Rauðu djöflarnir

Manchester United og Atlético Madrid gerðu í kvöld 1-1 jafntefli í fyrri leik sínum í 16-liða úrslitum Meistaradeildar Evrópu. Heimamenn fengu draumabyrjun með flottu marki frá João Félix strax á 7. mínútu en hinn ævinlega spræki Anthony Elanga jafnaði metin á 80. mínútu. Þetta var ekki besti leikur Manchester United á tímabilinu en okkar menn eru rækilega með í þessu einvígi ennþá og allt undir á Old Trafford í seinni leiknum.

Byrjunarlið og helstu upplýsingar

Rangnick ákvað að stilla Victor Lindelöf upp í hægri bakverði, með þann möguleika að geta skipt í þriggja miðvarða kerfi innan leiks án þess að gera sérstaka skiptingu til þess. Svona var byrjunarlið Manchester United í leiknum:

Bekkur: Heaton, Henderson, Alex Telles (inn á 66′ fyrir Shaw), Bailly, Dalot, Jones, Wan-Bissaka (inn á 66′ fyrir Lindelöf), Hannibal, Lingard (inn á 82′ fyrir Sancho), Mata, Matic (inn á 66′ fyrir Pogba), Elanga (inn á 75′ fyrir Rashford).

Heimamenn hófu leik með þetta lið á vellinum:

Bekkur: Lecomte, Christian, Felipe, Hermoso, de Paul, Lemar (76′ fyrir Lodi), Serrano, Griezmann (76′ fyrir Félix), Suárez.

Mörk:

7′ – João Félix, stoðsending Renan Lodi

80′ – Anthony Elanga, stoðsending Bruno Fernandes

Spjöld:

Atlético Madrid – Héctor Herrera, Reinildo, Marcos Llorente, José Giménez

Manchester United – Luke Shaw, Victor Lindelöf, Marcus Rashford, Fred, Alex Telles

Leikurinn

Það var ágætis jafnræði hjá liðunum á boltann allra fyrstu mínúturnar en þó greinilegur munur á hversu beinskeitt liðin voru strax. Atlético Madrid átti fyrstu marktilraunir leiksins áður en fimm mínútur voru búnar og þurfti m.a. góða tæklingu frá hægri bakverðinum Victor Lindelöf til að koma í veg fyrir marktilraun frá Giminez.

En heimamenn fengu draumabyrjun á 7. mínútu þegar þeir skoruðu laglegt mark. Eftir hornspyrnu frá hægri sem var skölluð burt kom fyrirgjöf frá vinstri beint í hlaupið hjá João Félix sem kastaði sér fram og stangaði boltann fast í nærhornið. Frábærlega vel gert hjá Atlético þarna. Það hefur löngum verið martröð liða sem heimsækja þennan völl, sér í lagi í útsláttarkeppni, að fá akkúrat þessa byrjun á sig.

Embed from Getty Images

Enda duttu Atlético beint í það sem þeir gera hvað best, stjórna leiknum án þess að vera með boltann. Eftir að boltinn hafði verið nokkurn veginn 50/50 á hvoru liði fyrstu mínúturnar þá rauk það upp í að Manchester United var með boltann 70% af tímanum en náði lítið að komast með boltann áleiðis upp völlinn samt. Atlético-menn voru fullkomlega sáttir við að leyfa United að dútla með boltann á sínum eigin vallarhelmingi en settu pressuna í gang á fullu um leið og einhver skapandi leikmanna United fékk boltann eða liðið reyndi að spila sig upp völlinn. Að auki spiluðu þeir eins fast og dómarinn leyfði, notuðu brot óspart til að stöðva leikinn og fengu að gera það án þess að fá spjöld fyrir.

Þetta pirraði leikmenn United, sér í lagi Ronaldo, sem hefur án efa líka verið hluti af plönum Atlético Madrid. Eitthvað sem var auðvelt að teikna upp fyrir leik.

Embed from Getty Images

Á meðan fóru leikmenn Manchester United að safna spjöldum fyrir óþarfa. Lindelöf, Shaw og Rashford fengu gult fyrir að missa menn framhjá sér og stöðva álitlegar sóknir og Fred fékk gult fyrir að mótmæla hornspyrnu sem dæmd var á hann.

