Rauðu djöflarnir

Enska bikarkeppnin

Manchester United 4:1 Fulham

skrifaði þann | 10 ummæli

Eftir að hafa átt í töluverðum vandræðum með West Ham í þriðju umferð FA bikarsins var komið að því að taka á móti Fulham í fjórðu umferð á Old Trafford. Á síðustu tveimur árum hefur Manchester United gengið frekar vel gegn Fulham, í síðustu 6 viðureigum hefur United 5 sinnum haft betur og einu sinni hafa liðin gert jafntefli. Maður var því tiltölulega bjartsýnn fyrir leikinn í dag og drengirnir okkar sýndu að maður hafði allan rétt á því. Ferguson gerði sex breytingar á liðinu frá leiknum við Tottenham.

De Gea

Rafael Jones Smalling Evra

Carrick Anderson

Nani Rooney Giggs

Hernandez

Leikurinn byrjaði fjörlega því eftir aðeins 72 sekúndur skoraði United fyrsta mark leiksins úr vítaspyrnu. Eftir ágæta sókn á fyrstu sekúndum leiksins fékk United hornspyrnu. Rooney smellti boltanum inn í boxið, Smalling stekkur upp og var við það að skalla boltann þegar Aaron Hughes, sem stökk upp með Smalling, rak vinstri hendina í knöttinn. Clattenburg tók 1-2 sekúndur í að hugsa málið og flautaði svo víti, sem var samkvæmt endursýningu alveg rakið. Giggs tók vítið og skoraði, ekki svo örugglega því Schwarzer náði að setja hendurnar í boltann. Virkilega góð byrjun á leiknum.

Á næstu mínútum eftir markið datt leikurinn hálfpartinn niður í „gönguhraða“ ef við getum sagt svo. Fulham héldu boltanum ágætlega á milli sín á miðju vallarins sköpuðu sér þó engin færi. Á 20 mínútu átti United svo að fá annað víti þegar Duff augljóslega setti hendina viljandi í boltann. Clattenburg sá atvikið vel en virtist réttlæta aðgerðir Duffs með einhverjum hætti gagnvart Giggs og Evra sem mótmæltu. Ég hef ekki hugmynd um hvaða rök Clattenburg hafði gegn því að dæma víti því þetta var ansi augljóst gagnvart öllum á vellinum, þar á meðal Duff. Í kjölfarið að þessu atviki fékk United horn og upp úr því gott færi þegar Rooney skaut að marki en Schwarzer varði í þverslá.

Fátt annað markvert gerðist það sem eftir lifði fyrri hálfleiks. Eins og ég hafði áður sagt þú héldu Fulham boltanum ágætlega fyrri hluta hálfleiksins en ógnuðu ekkert, áttu til dæmis bara eitt skoti á rammann. United voru yfirvegaðir í sínum varnaraðgerðum en sóknarlega voru hlutirnir kannski ekki alveg jafn vel smurðir. Í lang flestum tilvikum kom boltinn upp miðjan völlinn og menn voru að reyna að þræða boltanum í gegnum vörn Fulham, nú eða reyna skot sem voru flest hver hættulaus. Í öðrum tilfellum var boltanum komið á Nani á hægri kantinum en það virtist vera alveg vonalaust fyrir greyið manninn að koma boltanum inn í teiginn, annað hvort stoppaði hann sóknina með því að klappa boltanum aðeins of mikið (og allir varnarmenn Fulham voru mættir á sinn stað) eða þá að sendingarnar hans höfnuðu í fyrsta varnarmanni Fulham. Það voru helst föstu leikatriðin sem sköpuðu mestu hætturnar í fyrri hálfleik. Allavega, 1-0 í hálfleik.

Seinni hálfleikur byrjaði næstum því jafn fjörlega og sá fyrri. Nani átti loksins góða uppbyggingu á hægri kantinum, gaf fyrir á Rooney sem átti hörku skot sem Aaron Hughes varði á línu. Rooney brást hinsvegar ekki bogalistinn nokkrum mínútum seinna þegar hann skoraði loksins annað mark United í leiknum, nánar tiltekið á 50 mínútu. Anderson fékk boltann á miðjunni og átti frábæra stungusendingu á Rooney, sem lék vel á varnarmenn Fulham og negldi honum framhjá Schwarzer í markinu, með vinstri takk fyrir! Loksins kom markið sem maður var búinn að bíða eftir í 48 mínútur.

