Rauðu djöflarnir

Erik ten Hag gerði engar breytingar á liðinu frá sigrinum gegn Southampton, þegar margir bjuggust kannski við því að Casemiro myndi hefja leik.

Fyrri hálfleikur

Leikurinn byrjaði svona ágætlega rólega en þó fínt tempó hjá báðum liðum og frekar mikið jafnræði meðal þeirra en lítið um færi. Christian Eriksen fékk hálffæri en setti boltann fram hjá og Dewsbury-Hall átti þá skot úr aukaspyrnu af frekar löngu færi sem David De Gea greip, annars gerðist ekki mikið annað fyrstu 20 mínúturnar. Það var hins vegar á 23 mínútu þegar fyrst dróg til tíðinda í leiknum, Danny Ward markmaður Leicester hreinsaði boltann frá marki sínu, United vann fyrsta boltann og Bruno Fernandes stakk boltanum inn fyrir á Marcus Rashford sem stakk honum því næst á Jadon Sancho sem rölti framhjá Ward og lagði hann þægilega í netið, 1-0 fyrir United.

Eftir markið fór United að taka örlítið yfir leikinn og fékk nokkur hálffæri, Sancho fékk líklegast besta færið fyrir utan þegar hann skoraði eftir flottan undirbúning frá Rashford átti Sancho skot innan úr vítateig en í varnarmann Leicester og þaðan lak boltinn í hendur Danny Ward. Þegar fimm mínútur voru eftir af fyrri hálfleiknum brögguðust Leicester menn aðeins og fóru aðeins að sækja en sköpuðu sér þó ekki neitt almennilegt færi en það kristallast kannski best í xG tölfræði þeirra í fyrri hálfleik en xG-ið þeirra var 0.03. Barnes átti fínt skot fyrir utan teig sem fór yfir og Leicester fékk  eina álitlega aukaspyrnu hægra meginn við vítateig United en ekkert varð úr henni. Staðan í hálfleik 1-0 og ekki mjög mikill glamúr yfir fyrri hálfleik en 1-0 ágætlega verðskulduð staða en ekki mikið meira en það. United sýndi þó á köflum í fyrri hálfleik flott spil þó að það vantaði oft loka hnykkinn til þess að það spil myndi skila góðu færi. Þess má geta að á 15. mínútu mátti heyrast vel í United stuðningsmönnum „We want Glazers out“ og það heyrðist reyndar mjög vel allan leikinn í United stuðningsmönnum á pöllunum.

 

Seinni hálfleikur

United menn komu sprækir út úr leikhléi en eftir um 5 mínútna leik fengu Leicester menn hraðri sókn og braut Martinez á Dewsbury-Hall u.þ.b. 7 metrum fyrir utan vítateig, Maddison tók aukaspyrnuna og De Gea þurfti að hafa sig allan við til þess að koma í veg fyrir mark. Eftir þetta byrjuðu Leicester menn að taka völdin á leiknum. Á 56 mínútu gerði ten Hag sína fyrstu skiptingu, Casemiro kom inn í stað Anthony Elanga. Leikurinn róaðist aðeins eftir að Casemiro kom inn á en Leicester þó enn þá líklegri aðilinn. Leicester fékk aukaspyrnu á stórhættulegum stað í kringum 60. mínútu en skot Maddison beint í varnarvegginn. Cristiano Ronaldo kom inn á fyrir Jadon Sancho eftir u.þ.b. 20 mínútna leik í seinni hálfleik. Hann átti tvö hættulegustu færi seinni hálfleiks annars vegar þegar hann klippti boltann rétt framhjá úr frekar þröngu færi og svo þegar Bruno stakk honum inn fyrir en í þröngu færi skaut hann boltanum framhjá eiginlega þannig að maður spurði sig hvort hann væri að senda boltann fyrir. Þrátt fyrir að Leicester væru mögulegra líklegri þá gekk þeim bölvanlega að skapa sér einhver færi. Undir lokinn þá var tilfinningin að United myndi mögulega skora annað markið þar sem Leicester voru farnir að setja marga menn fram. Það var þó enginn United maður sem ógnaði marki Leicester undir restina en Iheanacho var hársbreidd frá því að setja boltann í eigið net eftir að fyrirgjöf Bruno fór af honum og rétt yfir markrammann. Í uppbótartíma fékk Leicester eitt prýðisfæri en James Justin hamraði þá boltanum langt upp í stúku sem reyndist seinasta færi heimaliðsins.