Það virtist í raun lítið í kortunum að Manchester United væri að fara að fá eitthvað út úr þessum leik. Atlético virtist hafa þetta allt í höndum sér. Eftir rúman klukkutíma gerði Rangnick þrefalda skiptingu þar sem Lindelöf, Shaw og Pogba fóru af velli fyrir Wan-Bissaka, Telles og Matic. Ekki beint skipting sem öskraði á sóknarþunga. Báðir bakverðirnir voru þó á gulu og skynsemi í að taka þá af velli. Manchester United var líka að gjörtapa baráttunni inni á miðjunni og vit í því að senda Serbann Matic inn á völlinn til að reyna að ná einhverjum tökum á leiknum þar.

Þegar korter var eftir af leiknum kom svo næsta skipting, þegar Svíinn Anthony Elanga kom inn á fyrir Marcus Rashford. Ég gjörsamlega dýrka Dr. Marcus Rashford en hann átti ekki góðan leik í kvöld. Flestar ákvarðanir voru rangar hjá honum, sérstaklega á ögurstundu, og hann komst illa inn í spilið með félögum sínum. Það hjálpaði honum ekki hversu illa United náði að vinna úr málum á miðjunni en hann á líka að geta gert betur sjálfur.

Anthony Elanga hefur hins vegar verið að koma frábærlega inn í vetur, ekki síst hefur hann getað komið með áhrif inn af bekknum, eins og sást bara vel í síðasta leik gegn Leeds United. Hann var búinn að vera inni á vellinum í 5 mínútur þegar hann skoraði jöfnunarmarkið. Eftir innkast á miðjum vellinum náði Fred að fleyta boltanum yfir á Bruno sem bar hann aðeins upp og gaf svo stungusendingu sem Reinildo rétt missti af með sinni tæklingu en endaði beint í hlaupinu hjá Elanga. Elanga skaut í fyrsta í fjærhornið, ekki fast en virtist koma Oblak að óvörum svo í netinu endaði boltinn. Fyrsta marktilraun Manchester United á rammann og staðan orðin 1-1.

Embed from Getty Images

Atlético Madrid var næstum búið að ná forystunni aftur þegar Griezmann setti boltann í slána með laglegu skoti úr teignum. Jesse Lingard átti hins vegar síðasta orðið í leiknum þegar hann tók langskot djúpt í uppbótartíma sem Oblak þurfti að verja en var ekki í teljandi vandræðum með það. Þetta skot varð hins vegar til þess að Manchester United endaði með fleiri tilraunir á ramma en Atlético Madrid.

Pælingar eftir leik og framhaldið

Atlético stjórnaði þessum leik megnið af honum. Gjörsamlega. En þeir áttu samt bara eina marktilraun á rammann. Það voru mjög, mjög, mjööög margir sem gagnrýndu bæði varnarlínu Manchester United og David de Gea í þessum leik en þrátt fyrir það áttu heimamenn ekki fleiri tilraunir á rammann. Áttu reyndar tilraun í rammann en ekki fleiri á rammann.

Embed from Getty Images

Aðalhausverkurinn í þessum leik hjá Manchester United var hversu illa gekk að ná tökum á miðjunni og skapa eitthvað fram á við. En Bruno Fernandes sýndi að hann þarf ekki nema eitt tækifæri til að búa til eitthvað sem ræður úrslitum. Stungusendingin hans var frábær. Reinildo hefði líklega átt að gera betur en sendingin var akkúrat nógu utarlega til að tækling varnarmannsins missti marks. Og Elanga gerði það sem hann hefur verið svo duglegur að gera í vetur, hafði áhrif á leikinn.

Þiggjum úrslitin úr þessum leik frekar en frammistöðuna. Liðið þarf þó að gera mun betur á Old Trafford 15. mars til að klára þetta einvígi.

Annars var annar jákvæður punktur við kvöldið því Tottenham náði ekki að fylgja eftir frábærum sigri þeirra á Manchester City um helgina heldur töpuðu gegn Burnley. Þeir eru því 7 stigum frá Manchester United með tvo leiki til góða.

Næsti leikur hjá okkar mönnum er hins vegar gegn Joshua King og félögum í Watford á Old Trafford á laugardaginn.

Eftir tvo fína deildarsigra í röð er nú komið að útsláttarkeppni í Meistaradeild Evrópu. Manchester United dróst fyrst gegn franska liðinu PSG í 16-liða úrslitum en í ljós kom að mistök höfðu valdið því að United fór ranglega í pottinn gegn Villareal en ekki í pottinn þegar andstæðingar Atlético Madrid voru dregnir. Atlético fengu upphaflega þýsku meistarana í Bayern Munchen og kvörtuðu formlega þegar þessi mistök urðu ljós. Þeir fengu í gegn að dregið var aftur, eðlilega, og í það skiptið drógust Atlético og Manchester United saman. Mikið fjör, allt saman.

