Rauðu djöflarnir

Opin umræða

Fréttir í landsleikjahléi

skrifaði þann | 6 ummæli

Íslendingar vona að King slái ekki of í gegn á föstudaginn

Það getur hafa verið misráðið að opna svona rétt fyrir landsleikjahlé, en það verður að venjast eins og annað.

Lítið að frétta af okkar mönnum, engin opin bréf og svona þannig að við minnumst á það helst að Joshua King, leikmaður varaliðsins er í Noregshópnum sem kemur til Íslands í vikunni. King hefur verið á láni hér og þar, var hjá Borussia Mönchengladbach og Hull í fyrra, spilaði lítið hjá ‘Gladbach en nokkuð hjá Hull, helst á kantinum og skv viðtali við hann í Verdens Gang í morgun tekur hann það fram fyrir að spila frammi. Þetta val King í landsliðið kemur á óvart í Noregi en Egil Olsen er að yngja allverulega  upp í landsliðinu.

Dimitar Berbatov hefur kvatt United en hann kvaddi ekki Sir Alex, og lætur hafa eftir sér að hann hafi misst virðingu að hluta fyrir Sir Alex eftir að hann var ekki látinn spila en samt sífellt sagt að hann væri mikilvægur leikmaður og mætti ekki fara. Að vissu leyti skiljanlegt viðhorf, og líklega rétt sem Dimitar segir að hann hefði átt að fara eftir að hafa verið settur út úr hópnum fyrir úrslitaleikinn í Meistaradeildinni í fyrravor.

Annars er orðið laust.

Opin umræða Slúður

Ronaldo heim? – Opin umræða

skrifaði þann | 46 ummæli

Ronaldo fagnaði ekki 150 Real markinu

Framundan er tveggja vikna landsleikjahlé þannig að vonandi verða litlar fréttir af United mönnum á meðan, eina sem við viljum er að allir komist meiðslalausir í gegnum þetta. En við munum flytja fréttir af gengi okkar manna, sem og aðrar greinar á hverjum degi til að reyna að stytta okkur öllum stundir.

Meginslúðrið í gærkvöld kom hins vegar frá Madid þar sem hinn gamli vinur okkar, Cristiano Ronaldo, fagnaði hvorugu marki sínu í leik Real og skv fregnum á hann að hafa grátið í klefanum eftir leik. Eftir leikinn sagði hann fréttamönnum að hann væri leiður og það væri atvinnutengt frekar en einkamál og þess vegna gæti hann ekki fagnað mörkum. Einni sagði hann að klúbburinn (Real Madrid) vissi hvers vegna hann væri leiður.

Það er ekki að sökum að spyrja að slúðurmaskínur hafa farið í kraftdrif við þetta að velta fyrir sér hvort Ronaldo sé á leiðinni í burtu frá Madrid. Tímasetningin gæti auðvitað ekki verið verri, tveim dögum eftir að lokað var á leikmannaskipti. Ég held að það hljóti hver einasti United stuðningsmaður að láta sig dreyma um að Ronaldo komi aftur heim, og þá er ég ekki að tala um Madeira. Köld rökhyggja segir okkur þó að þetta séu líklegast bara draumar, jafnvel þó þetta sé það alvarleg óánægja hjá honum til að hann fari frá Real. Ólíklegt er að við getum reitt fram kaupverðið fyrir hann, og líklega ekki nógu há laun. Enda hafa menn sem velt hafa upp mögulegum næsta áfangastað hans velt upp tveim möguleikum: PSG og, og Cantona forði því, Manchester City.

En þetta er opin umræða, ræðið Ronaldo eða annað slúður helgarinnar (vinsamlega haldið umræðu um leikinn í gær í þræðinum við leikskýrsluna)

Enska úrvalsdeildin

Southampton 2:3 Manchester United

skrifaði þann | 31 ummæli

Það væri ekki United ef ekki væri einhver óvænt í uppstillingunni. Ferdinand kominn aftur og þeir Vidic léku saman í fyrsta skipti síðan í desember.