Tveimur mínútum seinna gerði Hernández út um leikinn með því að setja þriðja mark United. Eftir góða skyndisókn, sem virtist reyndar vera að fjara út, fékk Rooney boltann á hægri kantinum, gaf fyrir og þar var Litla Baunin einn og óvaldaður, tækifæri sem Mexíkaninn sleppir sko ekki. Gott mark og loksins gat maður farið að halla sér aftur í sætinu og njóta lífsins.

Á 61 mínútu var Carrick skipt útaf fyrir Scholes og 5 mínútum seinna skoraði Hernández svo annað mark sitt í leiknum og fjórða mark United. Það var smá heppnisstimpill yfir því marki því boltinn átti viðkomu í varnarmanni Fulham og skoppaði svo rólega framhjá Schwarzer sem var búinn að skutla sér í það horn sem boltinn virtist stefna í. Þar með var leikurinn búinn og Ferguson ákvað að grípa tækifærið og nota restina af skiptingunum sínum þegar Kagawa og Valencia komu inn á fyrir Anderson og Giggs.

Fulham klóraði í bakkann á 76 mínútu þegar Aaron Hughes skallaði boltann í netið eftir horn. Í stöðunni 4-0 þá skipti þetta mark engu máli, en hefði þetta til dæmis verið jöfnunarmark þá hefði ég orðið ofboðslega pirraður út í Rooney, sem var alveg út á þekju í því að dekka sinn mann. Rooney ætlaði reyndar að bæta upp fyrir þau mistök þegar hann skoraði að mínu mati fullkomlega löglegt mark á 83 mínútu. Clattenburg dæmdi hinsvegar brot á Hernández í aðdraganda marksins. Rangur dómur þar á ferðinni, fáránlegur satt best að segja, og kórónaði dómarinn þar með slakan frammistöðu sína í dag. Það mun hinsvegar enginn aðdáandi samsæriskenninga muna eftir framistöðu Clattenburg í dag fyrst United vann leikinn auðveldlega.

Þar með er það upptalið úr leik dagsins, góður og sanngjarn sigur United á Fulham. Þessi lið eigast aftur við eftir nákvæmlega viku, þá á Craven Cottage í Lundúnum. Sá leikur verður pottþétt erfiðari en við skulum kannski fyrst einbeita okkur að leiknum gegn Southampton á miðvikudaginn. Nokkrir koma til greina sem maður leiksins í dag. Giggs var til dæmis mjög góður, Anderson líka og öll vörnin hreinlega. Ég er ennþá að reyna að finna eitthvað sem ég get kennt De Gea um…það hlýtur að koma eitthvað fljótlega.

Að lokum, tvö tíst:

https://twitter.com/OptaJoe/status/295241204235390976

https://twitter.com/OptaJoe/status/295240569339387904

Enska bikarkeppninEnska bikarkeppnin

Bikarleikur gegn Fulham á Old Trafford

skrifaði þann | 7 ummæli

Fyrsti heimaleikur United í deildinni þetta tímabil var gegn Fulham, fyrsti af mörgum 3:2 sigrum tímabilsins. Þessi  lið eru á ólíkum stað í deildinni þar sem United er á toppnum á meðan Fulham er í 14. sæti sex stigum frá fallsæti. Einhverjir gætu sagt að við værum óheppin að fá strax 2 úrvalsdeildarlið í röð svona snemma í keppninni, reyndar hafa verstu klúðrin yfirleitt verið gegn liðum úr deildunum fyrir neðan.

Með Fulham leika eins og margir vita tveir fyrrverandi leikmenn United, Kieran Richardson og Búlgarski sjarmurinn og sjentilmaðurinn Dimitar Berbatov. Richardson verður ekki með vegna meiðsla, Dimitar Berbatov mun leika sinn fyrsta leik gegn United í langan tíma. Berba hefur skorað 7 mörk í 17 leikjum fyrir Fulham eða rúmlega 20% marka þeirra.

