Rauðu djöflarnir

Leikmenn

Ángelo Henríquez er orðinn Manchester United leikmaður

skrifaði þann | 2 ummæli

Ángelo Henríquez ásamt Sir Alex Ferguson

Þá eru félagsskipti Ángelo Henríquez frá Universidad de Chile til Manchester United loksins formlega frágengin. Nokkuð er síðan að Henríquez fékk atvinnuleyfi á Englandi og er hann því núna United leikmaður. Henríquez mun leika í treyju nr.21 í vetur. Kaupverðið var ekki gefið upp en er talið vera í kringum 4 milljónir punda.

Henríquez er fæddur 13.apríl 1994 í Santiago, Chile. Hann er uppalinn hjá Universidad og spilaði 17 deildarleiki fyrir þá og skoraði 11 mörk. Hann hefur leikið með öllum yngri landsliðum Chile, samtals 18 leiki og skorað 21 mark. Þess má til gamans að geta að hann skoraði 14 mörk í 9 leikjum með U-20 ára liði Chile.

Sir Alex segist hafa fylgst með leikmanninum frá því hann var 14 ára og þegar hann varð 18 ára þá vissi hann að við gætum fengið hann. Samkvæmt Fergie þá er hann snöggur, sterkur og góður slúttari miðað við aldur.

Ekki er ólíklegt að Ángelo Henríquez muni koma eitthvað við sögu þetta tímabil.

Fantasy deildin

Fréttir út Fantasy deildinni

skrifaði þann | 6 ummæli

Ljón á veginum…með bolta.

Það er rífandi gangur í Fantasy deildinni okkar en 191 einstaklingar hafa nú þegar skráð sig til leiks og 15 munu svo bætast í hópinn í næstu umferð. Við viljum endilega fá sem flesta til að taka þátt þannig að ef þið eruð ekki búin að skrá ykkur í deildina, endilega gerið það með því að nota númerið 45375-320165.

Robin van Persie var augljóslega besti leikmaður Man Utd í síðustu umferð með því að setja þrennu gegn Southampton. Fyrir það hlaut hann 15 stig, 12 stig fyrir mörkin og 3 bónus stig fyrir að vera besti leikmaður liðsins í leiknum. Hann fékk reyndar 2 stig í viðbót fyrir að spila 90 mínútur en þeim stigum tapaði hann fyrir að misnota vítið. Valencia og Ferdinand komu næstir í stigasöfnun, báðir með 5 stig, Nani var með 4 stig og aðrir leikmenn minna. Van Persie er nú atkvæðamestur United manna heilt yfir með 25 stig, Kagawa er næstur með 11 stig og svo koma þeir Rafael og Evra báðir með 10 stig.

Það voru tveir einstaklingar sem söfnuðu flestum stigunum þessa vikuna, báðir með 91 stig fyrir þriðju umferð. Það voru þeir Óskar Guðbrandsson með lið sitt RooneyVanPersie (11 sæti) og Sigurður Sigurjónsson með FC Grettir (13 sæti). Grunnurinn að góðum árangri þeirra var að hafa bæði Van Persie og Carols Tevez í framlínunni, og vera svo með annan þeirra sem fyrirliða.

Sá sem leiðir þó deildina okkar samanlagt eftir fyrstu 3 umferðirnar er Davíð Snær Ágústsson með lið sitt Basalt, en hann hefur hnoðað saman heil 262 stig sem er meðaltal upp á rúm 87 per umferð. Davíð var reyndar jafn Gunnlaugi Baldurssyni eftir síðustu umferð, en Gunnlaugur féll niður í 2 sætið eftir að hafa skorað 66 stig í 3 umferð á meðan Davíð Snær tók 78 stig.

Að lokum er afskaplega mikilvægt að taka það fram að af meðlimum ritstjórnar Rauðu Djöflanna er undirritaður efstur á töflunni, eða í 17 sæti. Þó svo ég hafi nú ekki miklar áhyggjur af samkeppninni þar á bæ, þá verð ég að nefna að Björn Friðgeir er svo sem ekki langt undan, aðeins þremur stigum.

