deildarleikir eftir, þrjátíu stig í boði og stjóralausa liðið Reading að koma í heimsókn á Old Trafford. Þetta verður síðasti leikurinn fyrir landsleikjafrí og spilar United ekki næst fyrr en þrítugasta mars, gegn Sunderland á útivelli.

Reading rak stjórann sinn, Brian McDermott, á dögunum og leitar að eftirmanni hans sem þýðir að Eamonn Dolan mun sjá um stjórn liðsins á morgun. Reading deilir neðsta sæti deildarinnar með QPR, bæði lið með tuttugu og þrjú stig og markahlutfallið -21. Reading hafa nú tapað 5 leikjum í röð í öllum keppnum (deildin + FA bikarinn) en síðustu 6 deildarleikir Reading hafa endað með einu jafntefli, einum sigri og svo fjóra tapleiki í röð. Svo til að bæta gráu ofan á svart fyrir Reading, þá hafa síðustu sex útileikir liðsins endað með 5 töpum og einum sigri. En þrátt fyrir slæma frammistöðu í síðustu fimm leikjum þá var Reading búið að vinna 6 af síðustu átta leikjum í öllum keppnum fyrir það. Varla þarf ég að minna ykkur á leik liðanna á Madejski Stadium 1. desember, sem endaði 4-3 fyrir United þar sem öll mörkin voru skoruð á fyrstu 35 mínútunum? Reading eru semsagt sýnd veiði en alls ekki gefin!

United er hins vegar í mun betri málum þrátt fyrir frekar ömurlega tvo leiki í röð, þar sem liðið datt út úr meistaradeildinni og neyðist til að spila aftur gegn Chelsea eftir jafntefli í FA bikarnum. Í deildinni er United búið að vinna fimm leiki í röð og á Old Trafford er liðið búið að sigra í sex í röð. Ef þið eruð eitthvað niðurdregin eftir síðustu viku, hafið þetta í huga:

  • Í síðustu 19 deildarleikjum hefur United unnið 16, gert 2 jafntefli og tapað einu sinni
  • Í síðustu 19 heimaleikjum í deildinni hefur United sigrað 17, gert eitt jafntefli og tapað einum (Helv. Spurs!)

Líkurnar benda því sterklega til þess að United sigri á morgun og virðast verðmálasíðurnar vera á sama máli. Besti stuðulinn sem ég gat fundið á United sigur, var 1.18 og á Reading sigur er settur stuðullinn 20.0.

En burtséð frá allri tölfræði og stuðlum þá vonast ég einfaldlega til að sjá United koma sterkt til baka, spila vel, skora mörk og nýta leikinn til að gleyma vonbrigðum síðustu viku. Liðið þarf á því að halda. Í gegnum árin hefur United oft refsað liðum sem þeir mæta eftir vonbrigði Evrópukeppna. Á síðasta tímabili voru það vesalings Wolves sem urðu tvisvar fyrir barðinu á brjáluðu United liði. Töpuðu 4-1 á Old Trafford eftir að United tapaði gegn Basel í meistaradeildinni og svo var það 0-5 burst þegar United datt út úr UEFA Cup eftir tap gegn Athletic Bilbao.

City mætir Everton í hádeginu á Goodison Park þann sama dag sem þýðir að þegar United mætir Reading, fáum við að vita hvort Manchester City hafi minnkað muninn niður í níu stig eða hvort United fær tækifæri til að auka muninn. Mín spá er sú að United komi ferskt til leiks og að við fáum að sjá markatölu í svipuðum gír og gegn Norwich. Ég segi því 4-0 fyrir United.

Meiðsli/Veikindi/Leikbönn:

Það var lítið fréttnæmt sem kom fram á blaðamannafundinum í dag en það merkilegasta var að Phil Jones og Nani munu báðir missa af leiknum á morgun. Ferguson sagði að Phil Jones muni byrja að æfa með liðinu í næstu viku og sem þýðir vonandi að hann verði tilbúinn fyrir næsta leik. Meiðslin á Nani eru sem betur fer ekki eins slæm, eins og fyrst var talið, og er talið að hann verði orðinn leikfær eftir leikinn gegn Sunderland.

