Rauðu djöflarnir

Meistaradeild Evrópu

Real Madrid í heimsókn.

skrifaði þann | 9 ummæli

Þrjár vikur liðnar og enn er komið að örlagastundu. Madrídingar eru lentir í Manchester og tilbúnir í slaginn á morgun. United eru líka tilbúnir en það sem verst er, Phil Jones er ekki tilbúinn. A.m.k. segir Sir Alex Ferguson ekki, og Fergie hefur aldrei sagt ósatt orð um hvort leikmenn séu tilbúnir eða ekki. Vindum okkur fyrst af öllu í uppstillinguna

Sir Alex

Ferguson veit hvernig liðið

verður en ég hef

ekki hugmynd

Sleppur ekki svona?

Nei, þetta er ekki alveg svona óljóst, það er í minum huga, sem og hjá fleirum bara tvö stór spurningamerki, og eitt lítið.

De Gea

Rafael Ferdinand Evans Evra

Nani Carrick Cleverley Welbeck

Rooney

Van Persie

Mig grunar að Nani fái þarna tækifæri og held að Cleverley verði fyrir valinu frekar en Kagawa. Kagawa fær amk ekki að spila fyrir Welbeck.

Það má kalla það magnað að okkar besti varnarmaður sé ekki þarna með, en enn og aftur held ég að þessi þrír dagar milli leikja séu of stutt og að Evans sé hreinlega betri en Vidic þegar það er tekið með í dæmið.

Hvað Madrid varðar þá eru þeir með alla heila, Casillas ferðaðist með en er ekki leikfær þannig ég býst við sama liði og í fyrri leiknum. Væri gaman að sjá Pepé inná fyrir Varane, en því miður er það ólíklegt, Varane enda búinn að standa sig gríðarvel undanfarið.

Við erum búnir að vinna þessa þrjá leiki sem liðu frá útileiknum, en Real hefur gert betur, og unnið fjóra. Þá þarf varla að taka það fram að tveir síðustu leikir þeirra voru sigurleikir gegn Barcelona, og það þó þeir hefðu hvílt hálft liðið í leiknum á laugardaginn. Þannig að við vitum alveg hvað þetta verður erfiður leikur. Við þurfum a) að fá ekki á okkur mark, og b) helst að skora. Hvort tveggja er erfitt, en þó er ég viss um að b) er auðveldara. Vörn Real er ekki alveg jafn skæð og sóknin og því held ég að við getum sett eitt til tvö. Eins og ég fór rækilega yfir í upphitun fyrir fyrri leikinn fór síðasti leikur Real Madrid á Old Trafford 4-3, og Ronaldo skoraði þrennu. Það eru úrslit sem við getum mjög auðveldlega sætt okkur við á morgun, en mig grunar samt að við séum ekki að fara að fá á okkur þrjú mörk.

Vandamálið við þennan leik er ósköp einfalt. Bæði lið kjósa það öðru fremur þegar að svona leikjum kemur að byggja á þéttri vörn og sterkri miðju og beita svo gagnsóknum. United komst upp með það í útileiknum, en spurning hvort heimavöllurinn verður of freistandi til að sækja um of. Kannske sá Sir Alex Milan taka Barcelona í bakaríið á heimavelli þar sem Milan spiluðu lengst af í 5-5-0 með skyndisóknum. Ekki kannske það fallegasta, en samt var Milan að spila flottar en Barcelona sem dútluðu sér hægri vinstri, gjörsamlega bitlausir, en skyndisóknir Milan voru bara virkilega flottar.

Það væri því ekkert að því að vinna þennan leik á þann hátt 2-1.

Enska úrvalsdeildin

Manchester United 4:0 Norwich

skrifaði þann | 16 ummæli

Þrjú stig komin í hús og alls ekki leiðinlegt að krækja í þau með glæsisigri. United sigrar Norwich með fjórum mörkum gegn engu. Kagawa með þrennu og Rooney með bombu á 90. mínútu.