 

Að lokum

Leikurinn spilaðist talsvert eins og gegn Southampton, United voru betri aðilinn heilt yfir og Leicester var í bölvuðu basli við að skapa einhver færi. United gerði þetta þó spennandi með því að setja ekki mark númer tvö, því miðað við spilamennsku Leicester þá voru þeir aldrei að fara skora meira en eitt mark. Vörnin hjá United var skipulögð og góð en það þarf meiri ákveðni og fókus fram á við til þess að gera út um leik líkt og þennan. Mér fannst menn stundum hálf kærulausir á vallarhelmingi Leicester í seinni hálfleik eins og að staðan væri 3-0 en ekki 1-0. Það er þó hægt að hugga sig við það að United sé búið að halda hreinu tvo leiki í röð og vinna tvo leiki á útivelli í röð og virðast vera orðnir betri í að drepa leiki sem er eitthvað sem hefur vantað síðastliðin ár. Casemiro kom örlítið ryðgaður inn á en spilaði sig jafnt og þétt inn í leikinn, verður áhugavert hvort hann byrji þann næsta, McTominay stóð sig þó vel í þessum leik þrátt fyrir að hann hafi verið sá sem braut á Maddison á stórhættulegum stað. Þá virðist miðvarðarpar United fyrir tímabilið algjörlega vera geirneglt og það er ofboðslega gaman að vera með miðvörð eins og Varane sem les leikinn gríðarlega vel.

 

United heldur nú heim með níu stig eftir fimm leiki í ensku úrvalsdeildinni og útlitið talsvert bjartara en eftir fyrstu tvo leiki tímabilsins. United tekur svo á móti toppliði Arsenal næsta sunnudag og liðið þarf þá standa sig talsvert betur en í leiknum gegn Leicester til þess að vera fyrsta liðið til þess að vinna Arsenal á tímabilinu. Það er þó ekkert að óttast United þekkir það vel að kippa Arsenal niðrá jörðuna þegar að þeir halda að þeir séu ósigrandi (mynd að neðan fyrir þá sem ekki muna.)

 

xG leiksins

United: 1.26

Leicester: 0.55

 

Liðið

 

Lið Leicester

Eftir tvo sigurleiki í röð fara United menn að öllum líkindum bjartsýnir inn í leik gegn neðsta liði ensku úrvalsdeildarinnar, Leicester City. United hefur gengið hrikalega á útivelli á almanaksárinu 2022 en síðustu helgi lauk lengstu leikjahrinu án sigurs á útivelli í 90 ár þegar United sigraði Southampton. Vonandi hefur sá sigur gefið mönnum meiri trú á að sigur á útivelli sé í raun möguleiki, sem var farið að virðast óraunverulegur möguleiki. Erik ten Hag gerði engar breytingar á liði sínu frá sigrunum á Liverpool sem kom líklegast engum á óvart enda var það mjög flottur leikur. Margir bjuggust kannski við aðeins betri frammistöðu en ég tel að allir stuðningsmenn United sætti sig við 1-0 sigurinn gegn Southampton. Sá sigur leit líka talsvert betur út eftir að Dýrlingarnir sigruðu Chelsea núna á þriðjudaginn.  Það verður þó að segjast að United hefði alveg getað spilað betri leik gegn Southampton en hungrið og krafturinn var ekki alveg jafnmikill og gegn Liverpool. Sami kraftur og United liðið mætti með gegn Liverpool myndi gera okkur mjög líklega til þess að sigra Leicester.

