Rauðu djöflarnir

Enska bikarkeppnin

Manchester United 2:2 Chelsea

skrifaði þann | 17 ummæli

Eftir frábæra byrjun United voru þeir á endanum heppnir að fá annað tækifæri til að komast í undanúrslitin og mæta Manchester City.

United byrjaði miklu betur. Boltinn var að ganga vel á milli og strax á fimmtu mínútu leit Michael Carrick upp á miðjunni og sá möguleikann. Hann sendi háa sendingu inn á teiginn, Hernandez kom sér í stöðuna, stökk upp og skoraði með nettum skalla yfir Cech sem var fastur í einskismannslandi, kominn af línunni en ekki út í Javier.

Rétt rúmum fimm mínútum síðar var Cech aftur í ruglinu. United hafði staðið af sér staðlarar sóknir-eftir-að-fá-á-sig-mark sóknir Chelsea, kom upp í sókn og brotið var á Nani utan við vítateigshornið vinstra megin. Rooney tók aukaspyrnuna, sveiflaði boltanm inn á teiginn þar sem Luiz og Evans stukku upp, misstu báðir af boltanum og hann hélt áfram óáreittur í markhornið. Cech var frosinn á línunni, alveg óviðbúinn að báðir misstu af boltanum.

2-0 eftir 10 mínútur og 20 sekúndur, ekki slæm byrjun.

Chelsea fóru eftir þetta að taka nokkur völd á vellinum, og auka sóknarþunga. Vörnin var þó föst fyrir og var ekkert að hleypa þeim of langt. Loks kom þó að því að United stoppaði þá vitleysu og fór að sækja. Cech þurfti að verja glæsilega skalla frá David Luiz… já. Rooney átti gott skot sem hrökk af Cech, Luiz skallaði að marki og Cech rétt náði að slá boltann . yfir. Hefði verið mjög skemmtilegt sjálfsmark annars.

Eftir nokkura mínútna yfirráð hleypti United svo Chelsea í sama farið. Chelsea hélt boltanum vel á miðjunni, sótti upp að teig, en þar strandaði allt á vörn United, hvort sem það var Rafael, Rio, Evans eða Evra. Sóknirnar þyngdust þó og Victor Moses gerði vel þegar hann hitti hornfánann… úr nokkuð opnu færi í teignum. Ákveðið afrek þar á ferð.

Nani hafði verið að spila vel en mínútu fyrir lok hálfleiksins meiddist hann og var strax tekinn útaf fyrir Valencia.

Seinni hálfleikur var nokkuð jafn framan af. Hvorugt liði náði jafn miklum yfirburðum og þau höfðu skipst á að hafa í fyrri hálfleik, en Chelsea þó meira með boltann og eftir tvöfalda skiptingu Lampard og Moses fyrir Mikel og Hazard jókst sóknarþunginn. Þeir áttu tveggja mínútna stanslausa sókn og rétt þegar United hafði bundið enda á hana kom Chelsea beint til baka og Hazard sneri boltann inn af vítateigslínu, framhjá Rafael og De Gea, 2-1.

United reyndi sitt besta til að breyta þessu, Van Persie kom inná og United sótti svolítið. En þá komst Chelsea í skyndisókn sem endaði á því að Ramirez komst í gegn og skoraði. 2-2. Sanngjarnt, enda höfðu þeir átt mestan hluta hálfleiksins.

Loksins eftir þetta náði United nokkrum sóknum, en það mesta sem kom út úr því voru tvö verstu skot vetrarins, Valencia ætlaði að taka þrumu á lofti við teiginn en það endað sem þver’sending’ og síðan þrumaði Cleverley næstum yfir stúkuþakið. Victor Moses hlýtur að hafa liðið betur á eftir. Chelsea sótti mun meira það sem eftir lifði leiksins og sóknir United voru afskaplega máttlausar og skar sig þar úr Antonio Valencia sem átti alveg ótrúlega slakan leik. Það er ekki eins og það sé vottur eftir af gamla Valencia og er vonandi að Nani sé ekki illa meiddur.

