Rauðu djöflarnir

Enska deildarbikarkeppnin

Newcastle á morgun – deildarbikar

skrifaði þann | 16 ummæli

Eftir ævintýri helgarinnar er næsta verkefni fyrsti leikur liðsins í deildarbikarnum eða það sem nú kallast víst Capital One Cup.  Nýr styrktaraðili þessa bikarkeppnis og tekur við af Carling sem hefur styrkt þessa keppni frá árinu 2003. Þetta er þriðja umferð keppninnar sem hófst um miðjan ágúst. Við drógumst gegn Newcastle og verður leikurinn spilaður á Old Trafford. Þessi lið mættust síðast í deildarbikarnum árið 1994 en þá vann Newcastle 2-0 sigur. Sir Alex spilaði þá unglingum á borð við David Beckham, Gary Neville og Paul Scholes.

Okkur hefur gengið ágætlega í þessari keppi undanfarið og unnið hana þrisvar frá árinu 2006 og alls fjórum sinnum, ávallt undir stjórn Sir Alex. Síðast vorið 2010 þegar við vörðum titilinn frá árinu áður með sigri á Aston Villa. Síðustu tvö tímabil hefur liðið hinsvegar dottið út í 8-liða úrslitum. Fyrst gegn West Ham og á síðasta tímabili gegn Crystal Palace í afar döprum leik á Old Trafford þar sem hinn ungi Wilfried Zaha skólaði vörn United hvað eftir annað.

En hvað um það, nú er komið nýtt tímabil og ný keppni er hafin. Sir Alex hefur nýtt þessa keppni undanfarið eins og frægt er orðið til þess að gefa þeim sem eru að spila minna og þeim sem eru að banka á dyrnar tækifæri til þess að sanna sig og fá leiktíma. Það er líklega enginn ástæða til að ætlast til annars af þessum leik þó að andstæðingurinn sé í sterkari kantinum í þetta skiptið en meiðsli manna geta þó sett strik í þann reikninginn.

Chris Smalling, Phil Jones, Wayne Rooney og Ashley Young eru allir meiddir og gera má ráð fyrir því að Vidic verði hvíldur fyrir átökin gegn Spurs. Samkvæmt Physioroom er Rafael einnig meiddur eftir leik helgarinnar og svo má setja spurningarmerki við Rio Ferdinand en hann virtist ekki ganga alveg heill til skógar í leiknum á sunnudaginn þrátt fyrir að hafa spilað eins og herforingi. Vörnin er því nokkuð þunnskipuð og líklega stærsta spurningarmerkið fyrir leikinn á morgun.

Líklegt byrjunarlið:

Uppfært: Klúbburinn var að gefa út að Nemanja Vidic hafi farið í aðgerð í dag og verði frá næstu 2 mánuðina. Eftir þessar fréttir verður það að teljast afar ólíklegt að Rio og Evans spili í þessum leik. Ég myndi telja að Michael Keane fái tækifæri í byrjunarliðinu og til þess að hafa örlitla reynslu í öftustu línunni muni Michael Carrick stíga niður í varnarlínuna.

Lindegaard

Valencia M.Keane Carrick Büttner

Anderson Fletcher

Nani Powell Welbeck

Hernandez

Ég ætla að gefa mér að Lindegaard byrji á morgun og David de Gea byrji um helgina gegn Tottenham. Alexander Büttner hlýtur að koma inn í byrjunarliðið fyrir Evra og Evans mun halda sæti sínu. Hægri helmingur varnarlínunnar er mikið spurningarmerki, sérstaklega ef Rio er eitthvað meiddur og það er rétt að Rafael sé frá.  Carrick gæti þurft að leysa af í vörninni og Valencia í hægri bak. Það er þó bagalegt að þurfa að spila þessum mönnum í miðri viku fyrir leik gegn Tottenham en leikurinn á morgun er gegn andstæðingi sem leyfir kannski ekki alveg að mönnum eins og Michael Keane eða Scott Wootton sé hent í djúpu laugina.

