Rauðu djöflarnir

Manchester United missteig sig í hundraðasta sinn, að því er virðist, á tímabilinu. Dýrlingarnir frá Southampton komu á Old Trafford og sóttu verðskuldað stig. Svekkjandi 1-1 jafntefli niðurstaðan og ofsalega lítið við henni að segja. Það verður ólíklegra með hverjum leiknum sem líður að næsti stjóri United erfi lið sem að spilar í Meistaradeildinni tímabilið 2022-23. Grátlegt, en svona er þetta nú stundum.

Byrjunarliðið:

Skiptingar: Rashford út, Lingard inn. McTominay út, Elanga inn.

Fyrri hálfleikur

Eins og svo oft áður, þá byrjaði United liðið nokkuð líflega. Cristiano Ronaldo komst í algjört dauðafæri á 7. mínútu leiksins þegar að hann slapp einn í gegn og lék á Fraser Forster í marki gestanna. Skot Portúgalans var hins vegar laflaust og var boltanum þrumað burt áður en hann gat lekið í netið. Stuttu síðar fengu Southampton svo sitt fyrsta færi. Þá fékk Kyle Walker-Peters boltann á fjærstönginni og setti hann fyrir markið, þar náði Che Adams ekki að stýra boltanum á markið. Í kjölfarið brunuðu okkar menn upp og Jadon Sancho var hársbreidd frá því að koma United yfir.

Það var svo um 10 mínútum seinna sem að mark okkar manna leit dagsins ljós. Bruno Fernandes fékk boltann á okkar vallarhelmingi, leit upp og sá Marcus Rashford í hlaupi hægra megin. Bruno setti fína sendingu aftur fyrir vörn Southampton og Rashford brunaði með boltann í átt að teignum, þar beið Sancho á fjærstönginni og Rashford fann hann. Eftirleikurinn var auðveldur fyrir Sancho sem að setti boltann örlítið í Walker-Peters og svo í netið. 1-0.

Næstu mínútur voru tíðindalitlar en United var þó með ágætis tök á leiknum og fátt sem að virtist benda til þess að áhlaup frá gestunum væri væntanlegt. Þeir sóttu þó í sig veðrið þegar að líða tók á hálfleikinn og voru nokkuð aðgangsharðir síðustu 10 mínútur fyrri hálfleiks, en þó aldrei meira en þannig að þeir væru þvingaðir í langskot eða hálffæri. Eftirlæti okkar, Stuart Atwell, flautaði svo til loka fyrri hálfleiks og viðkvæm 1-0 forysta var hlutskipti okkar manna í leikhléi.

Seinni hálfleikur

Það voru liðnar þrjár mínútur af síðari hálfleik þegar að gestirnir höfðu jafnað leikinn. Skotinn Che Adams fékk þá stungusendingu frá Mohamed Elyounoussi eftir fínasta spil, þar sem að Luke Shaw spilaði Adams réttstæðan. Ekki í fyrsta skipti sem að Shaw gerir sig sekan um slík mistök. Þetta er helvíti dýrt þegar að liðið skorar ekki beinlínis að gamni sínu og hvert mark er gulls ígildi.

Það er ekki orðum ofaukið að segja að leikurinn hafi dáið um stund eftir jöfnunarmark Southampton. Þetta var moð, kraðak og vesen. Ekkert gekk að skapa færi og með hverri mínútunni sem leið þá sá maður hvernig leikmenn gestanna tvíefldust í trú sinni á verkefninu. Harry Maguire komst þokkalega nálægt því að skora eftir aukaspyrnu, en Fraser Forster sparkaði skrítnu skoti Maguire í burtu.

Maguire lenti svo í stöðu þar sem að hann var einn gegnum tveimur leikmönnum Southampton og framherji liðsins, Armando Broja, skildi fyrirliðann eftir í ryki og komst einn gegn de Gea í þröngt færi. Broja virtist hins vegar ekki viss um hvort að hann ætti að setja boltann fyrir markið eða klára sjálfur og úr varð mjög veik tilraun.

