Það er búið að vera einstaklega gaman að vera United stuðningsmaður þessa vikuna eftir glæsilegan sigur liðsins gegn City síðasta sunnudag, en núna er víst komið að því að halda göngunni áfram í átt að titlinum því á morgun klukkan 15:00 verður flautað til leiks á Old Trafford í viðureign Manchester United og Sunderland. Martin O’Neill og lærlingum hans hefur ekki gengið vel í deildinni í vetur en um síðustu helgi unnu þeir þó góðan heimasigur gegn Reading og lyftu sér upp í 16 sætið í deildinni.
Af leikmannamálum er það að frétta að herra Nemanja Vidic snýr væntanlega aftur eftir að hafa verið fjarverandi meira og minna í allt haust. Ferguson hefur sagt að hann komi við sögu í þessum leik en gaf þó ekki afdráttarlaust svar hvort við munum sjá hann í byrjunarliðinu, það verður þó að teljast líklegt þar sem Jonny Evans nældi sér í smá meiðsli gegn Man City og er á mörkunum. Það gæti tekið nokkra leiki fyrir Vidic að komast aftur í sitt gamla form en það verður frábært að sjá fyrirliðann okkar aftur á vellinum, maður hefur saknað hans. Ég hef mikla trú á því að nærvera Vidic muni stoppa þá leka sem við höfum séð á vörninni í vetur, það er allavega gríðarlega mikilvægt fyrir okkur að hafa hann á góðu róli í jólaösinni. Fréttir af öðrum leikmönnum eru þær að Rooney var eitthvað lasinn í vikunni en ætti að vera búinn að ná sér fyrir leikinn, svo styttist víst líka í Kagawa en það þykir þó ólíklegt að við munum sjáum hann um helgina.
Ég ætla að spá liði sem lítur einhvern veginn út svona:
De Gea
Rafael Ferdinand Vidic Evra
Valencia Carrick Cleverley/Welbeck
Rooney
Van Persie Hernández
Þessi spá mín er algjörlega úr lausu lofti gripin. Ég held að Hernández komi aftur inn í liðið eftir að hafa setið á bekknum gegn Reading og City, síðan er spurning hvort Cleverley haldi sínu sæti eða hvort Welbeck fái séns í byrjunarliðinu. Eitt er alveg ljóst, leikmenn Manchester United langar gríðarlega mikið til að vinna þennan leik. Þeir hafa ekki gleymt síðasta leik tímabilsins í fyrra þegar United lagði Sunderland á Stadium Of Light, í smá stund héldu menn þá að þeir væru orðnir Englandsmeistarar eða allt þangað til fréttir bárust þess efnis að City hafi stolið titlinum á síðustu augnabliki tímabilsins. Þessari niðurstöðu fögnuðu stuðningsmenn Sunderland ógurlega og sú framkoma hefur setið í okkar mönnum í allt sumar. Hér má til dæmis lesa hvað Rooney hefur um málið að segja.
“ When the fixtures come out I look for three games – City, Liverpool and Everton. This time I checked the Sunderland game. If there is one team that I want to beat this season it will be Sunderland.“
Ég hef engar áhyggjur af þessum leik. Leikmenn hafa fengið góða hvíld í þessa vikuna og ég hef trú á því að þeir komi einbeittir til leiks og ætli sér að ganga frá Sunderland. Ég spái 4-1 sigri.