Micheal Keane hefur þó vaxið sem leikmaður undanfarið og var t.d.valinn besti leikmaður varaliðsins í fyrra. Ef Fergie vill hvíla Rio, sem er ekki ólíklegt, er hann líkega næsti maður inn. Marnick Vermijl verður líklega á bekknum nema Ferguson ákveði að hann vilji hafa hægri bakvörð í hægri bakvarðastöðunni. Vermijl er tvítugur Belgi sem hefur líklega verið stöðugasti leikmaður varaliðsins síðustu tvö ár. Þessir tveir leikmenn munu líklega a.m.k. sitja á bekknum á morgun.

Ferguson gaf það út í síðustu viku að Fletcher myndi spila þennan leik og ég set Anderson hliðin á honum á miðjuna enda hefur hann spilað lítið. Það væri einnig gaman að sjá Powell fá tækifæri í byrjunarliðinu og ég reikna fastlega með að Hernandez og Welbeck byrji þennan leik en það væri einnig gaman að sjá Angelo Henriquez á bekknum.

Ég reikna með nokkuð sterku byrjunarliði gegn liði Newcastle enda er andstæðingurinn af því kaliberi að hann leyfir ekkert rugl. Það fer þó auðvitað eftir því hvort að Pardew stilli upp sterku liði eða fari Evrópudeildarleiðina og stilli upp einhverju varaskeifum. Ég spái 2-1 sigri fyrir United og ég skrái það hér með niður að Fletcher muni skora í þessum leik, annað gef ég ekki upp.

Leikurinn er klukkan 18.45 á morgun, fer fram á Old Trafford og er sýndur í beinni útsendingu á Stöð 2 Sport.

Enska úrvalsdeildin

Liverpool 1:2 Manchester United

skrifaði þann | 55 ummæli

Óhætt er að segja að beðið hafi verið eftir þessum leik með mikilli eftirvæntingu. Þetta var fyrsti heimaleikur Liverpool eftir útgáfu Hillsbrough skýrslunnar og var andrúmsloftið magnþrungið. 96 blöðrum var sleppt til minnast þeirra 96 sem létust í Sheffield og var stemmningin mögnuð. Og voru allir stuðningsmenn til fyrirmyndar.

Liverpool stillti upp sama liði og gegn Sunderland á meðan Ferguson gerði nokkrar breytingar frá leiknum gegn Wigan.

United:

Lindegaard

Rafael Ferdinand Evans Evra

Carrick Giggs

Valencia Kagawa Nani

van Persie

Liverpool:

Reina

Kelly Skrtel Agger Johnson

Gerrard Allen Shelvey

Sterling Suarez Borini

Liverpool byrjaði leikinn mikið betur, góð hreyfing var á mönnum og þeir héldu boltanum vel, voru ríflega 60% með boltann í fyrstu 10 mínúrnar. United áttu erfitt með að halda boltanum og tókst aldrei almennilega ná upp einhverju spili.

Seint í hálfleiknum reyna Jonjo Shelvey og Jonny Evans við sama boltann og fara báðir með báða fæturna á undan sér en Shelvey fór aðeins í Evans og fékk að sjá rautt, frekar harður dómur.

Ekkert fleira markvert gerðist í þessum bragðdaufa fyrri hálfleik þar sem hvorugt liðið átti einhver færi en Liverpool voru samt líklegri.

Suso kom inná fyrir Borini og hálfleik og Paul Scholes kom inná fyrir arfaslakan Nani. Suso var fljótur að hafa áhrif og hann stóran þátt í marki Steven Gerrard strax í byrjun hálfleiksins. Ekki ósanngjarnt miðað við gang leiksins.

Rafael jafnaði metin með laglegu skoti með vinstri eftir krafs í vítateig Liverpool. Seinni hálfleikurinn var fjörugur og erfitt var að sjá að Liverpool væru manni fleiri en liðið lék vel í dag.

