Rauðu djöflarnir

Opin umræða

Velkomin á Rauðu djöflana – íslenska Manchester United bloggið

skrifaði þann | 24 ummæli

Rauðu djöflarnir
Rauðu djöflarnir
Kæru United aðdáendur! Nú er komið að því!

Í langan tíma hefur það verið draumur fyrir aðdáendur Manchester United, bloggara og tístara að fá alvöru íslenskt United stuðningsmannablogg. Ónefndur klúbbur, í nágrenni við Manchester, hefur í allnokkur ár haldið úti glimrandi fínu bloggi hér á landi og hafa aðstandendur þess oft varpað þeirri spurningu á United menn hvers vegna þeir séu ekki með sitt eigið blogg.

Fyrir um það bil mánuði síðan var eins og síðasta púslið smylli inn, fimm saman ákváðum við að láta slag standa og erum við núna tilbúnir með þessa síðu. Við hvetjum ykkur heimsækja sem oftast, gefa okkur ykkar álit, vera virk og taka þátt í umræðum og fjörinu með okkur. Við vonum að þið séuð ánægð með þetta framlag og að þessi síða veiti okkur öllum skemmtilegan vettvang til að ræða hluti tengda United.

Við höfum verið að skrifa hér í smá tíma þannig að nú þegar er til góður skammtur af efni til að renna yfir og við munum síðan kappkosta að flytja fréttir hér um leið og þær berast okkur!

Leikmenn Staðfest

Dimitar Berbatov til Fulham (staðfest)

skrifaði þann | 6 ummæli

Dimitar starir bless

31. ágúst 2008 var viðburðaríkur dagur í Manchester. Sheikarnir frá Abu Dhabi keyptu Manchester City, og í æsingnum við að kaupa sterkan leikmann buðu þeir meira að segja 30m punda í Lionel Messi þegar einhver misskildi orð annars um að „things were getting messy“. Þeir buðu líka í Dimitar Berbatov. En Manchester United bauð líka í Dimi og í hans huga kom ekkert annað til greina. Manchester United hafði eytt yfir 20 milljónum punda í leikmann í fyrsta sinn síðan Malcolm Glazer keypti félagið og reyndar í síðasta sinn þangað til Robin van Persie kom til liðsins fyrir tveimur vikum. Verðið var reyndar rúmar 30 milljónir og Berbatov er dýrasti leikmaður í sögu félagsins.

Allt átti þetta sér auðvitað skýringu, félagið vissi á þessum tíma að Ronaldo var búinn að fá loforð um að fá að fara frá félaginu næsta sumar og víst að hann yrði seldur góðu verði.

Það er alveg óhætt að segja að Berbatov hafi skipt stuðningsmönnum United í tvo hópa síðan þá. Sumir dá hann, aðrir líta á hann sem letihaug. Ég skammast mín ekkert fyrir að vera í fyrri hópnum. Fyrsta árið skoraði hann 9 mörk í 31 leik í deild og margir stuðningsmenn voru æfir yfir að Tévez væri látinn fara en ekki Berbatov. Þar litu menn auðvitað alveg framhjá því að það hefði kostað amk 25 milljónir að kaupa Tévez til að vera áfram. En ansi margir voru hrifnari af þindarlausum hlaupum hins síðarnefnda frekar en áreynslulausu spili Berbatov sem byggðist á bestu fyrstu snertingu í heimi og tækni sem var meiri en nokkur sem ég hef séð síðan kóngurinn Cantona var og hét.

Árið eftir töpuðum við deildinni til Chelsea, Berbatov skoraði 12 mörk í deild og var ekki að vinna hug og hjörtu þeirra sem ekki voru hrifnir af honum. En tímabilið 2011-12 ætti að nægja hverjum sem er til að dá Dimitar Berbatov. Hann skoraði 20 mörk í 32 leikjum, var markahæstur í deild (ásamt þessum fyrrnefnda fyrrverandi United leikmanni) og var ein meginástæðan fyrir því að United vann 19. titilinn sinn, titil sem þarf væntanlega ekki að segja neinum sem þetta les hvers vegna er svo mikilvægur okkur.

En í fyrra var ljóst að Sir Alex hafði ákveðið að það sem fyrst og fremst vantaði í leik United væri aukinn hraði, og það þýddi bara eitt. Dagar Dimitars hjá United voru taldir. Engu að síður skoraði hann sjö mörk í tólf deildarleikjum og sagði aldrei eitt styggðaryrði um klúbbinn né Sir Alex. Ótrúlega kurteisleg og virðingarverð framkoma sem er óvenjulegt að sjá frá knattspyrnumanni úti í kuldanum

Í vor var nýtt ákvæði í samningi hans og sá framlengdur um ár, og það var nokkuð ljóst að það væri bara til að United fengi einhvern pening fyrir hann þegar hann færi. Samt virtist enginn hraði á hlutunum, fyrr en síðustu tvo daga að allt fór að gerast og núna er Berbatov Fulham leikmaður. Ég hefði svo miklu heldur viljað sjá hann á Ítalíu í aðeins hægari bolta, þar sem hann væri ólíklegur að gera okkur skráveifu. Og að auki er Fulham búið að spila á Old Trafford nú þegar þannig stuðningsmenn fá ekkert að hylla hann.