Þrátt fyrir að þessar viðureignir gegn PSG hafi verið orðnar ansi margar á stuttum tíma þá var alveg fínt að sjá fram á einvígi gegn þeim, sérstaklega þar sem Manchester United hefur haft gott tak á Parísarmönnum í París. Fyrirfram hefði maður haldið að Atlético væri lið sem hentaði Manchester United mun verr. En það er alveg hægt að vinna þetta lið og það er undir Ralf og leikmönnunum komði að finna leikplan og ástríðu til að mæta þessu fastspilandi og vel skipulagða liði frá Madrid.

Fyrri leikurinn verður spilaður annað kvöld á Estadio Metropolitano, eða Wanda Metropolitano, í Madrid og hefst klukkan 20:00 að íslenskum tíma. Dómari leiksins verður Ovidiu Haţegan frá Rúmeníu.

Bæ bæ, útivallamarkaregla

Stór breyting fyrir þetta tímabil var að útivallamarkareglan fræga/alræmda var tekin út. Það verður mjög áhugavert að sjá hvaða áhrif það hefur til lengdar í útsláttarkeppninni og hvort við munum sjá eftir þessari reglubreytingu eða ekki. Á síðustu árum hefur Atlético Madrid þó verið það lið sem hefur hvað best og reglulegast náð að nýta sér þessa reglu, sérstaklega þegar liðið hefur átt fyrri leikinn á heimavelli eins og er tilfellið núna. Með því að gjörsamlega múra fyrir rammann og koma í veg fyrir að andstæðingurinn næði útivallarmarki náðu piltarnir hans Simeone oftar en ekki að fylgja því eftir með því að ná sjálfir útivallarmarki í seinni leiknum.

Manchester United á þó nýlegan, frækinn Evrópusigur sem einmitt vannst á útivallarmörkum. En það var reyndar pínu undantekning frá hefðinni þar sem bæði lið unnu á útivöllum.

Fyrir utan ævintýrið í París hefur Manchester United aðeins tvisvar lent í því að Evrópueinvígi hefur ráðist á útivallamörkum. Annars vegar var það tímabilið 2009-10 þegar Bayern Munchen vann fyrri leikinn í Þýskalandi 2-1 en United vann á Old Trafford 3-2. Grátlegur leikur þar sem United komst yfir í Þýskalandi en Bayern náði sigurmarki á 92. mínútu og svo komst United í 3-0 í seinni leiknum. Hins vegar var það svo í undanúrslitum tímabilið 2001-02 þegar United og Bayern Leverkusen gerðu tvö jafntefli, fyrst 2-2 á Old Trafford og svo 1-1 í Þýskalandi. Aftur var þetta grátlegt þar sem United tók þrisvar sinnum forystu í einvíginu, bara til að sjá Þjóðverjana jafna þrisvar og hanga á útivallarmörkunum.

Embed from Getty Images

Svo það er óhætt að segja að útivallamarkareglan hafi líka leikið okkar menn grátt í gegnum tíðina. En það þarf einhvern veginn að útkljá þessi einvígi og stundum er það mjótt á milli að það sem ræður úrslitum á endanum virkar ekki endilega mjög sanngjarnt.

Það eru líka ekki bara beinu áhrifin sem útivallamarkareglan hafði, þegar úrslitin bókstaflega réðust á þessari reglu. Það voru líka óbeinu áhrifin, þegar útiliðið náði marki sem þýddi að heimaliðið þurfti allt í einu tvö og þurfti að sækja af meiri ákafa og jafnvel örvæntingu sem leiddi til þess að útiliðið gat sett skyndisóknarmark í andlitið á þeim. Þeir hafa alveg verið ófáir slíkir leikir í gegnum tíðina.

Fjórða og fimmta sætið

Í þessu einvígi mætast liðin í fjórða og fimmta sæti í sínum deildum. Manchester United er sem stendur í fjórða sæti ensku úrvalsdeildarinnar, þótt einhver lið eigi leiki inni í baráttunni um Meistaradeildarsæti. Atlético Madrid er á meðan í fimmta sæti spænsku úrvalsdeildarinnar, með jafnmörg stig og Barcelona en með verra markahlutfall og auk þess búið að spila leik meira en Börsungar.