Raheem Sterling einhver áhugaverðasti ungi leikmaðurinn í deildinni var tekinn útaf fyrir Jordan Henderson og við það minnkaði álagið á Evra sem virkilega þarf að fara sýna lit.

Draga fór til tíðinda þegar Antonio Valencia átti hörkusprett upp að marki Liverpool og virtist vera tekinn niður af Glen Johnson og vítaspyrna dæmd, frekar harður dómur að mínu mati. Daniel Agger var borinn af velli og Jamie Carragher kom inná í hans stað. Robin van Persie stillti boltanum upp og beið í tæpar 4 mínútur eftir að taka spyrnuna, van Persie skoraði örugglega en Reina var ekki langt frá að verja.

Javier Hernández kom inná fyrir Shinji Kagawa á 81. mínútu og van Persie átti skrautlega tæklingu skömmu síðar og fékk gult spjald að launum.

Liverpool missti svo Martin Kelly af velli vegna meiðsla og þurfti því að spila lokamínúturnar 2 færri.

Danny Welbeck kom inná fyrir Rafael undir restina vegna meiðsla og ljóst að Ferguson vildi ekki taka neina áhættu með Brassann.

Fleiri mörk voru ekki skoruð og fyrsti sigur Man Utd á Anfield síðan 2007 staðreynd.

Helstu atvik:

Jonjo Shelvey rautt spjald 39′

Steven Gerrard skorar 46′

Rafael skorar 51′

Robin van Persie skorar 81′

Nokkrir punktar:

  • Nani átti sinn daprasta leik í dag sem ég man eftir.
  • Evra átti í miklum vandræðum með hinn unga og spræka Sterling.
  • Fengum 3 vítaspyrnuna á einhverjum 26 árum á Anfield.
  • Við skoruðum úr VÍTI (lesist tvisvar)
  • Lindegaard var traustur en þetta Liverpool lið hefði líka hentað David de Gea vel þar sem Andy Carroll er kominn í annað póstnúmer.
  • Rafael hefur skorað 3 mörk fyrir United en ekkert með hægri fótnum.
  • Evra og Suarez tókust í hendur (hverjum er ekki sama?)
  • Tæklingin frá Shelvey var ljót en brottvísunin opnaði leikinn og bæði lið urðu aðeins sprækari. Hann á samt seint eftir að gleyma þessum leik þó hann vilji það sjálfsagt.
  • Liverpool voru óheppnir að fá ekki víti og hefðu sennilega fengið það ef þetta hefði verið einhver annar en Suarez.

Það er alltaf gaman að vinna Liverpool og hvað þá á Anfield, í þetta skiptið þurftum við ekki John O’Shea til að pota’num.

Þetta Liverpool hlýtur að fara vinna leiki ef þeir spila eins og þeir gerðu í dag.
Manchester Utd hafa oft spilað betur í dag og erfitt var að sjá að þeir væru einum fleiri síðustu 50 mínúturnar af leiknum.

Næsta verkefni er Carling bikarinn gegn Newcastle á miðvikudaginn og við viljum klárlega fá betri spilamennsku í honum heldur en við fengum í dag.

Hver var að ykkar mati maður leiksins?

Enska úrvalsdeildin

Liðið gegn Liverpool

skrifaði þann | 13 ummæli

Byrjunarliðin eru eftirfarandi:

Lindegaard

Rafael Ferdinand Evans Evra

Carrick Giggs

Valencia Kagawa Nani

van Persie

 

Bekkur: De Gea, Anderson, Chicharito, Welbeck, Scholes, Cleverley, Büttner

Vidic er ekki með líklega vegna meiðsla.