Juan Mata, besti maður Chelsea, átti að klára leikinn á 90. mínútu en í stað þess að hann næði að setja boltann laglega framhjá De Gea, varði David skotið snilldarlega og sá til þess að leikjaröðunartölvan fær höfuðverk, þar sem það er víst ekki búið að gera ráð fyrir aukaleiknum.

En við megum kallast afskaplega heppnir að sleppa í aukaleik. Fyrstu tíu mínúturnar voru frábærar, og stöku kaflar eftir það í fyrri hálfleik, en seinni hálfleikur var einn sá slakasti sem maður hefur séð á þessu ári. United gaf miðjuna gjörsamlega eftir og gat aldrei náð henni aftur. Skiptingin hjá Chelsea þegar Hazard og Mikel komu inná sá alveg til þess og við erum hreinlega ekki með sams konar miðjumenn, eigum alltaf erfiðara með að ná valdi á miðju ef við höfum það ekki, allt annað mál ef við erum með yfirhöndina.  Ekki hjálpaði að sendingar United voru verulega slakar í dag.

Vörnin var verulega góð í fyrri hálfleik, en eftir sem miðjuyfirburðir Chelsea urðu meiri þá varð æ erfiðara fyrir þá að verjast.

Ekki góður dagur þrátt fyrir góða byrjun, en við fáum annað tækifæri… og svo bíður City. Núna er vika í næsta leik, og síðan tekur við landsleikjahlé, þannig að það gefst tími til að gyrða í brók og finna út úr því hvað klikkaði í dag.

Enska bikarkeppnin

Liðið gegn Chelsea

skrifaði þann | 10 ummæli

De Gea

Rafael Ferdinand Evans Evra

Nani Carrick Cleverley Kagawa

Rooney Hernandez

Varamenn: Amos, van Persie, Valencia, Anderson, Vidic, Young, Welbeck

Eins og ég spáði fær Van Persie að hvíla sig aðeins á bekknum og Rooney og Chicharito byrja. Kagawa fær að byggja á þrennunni um síðustu helgi og Nani er að spila sig í form.

Hörkuflott lið!

Lið Chelsea: Cech; Azpilicueta, Cahill, Luiz, Cole; Lampard, Ramires; Oscar, Mata, Moses; Ba. Þetta verður ágæt þolraun fyrir vörnina okkar, Carrick og Cleverley

Enska bikarkeppnin

Fjórðungsúrslit í bikarnum, Chelsea á morgun

skrifaði þann | 8 ummæli

Þrátt fyrir allt tal síðustu ára um hvað bikarkeppnin skipti ekki máli þurfum við ekkert að hafa áhyggjur af því að leikurinn á morgun verði ekki tekinn af fullri festu og einurð hjá báðum liðum. United þarf að koma sér í gírinn aftur eftir vonbrigði vikunnar og þó að Chelsea þurfi að einbeita sér að hörkubaráttu um 3-5. sætið í deildinni get ég ekki ímyndað mér annað en að Rafa vilji fá bikar í hús til að láta þetta hörmungartímabil Chelsea líta betur út.

Chelsea hefur gengið þolanlega að undanförnu þó prógrammið hafi ekki verið alltof erfitt.  Það er samt ekki hægt að segja að liðið hafi verið mjög sannfærandi. Á fimmtudaginn var töpuðu þeir fyrir Steua Búkarest á útivelli í Evrópudeildinni, 1-0 í döprum leik. Rafa virðist vera að gefast upp á reyna að nota Torres en þurfti að gera það á fimmtudaginn þar sem Demba Ba var ekki gjaldgengur. Hann verður það hins vegar á morgun og verður eflaust í liðinu. Þar verða líka Victor Moses, Ramires og Juan Mata sem er einn af bestu leikmönnum tímabilsins, þó undanfarið hafi hann ekki verið eins öflugur.  Búist er við Oscar á bekknum, þar er leikmaður sem er ekki síður skeinuhættur þannig að ef Chelsea nært að smella í gír verður þetta síður en svo auðvelt. En það er einmitt málið, þó að Chelsea líti vel út á pappírnum þá hefur vantað uppá að þeir spili eins og lið. Vonum bara að það haldi áfram á morgun.