Welbeck inn á kantinn kom ekki sérstaklega á óvart, en það sem kom á óvart var að de Gea var refsað fyrir mistökin sem leiddu til seinna marks Fulham um daginn, mistök sem voru reyndar klárt sóknarbrot fannst mér.

Lindegaard

Rafael Ferdinand Vidic Evra

Cleverley Carrick

Valencia Kagawa Welbeck

Van Persie

United byrjuðu mjög vel og sóttu frá fyrstu mínútu, Van Persie fékk frábæra sendingu frá Carrick sem hann þurfti að taka á lofti og skaut framhjá, en annars sköpuðu United menn ekki færi fyrstu 10 mínúturnar, þrátt fyrir gott spil. Southampton kom síðan betur inn í leikinn, náðu upp góðu spili og skoruðu á 16. mínútu, náðu boltanum af Kagawa, spiluðu vel upp og náðu góðri fyrirgjöf yfir á fjærstöng þar sem Lambert stökk hátt yfir Rafael og skallaði inn, óverjandi fyrir Lindegaard. United komst strax aftur inn í leikinn og jafnaði nákvæmlega 7 mínútum eftir mark Southampton, og ekki alveg ólíkt mark. Góð sókn United endaði úti á kanti hjá Valencia, falleg sending þvert yfir á fjærstöng, Clyne bakvörður Southampton féll við og Van Persie var alveg frír og hafði nægan tíma til að taka boltann niður og smella honum í netið af stuttu færi.

Eftir markið sveiflaðist leikurinn fram og til baka, hvortu lið var að skapa sér mikið og Southampton var síst minna með boltann. Þó var alltaf meiri ógnun í leik United. Kagawa var út um allt, Welbeck var meira inn á miðjunni en búast mætti við m.v. liðsuppstillinguna og Carrick og Cleverly stjórnuðu á miðjunni. Það var þó eins og vantaði að stöðva Southampton betur á miðjunni. Besta færið það sem eftir var hálfleiksins kom þegar fimm mínútur voru eftir Evra fékk frían skalla á fjærstöng en Davis varði nokkuð vel. Rétt fyrir hálfleik kom enn ein sendingin frá Carrick inn á Van Persie, en hann vantaði Berbatouchið og fékk hann í legghlífina í staðinn og missti hann frá sér.

1-1 í hálfleik og ekki ósanngjarnt. United voru jú að spila betur en Southampton gaf litið eftir og átti of góða kafla. Einföld spilamennska hjá þeim var að gefa árangur. Hjá United vantaði helst að taka aðeins betur á þeim á miðjunni og hleypa þeim ekki eins innað teig. Vinstri kanturinn hjá okkur var ósýnilegur, Welbeck of langt inni á miðjunni og þó Evra kæmi upp var það ekki nóg til að gefa möguleika þeim megin. Valencia, Kagawa og Van Persie voru að spila mjög vel saman en vantaði að komast í gegnum vörnina.

Í seinni hálfleik byrjuðu United ekki mjög vel en Kagawa átti þó gott skot rétt framhjá og síðan fékk Van Persie góða fyrirgjöf í miðjum teignum ens kaut framhjá.

Southampton komst síðan aftur yfir á 55. mínútu. Sóttu upp, fyrirgjöfin kom há inn á teiginn og Evra rann beint á hausinn þannig að Schneiderlin hafði allan tímann í heiminum til að skalla framhjá Lindegaard. Skelfileg mistök Evra.

Þrem mínútum síðar komst Puncheon í gott færi þegar hann fór auðveldlega framhjá Evra en Lindegaard varði vel í horn. Southampton voru bara miklu meira með boltann eftir þetta og komust hvað eftir annað í sókn.

Skiptingar komu á 61. mínútu, Scholes og Nani inn fyrir Cleverly og Kagawa. Hefði nú frekar tekið Welbeck útaf. Rétt á eftir komst Van Persie í færi eftir góða sendingu Scholes, en Davis varði vel og enginn var í annarri bylgjunni.