 

Liðið

Ég held að Erik ten Hag haldi sig við sama lið en geri þó eina breytingu og það er að byrja með Casemiro í stað Scott McTominay. Þá gæti ég trúað því að ef Martial er kominn til baka úr meiðslum þá tel ég að hann byrji fram yfir Elanga og Rashford yrði þá færður út vinstra meginn og Martial upp á topp, að því sögðu þá held ég að Martial verði ekki tilbúinn fyrir leikinn gegn Leicester. Það gæti verið að ten Hag byrji með McTominay inn á í stað Casemiro ef hann telur Casemiro þurfa að aðlagast umhverfinu eitthvað meira en mér finnst talsvert líklegra að hann treysti Casemiro algjörlega fyrir því að vera tilbúinn. Sumir United menn hefðu kannski vonanst til þess að sjá nýja leikmann United Antony sýna brellur sínar í þessum leik en hann verður þó ekki kominn með leikheimild og þurfa menn að bíða aðeins lengur eftir honum.

 

Leicester City

Leicester City hefur verið í allskonar brasi frá upphafi leiktíðar, liðið hefur ekki keypt neinn leikmann og misst markmanninn sinn Kasper Schmeichel sem var einn af máttarstólpum liðsins og nú er Fofana ungi og efnilegi miðvörðurinn þeirra kominn til Chelsea. Þá situr liðið á botni ensku úrvalsdeildarinnar án sigurs og einungis eitt stig, sumir telja að það sé farið að hitna heldur betur undir Brendan Rodgers. Það verður þó að segjast að Brendan Rodgers er í talsvert erfiðri stöðu þegar hann fær ekki til sín neina leikmenn og önnur lið í deildinni eru farinn að kroppa í hans bestu leikmenn. Liðið hefur þó virkað frekar andlaust ekki bara í upphafi tímabils heldur líka bara á þessu almanaksári og eru ekki alveg jafn sprækir og þeir hafa verið undanfarin tímabil.

Liðið er þó með marga gæða leikmenn innanborðs sem geta alveg gert liði eins og United lífið leitt. Youri Tielemans er mjög góður miðjumaður og þá er Harvey Barnes alveg týpískur leikmaður til þess að slengja einum bolta sláin inn af 26 metra færi gegn United. Svo ekki sé minnst á Jamie Vardy sem er lúsiðinn fram á við og á eftir að skora á þessu tímabili. Liðið tapaði gegn Chelsea 2-1 síðustu helgi sem ætti ekki að vera skömmustulegt nema mögulega vegna þess að Chelsea fékk rautt spjald á 28 mínútu þegar staðan var 0-0 og lék manni færri restina af leiknum. James Maddison, markahæsti leikmaður Leicester á tímabilinu er tæpur fyrir leikinn og því spái ég því að hann byrji ekki inn á.

 

 

United ætti að vinna þennan leik ef maður skoðar frammistöðu Leicester á tímabilinu, það er þó alltaf hættulegt að mæta liðum sem hafa farið illa af stað, Liverpool fékk að kynnast því gegn okkur og Bournemouth fékk svo að kynnast því gegn Liverpool. Krafan er samt að United bara vinni Leicester og tryggi okkur þriðja sigurinn í jafn mörgum leikjum, en hafandi fylgst með United undanfarin ár þá veit maður að liðið bænheyrir ekki alltaf slíkar bónir og kröfur. Sigur núna á fimmtudaginn myndi gefa manni alvöru fiðring fyrir leikinn gegn Arsenal næstkomandi sunnudag. Sumir spá því að ef Leicester vinnur ekki leikinn gegn United þá verði Brendan Rodgers mögulega látinn fara, því er þó ekki hægt að svara fyrr en eftir leik og jafnvel ekki einu sinni þá.

Annað varðandi leikinn, Leicester og United

– Craig Pawson verður á flautunni í leiknum.
– United vann seinast á King Power í úrvalsdeildinni í júlí 2020
– Liðin hafa mæst 32 í úrvalsdeildinni og hefur United unnið 19 sinnum en Leicester 4 sinnum

 

Þá er fyrsta leik 4. umferðar ensku Úrvalsdeildarinnar lokið. Dýrlingarnir hans Ralf Hasenhuttle tóku á móti óbreyttu United liði frá sigurleiknum gegn Liverpool um síðustu helgi.