Okkar megin verða einhverjar breytingar. Rooney kemur eflaust inn í liðið, Giggs hvílir, og ég spái því að Vidic geri það líka. So er ég kominn á þá skoðun að Van Persie megi alveg slaka á einn leik og ætla því að taka hann út úr liðinu

De Gea

Rafael Ferdinand Evans Evra

Valencia Carrick Anderson Nani

Rooney Hernandez

Slúðrið í vikunni hefur allt snúist um Wayne Rooney og að hann sé á leiðinni frá United. Það virðist aðallega byggjast á því að hann var ekki í liðinu á þriðjudaginn, en lítur minna á það að taktík United með að spila með Danny Welbeck og láta hann passa Xabi Alonso gekk alveg upp.

Þegar dýpra er litið finnast þó aðrir fletir. Slúðrið í ‘fanzines’ hefur verið lengur en bara vikuna að Rooney sé óánægður og vilji til Barcelona. Auðvelt að skilja ef hann vill það, erfiðara er að sjá hvort Barcelona ætti að vilja hann. Það er enda einungis rætt um PSG núna sem hugsanlegan áfangastað, og búið að afskrifa City og Chelsea. Þá eru ekki mörg lið eftir sem ættu að vilja borga vel fyrir pilt.

Fanzine slúðrið lýtur líka að því að við, eða öllu heldur Fergie vilji Lewandowski. Ekkert nýtt þar.

Sjálfur er ég alveg til í að láta Rooney fara. Ef Ronaldo kemur í staðinn!

Leikmaður mánaðarins

Leikmaður febrúarmánaðar?

skrifaði þann | 3 ummæli

Jæja, ég held að það sé bara best að gleyma þessum skrattans leik gegn Real og vinda sér í það að kjósa besta leikmann United í febrúar. Sökum þess hversu snaggaralegur febrúar er spilaði United aðeins fimm leiki og unnu af þeim fjóra. Góðir sigrar þó svo lítið hafi verið um flugeldasýningar. Besti leikur United í febrúar var gegn Real Madrid á Santiago Bernabeu þar sem gríðar góð barátta var í liðinu, en því miður fór það allt sman fyrir lítið, og þar með rifja ég upp leikinn sem ég ætlaði að gleyma.

Leikir United:

Kosning:

[poll id="5"]

Meistaradeild Evrópu

Manchester United 1:2 Real Madrid

skrifaði þann | 30 ummæli

Leikurinn í dag réðist af gjörsamlega óafsakanlegu athæfi:

Lið sem búið var að ráða stærstum hluta leiks á ekki að hrynja niður í rusl, þó það missi hægri kantmann útaf, sama hversu vafasamur dómur það er. Það er það sem ég fer með út úr þessum leik.

Fyrir leikinn var ég nær viss um að við myndum ekki ráða við þetta verkefni, en fyrri hálfleikur kom mér skemmtilega á óvart. reyndar voru fyrstu mínúturnar frekar stressaðar af hálfu United, nokkuð um misheppnaðar sendingar en svo fór að rætast úr þessu. Gagnsóknir United voru oft ansi beittar, og Danny Welbeck var eins og hlaupageit um allar trissur, sívinnandi. Það var hins vegar besti maður United í leiknum, Ryan Giggs sem vann hornið sem gaf hættulegasta færið í fyrri hálfleik, skalla Vidic í stöng. Að öðru leyti var hálfleikurinn vel spilaður hjá okkar mönnum. Reyndar var United ekki með boltann nema 37% en það var vel ásættanlegt. Real skapaði litla sem enga hættu og þetta var allt í góðum gír.