Það er þó einnig hægt að slá þessu upp sem leik liðanna sem enduðu í 1. og 2. sæti sinna deilda á síðasta tímabili. Atlético Madrid náði þá að vinna deildina á Spáni á meðan Manchester United var lang næstbesta liðið á Englandi. En það er þó varla sanngjarnasta leiðin til að mála upp þetta einvígi.

Embed from Getty Images

Staðreyndin er þó að þetta eru tvö öflug lið sem hafa verið í brasi á þessari leiktíð en innihalda topp leikmenn og geta bæði spilað öflugan fótbolta þegar sá gállinn er á þeim.

Sagan

Liðin eiga eitt einvígi að baki í knattspyrnusögubókunum. Tímabilið 1991-92 mætti Manchester United inn í Evrópukeppni bikarhafa sem ríkjandi meistarar í þeirri gömlu, góðu keppni. Tottenham fylgdi þeim þangað frá Englandi sem ríkjandi bikarmeistarar og Atlético Madrid tók þátt fyrir hönd Spánar eftir að hafa unnið Mallorka í úrslitum spænska bikarsins tímabilið áður. Atlético vann þá reyndar líka bæði Barcelona og Real Madrid á leið sinni í úrslitaleikinn.

Embed from Getty Images

Liðin mættust í annarri umferð keppninnar, eða 16-liða úrslitum, í lok október og byrjun nóvember 1991. Fyrri leikurinn var, líkt og nú, spilaður í Madrid, á Vincente Calderón vellinum. Það var völlurinn sem Atlético Madrid notaði frá 1966 til 2017. Þessi fyrri leikur endaði ekki vel, Paulo Futre kom heimamönnum yfir eftir rúman hálftíma og undir lok leiksins bættu Futre og Manolo við mörkum og kláruðu þetta einvígi. Seinni leikurinn byrjaði vel, Mark Hughes kom United yfir strax á fjórðu mínútu. En þegar þýski miðjumaðurinn Bernd Schuster jafnaði á 68. mínútu var þetta endanlega búið. Atlético komst þó ekki mikið lengra í þessari keppni heldur féll út í næstu umferð á eftir gegn Club Brugge.

Elskar að skora gegn Atlético

Þótt Manchester United hafi ekki mikla reynslu af því að skora mörk gegn Atlético Madrid þá er einn leikmaður innan liðsins sem hefur bæði reynslu og að því er virðist sérstaklega mikla ánægju af að skora einmitt gegn Atlético Madrid. Cristiano Ronaldo hefur skorað 25 mörk í þeim 35 leikjum sem hann hefur spilað gegn Atlético. Hann hefur að auki lagt upp 5 mörk til viðbótar. Hann hefur skorað fjórar þrennur gegn Madridarliðinu, þrjár með Real og eina með Juventus.

Embed from Getty Images

Leikmannafréttir

Það eru nokkrir meiddir hjá Atlético. Brasilíumaðurinn Matheus Cunha er meiddur en hann var búinn að vera sprækur fyrir Atlético, kominn með 5 mörk og 2 stoðsendingar í spænsku deildinni. Hann var samt töluvert meira að koma inn af bekknum en byrja leiki.

Danski varnarmaðurinn Daniel Wass er líka meiddur. Thomas Lemar og Mario Hermoso eru tæpir vegna Covid auk þess sem fyrirliðinn Koke er tæpur, gat lítið æft í byrjun vikunnar og gæti misst af þessum leik.

Belginn Yannick Carrasco, sem getur spilað á báðum köntum, framliggjandi á miðjunni eða fremst í sókninni, missir af báðum leikjunum gegn Manchester United vegna leikbanns sem hann hlaut eftir rautt spjald sem hann fékk gegn Porto í riðlakeppninni.

Hjá Manchester United er Tom Heaton sá eini sem er skráður fjarverandi vegna meiðsla. Mason Greenwood er að sjálfsögðu ekki í hópnum heldur. Fyrir utan það er Edinson Cavani tæpur fyrir leikinn.

Líkleg byrjunarlið

Spekingarnar spá því að Atlético Madrid stilli upp í 3-5-2 á þessa leið:

Manchester United gæti hins vegar stillt upp einhvern veginn á þessa leið:

Seinni leikurinn verður svo spilaður á Old Trafford þriðjudagskvöldið 15. mars, klukkan 20:00.