Þar sem þetta er nú aðeins leikskýrsla númer tvö hjá mér, þá ætla ég að taka það aftur fram að í mínum leikskýrslum nenni ég ekki að fara yfir hvert einasta atriði sem gerðist í leiknum. Ég tek frekar saman það helsta sem mér þótti eftirtektarvert, sem við getum svo rætt áfram í athugasemdunum fyrir neðan.

Liðsuppstillingin

Eins og ég nefndi í upphituninni, þá var maður spenntur að sjá hvernig Ferguson og Mourinho myndu stilla upp liðunum í dag. Hvaða leikmenn fengu hvíld og hverjir myndu spila. Ef það var einhver vafi um hvaða titlar eru í forgangi hjá Ferguson og Mourinho, þá var honum algjörlega sturtað niður í klósettið í dag. Ferguson ætlar svo sannarlega að taka deildina í ár og tefldi hann fram mjög sterku liði gegn Norwich. Á sama tíma hvíldi Mourinho sína helstu lykilleikmenn þegar Real mætti Barcelona í El classico (sem kom reyndar ekki að sök þar sem þeir unnu 2-1).

Svona hafði Ferguson liðið í dag:

De Gea

Smalling Evans Vidic Evra

Valencia Anderson Carrick Kagawa

Rooney Van Persie

Og á bekknum voru: Lindegaard, Rafael, Cleverley, Nani, Young, Welbeck, Chicharito

Tölfræði leiksins

Í fyrri hálfleik var nánast bara eitt lið á vellinum. United var næstum allan tímann með boltann, átti ellefu skot og þrjú á rammann á meðan Norwich náði ekki einu skoti! Í seinni hálfleik náðu Norwich að halda boltanum ágætlega og náðu að skapa eitt stórhættulegt færi, sem endaði þó með að dæmt var á Holt fyrir að brjóta á Evra (Hvernig í ósköpunum klikkaði Martin á þessu færi samt?). En þegar fimmtán mínútur voru eftir af leiknum, fór vörnin að opnast hjá Norwich og náði United að negla inn þrem stórglæsilegum mörkum með stuttu millibili (76., 87. og 90. mín).

Svona leit tölfræðin út eftir leikinn:

Manchester United   Norwich City
19(7) Shots (on goal) 1(0)
5 Fouls 14
7 Corner kicks 3
3 Offsides 2
65% Time of Possession 35%
0 Yellow Cards 4
0 Red Cards 0
0 Saves 3

Mig langaði að finna síðu með góða tölfræði fyrir þessa skýrslu og eftir smá Google leit rakst ég á espnfc.com sem sýnir manni það mikilvægasta. Mér þótti sérstaklega gaman að skoða myndina sem sýnir hvar leikmenn United héldu sig helst á vellinum í dag (e. „Average Position“)
Staðsetningar leikmanna United

Þessi mynd sýnir greinilega hversu mikla yfirburði United hafði í þessum leik. Næstum allir leikmenn United eyddu tímanum á vallarhelmingi Norwich.

Stórglæsileg mörk

Þið hljótið að vera ánægð með mörkin sem við fengum að sjá í dag? Þetta voru alveg stórglæsileg mörk sem Kagawa og Rooney skoruðu.

Fyrsta markið var kannski ekki það fallegasta í dag en að sjá RVP ná boltanum sem kom frá Valencia og koma honum til Kagawa fékk mig til að brosa.

Þegar Kagawa skoraði mark númer 2 hló ég upphátt hér aleinn heima hjá mér. Af hverju? Því ég fékk þá tilfinningu að Rooney og Kagawa væru hreinlega að leika sér að fífla vörnina hjá Norwich. Rooney fær gullfallega sendingu frá Carrick, tekur boltann niður og kemst í góða stöðu til að annaðhvort skjóta eða senda boltann. Ákveður að senda á Kagawa sem skýtur laflaust en hnitmiðað framhjá Bunn í markinu og varnarmanninum sem reyndu allt hvað þeir gátu til að þvælast fyrir.