Hér má sjá efstu tíu liðin í deildinni að loknum þremur umferðum:

 

Leikmenn Meistaradeild Evrópu

Meistaradeildarhópurinn

skrifaði þann | 13 ummæli

Markmenn:  1. David de Gea, 13. Anders Lindegaard, 50. Sam Johnstone

Varnarmenn: 2. Rafael, 3. Patrice Evra, 4. Phil Jones, 5. Rio Ferdinand. 6. Jonny Evans, 12. Chris Smalling, 15. Nemanja Vidic
28. Alexander Büttner, 36. Marnick Vermijl, 38. Michael Keane

Miðjumenn: 7. Antonio Valencia, 8. Anderson, 11. Ryan Giggs, 16. Michael Carrick, 17. Nani, 18. Ashley Young, 22. Paul Scholes,
23. Tom Cleverley, 24. Darren Fletcher, 25. Nick Powell, 34. Larnell Cole, 35. Jesse Lingaard, 46. Ryan Tunnicliffe

Sóknarmenn: 10. Wayne Rooney, 14. Javier Hernández, 19. Danny Welbeck, 20. Robin van Persie, 26. Shinji Kagawa, 27. Federico Macheda, 41. Joshua King

Skáletraðir eru svonefndir b-lista leikmenn, sem eru leikmenn fæddir eftir 1.janúar 1991 og hafa verið „eligable“ til að spila fyrir klúbbinn síðustu 2 ár. Sem þýðir að fleiri leikmenn en þeir sem eru á þessum lista munu koma til greina til að spila fyrir okkur í Meistaradeildinni, t.d. Scott Wootton, Robbie Brady o.fl sem komu við sögu á undirbúningstímabilinu.

Opin umræða

Fréttir í landsleikjahléi

skrifaði þann | 6 ummæli

Íslendingar vona að King slái ekki of í gegn á föstudaginn

Það getur hafa verið misráðið að opna svona rétt fyrir landsleikjahlé, en það verður að venjast eins og annað.

Lítið að frétta af okkar mönnum, engin opin bréf og svona þannig að við minnumst á það helst að Joshua King, leikmaður varaliðsins er í Noregshópnum sem kemur til Íslands í vikunni. King hefur verið á láni hér og þar, var hjá Borussia Mönchengladbach og Hull í fyrra, spilaði lítið hjá ‘Gladbach en nokkuð hjá Hull, helst á kantinum og skv viðtali við hann í Verdens Gang í morgun tekur hann það fram fyrir að spila frammi. Þetta val King í landsliðið kemur á óvart í Noregi en Egil Olsen er að yngja allverulega  upp í landsliðinu.

Dimitar Berbatov hefur kvatt United en hann kvaddi ekki Sir Alex, og lætur hafa eftir sér að hann hafi misst virðingu að hluta fyrir Sir Alex eftir að hann var ekki látinn spila en samt sífellt sagt að hann væri mikilvægur leikmaður og mætti ekki fara. Að vissu leyti skiljanlegt viðhorf, og líklega rétt sem Dimitar segir að hann hefði átt að fara eftir að hafa verið settur út úr hópnum fyrir úrslitaleikinn í Meistaradeildinni í fyrravor.

Annars er orðið laust.

Opin umræða Slúður

Ronaldo heim? – Opin umræða

skrifaði þann | 46 ummæli

Ronaldo fagnaði ekki 150 Real markinu

Framundan er tveggja vikna landsleikjahlé þannig að vonandi verða litlar fréttir af United mönnum á meðan, eina sem við viljum er að allir komist meiðslalausir í gegnum þetta. En við munum flytja fréttir af gengi okkar manna, sem og aðrar greinar á hverjum degi til að reyna að stytta okkur öllum stundir.

Meginslúðrið í gærkvöld kom hins vegar frá Madid þar sem hinn gamli vinur okkar, Cristiano Ronaldo, fagnaði hvorugu marki sínu í leik Real og skv fregnum á hann að hafa grátið í klefanum eftir leik. Eftir leikinn sagði hann fréttamönnum að hann væri leiður og það væri atvinnutengt frekar en einkamál og þess vegna gæti hann ekki fagnað mörkum. Einni sagði hann að klúbburinn (Real Madrid) vissi hvers vegna hann væri leiður.

Það er ekki að sökum að spyrja að slúðurmaskínur hafa farið í kraftdrif við þetta að velta fyrir sér hvort Ronaldo sé á leiðinni í burtu frá Madrid. Tímasetningin gæti auðvitað ekki verið verri, tveim dögum eftir að lokað var á leikmannaskipti. Ég held að það hljóti hver einasti United stuðningsmaður að láta sig dreyma um að Ronaldo komi aftur heim, og þá er ég ekki að tala um Madeira. Köld rökhyggja segir okkur þó að þetta séu líklegast bara draumar, jafnvel þó þetta sé það alvarleg óánægja hjá honum til að hann fari frá Real. Ólíklegt er að við getum reitt fram kaupverðið fyrir hann, og líklega ekki nógu há laun. Enda hafa menn sem velt hafa upp mögulegum næsta áfangastað hans velt upp tveim möguleikum: PSG og, og Cantona forði því, Manchester City.

En þetta er opin umræða, ræðið Ronaldo eða annað slúður helgarinnar (vinsamlega haldið umræðu um leikinn í gær í þræðinum við leikskýrsluna)