United

  • Phil Jones => Meiðsli (ökkli)
  • Nani => Meiðsli (Aftanlæris tognun)
  • Paul Scholes => Meiðsli (hné)
  • Darren Fletcher => Veikindi (sáraristilbólga)

Reading

  • Pavel Pogrebnyak => Leikbann
  • Jason Roberts => Meiðsli (mjöðm)
  • Adam Federici => Meiðsli (ökkli)
  • Jimmy Kebe => Meiðsli(nári)
Lykilmaður Reading


United stuðningsmaðurinn Adam Le Fondre er sá sem ég tel vera hættulegasta leikmann Reading á morgun. Drengurinn er búinn að spila 27 leiki, kominn með tíu mörk úr 47 skotum og eina stoðsendingu. Þar á meðal tvö mörk gegn Chelsea í lok janúar (seinna markið er sérlega glæsilegt). Le Fondre var valinn besti leikmaður janúarmánaðar í deildinni og þegar United mætti Reading í FA bikarnum fyrir stuttu, nefndi Ferguson hann sérstaklega.

Líklegt byrjunarlið

De Gea

Rafael Smalling Ferdinand Evra

Carrick Anderson

Welbeck Rooney Young

Van Persie

Helstu keppinautar…
  • Lau 16.03 – Manchester City mætir Everton á Goodison Park
  • Sun 17.03 – Tottenham mætir Fulham á White Hart Lane
  • Sun 17.03 – Chelsea mætir West Ham á Stamford Bridge
  • Lau 16.03 – Arsenal mætir Swansea á Liberty Stadium
Skemmtilegar staðreyndir
  • Samkvæmt whoscored.com, þá er United með næstbesta sendingarhlutfall allra liða í deildinni, 85.7%. Í efsta sæti sitja Arsenal með 86.2%. Reading eru lægstir á þessum lista með 69% sendingarhlutfall.
  • Af öllum liðum í deildinni þá er Reading minnst með boltann, eða 39.7%. United er í fjórða sæti með 56.5%.
  • United hefur skorað 19 mörk úr föstum leikatriðum sem er sex fleiri en næstu lið, Norwich/Stoke
  • Á þessu ári hefur Reading náð að skora í ellefu af tólf leikjum sínum.
Í öðrum fréttum

ROM tók skemmtilegt viðtal við Reading stuðningsmann.

De Gea var í fyrsta skipti valinn í spænska landsliðið sem mætir Finnum og Frökkum.

Roy Hodgson valdi Rio aftur í landsliðshóp Englands, sem mætir San Marinó og Serbíu í undankeppni HM, eftir að hafa verið hent út vegna „Footballing reasons“ á sínum tíma. Ferguson sagði á fréttamannafundinum að valið hefði komið honum mjög á óvart og að hann sé ekki viss um að það væri best fyrir Ferdinand.

Að lokum

Verið dugleg að koma með athugasemdir hér og á Twitter. Muna að nota #Djöflarnir á Twitter og elta Rauðu Djöflana. Þessar leikskýrslur skrifa sig ekki sjálfar og þykir mér bæði gaman og gagnlegt að sjá hvað ykkur þykir eftirtektarvert á meðan leiknum stendur.

Enska bikarkeppnin

Manchester United 2:2 Chelsea

skrifaði þann | 17 ummæli

Eftir frábæra byrjun United voru þeir á endanum heppnir að fá annað tækifæri til að komast í undanúrslitin og mæta Manchester City.

United byrjaði miklu betur. Boltinn var að ganga vel á milli og strax á fimmtu mínútu leit Michael Carrick upp á miðjunni og sá möguleikann. Hann sendi háa sendingu inn á teiginn, Hernandez kom sér í stöðuna, stökk upp og skoraði með nettum skalla yfir Cech sem var fastur í einskismannslandi, kominn af línunni en ekki út í Javier.

Rétt rúmum fimm mínútum síðar var Cech aftur í ruglinu. United hafði staðið af sér staðlarar sóknir-eftir-að-fá-á-sig-mark sóknir Chelsea, kom upp í sókn og brotið var á Nani utan við vítateigshornið vinstra megin. Rooney tók aukaspyrnuna, sveiflaði boltanm inn á teiginn þar sem Luiz og Evans stukku upp, misstu báðir af boltanum og hann hélt áfram óáreittur í markhornið. Cech var frosinn á línunni, alveg óviðbúinn að báðir misstu af boltanum.