Spilið svo í þriðja markinu var alveg stórkostlegt. Ég hugsaði með mér að Kagawa var einmitt keyptur til að skapa og skora svona mörk. Spilið á milli Welbeck, Rooney og Kagawa gaf mér svipaða gæsahúð og ég fékk þegar ég sá Nani skora gegn City í góðgerðarskildinum 2011 eftir glæsilegt samspil milli Cleverley, Welbeck, Rooney og Nani. Vörnin hjá Norwich náði að galopnast og vippaði Kagawa boltanum snyrtilega yfir Bunn.

Fjórða markið var svo stórglæsilegt í alla staði! Það sýndi okkur hvað Rooney getur verið stórhættulegur ef honum er gefið smá pláss. Vel fyrir utan vítateiginn tekur hann boltann, ógnar skoti og kemst framhjá leikmanni Norwich og neglir svo tuðrunni framhjá Bunn í markinu, sem átti aldrei sjens í boltann. Gullfallegt mark!

Kagawa & Rooney

Það er ekki hægt annað en að tala um leikmanninn sem skorar þrennu fyrir liðið. Eftir fyrri hálfleikinn var ég búinn að undirbúa mig undir að skrifa um hvað hann átti frekar dapran leik þrátt fyrir að skora. En eftir að leiknum lauk gat maður ekki annað en að draga það allt til baka. Drengurinn er búinn að eiga erfitt á þessu tímabili eftir mjög góða byrjun og spila þá helst leiðindameiðsli þar inn. Frábærlega gert hjá drengnum og vonandi heldur hann þessu áfram. Eftir leikinn sagði Ferguson þetta um Kagawa:

„He’s gradually getting his form back because he missed that period of football in October and November which set him back a little bit.

He’s going to be a good player. Next year he’ll be far, far better too.“

Svipað og með Kagawa þá var ég búinn að punkta hjá mér, eftir fyrri hálfleik, að ræða allar feilsendingarnar hjá Rooney í þessum leik (Mikið djöf. voru þær margar). En eftir undirbúninginn og stoðsendinguna á Kagawa í marki nr.2 og glæsimarkið í lokin, þá ætla ég hreinlega að gefa honum frí í dag. Vonandi verður hann kominn í betri sendingargír á þriðjudaginn því líklegt verður að hann spili ca. 3-4 stöður í þeim leik.

Vörnin

Það er mjög ánægjulegt að sjá varnarmenn United brillera þessa dagana. Leikurinn í dag var fjórði deildarleikurinn í röð sem United spilar án þess að fá á sig mark. Miðvarðarteymið í þessum leikjum er búið að vera Ferdinand Evans (Fulham), Ferdinand Vidic(QPR) og Vidic Evans (Everton & Norwich). Það er alveg frábært að þeir séu að toppa á hárréttum tíma, eftir að hafa kostað okkur alveg óásættanlega mikið af mörkum á þessu tímabili, því núna eru allir leikir mikilvægir fyrir liðið. Að auki má segja að De Gea sé búinn að fá sína hvíld fyrir stórleikinn á þriðjudag þar sem hann þurfti lítið sem ekkert að gera í dag.

Staðan

Aftur erum við komnir með fimmtán stiga forskot á City og núna eru tíu umferðir eru eftir og City með leik til góða. Datt einhverjum í hug að við myndum ná slíku forskoti á þessu tímabili? Ef svo er, þá megið þið klappa ykkur á bakið því þið eruð snillingar! City spila á mánudag við Aston Villa á útivelli og bind ég litlar vonir við að Villa menn geri okkur einhvern greiða þannig að líklegt að þetta verði tólf stig á mánudag.