Ralf Rangnick reyndi að blása lífi í daufan sóknarleik United með því að setja Anthony Elanga inn fyrir Scott McTominay og síðar Jesse Lingard fyrir Marcus Rashford. Hvorugum tókst að setja mark sitt á leikinn af einhverju viti og eftir flotta vörslu Forster þegar hann sá við Harry Maguire, þá vissi maður að leikurinn myndi bara renna út í sandinn og liðin sættast á skiptan hlut. Sem og þau gerðu.

Pælingar

Adeu, Ronaldo…?

Bleikasti fíllinn í herberginu er Cristiano Ronaldo. Hann hentar liðinu engan veginn. Hann hefur lítinn sprengikraft, viðbrögðin virðast hægjast með hverjum leiknum og sem „target striker“ þá heldur hann boltanum gjörsamlega afleitlega þegar að liðið er annað hvort að færa sig upp eða vill spila í kringum hann. Það dóu svona 15-20 sóknir vegna hans í dag.

Rangnick hafði orð á því á blaðamannafundi fyrir leikinn að það yrði 100% keyptur framherji í sumar, þar sem að Edinson Cavani er á förum. Þægilegasta lendingin fyrir klúbb og leikmann væri sennilega ef að Ronaldo gerði slíkt hið sama. Við losnum við ofurháan launapakka leikmannsins og Ronaldo fer mögulega eitthvert þar sem að hann kemst upp með að koma bara við boltann inni í vítateig andstæðinganna.

Eins og postulín

Það má ekkert útaf bregða og þá virðist liðið hrynja úr jafnvægi. Við byrjum vel og við skorum mark – andstæðingurinn bítur frá sér og við förum inn í skel. Þetta er bara mynstrið, leik eftir leik. Það kemur svo mikið fát og óðagot á suma leikmenn liðsins, sem virðast ætla að skora í það minnsta tvö mörk í hverri sókn. Eðlilega þá verður ákvörðunartakan frekar slöpp þegar að hausinn er á þeim stað.

Eftir fyrri hálfleikinn gegn Burnley og eftir ca. 25 mínútur af þessum leik þá hugsagði ég: „Já, það er nú bara ágætis taktur í þessu og flott holning á liðinu.“ En 10 mínútum seinna þá líður mér eins og ég sé að horfa á bara aðra einstaklinga. Þetta er auðvitað spurning um sjálfstraust að mörgu leyti og það bíður hnekki þegar að úrslitin falla ekki – en þau gera það ekki af sjálfu sér.

Framhaldið

Næsti leikur er heimaleikur gegn Brighton, þriðjudaginn 15. febrúar og má búast við öðru krefjandi verkefni. Eftir það þyngist leikaprógramm Manchester United talsvert þar sem að leikir gegn Leeds, Atletico Madrid, Manchester City, Tottenham og Liverpool eru framundan. Áfram gakk.

Manchester United tekur í hádeginu á morgun á móti Southampton. Stjórar liðanna eru gamlir samherjar.

Eftir að hafa komið RB Leipzig upp í efstu deild í Þýskalandi vildi Ralf Rangnick stíga til hliða og einbeita sér að framkvæmdastjórastöðunni. Við af honum tók Ralph Hasenhüttel. Hasenhüttel hélt í hefðir RB-veldisins með kraftmiklum hápressu. Það skilaði árangri, liðið varð í öðru sæti og komst í Meistaradeildina.

Á öðru tímabili fjaraði heldur undan árangrinum. Þýsk lið eru ekki vön að spila þrjá leiki á viku, þar er talað um „enska viku“ þegar það gerist og Meistaradeildin tók á. Svo fór að liðið endaði í sjötta sæti og frá þessu ári eru til sögur um ágreining nafnanna að tjaldabaki.

Alltént vildi Leipzig ekki framlengja samning Hasenhüttel, sem átti þá eitt ár eftir. Hvort sem það var út af slökum árangri eða vegna þess að búið var að semja við Julian Nagelsmann eftir ár, fór það svo að Hasenhüttel hætti og Rangnick settist á ný tímabundið í stjórastólinn. Hasenhüttel var nokkrum mánuðum síðar ráðinn til Southampton. Þar er hann enn.