Að lokum. Í mínum huga snýst Berbatov ekki um 19. titilinn, markakóngstitil, eða meinta leti. Hann var einfaldlega mesti töframaður sem ég hef lengi séð. Í 99,9% hata ég af einlægni tónlist sem menn velja við fótboltamyndband. Hér kveðjum við sannan meistara með frábæru myndbandi með fullkomlega viðeigandi tónlist.

httpv://www.youtube.com/watch?v=29czY142IpQ

Meistaradeild Evrópu

H-riðill Meistaradeildarinnar

skrifaði þann | 1 ummæli

Það eru fáir vellir sem státa af fjalli sem stúku, eins og Estádio Municipal de Braga.

Eins og alþjóð veit var í dag dregið í riðla Meistaradeildar Evrópu. Að venju var riðillinn okkar í léttari kantinum. Við drógumst gegn Braga frá Portúgal, Galatasaray frá Tyrklandi og CFR Cluj frá Rúmeníu. Þetta eru allt lið sem við ættum að fara í gegnum.

Þó er best að hafa allan vara á eftir reynslu síðasta tímabils þar sem við fengum mjög áþekkan riðil en guldum algjört afhroð. Það eina slæma við þennan riðil er okkar menn þurfa að fara í helst til of löng ferðalög til Tyrklands og Rúmeníu. Þetta hefði þó getað verið verra, eins og andstæðingar okkar í City fengu að kenna á.

Riðilinn lítur þá svona út:

H-riðill

  1. Manchester United
  2. Braga
  3. Galatasaray
  4. CFR Cluj

Braga

Lið Braga er nokkuð lítið lið en er þó líklega með einn flottasta heimavöll Evrópu sem var byggður fyrir EM 2004 sem fór fram í Portúgal. Heitir hann Estádio Municipal de Braga og tekur 30.154 í sæti. Liðið endaði í 3.sæti portúgölsku deildarinnar, 13 stigum frá meisturum Porto. Braga var í potti 2 ásamt liðum eins og City, Valencia og Benfica þrátt fyrir að vera ekki með mikla reynslu í Meistaradeildinni. Ástæðan fyrir því að liðið var svo ofarlega í pottaröðinni er sú að liðið hefur náð góðum árangri í Evrópudeildinni undanfarin ár og komst m.a. í úrslit árið 2011 en tapaði þar fyrir löndum sínum í Porto.

Galatasaray

Lið Galatasaray þekkja flestir enda fornfrægt félag. Liðið er með bækistöðvar í Istanbúl og því gaman fyrir liðsmenn United að fá að kynnast þessari sögulegu borg aðeins betur. Liðið er eitt af stóru liðunum í Tyrklandi og eina liðið sem hefur unnið UEFA-bikarinn, UEFA Super-cup, tyrknesku deildina og tyrkneska bikarinn á sama ári en það gerðist árið 2000. Liðið spilar á flunkunýjum heimavelli, hinum glæsilega Turk Telecom Arena sem tekur alls 52.695 manns í sæti. Ekki amalegt það. Lið í Tyrklandi hafa undanfarin ár verið helst þekkt fyrir að sanka að sér nokkuð þekktum nöfnum sem ekki náðu að meika það í bestu deildum Evrópu. Af núverandi spilurum í röðum Galatasaray af því taginu má nefna leikmenn eins og ruslakarlinn sjálfan Felipe Melo, Liverpool-manninn Alberto Riera og skemmtikraftinn Emanuel Eboue.

CFR Cluj

Fyrir tiltölulega skömmu var CFR Cluj lið sem enginn hafði hugmynd um að væri til. Það er svosem ekki skrýtið enda hafa lið frá höfuðborginni í Bucharest eignað sér rúmensku deildina í gegnum tíðina. Árið 2008 varð CFR Cluj fyrsta liðið í 17 ár utan höfuðborgarinnar til þess að vinna deildartitilinn en sex árum áður hafði liðið verið í rúmensku þriðju deildinni en vísir menn segja reyndar að hún sé ógnarsterk. Árið 2002 komu nýjir eigendur að liðinu og síðan hefur leiðin bara verið upp og hefur liðið unnið alls 8 titla síðan þá, þar af deildina þrisvar. Liðið leikur á heimavelli sem tekur 23.500 manns í sæti og heitir því athyglisverða og þjála nafni Dr. Constantin Radulescu stadium. Það er nú ekki mikið um þekkt nöfn sem spila með liðinu. Ég kannaðist aðeins við nafn Ádám Vass sem spilaði eitt sinn um skamma hríð með Stoke.