Nú koma tveir stórleikir í röð. Fyrst er það Real Madrid á þriðjudaginn í meistaradeildinni og svo Chelsea í FA Bikarkeppninni á sunnudag eftir viku. Party on!

Tíst dagsins

https://twitter.com/TheBusbyBabe/status/307871887231418370

https://twitter.com/halldorm/status/307882291328344064

https://twitter.com/furqanshahid/status/307899546342682624

https://twitter.com/tryggvipall/status/307897506837184512

https://twitter.com/EPLStuff/status/307896380234530819

https://twitter.com/stephenfry/status/307904554085781504

Viðtal við Ferguson eftir leikinn

http://www.youtube.com/watch?v=002s2i4yu-U

Enska úrvalsdeildin

Liðið gegn Norwich

skrifaði þann | 9 ummæli

Byrjunarliðin voru að detta í hús. Svona líta þau út í dag:

Manchester United

De Gea

Smalling Evans Vidic Evra

Valencia Anderson Carrick Kagawa

Rooney Van Persie

Varamenn:
Lindegaard, Rafael, Cleverley, Nani, Young, Welbeck, Chicharito

Norwich*

Bunn

R.Martin Turner Bassong Garrido

Snodgrass Howson Johnson Pilkington Hoolahan

Holt

* Neita að bera einhverja ábyrgð á því hvort leikmenn Norwich séu í réttum stöðum :)

Athugasemdir

Virkilega sterkt lið sem Ferguson teflir fram í dag. Ef til vill eru margir ósáttir að hann hvíli ekki fleiri aðalleikmenn en við verðum bara að treysta stjóranum eins og alltaf. Á sama tíma er Mourinho hinsvegar að hvíla marga leikmenn í dag fyrir leikinn gegn Barcelona.

Byrjunarlið Real gegn Barcelona er svona í dag:
Diego López, Varane, Pepe, Sergio Ramos, Coentrão, Kaká, Benzema, Essien, Modric, Callejón, Morata.

Khedira, Ronaldo, Özil, Carvalho, Arbeloa og Higuaín á bekknum og Alonso ekki í hóp. Magnað.Það er erfitt að túlka þetta öðruvísi en að Mourinho sé búinn að gefa deildina upp á bátinn og stefni á sigur gegn okkar mönnum á þriðjudag.

Enska úrvalsdeildin

Norwich á Old Trafford

skrifaði þann | 6 ummæli

Þá er komið að því gott fólk! Leikurinn sem allir eru búnir að bíða eftir! Manchester United gegn Rea…

Nei…

Öhmm…

Bíðið aðeins…

…Ahh. Afsakið. Sá leikur er víst næsta þriðjudag. Á morgun koma hinsvegar drengirnir frá Norwich í heimsókn á Old Trafford.

Sigur hér væru frábær úrslit fyrir United. Með sigri getur United aftur náð fimmtán stiga forskoti á City og tíu leikir eftir af tímabilinu. Hinsvegar verður helsti höfuðverkur Ferguson að ákveða hvaða leikmenn verða hvíldir fyrir leikinn gegn Real Madrid og hverjir munu spila. Ég get ómögulega neitað því að ég verð alltaf þónokkuð smeykur fyrir svona leiki því það er svo auðvelt fyrir leikmenn að gleyma sér, halda að þetta séu gefin þrjú stig og enda með því að hleypa City 3 stigum nær og gera deildina aftur spennandi.

Ferguson virðist vera á sömu nótum þegar hann var spurður á fréttamannafundinum. Gamli tók skýrt fram að þeir væru alls ekki horfa framhjá þessum leik:

„Tomorrow is the important one for us because Tuesday will look after itself. It’s an occasion on Tuesday whereas tomorrow is the mundane, practical situation – we need to win. It’s such an important league game for us. That’s what the concentration is on. I can assure you the players will not be thinking about Tuesday at this moment in time. All week we’ve been talking about how important Norwich is.“

Það er ekki hægt að segja annað en að Norwich sé frekar furðulegt lið, amk hvað varðar frammistöður og úrslit í deildinni. Á þessu tímabili hafa þeir sigrað United(h), Arsenal(h), Swansea(a) og Everton(h). Gert jafntefli við Tottenham (2x) og Everton(a) en svo gjörsamlega *beep* á sig í leikjum gegn Liverpool 5-0 og 2-5, Fulham 5-0(a) og Chelsea 4-1(a).