Á bekknum voru þeir Heaton, Maguire, Wan-Bissaka, Ronaldo, Fred, Casemiro, Shaw, van de Beek og Garnacho.

 

Heimamenn gera fáar breytingar á liði sínu frá sigurleiknum gegn Leicester um síðustu helgi en Che Adams, sem átti magnað innkomu og skoraði tvö mörk í þeim leik, fékk að byrja sem fremsti maður í stað Mara.

Á bekknum voru þeir : McCarthy, Lyanco, Bednarek, Valery, Perraud, Romeu, Diallo, Armstrong og Mara.

 

Fyrri hálfleikur

Leikurinn fór ekki af stað með sama krafti og leikurinn við Liverpool. Bæði lið voru föst í varkárnisgírnum framan af og virtust bæði vera að reyna að fóta sig. Liðin skiptust á að reyna að skapa færi en trekk í trekk klikkaði síðasta sendingin eða menn reyndu of mikið og töpuðu boltanum. Á 7. mínútu átti Bruno Fernandes tilraun frá miðju þegar hann kom auga á að Bazunu var langt út úr markinu en honum tókst ekki að leika eftir markið hans Cavani á síðustu leiktíð og Bazunu greip boltann auðveldlega.

Embed from Getty Images

Bæði lið voru mikið að reyna háar fyrirgjafir sem varnarlínur liðanna áttu auðveld með að takast á við. Það lá þó í loftinu að það þyrfti ekki mikið að breytast til að leikurinn yrði fjörugur þar sem liðin skiptust á að sækja. Það var ekki fyrr en á 19. mínútu að fyrsta alvöru færið kom og sannkallað dauðafæri.

Diogo Dalot kom þá með fyrirgjöf frá hægri hluta vítateigsins sem rataði á kollinn á Bruno en Walker-Peters komst fyrirboltann og hann barst aftur yfir á hægri helming vítateigsins. Þar var það Anthony Elanga sem tók boltann og hamraði hann í átt að markinu en beint í belginn á Bazunu. Aftur skutu United menn að markinu en varnarmaður heimamanna komst fyrir skotið. Færið var ekki runnið úr greipum United því boltinn skoppaði fyrir fæturnar á Bruno sem negldi tuðrunni í trýnið á Walker-Peters og þaðan í horn. Hreint með ólíkindum að boltinn hafi ekki ratað í netið úr einhverri af þessum tilraunum.

Eftir um hálftíma leik kom fyrsta hættulega færið hjá heimamönnum þegar Elyounoussi átti fyrirgjöf sem rataði á kollinn á Che Adams en boltinn sveif yfir þverslánna. Lítið markvert sem gerðist annað en að liðin skiptust á að reyna að skapa færi, þá yfirleitt með háum fyrirgjöfum en án árangurs. Liðin fóru því inn í hálfleik jöfn.

Embed from Getty Images

 

Síðari hálfleikur

Engar breytingar voru gerðar í hálfleik en leikurinn fór af stað keimlíkt og fyrri hálfleikur hafði endað. Liðin skiptust á að reyna og reyna en alltaf vantaði upp á gæðin í lokasendingunni. Heimamenn fengu aukaspyrnu eftir að Dalot braut á Djenepo sem var að hefja skyndisókn en James Ward-Prowse átti frekar slappa sendingu úr aukaspyrnunni og De Gea greip boltann og kom af stað skyndisókn. Elanga átti góðan sprett inn í vítateig Southampton en Bella-Kotchap, sem var án vafa einn besti maður vallarins, náði að henda sér fyrir skot svíans í tæka tíð.