Uppfært (BFrB): Leikdagar komnir: 19. sep. Galatasaray (h); 2. okt. Cluj (ú); 23. okt. Braga (h); 7. nóv. Braga (ú); 20. nóv. Galatasaray (ú); 5. des. Cluj (h). Smá fjúkk hér, Leikirnir á eftir heimaleikjunum eru Liverpool (ú), Chelsea (ú) og City (ú). Þannig að sleppa við ferðalög á undan þeim er snilld.

Leikmenn

Fréttir dagsins

skrifaði þann | Engin ummæli

Darren Fletcher spilaði 90 mínútur fyrir U-21 árs lið Manchester Utd í 2-1 sigri á Tottenham í gærkvöldi. Jonny Evans spilaði einnig ásamt nýliðanum Alexander Büttner sem átti stórleik samkvæmt Evans. Daninn Anders Lindegaard varði á köflum meistaralega í markinu. Angelo Henriquez var ekki með í leiknum.

Michael Carrick, Tom Cleverley og Danny Welbeck voru valdir af Roy Hodgson í enska landsliðshópinn. Ashley Young var ekki valinn að þessu sinni né Wayne Rooney sem verður frá næstu vikur vegna meiðsla.

Dimitar Berbatov var í læknisskoðun hjá Fulham í dag og er búist við að hann skrifi undir fyrir lok félagsskiptagluggans. Hans verður sjálfsagt saknað af mörgum en ef af félagsskiptunum verður þá er gott að hafa hann áfram í deildinni.

Meistaradeild Evrópu

Dráttur í Meistaradeild Evrópu í dag

skrifaði þann | 5 ummæli

Moskva, Rússland, 21 maí 2008.

Klukkan 15:45 í dag verður dregið í riðla í Meistaradeild Evrópu. Síðasti vetur var okkar slakasti í sex ár í Meistaradeildinni þannig að held að við séum flest nokkuð bjartsýn á að Man Utd geri a.m.k betur en síðasta vetur. Það eru þó margir mjög sterkir klúbbar sem gætu dregist í riðil með United, þetta gæti því orðið erfiður vetur. Við skulum svo sannarlega vona að við fáum frekar léttan drátt seinni partinn í dag.

Skoðum hvaða möguleika við höfum. Dregið verður eitt lið úr hverjum potti, og myndar það einn riðill. Það getur ekki komið upp sú staða að lið frá sama landi, lendi í sama riðlinum.

Pottur 1

  • Chelsea
  • Barcelona
  • Real Madrid
  • Manchester United
  • Bayern Munich
  • Arsenal
  • Porto
  • AC Milan.

Út frá UEFA stærðfræðinni þá er Arsenal í sterkasta pottinum, en ekki Man City.

Pottur 2

  • Valencia
  • Benfica
  • Shakhtar Donetsk
  • Zenit St Petersburg
  • Schalke
  • Manchester City
  • Braga
  • Dynamo Kiev.

Það er ekki séns að lenda með City, þannig að helst myndi ég vilja sleppa við Benfica, við vitum afskaplega vel hversu sterkir þeir eru. Best væri að fá Braga eða Schalke og sleppa þannig við vetrarferðir til Austur-Evrópu.

Pottur 3

  • Olympiakos
  • Ajax
  • Anderlecht
  • Juventus
  • Paris St Germain
  • Galatasaray
  • Lille
  • Spartak Moscow.

Ekki vitund slakari pottur en númer 2. Hér viljum við alls ekki Juventus og Paris St Germain, þó svo Frakkarnir hafi nú ekki verið sannfærandi í frönsku deildinni undanfarið. Lille, Anderlecht eða Olympiakos takk fyrir.

Pottur 4

  • Borussia Dortmund
  • BATE Borisov
  • Dinamo Zagreb
  • Malaga
  • Montpellier
  • FC Nordsjælland
  • Celtic
  • CFR Cluj.

EKKI DORTMUND TAKK FYRIR! Þó svo Man Utd hafi keypt Kagawa af þeim þá eru Dortmund ógnar sterkir og alls ekki völlur sem við viljum heimsækja. Restin skiptir mig ekki máli svo framarlega sem við fáum ekki Dortmund.

Annars kemur þetta allt í ljós seinni partinn í dag. Ég ætla að taka nokkur símtöl og sjá hvort ég get ekki fengið Barcelona, Man City, Juventus og Dortmund saman í riðil.