2-0 eftir 10 mínútur og 20 sekúndur, ekki slæm byrjun.

Chelsea fóru eftir þetta að taka nokkur völd á vellinum, og auka sóknarþunga. Vörnin var þó föst fyrir og var ekkert að hleypa þeim of langt. Loks kom þó að því að United stoppaði þá vitleysu og fór að sækja. Cech þurfti að verja glæsilega skalla frá David Luiz… já. Rooney átti gott skot sem hrökk af Cech, Luiz skallaði að marki og Cech rétt náði að slá boltann . yfir. Hefði verið mjög skemmtilegt sjálfsmark annars.

Eftir nokkura mínútna yfirráð hleypti United svo Chelsea í sama farið. Chelsea hélt boltanum vel á miðjunni, sótti upp að teig, en þar strandaði allt á vörn United, hvort sem það var Rafael, Rio, Evans eða Evra. Sóknirnar þyngdust þó og Victor Moses gerði vel þegar hann hitti hornfánann… úr nokkuð opnu færi í teignum. Ákveðið afrek þar á ferð.

Nani hafði verið að spila vel en mínútu fyrir lok hálfleiksins meiddist hann og var strax tekinn útaf fyrir Valencia.

Seinni hálfleikur var nokkuð jafn framan af. Hvorugt liði náði jafn miklum yfirburðum og þau höfðu skipst á að hafa í fyrri hálfleik, en Chelsea þó meira með boltann og eftir tvöfalda skiptingu Lampard og Moses fyrir Mikel og Hazard jókst sóknarþunginn. Þeir áttu tveggja mínútna stanslausa sókn og rétt þegar United hafði bundið enda á hana kom Chelsea beint til baka og Hazard sneri boltann inn af vítateigslínu, framhjá Rafael og De Gea, 2-1.

United reyndi sitt besta til að breyta þessu, Van Persie kom inná og United sótti svolítið. En þá komst Chelsea í skyndisókn sem endaði á því að Ramirez komst í gegn og skoraði. 2-2. Sanngjarnt, enda höfðu þeir átt mestan hluta hálfleiksins.

Loksins eftir þetta náði United nokkrum sóknum, en það mesta sem kom út úr því voru tvö verstu skot vetrarins, Valencia ætlaði að taka þrumu á lofti við teiginn en það endað sem þver’sending’ og síðan þrumaði Cleverley næstum yfir stúkuþakið. Victor Moses hlýtur að hafa liðið betur á eftir. Chelsea sótti mun meira það sem eftir lifði leiksins og sóknir United voru afskaplega máttlausar og skar sig þar úr Antonio Valencia sem átti alveg ótrúlega slakan leik. Það er ekki eins og það sé vottur eftir af gamla Valencia og er vonandi að Nani sé ekki illa meiddur.

Juan Mata, besti maður Chelsea, átti að klára leikinn á 90. mínútu en í stað þess að hann næði að setja boltann laglega framhjá De Gea, varði David skotið snilldarlega og sá til þess að leikjaröðunartölvan fær höfuðverk, þar sem það er víst ekki búið að gera ráð fyrir aukaleiknum.

En við megum kallast afskaplega heppnir að sleppa í aukaleik. Fyrstu tíu mínúturnar voru frábærar, og stöku kaflar eftir það í fyrri hálfleik, en seinni hálfleikur var einn sá slakasti sem maður hefur séð á þessu ári. United gaf miðjuna gjörsamlega eftir og gat aldrei náð henni aftur. Skiptingin hjá Chelsea þegar Hazard og Mikel komu inná sá alveg til þess og við erum hreinlega ekki með sams konar miðjumenn, eigum alltaf erfiðara með að ná valdi á miðju ef við höfum það ekki, allt annað mál ef við erum með yfirhöndina.  Ekki hjálpaði að sendingar United voru verulega slakar í dag.

Vörnin var verulega góð í fyrri hálfleik, en eftir sem miðjuyfirburðir Chelsea urðu meiri þá varð æ erfiðara fyrir þá að verjast.

Ekki góður dagur þrátt fyrir góða byrjun, en við fáum annað tækifæri… og svo bíður City. Núna er vika í næsta leik, og síðan tekur við landsleikjahlé, þannig að það gefst tími til að gyrða í brók og finna út úr því hvað klikkaði í dag.