Liverpool:

Reina

Kelly Skrtel Agger Johnson

Gerrard Allen Shelvey

Borini Suarez Sterling

Enska úrvalsdeildin

Liverpool á morgun

skrifaði þann | 6 ummæli

Þá er komið að fyrri slag þessara fornu fjanda. Liðin hafa byrjað þetta tímabil mjög ólíkt. Á meðan United voru slakir í fyrsta leik en hafa svo unnið fjóra leiki í röð ef að fyrsti leikurinn í meistaradeildini er tekinn með, þá hafa Liverpool átt sína verstu byrjun í um 100 ár. Svo hefur Manchester Utd ekki unnið á Anfield síðan 2007. En eins og oft áður þegar þessi lið mætast þá skiptir tölfræðin ekki alltaf máli. Leikurinn hefst klukkan 12:30.

Samkvæmt Sir Alex þá verður Wayne Rooney ekki í hópnum sem fer til Liverpool, hann er byrjaður að æfa á fullu og verður vonandi tilbúinn í næstu viku, á meðan þurfum við að bíða 2-3 vikur eftir að Ashley Young verði klár í slaginn. Ég held að David de Gea muni pottþétt byrja þennan leik eftir frábæra frammistöðu gegn Galatasaray á miðvikudaginn. Ferdinand verður líklega aftur í liðinu eftir að hafa verið hvíldur í sama leik. Margir vilja eflaust sjá Büttner í vinstri bakverðinum en mig grunar að Evra muni spila. Scholes verður líklega á bekknum eftir að hafa spilað 80 mínútur á miðvikudaginn, Cleverley verður pottþétt á miðjunni með Carrick og sóknarlínan verður sennilega óbreytt frá síðustu leikjum. Annars er alltaf möguleiki að Fergie muni komi á óvart með liðsvali og þá gæti Welbeck byrjað í stað Nani.

Líklegt byrjunarlið Man Utd

De Gea

Rafael Vidic Ferdinand Evra

Cleverley Carrick

Valencia Kagawa Nani/Welbeck

van Persie

 

Staða Liverpool er svolítið í sérstök í ljósi þess að liðið hefur alls ekki verið að spila illa í deildinni en þeirra helsti höfuðverkur er sá að þeir skora ekki mörk. Þeir eru ansi fáir framherjarnir í liðinu eða strangt til tekið tveir, og annar þeirra spilar á kantinum og hinn er Luis Suarez, sem virðist oftar en ekki gjörsamlega fyrirmunað að skora. Steven Gerrard hefur undanfarin ár verið lukkudýr Liverpool og hefur margoft komið liðinu til bjargar þegar hefur þörf hefur verið á. En með tilkomu Brendan Rodgers þá hefur Liverpool tekið upp nýjan spilstíl, svokallað tiki-taka sem flestir ættu að kannast með sem fylgst hafa með Barcelona og spænska landsliðinu undanfarin ár, Swansea spilaði þetta líka á síðustu leiktíð og skemmtu mörgum með skemmtilegu og hröðu spili. Gerrard hefur ekki ennþá fundið sig í nýja kerfinu og hefur ótrúlegt en satt í nokkrum leikjum verið slakasti leikmaður liðsins.

Líklegt byrjunarlið Liverpool:

Reina

Kelly Skrtel Agger Johnson

Shelvey Gerrard Allen

Borini Suarez Sterling

Þess má til gamans geta að Tryggvi Páll einn af ritstjórum síðunnar mun taka þátt í hringborðsspjall ásamt Kristjáni Atla af Kop.is á útvarpsþætti Fótbolta.net á X-inu í dag klukkan 13.15. Hvet alla til að hlusta á það.

PS: Opið bréf Ferguson til United aðdáenda.

 

Mótherji mælir Viðtöl

Mótherjinn mælir: Kristján af kop.is

skrifaði þann | 15 ummæli

Það verður vonandi reglulegur viðburður hér fyrir stórleiki að fá stuðningsmann mótherjanna til að segja okkur aðeins frá liðinu sínu frá sínum sjónarhóli svo við getum aðeins kynnst þeim betur. Stórleikirnir gerast ekki stærri en leikurinn á sunnudaginn og það er við hæfi að fá fótboltabloggara sem er hokinn af reynslu sem fyrsta gest okkar hér.

