Byrjunarliðið er:
De Gea
Valencia Smalling Evans Evra
Anderson Giggs
Nani Rooney Welbeck
Chicharito
Bekkur: Lindegaard, Rafael, Ferdinand, Carrick, Young, Cleverley, Van Persie
S.C. Braga – Manchester United annað kvöld
Annað kvöld byrjar seinni hluti riðlakeppninnar hjá okkar mönnum. Aftur mætum við Braga en í þetta skiptið fer leikurinn fram á heimavelli Portúgalana, Estádio AXA í Braga. Fyrri leikur þessara liða var dæmigerður leikur fyrir okkar menn á þessari leiktíð, lenda snemma undir og þurfa svo að vinna sig aftur inn í leikinn. Góðu fréttirnar eru þær að í síðustu deildarleikjum gegn Chelsea og Arsenal hefur annað verið upp á teningnum og hafa United menn skorað snemma og stjórnað leikjunum. Sir Alex sem á 26 ára starfsafmæli í dag hefur gefið það út að það verði breytt lið sem spilar í kvöld frá því um helgina. Búast má við að Rio Ferdinand verði hvíldur ásamt fleirum. En stefnan er samt sett á að vinna leikinn og tryggja liðið áfram. Hópurinn sem fer til Portúgal: De Gea, Lindegaard; Rafael, Evans, Ferdinand, Büttner, Smalling, Evra; Cleverley, Giggs, Anderson, Nani, Valencia, Carrick, Young, Powell; Rooney, Welbeck, Hernandez, van Persie.
Braga hefur unnið báða leikina sem þeir hafa spilað í Portúgölsku deildinni síðan þeir töpuðu á Old Trafford. Heimamenn eru meiðslalausir og munu án efa stilla upp sínu sterkasta liði. Þar sem hættulegastir verða teljast framherjarnir Éder og Alan sem skoraði einmitt mörk Braga í fyrri viðureign liðanna.
Erfitt að gera spá fyrir um mögulegt byrjunarlið í þessum leik, en miðað við hvað Ferguson hefur sagt þá gæti það verið á þessa leið:
Lindegaard
Rafael Smalling Evans Büttner
Cleverley Anderson
Nani Rooney Giggs
Hernández
Ég spái því að þessi leikur endi í 1-1jafntefli sem verður nóg til að komast upp úr riðlinum. En hvað haldið þið?
Manchester United 2:1 Arsenal
Enn einu sinni hefst United sigur með einu marki, en í þetta skiptið sýnir markatalan ranga mynd af leiknum.
Leikurinn var varla byrjaður þegar veikleiki Arsenal varnarinnar gerði vart við sig. Santos fylgdi Rafael ekki vel eftir og leyfði fyrirgjöf inn á teiginn, en Vermaelen gerði mjög skemmtileg mistök og gaf því sem næst beint á Robin van Persie sem afgreiddi boltann örugglega í hornið.
Annars fór leikurinn frekar tíðindalítið fram fram undir miðjan hálfleikinn að bæði lið áttu góð færi, en Mannone og De Gea sáu um það. Arsenal voru nokkuð öflugri og United menn fóru í spjaldasöfnun, Young, Carrick og Cleverley fengu allir gul spjöld fyrir brot.
Undir lok hálfleiksins fengu United síðan víti. United fengu horn og síðan átti Ashley Young fyrirgjöf sem Santi Cazorla stökk fyrir og stöðvaði með hendi. Arsenal menn allt annar en sáttir, en Rooney hélt áfram vítavandræðum United og brenndi vítinu. Svo sem skiljanlegt að Van Persie sé ekki látinn taka vítið, en miðað við að Rooney er ekki alltaf öruggur í vítum, hættulegt.
Ekki var mínúta liðin af seinni hálfleik þegar United átti enn að bæta í, Vermaelen missti enn boltann frá sér og Van Persie stal honum, lék upp, gaf fyrir og á óskiljanlegan hátt tókst Valencia að láta boltann flækjast fyrir sér frekar en að renna honum í netið.
United var engan veginn að ná tökum á miðjunni í þessum leik, Arsenal var mun meira með boltann þar, United lá frekar aftarlega og var með skyndisóknir.
Enn og aftur fóru United menn illa að ráði sínu um miðjan hálfleikinn þegar Robin van Persie fékk frábæra sendingu frá Ashley Young inn fyrir vörnina, en skotið var ekki nógu gott og Mannone varði í horn. Úr horninu kom þó langþráð annað markið, Rooney með fyrirgjöfina og Evra skoraði með góðum skalla.
Skömmu eftir markið var Jack Wilshere rekinn útaf. Hann hafði fengið gult fyrir seina tæklingu í fyrri hálfleik og verið að smábrjóta af sér. Fékk síðan annað gult þegar hann missti boltann aðeins of langt frá sér og fór í ökklann á Evra við að reyna ná til hans. Verulega klaufalegt hjá Wenger að vera ekki búinn að taka hann útaf eins og Ferguson var búinn að taka Cleverley útaf fyrir Anderson. Cleverley var í svipuðu rugli og Wilshere, báðir áttu tæklingar sem hefðu getað verið annað gult, Cleverley var tekinn útaf, Wilshere ekki og því fór sem fór.