Á síðustu tuttugu árum hafa United og Norwich mæst ellefu sinnum og er ekki hægt að segja annað en að tölfræðin sé svo sannarlega United megin, eins og má sjá í töflunni hér fyrir neðan (fengin frá mufcinfo.com).

Ground P W D L F A Diff Win %
Old Trafford 5 4 1 0 8 3 +5 80.00
Carrow Road 6 4 0 2 9 5 +4 66.67
Total 11 8 1 2 17 8 9 72.73

En þrátt fyrir þessa tölfræði þá eru engir leikir gefnir í þessari deild og getur Norwich verið stórhættulegt og sigrað United ef þeir mæta sterkir til leiks, eins og sást í fyrri viðureign liðanna á tímabilinu. United hefur nú þegar tapað einu sinni gegn þeim og væri það hreinlega geggjun að tapa sex stigum gegn Norwich á þessu tímabili! Fyrir áhugasama þá tók Beautifully Red saman og bjó til GIF hreyfimyndir af öllum mörkum frá United í þessum fimm viðureignum á milli liðanna á Old Trafford.

Ég ætla að spá því að United komi ákveðnir inn í þennan leik og sigri örugglega. Draumurinn væri að skora nokkur mörk snemma og ná að skipta lykilmönnunum út í hálfleik.

Tölfræði
  • Í síðustu sex leikjum hefur United unnið alla!
  • Í síðustu sex leikjum hefur Norwich unnið einn, gert fjögur jafntefli og tapað einum
  • Í síðustu 20 heimaleikjum hefur United hefur unnið 18, gert eitt jafntefli og tapað einu sinni
  • Í síðustu 20 útileikjum hefur Norwich hefur unnið 3, gert 7 jafntefli og tapað tíu sinnum
  • Í 90% af síðustu 20 útileikjum, hefur Norwich fengið á sig mark
  • United hefur skorað á Old Trafford 63 leiki í röð
Meiðsli/Veikindi:

Van Persie er búinn að jafna sig á mjaðmarmeiðslunum sem hann varð fyrir í leiknum gegn QPR. Hann er búinn að vera æfa með liðinu og getur spilað gegn Norwich.

Phil Jones byrjaði að æfa í dag og verður þar að leiðandi ekki tilbúinn fyrir leikinn á morgun. Ferguson sagði að það væri möguleiki fyrir hann að ná leiknum gegn Real en það yrði tæpt.

Að öðru leyti eru bara Scholes og Fletcher á meiðslalista. Síðustu fréttir af Scholes voru að hann hefði farið til sérfræðings vegna meiðsla í hné og ekki vitað hvenær hann verði tilbúinn.

Lykilmaður Norwich




Sebastien Bassong er búinn að vera gríðarlega mikilvægur fyrir vörnina hjá Norwich og er þar að auki kominn með þrjú mörk í deildinni. Að auki má nefna framherjann Grant Holt sem er kominn með fimm mörk (þar á meðal eitt gegn Everton um síðustu helgi) og Snodgrass sem hefur skorað fjögur mörk og gefið fjórar stoðsendingar.

Líklegt byrjunarlið

Ég held að Ferguson muni hafa nokkuð sterkt lið á morgun og taki svo leikmenn út ef liðið nær góðri forystu. Sem betur fer fyrir okkar menn þá mætir Real mætir Barcelona í deildinni sama dag, í annað skiptið í þessari viku og vonar maður að einhver þreyta muni sitja í þeim fyrir stórleikinn næsta þriðjudag.