Flestir heilir hjá Southampton

Þessir gömlu samherjar leiða saman lið sín á Old Trafford klukkan 12:30 á morgun. Þrátt fyrir listrænan ágreining fyrri tíðar mun samband þeirra vera ágætt í dag. Hasenhüttel hefur áunnið sér virðingu fyrir árangur sinn með Southampton, þrátt fyrir stöku slys eins og 9-0 tap á Old Trafford fyrir nánast sléttu ári. Þann dag voru margir leikmenn liðsins fjarverandi. Í dag hefði sennilega verið sagt að þeir væru með Covid og leiknum verið frestað.

Staðan er öllu skárri í dag, aðeins fjórir leikmenn eru skráðir meiddir. Þar af gæti Nathan Redmond mætt til leiks en varnarmaðurinn Lyanco er frá fram til vors vegna tognunar aftan í læri í síðasta leik liðsins í janúar.

Grunnurinn sem Hasenhüttel tók við var ágætur, en hann hefur haldið fast í þýskar hefðir og liðið spilar fínustu hápressu. Hún lagði grunninn að óvæntum 2-3 sigri á Tottenham (Takk!) á útivelli á miðvikudag. Því ættu gestirnir að mæta fullir sjálfstrausts. Vonandi er þó að þeir hafi aðeins þreyst.

Þjálfarinn spilar ekki leikinn

Gleðin er ekki jafn mikil hjá Rangnick, enn á ný berast fréttir um að leikmenn séu ósáttir við þjálfunaraðferðir og að aðstoðarþjálfarar þyki ekki nógu góðir. Merkilegt er að sömu vandamálin skjóti aftur og aftur upp kollinum, sama hver stjórinn er!

Það er ekki nýtt að þegar illa gengur er ábyrgðinni varpað á aðra. Middlesbrough átti að vera skyldusigur og Burnley sýnd veiði. Ljósi punkturinn er að liðið spilaði sannarlega nógu vel til að vinna báða leikina, frammistaðan hefur batnað síðustu vikur. Hvað sem leikmönnum finnst um þjálfunaraðferðirnar þá virðast þær skila einhverjum árangri. Haldi liðið haus og áfram á þeirri braut er vonandi að lukkan falli með liðinu gegn snúnari andstæðingi á morgun, en sem kunnugt er hafa Ralf og aðstoðarmenn hans farið illa með fjölda dauðafæra í síðustu leikjum!

Hvað á að gera við?

Þeirra bíða nokkrar snúnar ákvarðanir í liðsvalinu. Cristiano Ronaldo hefur ekki skorað í síðustu fimm leikjum og ekki leikið átakanlega vel. Edinson Cavani er allur af vilja gerður en gengur engu betur. Hvað gerir þjálfarinn þegar framherjarnir skora ekki? Er til dæmis reynandi að stilla Marcus Rashford upp fremstum?

Er kominn tími á að ferskja upp einhverja af þeim fótum sem þegar spilað hafa 210 mínútur í vikunni? Hverjir henta gegn fljótu og pressuglöðu liði Southampton? Er rétt að skipa inn Anthony Elanga, sem hefur orð á sér fyrir að vera duglegur að finna svæði þegar hann hefur ekki boltann? Hvað með fyrirliðann Harry Maguire, sem átti ekki gott kvöld gegn Burnley. Er Viktor Lindelöf, sem almennt er betri í stuttu spili, betri kostur?

Útlit er fyrir að miðjan verði óbreytt. Fred er frá vegna Covid og Nemanja Matic hefur ekki getað æft seinni hluta vikunnar. Engar fréttir eru af Eric Bailly en Alex Telles hefur náð sér af veirunni.

Þetta ætlar ekki að takast

Það jákvæða er að framfarir eru vel sýnilegar á leik Manchester United. En það er dýrt að klúðra dauðafærum og láta dæma af sér tvö gegn botnliðinu sem að auki nýtir sitt eina færi.