En loksins gerðist eitthvað marktækt á 55. mínútu þegar Sancho fann Dalot á vinstri vængnum og portúgalinn kom með fyrirgjöf út í teiginn þar sem Bruno Fernandes stóð einn og óvaldaður og smellhitti tuðruna á lofti og beint út í vinstra hliðarnetið framhjá Bazunu í marki heimamanna. 1-0 og ísinn brotinn.

Embed from Getty Images

Southampton-menn tóku vel við sér eftir markið og tóku stjórn á leiknum og United virtist í bölvuðum vandræðum að hnoða saman eins og 3-4 sendingar milli manna. Á tímabili var Southampton með boltann meira en 80% á móti United liði sem hékk aðeins of aftarlega og þjörmuðu þeir vel að gestunum. Örstuttu eftir markið vildu þeir fá hendi dæmda á McTominay eftir að hann og Adams voru í baráttu um skallabolta og vissulega fór boltinn í höndina á skotanum en einnig í höndina á Adams og af verulega stuttu færi. Hefði verið grimmt að dæma víti en það hefði samt ekki endilega komið á óvart.

Næstu mínútur voru alfarið í eigu Southampton og á 66. mínútu kom frábær sending frá Adam Armstong frá vinstri kantinum á Aribo sem stóð nánast óvaldaður í markmannsteignum sem skallaði boltann í átt að markinu en De Gea kastaði sér snyrtilega fyrir boltann og bjargaði því sem hefði átt að heita nær öruggt mark. Tveimur mínútum síðar kom Ronaldo inn fyrir Sancho en portúgalinn var farinn að haltra einungis 7 mínútum síðar en endaði reyndar á að klára leikinn.

Embed from Getty Images

McTominay átti því næst sendingu á Ronaldo í teig heimamanna en rétt í þann mund er hann ætlaði að skjóta úr upplögðu færi náði Djenepo að kasta sér fyrir skotið og bjarga. á 72. mínútu gaf Malacia, sem átti ekki sérstakan leik í dag, aukaspyrnu úti við hornfánann og Ward-Prowse sendi á fjærstöngina þar sem Adam Armstrong skallaði boltann í brjóstkassann á Varane og vildu margir heimamenn þar fá víti en augljóst að boltinn fór ekki í hönd frakkans.

Loksins á 80. mínútu kom Casemiro inn fyrir Elanga til að gulltryggja hreint lak en örstuttu síðar komst félagi hans, Ronaldo, í hörkugott færi þegar hann sótti hratt að marki heimamanna og virtist vera kominn inn fyrir en Bella-Kotchap elti hann og náði að vinna upp nokkra metra og kasta sér svo fyrir skotið.

Embed from Getty Images

Heimamenn héldu áfram að reyna og reyna en fundu engar leiðir framhjá varnarmúr United, þrátt fyrir ítrekaðar tilraunir. Fred kom inn á fyrir Eriksen og á sama tíma var gefið upp að viðbótartíminn yrði um sex mínútur. Heimamenn fengu þó eina loka tilraun þegar Sekou Mara, sem kom inn á fyrir Che Adams, átti bakfallsspyrnu sem líklegast var þó á leið framhjá en hefði verið (fyrir hlutlausan áhorfanda eða stuðningsmenn heimamanna) afar glæsilegur endir á annars döprum leik.

Leiknum lauk svo með 0-1 sigri United. Langt því frá sama grimmd og gegn Liverpool á erfiðum og vondum velli en þrjú stig í hús og lengsta leikjahrina án sigurs á útivelli í tæp 90 ár þar með lokið.

Næsti leikur verður gegn Leicester City á lokadegi leikmannagluggans, 1. sept. n.k. kl 19:00.

 

Eftir sannkallaða Jekyll & Hyde frammistöðu Manchester United á byrjun tímabilsins, er ekki laust við að stuðningsmenn séu bæði spenntir og taugaveiklaðir í aðdraganda leiksins. Eftir að hafa farið með skottið á milli lappanna eftir fyrstu tvo leikina gegn Brighton og Brentford, gerði liðið sér lítið fyrir og lagði Liverpool, nokkuð sem liðinu hefur ekki tekist frá því 2018 (í deildinni það er). United var fyrir umferðina í neðsta sæti deildarinnar en situr nú í því fjórtánda. Því ef einhverjir stuðningsmenn liðsins getaekki fundið huggun í því að sigra erkióvinina frá Liverpool þá er líka hægt að líta á töfluna og sjá að það eru talsvert skrýtnir hlutir að gerast og flestöll stóru liðin að hiksta að því er virðist.