Eins og áður, þá er ég búinn að gefast upp á því að þykjast vita hvernig Ferguson stillir upp liðinu þannig að ég kem bara með „mitt lið“ fyrir leikinn á morgun.

De Gea

Rafael Smalling Vidic Evra

Carrick Cleverley

Nani Rooney Young

Van Persie

Helstu keppinautar…
  • Chelsea mætir West Brom á heimavelli á morgun
  • Arsenal og Tottenham mætast á sunnudag
  • Manchester City mætir Aston Villa á útivelli á mánudag
Í öðrum fréttum…

Á miðvikudaginn sigraði Chelsea Middlesborough í FA bikarkeppninni og mun mæta United í næstu umferð. Sá leikur verður spilaður 10.mars.

Ferguson telur líklegt að Rio skrifi undir nýjan samning við United.

Ryan Giggs hefur skrifað undir nýjan eins árs samning og mun því spila með United á næsta tímabili. Í tilefni þess ætla ég að láta hér nokkra skemmtilega hlekki:

Að lokum

Ef einhverjir lesendur hér eru að fara á leikinn á morgun, þá ætlar Chevrolet að taka aðra 360° ljósmynd inn á vellinum á morgun sem verður svo birt daginn eftir. Síðast var tekin mynd þegar Liverpool kom í heimsókn og getið þið skoðað hana hér: manutd.com/360fanpic.

Ég held svo áfram að minna ykkur sem eru skráð á Twitter að tísta með #Djöflarnir. Mér finnst gaman að hafa skemmtileg tíst í leikskýrslunum mínum þannig að verið hress og skemmtileg.

Pistlar

Úr bókaskápnum: Sons of United – Unglingastarf United frá 1937

skrifaði þann | 2 ummæli

Þau sem eru hvað hörðust á Twitter hafa kannske tekið eftir mrmujac sem tístir um unglingalið og varalið United. Frá því í haust hafa reglulega komið tíst á borð við þetta

https://twitter.com/mrmujac/status/303591278145314816

 

Tölfræði þessi er sprottin af stórvirki sem mrmujac, sem í raun heitir Tony Park, hefur unnið að í hátt í 20 ár ásamt Steve Hobin. Afrakstur þessara vinnu félaganna er bókin Sons of United og kom út fyrir jólin.

Þeir félagar hafa í allan þennan tíma unnið að því að finna allar þær upplýsingar um unglingastarf Manchester United sem hófst fyrir alvöru árið 1937 með stofnun Manchester United Junior Athletics Club, eða MUJAC.

Síðan þá hefur unglingastarf United verið með þvílíkum ágætum að í öllum leikjum fram til 1. maí 2011 var leikmaður sem kom upp úr unglingastarfinu í byrjunarliði United. Þann dag sat John O’Shea á bekknum og bjargaði því að hægt að segja eins og ofan að uppalinn leikmaður hefur verið  í hóp óslitið frá 1937.

Það er því full ástæða til að fylla í skarð það sem hefur verið í bókasafni Manchester United og gera unglingastarfinu hátt undir höfði.

Óhætt er að segja að Sons of United gerir það og vel það. Bókin hefst á inngangi þar sem rekin er saga MUJAC og eiginlegs unglingastarfs. Meginhluti hennar er síðan saga United í FA Youth Cup, eða Bikarkeppni unglinga. Sú keppni var lengst af langmikilvægasta keppnin sem unglingalið tóku þátt í. Aðeins á síðustu árum hafa deildakeppnir unglingaliða fengið aukið vægi. Þetta er því skynsamleg ákvörðun að fókusera á þessa keppni, alveg er bókin nógu stór þó ekki sé bætt við. Unglingabikarinn er að auki United kær enda vann liðið hann fyrstu fimm árin sem keppnin fór fram, 1953-1957 og þarf engum að segja hvaða piltar voru þar á ferð, né örlög sumra þeirra. Aftur vann United bikarinn 1964 og síðan 1992. Um ’92 piltana þarf ekkert sérstaklega að fjölyrða heldur. Loks vannst bikarinn 1995, 2003 og 2011.