Við bjóðum velkominn í heimsókn Kristján Atla Ragnarsson frá kop.is

Hvernig er almennt álit Liverpool stuðningsmanna á Brendan Rodgers?
Er hann rétti maðurinn í starfið?
Það er of snemmt að segja. Mönnum líst almennt mjög vel á hann; Swansea spiluðu flottan bolta á síðustu leiktíð og hann hefur sagt allt það rétta síðan hann tók við Liverpool. Hann kemur mjög vel fyrir. Hins vegar var sumarglugginn hálfgert klúður og það er erfitt að fylkja sér á bak við knattspyrnustjóra sem segir allt það rétta þegar hann hefur ekki unnið leik í fyrstu fjórum umferðunum. Ég skal svara þér um jólin.

Hvað þyrfti Liverpool að gera til þess að þú yrðir ánægður með þetta tímabil?
Hvar endar Liverpool í deild?
Mín von í upphafi tímabils var að liðið myndi bæta sig frá síðustu leiktíð og berjast um Meistaradeildarsæti. Hins vegar er leikmannahópurinn svo þunnskipaður að það þurfa nánast allir aðalliðsmenn að spila framar vonum og enginn þeirra má meiðast til að þær vonir standist. Og miðað við byrjun tímabilsins og þá ömurlegu staðreynd að Lucas Leiva sé þegar búinn að meiðast í 2-3 mánuði er ég nánast þegar búinn að gefa upp vonina. Í dag kæmi mér þægilega á óvart ef liðið næði Evrópusæti.

Hverjir verða meistarar?
Manchester City stigu stóra skrefið á síðustu leiktíð og verða illviðráðanlegir í vetur. United hafa reynsluna og Chelsea virka feykisterkir í upphafi móts en ég held að breiddin hjá City segi sitt. Ég verð hissa ef þeir verja ekki titilinn í ár, þótt ég búist við að Chelsea og United muni pressa þá alla leið að venju.

Hverjir eru mikilvægustu leikmenn Liverpool?
Lucas Leiva og Luis Suarez. Ef sá fyrrnefndi er ekki með stórsér á allri spilamennsku liðsins og ef sá síðarnefndi skorar ekki mörkin í vetur gerir það enginn. Í alvöru, hafið þið séð sóknarlínuna okkar? Suarez er helmingurinn af henni og hinn helmingurinn er að spila fyrir West Ham.

Hver er helsti veikleiki Liverpool-liðsins?
Sóknin, aftur. Ef Suarez skorar ekki mörkin gerir það enginn. Liðið skoraði aðeins 47 mörk í deildinni á síðustu leiktíð og veikti sóknarlínuna frekar en að styrkja hana í sumar. Lið sem skora ekki mörk ná ekki árangri.

Hvað þurfa leikmenn Liverpool að hafa mest í huga er þegar þeir mæta United?
Hvar er United hættulegast?
Robin Van Persie er augljóst svar, hann er heitasti framherji heims utan Spánar í dag og hann kálaði Liverpool á Anfield með ótrúlegri tvennu á síðustu leiktíð. Hins vegar er ég einnig logandi hræddur við Shinji Kagawa. Ég fylgdist vel með honum hjá Dortmund sl. tvö ár og miðað við hvernig Santi Cazorla fór með vörn Liverpool fyrir rúmum tveimur vikum ætti Kagawa að geta leikið sama leik ef hann fær tækifæri til. Liverpool verður að þagga niður í þessum tveimur til að eiga séns.

Hvaða veikleika telur þú United hafa sem Liverpool gæti nýtt sér?
Ég myndi segja að vörn United sé ekki sú sterkasta sem þeir hafa átt en þar mætir veikileiki United, vörnin, veikleika Liverpool, sókninni. Hins vegar hefur United annan veikleika sem aðdáandi United ræddi í podcast-þætti TheAnfieldWrap.com sl. mánudag, þ.e. að United virðist hafa nálgast Anfield af ákveðinni hræðslu síðustu ár. United virðist spila þessa leiki upp á jafntefli í stað þess að ráðast á Liverpool og ef þeir gera það núna eru þeir að bjóða hættunni heim. United er með sterkara liðið í dag og ég vona því að þeir sýni áfram sömu varkárni og undanfarin ár. Ef þeir ráðast að Liverpool eru mínir menn í vandræðum.