Síðustu 20. mínúturnar voru síðan daufar og það leit út fyrir að leikurinn væri að fjara út, en undir lokin sótti Arsenal nokkuð og með síðasta skoti leiksins minnkaði Santi Cazorla muninn með laglegu marki.
Þetta var sanngjarn sigur United í frekar slökum leik. Leikmenn voru frekar grimmir í dag og spjaldaveislan dró úr ánægjunni. United réði ekki spilinu eins og ég hefði viljað, en Anderson átti þokkalega innkomu. Leikurinn vannst hins vegar á mun betri sókn United og það verður að viðurkennast, slakri vörn Arsenal. Ef ekki fyrir mistök hefði sigurinn átt að vera stærri og öruggari.
Þessi stig eru vel þegin í leik sem er erfiður á pappírnum. Framundan er leikjahrina þar sem United á að búast við sigri í hverjum leik, fram að Manchester-slagnum 9. desember og vonandi verðum við í góðri stöðu í deildinni þegar við förum á Etihad.
Liðið gegn Arsenal
Liðið komið
De Gea
Rafael Ferdinand Evans Evra
Carrick Cleverly
Valencia Rooney Young
van Persie
Varamenn: Lindegaard Anderson Hernandez Nani Scholes Powell Wootton.
Anderson fær ekki sénsinn, okkar sterkasta liði, eins og Ferguson sér það stillt upp. Welbeck er meiddur og því ekki á bekk
Arsenal: Mannone; Sagna, Mertesacker, Vermaelen, Santos; Arteta, Wilshere, Ramsey; Cazorla, Giroud, Podolski. Alveg eins og almennt var spáð
Arsenal kemur í hádegisleikinn á morgun
Liðin er sú tíð að leikur Arsenal og United var úrslitaleikur um meistaratitilinn. Síðustu árin hefur það verið hlutskipti stuðningsmanna að horfa upp á bestu leikmenn liðsins hverfa á braut en í staðinn eru keyptir ódýrari leikmenn eða stuðst við uppalda leikmenn. Það ætti að vera fjarri nokkrum stuðningsmanni United að gagnrýna stefnu sem byggir á uppeldi, en eins og United stuðningsmenn hafa kvartað sáran undan að veskið sé dregið nægilega duglega upp hafa Arsenal stuðningsmenn gert hið sama. Þar á bæ munu vera til þokkalega digrir sjóðir eftir sölur síðustu ára, en engu að síður hefur Arsène Wenger ekki splæst í neina ofurkappa, en leitað eftir kjarakaupum.
Arsenal hefur gengið nokkuð brösuglega í haust eftir að markamaskínan þeirra síðustu ár ákvað að ganga í skemmtilegra lið, og það þó keyptir væru þrír leikmenn í staðinn.
Santi Cazorla hefur þó slegið í gegn í haust og sýnt sínar bestu hliðar eins og vænta má af leikmanni sem á 50 landsleiki með sigursælasta landsliði allra tíma, þó hann hafi ekki leikið lykilhlutverk í lokakeppnum með Spáni.
Olivier Giroud og Lukas Podolski hafa átt erfiðara með að koma sér í gang og Arsenal hefur skorað fæst mörk efstu sex liðana í deildinni. Um leið hafa þeir þó fengið fæst mörk á sig af þessum liðum. Framan af þótti vörn þeirra alveg skotheld en í síðustu leikjum hefur hún aðeins orðið lekari. Ekki ætla ég þó mikið að taka mark á 7-5 leik þeirra gegn Reading á þriðjudag hvað það varðar. Arsenal hefur átt í markmannsveseni og um tíma voru bæði Szczęsny og Fabianski meiddir, en Vito Mannone hefur átt ágæta innkomu og er búinn að ná varamarkmannstöðunni af Fabianski, en Szczęsny er enn meiddur.
Helsti veikleikinn hjá vörninni er Brasilíumaðurinn André Santos, en hann á við þann galla að stríða að vera brasilískur bakvörður. Það var ekki að ástæðulausu að við tókum tvíburana til okkar strax 18 ára til að reyna að ala þá upp.
Á miðjunni má búast við Mikel Arteta sterkum, og endurkoma Jack Wilshere mun að öllum líkindum halda áfram. Ramsey, Cazorla, Podolski og Giroud verða svo þarna allir. Oxlade-Chamberlain er eitthvað tæpur þannig að hann byrjar varla.
Okkar megin verður stillt upp sterku liði. Allir aðalmenn hvíldu á miðvikudaginn og koma aftur inn í liðið. Smalling og Jones eru alveg við það að koma til baka, en ekki er búist við þeim í þessum leik. Cleverley var ekki frábær í leiknum á sunnudaginn, en það var Anderson á miðvikudaginn og ég vona að hann fái séns. Liðið verður því svona:
De Gea
Rafael Ferdinand Evans Evra
Carrick Anderson
Valencia Rooney Young
Van Persie
Ætla að spá nokkrum mörkum, 3-2 fyrir okkur, enn einn leikurinn sem verður ekki fyrir hjartveika. Þetta verður þá 55. deildarleikurinn í röð sem United skorar í. 54 er nú þegar nýtt met fyrir þá sem halda að fótbolti hafi byrjað árið 1992.
Já og ef einhver var búinn að gleyma því fór leikurinn á Old Trafford í fyrra 8-2.