Breytingarnar virtust samt lítið gera fyrir United fyrr en við fengum víti á 68.mínútu. Nani komst inn í sendingu, lék upp í teig, lagði fyrir á Van Persie sem var strauaður niður. Van Persie tók víti, vippaði til annarar hliðar og Davis varði. Arfaslakt víti og leit enn ver út í endursýningu, Davis fór snemma af stað en Van Persie setti hann samt í hornið.

Síðasta skiptingin komi rétt eftir vítið, Hernandez inn fyrir Welbeck og United skipti alveg yfir í 4-4-2. Southampton bakkaði alveg aftur í teig og leyfði United að hafa boltann og reyndu síðan skyndisóknir á móti. Það virtist ekkert vera að gerast fyrr en á 87. mínútu þegar Rafael kom upp, gaf fyrir, Ferdinand var enn að hanga frammi eftir horn rétt áður, skallaði að marki og Van Persie setti hann inn af 3 metrum. Southampton setti í yfirgír í 2 mínútur, pressaði mikið en þegar 91 mínúta og 10 sekúndur voru liðnar tók Nani horn frá vinstri og Van Persie var gjörsamlega óvaldaður á markteig við nærstöng og hamarskallaði inn.

Það þarf ekkert að fara fögrum orðum um þetta. Þetta var hreinn og klár þjófnaður framkvæmdur af stórfenglegum striker. Ekki minna ótrúlegt fyrir það að við skoruðum úr horni. Samspilið var skelfilegt og baráttan á miðjunni tapaðist algerlega. Það er ekki nokkur leið að Evra eigi skilið að vera í liðinu í næsta leik og það eru verulegar áhyggjur að við getum ekki stöðvað sóknir framar á vellinum.

Southampton spilaði þennan leik mjög vel, setti upp strategíu sem gaf ríkulega af sér þangað til Van Persie ákvað að taka þetta að sér.

Maður leiksins? Robin van Persie. Takk. Þó hann hafi sagt að Paul Scholes hafi verið það. Sýndi nákvæmlega hvers vegna við keyptum hann.

Enska úrvalsdeildin

Liðið gegn Southampton

skrifaði þann | 36 ummæli

Liðið gegn Southampton er komið og lítur svona út:

Lindegaard

Rafael Ferdinand Vidic Evra

Cleverley Carrick

Valencia Kagawa Welbeck

Van Persie

Kemur verulega á óvart að sjá Rio þarna! Welbeck á kantinum kemur minna á óvart. Svo er bara vonandi að það sé bara verið að hvíla de Gea frekar en það séu meiðsli hjá honum

Viðbót: Bekkurinn: Giggs, Powell, Scholes, Evans, Nani og Chicharito

Lið Southampton K. Davis, Clyne, Fonte, Hooiveld, Fox, Ward-Prowse, Schneiderlin, S. Davis, Puncheon, Lallana, Lambert

Hér má líka ræða gang leiksins jafnóðum

Enska úrvalsdeildin

Southampton á morgun

skrifaði þann | 32 ummæli

Southampton - Manchester United
United í heimsókn á St Mary’s

Eftir hálfbrösuglega byrjun Manchester United koma þær góðu fréttir að Jonny Evans er orðinn heill, og því þurfum við ekki lengur að þola að besti miðjumaðurinn okkar sé í miðverðinum. Evans lék allan leik U-21 árs liðsins í vikunni og er tilbúinn í slaginn á morgun. Rio Ferdinand og Phil Jones eru byrjaðir að æfa þó þeir séu ekki enn leikhæfir þannig að vonandi er varnarlínan að komast í fullan styrkleika. Ashley Young er hins vegar frá vegna meiðsla sem og auðvitað Rooney, en síðustu fréttir herma að hann verði kominn til baka eftir um mánuð, sem má teljast þokkalega sloppið.