Síðari hálfleikur var varla byrjaður þegar United komst yfir. Rafael gaf inn á teiginn þar sem Welbeck komst ekki í skotfæri, missti boltann frá sér, barðist um hann þannig að hann barst til Van Persie. Robin skaut í varnarmann og útað endalínu þar sem Nani hirti boltann af Varane, gaf fyrir, Welbeck setti fót í boltann og þaðan barst hann í legginn á Sergio Ramos og framhjá López í markinu. Frábær byrjun.

Atvikið sem gerði svo út um leikinn varð síðan tíu mínútum síðar. Nani reyndi að komast fyrir háan bolta út úr vörninni, lyfti fæti hátt og fór með hann í bringuna á Arbeloa sem stökk móti boltanum. Það er nokkuð ljóst að Nani sá ekki Arbeloa fyrr en of seint, en engu að síður var um háskaleik að ræða. Ég ætla að sleppa því hér að dæma frekar hvor rauða spjaldið sem Nani fékk fyrir vikið var rétt eða ekki, hitt veit ég að ég hef sé mun vafasamari rauð spjöld, og ég ætla ekki að formæla dómaranum sem svindlara. Til þess þarf mun verri ákvarðanir áður en ég geng svo langt.

En við þetta spjald missti United fótanna algerlega. Ákvörðunin var vafasöm og menn misstu sig á hliðarlínunni og virtist sem menn inni á vellinum gerðu það líka.  Real setti í algeran fluggír, United missti allan takt og aga í spilinu og Mourinho gekk á lagið, setti Modrić inn á fyrir Arbeloa og innan þrettán mínútna var Real komið í 1-2 og leikurinn í raun búinn. Modrić skoraði fyrra markið, glæsilegt mark af 25 metra færi, stöng og inn, Ronaldo það síðara (og fagnaði ekki) eftir fyrirgjöf Higuain þvert fyrir teiginn á fjær stöng þar sem Ronaldo afgreiddi hann.

Þá gaf Real eftir, leyfði United að sækja síðustu 20 mínúturnar og ef ekki fyrir nokkrar góðar vörslur Lópezar hefði United alveg átt skilið að jafna í það minnsta.

Það situr fátt eftir eftir þennan leik nema þetta rauða spjald, og kortérs uppgjöf eftir það. Langbesti maður okkar var Ryan Giggs sem hafði þol umfram allt sem búast má við af manni á hans aldri, var út um allt á vellinum. Danny var góður í fyrri hálfleik en var svo búinn á því og kom útaf fyrir Ashley Young á 81. Þar hefði ég nú frekar sett inn Hernandez til að reyna að lúra inn í teig. Stóru fréttirnar fyrir leik voru auðvitað að Rooney var á bekknum. Hann kom síðan ekki inn á fyrr en staðan var 2-1 og var nokkuð sprækur, en ég styð fullkomlega þá ákvörðun að hvíla hann, Danny og Ryan sáu alveg um þetta.

Vörnin var góð, nema þetta martraðarkortér, gömlu mennirnir Rio og Nemanja voru alveg að skila sínu og ekkert undan þeim að kvarta.

Að skoða sendingarstatistikkina er síðan frekar dapurleg lesning. 57% sendinga okkar manna rötuðu á samherja, og hver öðrum slakari þar.

Loks er rétt að minnast á áhorfendur, langt síðan maður hefur heyrt svona stemmingu á Old Trafford. Svona er þetta þegar fólk fær að standa, og vonandi að „örugg stæði“ („safe standing“) fái að líta dagsins ljós á næstu árum

Við þurfum amk. ekki að hafa áhyggjur af  því að spila fjórðungsúrslit sitt hvoru megin við leikinn við City. Það hefði verið gaman að komast áfram, en meistaratitillinn er algerlega takmark númer eitt í vetur. Mér finnst, líklega réttilega, þó til sanns vegar megi færa að við höfum verið betra liðið í báðum leikjunum gegn Real, að það vanti einhverja smá töfra í liðið til að við getum, og eigum skilið að vinna Meistaradeildina.

Svo er það bara næsti leikur, bikarinn gegn Chelsea. Það væri ekkert að því að vinna tvöfalt!