Hér er sem sé ekki um að ræða bók sem rekur framgang unglingaliðsins í samfelldu máli eða einstökum sögum, heldur er hver einasti bikarleikur tekinn fyrir. Höfundar hafa grafið upp umsagnir blaða um hvern einasta leik og geta þannig sagt frá þeim hverjum fyrir sig. Inn í umsagnirnar er síðan myndað samhengi við fyrri og síðari leiki þar sem við á, þannig að hægt er að ná samfelldri sögu liðsins og leikmanna.

Bókinni er skipt í kafla eftir tímabilum og milli kafla eru æviágripskaflar þar sem helstu leikmönnum hvers tímabils er gerð greinargóð skil, hvort sem það voru framtíðarhetjur United, leikmenn sem áttu feril annars staðar eða leikmenn sem áttu sinn hátind í unglingaliðinu. Í þeim köflum kemur reyndar einn af fáum göllum bókarinnar í ljós, leikmenn eru þar ekki í stafrófsröð og ekkert efnisyfirlit er í bókinni og nafnaskrá vísar aðeins til ára sem leikmenn léku í unglingaliðinu, ekki síðna þar sem þeir koma við sögu. En við fyrirgefum það, bókin er unnin af höfundum sjálfum og aðstoðarmönnum, ekki atvinnubókaforlagi.

Þetta er því fyrst og fremst bók sem þarf að grípa niður í, renna í gegnum stutt tímabil, skoða leikina, liðin og markaskorarana, taka eftir frægum, og minna frægum nöfnum, lesa æviágripin og týna sér í þessum hluta sögu United. Finna kunnugleg nöfn, rekja feril þeirra og leiki, rekast á önnur minna kunnugleg nöfn, og njóta gríðarlegs fjölda mynda sem höfundar hafa safnað.

Enga samantekna tölfræði er að finna í bókinni af plássleysi, en í stað þess er tölfræðin birt á heimasíðu bókarinnar.

Í stuttu máli sagt, Sons of United er alger skyldueign fyrir þá sem vilja lesa sem mest um Manchester United og safna United bókum. Hún segir söguna sem mörgum United stuðningsmönnum er svo annt um, og er unnin af sönnum stuðningsmönnum og af sannri ástríðu. Sendingarkostnaður er verulegur hingað, en höfundur selur hana sjálfur fyrir utan Old Trafford á leikdögum ef þú ert á leiðinni út, en annars má láta rafrænu útgáfuna nægja. 45 vantar upp á að Facebook síða bókarinnar nái 1500 ‚lækum‘ en þá verða gefnar 5 rafrænar bækur af handahófi.

Á hinn bóginn, ef þú átt enga United bók, þá er þetta ekki bókin fyrir þig. Fyrir þig get hiklaust mælt með „Rauðu djöflarnir: Saga Manchester United 1878-1999“ eftir Agnar Frey Helgason og Guðjón Inga Eiríksson, sem er besta saga félagsins á íslensku, en ég veit ekki hvort eða hvar hún er enn fáanleg.  Í Eymundsson í Kringlunni fæst svo  The Man Utd Miscellany eftir Andy Mitten, skemmtileg lítil bók uppfull af mismerkilegum staðreyndum og fróðleik um uppáhaldsliðið okkar.

Færsla þessi er nefnd og flokkuð sem „Úr bókaskápnum“ og ætlunin er að þetta verði að reglulegum lið hér á blogginu. Skv. ófullkomnum lista eru eitthvað á níunda tug United bóka í skápnum mínum og ætti því að endast eitthvað. Þessi tala United bóka skýrir líka hvers vegna ég var þollaus að fá Sons of United í hendur frá því ég frétti fyrst af henni.