Leikmenn Manchester United skelltu sér í æfingarferð til Qatar í vikunni og hafa vonandi náð að hlaða batteríin. Samkvæmt blaðamannafundi Ferguson í dag verða Ashley Young og Jonny Evans ekki með á morgun, hann segir að stutt sé í Young en að það sé aðeins lengra í Evans.

Það getur oft verið strembið að skjóta á rétt byrjunarlið þessa dagana en ég spái þessu svona:

Ég spái þessum leik 3-1, van Persie, Nani og Cleverley skora fyrir okkar menn og Berbatov skorar fyrir Fulham.

Lesefni

Rauðu djöflarnir lesa

skrifaði þann | 2 ummæli

Það helsta sem við lásum í vikunni:

Manchester United eru komnir tvo kínverska stuðningsaðila

Suarez heldur áfram að væla og segir United stjórna fjölmiðlunum á Englandi

Guardian skrifar um símtalið sem fékk Van Persie til United

Adam Marshall með flotta grein um De Gea eftir leikinn gegn Tottenham

ROM kom með tvær góðar greinar um United og eyðslu. Fyrri greinin svarar þeim sem segja að United hafi aðeins unnið titla því þeir borguðu meira fyrir leikmenn. Seinni greinin ber saman eyðslu United við helstu keppinautana.

Beautifully Red sýnir okkur brot af því besta frá De Gea á þessu tímabili

Enska úrvalsdeildin

Tottenham 1:1 Manchester United

skrifaði þann | 27 ummæli

Manchester United og Tottenham skildu jöfn í hörku leik á White Hart Lane í dag. Aðstæður voru erfiðar, það snjóaði grimmt í London og um tíma fyrir leikinn var jafnvel möguleiki á frestun. Svo fór nú ekki, Ferguson setti bara upp Nike húfu og bar hana á höfði allan leikinn, eitthvað sem ég man varla eftir að hafa séð áður. Byrjunarlið United kom mér aðeins á óvart. Ferguson ákvað að spila ekki „official“ kantmönnunum heldur færði Cleverley upp á vinstri kantinn og var síðan með Welbeck á þeim hægri. Jones var svo staðsettur með Carrick sem varnartengiliður og Kagawa í hlutverki sóknartengiliðs en ekki Rooney eins og maður bjóst kannski við. Svona leit þetta semsagt út:

De Gea

Rafael Vidic Ferdinand Evra

Jones Carrick

Welbeck Kagawa Cleverley

Van Persie

Jafnræði var á með liðunum í byrjun leiks, menn voru eðlilega ekki að taka of mikla sénsa, á meðan annað liðið hélt botlanum í kringum miðjuna varðist hitt vel og voru snöggir að loka svæðum. Svona gekk þetta á víxl í 25 mínútur en þá skoruðu United gott. Tottenham tapaði boltanum á slæmum stað á miðjunni, Welbeck fær boltann vinstri meginn á vellinum, svissar honum yfir til hægri á Cleverley sem gefur inn í teig og hver er þar mættur á fjærstöng annar en Robin Van Persie sem skallar í markið. Snaggaralega gert hjá okkar mönnum að setja eitt mark svona nánast upp úr þurru. Tottenham-menn höfðu hingað til gert mjög vel í að loka á allar aðgerðir United þannig að það hafði ekki verið nein ógn fram að þessu.

Eftir markið hélt Tottenham boltanum meira en vörn United gerðu vel í því að halda þeim frá því að ógna marki af einhverju viti, besta færi Tottenham í fyrri hálfleik var á 40 mínútu þegar Bale átti þrumuskot fyrir utan teig, boltinn sigldi í gegnum vörn United (með smá viðkomu í Vidic) og gerði De Gea gríðarlega vel í að verja boltann með löppunum.