Ef þú gætir fengið einn leikmann frá United til Liverpool, hvern myndir þú velja?
Robin Van Persie. MÖRK ÓSKAST!

Hvernig myndir þú stilla Liverpool-liðinu upp fyrir leikinn?
Sterkasta lið Liverpool er nokkuð sjálfvalið þessa dagana og ég sé lítið sem breytir því, sérstaklega á meðan Lucas er meiddur. Pepe Reina verður í markinu, Johnson, Skrtel, Agger og Enrique verða í vörn, Allen, Gerrard og annað hvort Sahin eða Shelvey á miðjunni og Suarez, Borini og hinn ungi Sterling verða frammi. Ég vona að Nuri Sahin verði klár í þennan leik og ég vona að Rodgers hætti að prófa Glen Johnson í vinstri bakverði á kostnað Jose Enrique.

Hverju eiga United menn helst að taka eftir í leik Liverpool? Hvaða leikmanni/taktík?
Joe Allen. Hann er að spila langbest af okkar mönnum enda sá sem fylgdi Rodgers yfir frá Swansea og þekkir spilamennsku hans best. Aðrir leikmenn eiga í vandræðum í upphafi tímabils með að aðlagast nýjum leikstíl og Allen hefur staðið höfuð og herðar yfir aðra leikmenn liðsins hingað til, þrátt fyrir smæð. Auðvitað má líka benda mönnum á að fylgjast með hinum 17 ára Raheem Sterling sem hefur reynt fleiri „einvígi“ (þ.e. að sóla andstæðing) en nokkur annar leikmaður í deildinni hingað til.

Þín spá fyrir leikinn?
Suarez og Evra takast ekki í hendur og allt verður vitlaust … utan vallar. Eða þá að Evra verður á bekknum og Buttner í byrjunarliðinu. Get ég pantað það, plís? Allavega, leikurinn endar í jafntefli sem hentar báðum liðum ágætlega vel.

Hver er uppáhaldsleikur Liverpool og United sem þú hefur séð?
Ég hef þrisvar sinnum séð leiki þessara liða á Anfield og United hefur unnið þá alla. Ég hef svarið þess eið að fara aldrei, aldrei, aldrei aftur á leiki við United og ég mun fara í gröfina pirraður yfir John O’Shea-markinu vorið 2007. Hins vegar fór 1-4 sigurinn 2009 langt með að bæta mér þessa þrjá leiki upp. Það er og verður uppáhalds leikurinn minn um ókomna tíð grunar mig, enda ekki oft sem Liverpool vinnur svo stóran sigur á Old Trafford. ANDREA DOSSENA!

Nú erum við hér uppi á Íslandi ekki eins beintengdir í óvildina milli stuðningsmanna úti, en finnst þér aukin illindi milli stuðningsmanna síðasta tímabil hafa skilað sér upp á skerið?
Já. Því miður. Ég á nokkra bestu vini sem halda með United og það hefur verið þögult samkomulag okkar á milli að ræða Suarez/Evra-málið aldrei. Það þýðir bara ekkert. Hafi verið rígur þarna á milli í mörg ár er þar núna bara tilefni til rifrildis því Suarez og Evra bera nánast alltaf á góma og þá fer fólk að rífast. Ég veit ekki hversu langan tíma það tekur að hætta að rífast yfir þeirra máli, sennilega róast það ekki aftur fyrr en þeir eru báðir hættir að spila með sínum liðum. Þannig að ef þið væruð til í að selja Evra strax í janúar væri það vel þegið og myndi strax byrja að græða sárin :-)

Við þökkum Kristjáni Atla kærlega fyrir og vonum að þið hafið haft gaman af þessari innsýn í hugarheim Liverpool manna.