En það þarf að hamra járnið á meðan það er heitt og gera Liverpool leikinn að vendipunkti leiktíðarinnar því næstu vikur verða mjög strembnar þar sem liðið leikur fimm af sjö næstu leikjum á útivelli. Stuttu síðar mun liðið svo mæta þremur Lundúnarliðum í röð (Spurs, Chelsea, West Ham) áður en liðið fær einhverja leiki sem eiga að teljast auðveldari á blaði. Leikurinn gegn dýrlingunum er því óþægilega mikilvæg byrjun á erfiðri leikjadagskrá okkar manna í september og október.

Embed from Getty Images

Southampton

Margir álitu svo að Ralf Hasenhuttl og hans menn yrðu í miklu basli í ár þar sem þeir enduðu síðasta tímabil afleitlega með einu stigi úr síðustu fimm leikjunum og hafa síðan verið rólegir á leikmannamarkaðinum. Þeirra helstu kaup eru Gavin Bazunu (markmaður) og Romeo Lavio (varnarmiðjumaður) báðir úr varaliði Manchester City, Sekou Mara, tvítugur framherji með 890 mínútur úr frönsku deildinni á síðasta ári og Armel Bella-Kotchap (miðvörður) sem hefur reyndar farið ágætlega af stað í deildinni og er þegar komið með stoðsendingu eftir 2 leiki. Liðið missti á sama tíma Fraser Forster, Dan N’Lundulu og Shane Long.

Hasenhuttl hefur frá því hann kom til Southampton ekki verið hræddur við að breyta til og aðlaga leikkerfi sitt eftir leikmönnum og líka mótherjum sínum. Á tímabilinu 2018/2019 notaðist hann mikið við 3-4-3 og 3-5-2 en hefur í seinni tíð fikrað sig yfir í 4-4-2 og virðist hann vera að festa leikkerfið í sessi hjá sínum mönnumef marka má síðustu leiktíðir: 33 leikir 19/20, 42 leikir 20/21 og 32 leikir 21/22. Það væri því tölfræðilega best að skjóta á að austurríkismaðurinn hendi í 4-4-2 en hann hefur ekki enn gert það á þessari leiktíð:

Southampton vann síðasta deildarleik 1-2 gegn Leicester City og ég býst við að Hasenhuttl haldi nánast óbreyttu liði með nýju leikmennina, Aribo, Lavia og Bazunu alla innanborðs en líklegast kemur Che Adams inn í stað Mara eftir að Adams kom inn á og breytti síðasta leik úr tapi í sigur með tveimur mörkum. Þeirra hættulegustu menn verða líklega Djenepo og téður Che Adams en ekki má gleyma að þeir eru vafalaust með besta aukaspyrnusnilling Úrvalsdeildarinnar, James Ward-Prowse, sem er alltaf stórhættulegur úr föstum leikatriðum.

Embed from Getty Images

Manchester United

Hvar á að byrja? Flestir stuðningsmenn eru eflaust orðnir örmagna og komnir með upp í kok af fréttum, slúðri, neiðkvæðni, bulli og öðru tengdu klúbbnum í þessum leikmannaglugga. Frenkie de Jong verður líklegast áfram hjá Barca og í vikunni fyrir Liverpool leikinn vorum við orðaðir við alla leikmenn sem hafa reimt á sig takkaskó undanfarin tvö árin. Eftir hroðalega byrjun á leiktíðinni fylltust fréttir af því að United ætlaði að kaupa marga leikmenn inn, Antony, Frenkie de Jong, Trapp, Gakpo og hægri bakvörð en um leið og leiknum lauk á mánudagskvöldinu féll allt í dúnalogn og svo virtist sem allir íþróttafréttamenn hefðu farið í frí á sama tíma. Enda eflaust taktík hjá eigendunum að skapa jákvæða umræðu með því að tala um stór kaup þegar illa gengur en um leið og örlítil sólarglæta gerir vart við sig að skella í bakkgír og fara í sama gamla Glazer-farið.