Þar við sat í fyrri hálfleik, eitt færi hjá United og eitt mark. Bestu fréttirnar voru hinsvegar góð varnarvinna hjá okkar mönnum, þeir gerðu vel í að stoppa öll hraðaupphlaup Tottenham. Skotið hjá Bale af sirka 20-25 metra færi var þeirra eina færi.

Seinni hálfleikur byrjaði fjörlega, bæði lið áttu góð færi á fyrstu 5 mínútunum og þurfti De Gea t.d. að verja einu sinni alveg meistaralega frá Dempsey sem var kominn einn inn fyrir. Eftir þetta virtust menn ná einbeitingunni aftur en leikurinn var þó mun opnari en í fyrri hálfleik. Bæði lið ógnuðu marki, Tottenham voru klárlega grimmari fram-á-við en áður þannig að maður var smá stressaður yfir þeim möguleika að þeir myndu ná að pota inn jöfnunarmarki.

Á 62 mínútu kom Rooney inn á fyrir Kagawa, rökrétt skipting að mínu mati, það hafði ekki mikið komuð út úr Kagawa sóknarlega þó varnarlega hafði hann barist vel. Rooney vildi frá víti nokkrum mínútum eftir að hann kom inn á þegar hann datt í teignum. Í endursýningu var klárlega farið í lappirnar á honum en það hefði verið afar strangur dómur að dæma á þetta atviki, held að Rooney hefði alveg getað staðið þetta af sér hefði hann viljað (uppfærð skoðun á þessu atviki má lesa hér).

Á 75 mínútu kom Valencia inn á fyrir Cleverley, maður hélt kannski að Welbeck yrði tekinn þar sem hann var búinn að vera í endalausu fram að þeim tíma. Munurinn á Welbeck og Cleverley var þó sá að Welbeck var allavega í einhverju hnoði, ég var nánast búinn að gleyma því að Cleverley var inn á. Stuttu seinna fékk Defoe svo DAUÐAFÆRI sem Ferdinand gerði ótrúlega vel í að renna sér fyrir. Maður hefur nánast ekki séð svona tilþrif frá Ferdinand í vetur, vel gert honum þó svo De Gea hefði örugglega étið þennan bolta!

Síðustu 10-15 mínúturnar voru erfiðar á að horfa. Það var mikil barátta í gangi, ekkert um alvöru færi þannig lagað en þegar forskotið er bara eitt mark veit maður aldrei hvað getur gerst. Svo gerðist það sem maður óttaðist mest, nokkrum sekúndum áður en leikurinn er flautaður af kemur Tottenham boltanum inn í teig, það gengur illa hjá United að hreinsa frá, menn panika aðeins og gleyma sínum mönnum, svo best boltinn til Clint Dempsey sem var einn og óvaldaður og smellir boltanum nánast í opið markið. Strax þar á eftir er leikurinn svo flautaður af.

Auðvitað er það gallsúrt að tapa tveimur stigum á síðustu sekúndunni en það er hinsvegar erfitt að svekkja sig af mikið á þessu af tveimur ástæðum. Númer eitt, Tottenham eru með virkilega gott lið og ég held að sá tími sé hreinlega liðinn að við völtum yfir þá tvisvar sinnum á hverju tímabili. Leikurinn var í járnum allan tímann, þeir áttu til dæmis mun fleiri marktilraunir þannig að þeir áttu skilið eitt stig út úr þessum leik. Númer tvö, hversu mörg stig höfum við tekið í vetur á síðustu mínútunum? Ætli maður þurfi ekki stundum að bragða sitt eigið meðal.

Það er margt gott hægt að taka út úr þessum leik. Heilt yfir átti vörnin okkar góðan dag, Carrick var frábær og David De Gea bjargaði okkur nokkrum sinnum meistaralega. Hvaða endalausa rugl er maður alltaf að lesa um að maðurinn sé ekki nægilega góður fyrir United og sé jafnvel á förum? Ég veit ekki um neinn markmann í ensku deildinni sem ég væri frekar til í að vera með en David De Gea. Þegar kemur að því að því að velja mann leiksins þá held ég að Michael Carrick hafi unnið fyrir þeirri nafnbót í dag.