Ralf Rangnick gerði tvær breytingar á byrjunarliði Manchester United gegn Burnley í gærkvöldi frá leiknum gegn Middlesbrough á föstudag. David de Gea kom inn í stað Dean Henderson og Edinson Cavani byrjaði frammi í staði Cristiano Ronaldo. Seinni breytinguna skýrði Ralf með því að gegn Burnley væri þörf á mörgum stuttum sprettum en spurningin er hvort Ronaldo hafi í raun verið settur á bekkinn eftir að hafa ekki skorað í fjórum leikjum í röð.

United tók strax yfirhöndina og skoraði mark strax á tólftu mínútu. Aukaspyrna Bruno Ferndandes hitti beint á pönnuna á Raphael Varane sem eðlilega gladdist yfir því sem hann taldi sitt fyrsta mark fyrir félagið. En þótt markið virtist við fyrstu sýn eðlilegt kom fljótt í ljós að dómarahópurinn taldi ekki allt með felldu. Eftir ítrekaðar athuganir VAR-dómarans var Mike Dean kallaður að hliðarlínunni. Hann var fljótur að kveða upp niðurstöðu: Harry Maguire kom úr rangstöðu til að hindra Jay Rodriguez, annan þeirra sem dekka átti Varane og markið var dæmt af.

Sex mínútum síðar komst United yfir – löglega. Markus Rashford átti gott hlaup inn á teiginn vinstra megin og sendi boltann niður að endalínunni þar sem Luke Shaw kom askvaðandi og náði að senda út í teiginn þar sem Pogba mætti og smellti knettinum efst í hornið.

Embed from Getty Images

Tveimur mínútum síðar var komið að næsta marki til að vera dæmt af. Shaw gaf fyrir frá vinstri og á fjærstönginni var Rashford sem sendi boltann fyrir markið þar sem varnarmaður Burnley sendi boltann inn. Nokkrum sekúndum síðar var ljóst að línuvörðurinn hafði flaggað. Pogba, sem var fyrir framan Rashford á fjærstönginni, hafði sett hendurnar í bak og andlit varnarmanns Burnley og markið því dæmt af vegna brots.

United hélt áfram að yfirspila Burnley. Þegar flautað var til hálfleiks hafði United átt 12 marktilraunir gegn engri. Besta færið féll fyrir Cavani. Enn og aftur gaf Shaw fyrir frá vinstri, boltinn fór í boga af varnarmanni yfir á fjær þar sem Cavani stóð og skallaði að marki. Mögulega hefði hann getað náð meiri krafti í skallann með að stökkva upp og mæta boltanum en varnarmenn Burnley höfðu þrengt að honum auk þess sem markvörðurinn Nick Pope gerði það eina sem hann gat – kastaði sér þvert yfir markið og varði.

Spurning um að halda aðeins út?

Heimamenn komu dýrvitlausir til seinni hálfleiks, fóru fast í návígi og settu góða pressu á United, sem reyndar náði að svara henni með skyndisókn. Ekki voru þó liðnar nema tvær mínútur þegar Burnley jafnaði, með marki sem enginn varnarmaður United getur verið stoltur af.

Ekkert samband virtist milli Maguire og Varane sem fyrst voru hvergi nærri Wout Weghorst sem lék boltanum inn fyrir á Jay Rodriguez sem kom blint á þá af kantinum, lék inn að markinu, lyfti boltanum framhjá de Gea og skoraði sitt fyrsta mark í 50 leikjum. Luke Shaw lék hann réttstæðan með að vera töluvert fyrir aftan samherja sína.

Markið gaf Burnley kraft, nokkrum mínútum síðar átti Weghorst frábært langskot sem de Gea skutlaði sér niður til að verja. Smám saman fór krafturinn að þverra af Burnley sóknarlega, ljóst var að Uniited hefði aðeins þurft að halda út í nokkrar mínútur í byrjun til að halda hreinu, en skaðinn var skeður.