En góðu fréttirnar eru þær að Casemiro er orðinn leikmaður United og verður væntanlega í hópnum á laugardaginn en enn bíðum við eftir sóknarmönnunum sem liðið hyggst kaupa. United hefur ekki verið með almennilega og hreinræktaða sexu frá því að Michael Carrick var að spila þrátt fyrir að stuðningsmenn hafi grátbeðið um slíkan leikmann síðustu ár. Vonandi verður hann settur beint í liðið enda algjör heimsklassaleikmaður hér á ferð.

Embed from Getty Images

Þá hefur mikið verið ritað um þá ákvörðun stjórans að taka bæði Maguire og Ronaldo út úr liðinu gegn Liverpool en það skilaði sér sannarlega. Martinez og Varane voru óaðfinnanlegir í vörninni og Tyrell Malacia var einstaklega flottur í vinstri bakverðinum. Þrátt fyrir að United hefði einungis eins marks forystu í leiknum undir lokin þá læddist ekki þessi óþægilega tilfinning að vörnin væri að fara fá á sig mark undir lokin og missa leikinn frá sér. Það er langt síðan varnarlína United hefur veitt manni þá öryggiskennd en Erik ten Hag virðist vera kominn með ágætisblöndu í varnarlínuna og ekki skemmir fyrir að fá Casemiro fyrir framan hana, hafandi spilað í fjölda ára með Varane og auðvitað Ronaldo.

Þegar kemur að liðsvalinu gæti ten Hag komið okkur á óvart en ég tel að þetta verði liðið gegn dýrlingunum. Hugsanlega getur verið að hann fari í 4-3-3 en ég myndi gera ráð fyrir því að hann myndi halda sama leikkerfi en gefa þeim sem spilar við hlið Casemiro aukið frelsi til að sækja fram völlinn.

Líklegast mun Ronaldo koma inn í liðið á kostnað Elanga sem stóð sig samt sem áður mjög vel í síðasta leik. Þá geri ég ráð fyrir að McTominay fái að víkja fyrir Casemiro og þrátt fyrir að Fred hafi ekki spilað vel þá á hann og Casemiro gott samband á miðjunni hjá Brasilíu og það gæti hjálpað að vera að spila með leikmönnum sem þú ert vanur að spila með, að minnsta kosti fyrst um sinn. Vonandi fáum við þá að sjá bestu hliðar Fred, sem nýtur sín vel í box-to-box hlutverki á miðjunni þegar hann þarf ekki að liggja með McTominay og vernda varnarlínuna eins mikið. Það er ekkert útilokað að við sjáum samt Casemiro-Eriksen-Fernandes miðju í 4-3-3 leikkerfinu sem gæti verið algjör negla, varnarlega og sóknarlega en það kunna að vera draumórar höfundar.

Engin meiðsli ættu að setja strik í reikninginn varðandi byrjunarliðið en þeir Brandon williams, Facundo Pellistri og Victor Lindelöf eru á meiðslalistanum.

Takist liðinu að vinna þennan leik verður liðið með sex stig eftir 4 umferðir og þrátt fyrir að liðið verði að horfa á einn leik í einu eins og staðan er í dag þá er gríðarlega mikilvægur leikur 4. sept þegar erkifjendurnir í Arsenal koma á Old Trafford, en þeir eru með fullt hús stiga og hafa litið hvað best út það sem af er.
Næstu leikir:
Leicester (úti)
Arsenal (heima)
Crystal Palace (úti)
Leeds (heima)

Leikurinn hefst á slaginu 11:30 og flautuleikarinn dagsins Andrew Medley.

#Glazersout