Voetbal International í Hollandi var í gær að halda því fram að Büttner yrði í byrjunarliði, en ég ætla ekki að hlusta á það og spái liðinu okkar á morgun því svona:

De Gea

Rafael Evans Vidic Evra

Cleverley Carrick

Valencia Kagawa Nani

Van Persie


Það má búast við að á bekknum verði menn á borð við Büttner og jafnvel Nick Powell, og ólíklega spáin í þetta skiptið er að Darren Fletcher verði á bekknum eftir að hafa spilað U-21 árs leikinn í vikunni. Sir Alex segir að Fletcher verði að öllum líkindum í Meistaradeildarhópnum þar sem ekki sé það margir yfir 21 árs í hópnum að hann komist ekki fyrir án þess að ryðja öðrum út.

Á morgun fer United niður á suðurströndina og leikur á St Mary’s í Southampton í fyrsta skipti í deildinni síðan við felldum þá með sigri í síðasta leik vorið 2005.

Southampton er einn af þeim klúbbum sem margir eldri fótboltaáhugamennt líta á sem eitt af þeim liðum sem „eiga heima“ í efstu deild. Þessum áhugamönnum hefur nú orðið að ósk sinni eftir að Southampton komst upp í úrvalsdeildina i vor eftir sjö ára fjarveru. Þeir urðu í öðru sæti í fyrra á fyrsta ári sinu í deildinni eftir að þeir komu beint upp úr League One.

Þessi endurreisn klúbbsins eftir fall í kjölfar gjaldþrots mátti þakka yfirtöku Svisslendingsins Marcus Liebherr. Þrátt fyrir lát hans í fyrra breyttist aðstaða Southampton lítið þar sem erfingjar Liebherr fylgdu óskum hans um framgang klúbbsins. Einnig þykir stjóri Southampton, Nigel Adkins vinna einstaklega vel með mannskapinn

Southampton styrkti sig ekki að ráði í sumar en var nálægt því að gera Manchester City skráveifu í fyrsta leik tímabilsins þegar varamenn þeirra, Ricky Lambert, markakóngur Championship síðasta vetur og Steven Davies komu Southampton 2-1 yfir, áður en City kláraði leikinn 3-2. Tap gegn Wigan í síðasta leik 2-0 gefur þó til kynna að Southampton muni eiga erfitt uppdráttar í vetur.

Á lokadegi leikmannagluggans gengu Dýrlingarnir þó frá einum skemmtilegustu kaupum gluggans þegar þeir keyptu Úrúgvæann Gastón Ramírez frá Bologna. Ramírez var einn af aðalleikmönnum Úrúgvæ á Ólympíuleikunum í sumar og þykir mikið efni, alhliða miðjumaður. Hann var þó keyptur of seint í gær til að fá leikheimild fyrir leikinn á morgun.

Ásamt Lambert má því ætla að Adam Lallana fyrirliði og Jay Rodriguez sem keyptur var frá Burnley í sumar, séu hættulegustu leikmenn Southampton.
Ein aðvörun: Ekki verða hissa þegar þið sjáið leikinn, Southampton er liðið í Liverpool búningnum. Einhverra hluta vegna ákváðu þeir að hætta að spila í gömlu góðu hvítröndóttu búningunum sínum og fara í staðinn í alrauða búninga.

Þegar litið er á þessi tvö lið eigum við ekkert að velkjast í vafa að um skyldusigur er að ræða. Kagawa og van Persie hafa sýnt hvað þeir geta nú þegar og ásamt Valencia og Nani eiga þeir að leika vörn Southampton, sem er lítið meira en Championship vörn, grátt. En þrátt fyrir það sjáum við að City átti í vandræðum og vitum vel að enska deildin er ekki sú spænska og að vel skipulagt lið getur haldið mun sterkara liði í skefjum. Hvað um það, fyrsta spá mín hér á síðunni verður í bjartsýna kantinum, 3-0 sigur okkar manna.

En það merkilegasta við leikinn er auðvitað sú staðreynd að á morgun stýrir Sir Alex Ferguson United liðinu í þúsundasta skipti í deildarleik. Enn á ný sjáum hversu ótrúlega heppnir við vorum að fá hann til starfa og þökkum fyrir alla sigrana!