Burnley pakkar í vörn

Um miðjan hálfleikinn vildu Burnley-menn fá Maguire rekinn út af. Hann slæmdi höndinni í mótherja sem var að hlaupa framhjá honum og þar með einn í gegn. Sá dómur var þó ekki einu sinni endurskoðaður, boltinn var vel fyrir ofan þá og Burnley-maðurinn því vart kominn í marktækifæri. Því dugði gult spjald.

Þegar á leið fóru Burnley menn að safnast í vel skipulagðar varnarlínur og sýndu hvers vegna fáir hafa trú á að liðið falli, jafnvel þótt það sé neðst. Með tíu Burnley-menn fyrir aftan boltann reyndist United erfitt að skapa sér afgerandi marktækifæri. Það besta fékk Ronaldo um tíu mínútum fyrir leikslok, en skalli hans úr teignum fór yfir enda Ben Mee alveg í honum. Ronaldo fékk síðan annað skallafæri um það leiti sem leiktíminn var að renna út auk þess sem við lok uppbótartíma mætti Maguire á fjærstöngina en í fylgd varnarmanns og boltinn hrökk af öxl hans aftur fyrir.

Ekki nóg

Ralf Rangnick sagði eftir leikinn að enginn gæti verið sáttur með eitt stig. Það er rétt. Annan leikinn í röð hefði United átt – og verðskuldað – að gera út af við augljóslega lakari andstæðing í fyrri hálfleik. Hvað varðar einstaka leikmann þá var Shaw frábær á kantinum en illa staðsettur í markinu. Jadon Sancho var líka skapandi en lokasending hans ekki nógu góð. Paul Pogba var öflugur á miðjunni og skoraði frábært mark en hvarf um tíma í seinni hálfleik, á þeim mínútum sem United var helst í basli.

Hægt er að pirrast yfir mörkunum sem dæmd voru af, sérstaklega eftir „ekki-hendina“ hjá Boro. Einhverjir dómarar hefðu sleppt brotunum, sagt Burnley-mönnum að herða sig, en eftir ítarlega skoðun verður að staðfesta dóma Dean sem rétta.

Það er vinsælt meðal þjálfara í dag að tala um frammistöðu og framfarir frekar en úrslit. Það eru batamerki á leik United. Varnarleikurinn og miðjan eru orðin betri, Burnley fékk eitt alvöru færi, nokkur hálffæri. Ekki fjölda dauðafæra. Það sást að United var töluvert betra fótboltalið, sérstaklega í fyrri hálfleik voru fínar sóknir í gangi og leikskipulagið með að fara upp bakvið bakverðina gekk þokkalega en því miður nýttust færin ekki. Þegar um er að ræða Manchester United skipta úrslitin máli.

Grautfúlt og dýrkeypt er að hafa ekki unnið botnliðið. West Ham náði í gærkvöldi fjórða sætinu af United, Arsenal og Tottenham geta leikandi gert það með að vinna leikina sem þau eiga inni – meira að segja Wolves. Það eina góða er að önnur lið í baráttunni um fjórða sætið eru líka óstöðug, en United verður að klára leiki gegn liðum neðar í töflunni til að byggja upp sjálfstraust og safna stigum áður en kemur að viðureignum gegn hákörlunum með vorinu.

Lið United

Varamenn: Henderson, Lindelöf, Jones, Wan-Bissaka, Matic, Mata, Lingard (80′), Ronaldo (68′), Elanga (85′)

Ekki þýðir að dvelja lengi við hrakfarirnar gegn Middlesbrough í bikarnum um helgina. Komið er að næsta leik sem er gegn Burnley á Turf Moor.

United getur tekið það með sér út úr leiknum gegn Boro að hafa skapað sér nóg af færum, að sögn Ralf Rangnick til að skora sex mörk í venjulegum leiktíma. Boro tókst hins vegar að slefa inn í vítakeppni og hafa þar betur. Slík úrslit eru einkennandi fyrir „eitt skref áfram – tvö afturábak“ stöðuna sem United hefur verið fast í nú í tæpan áratug.

Fred og Alex Telles greindust með Covid eftir landsleikjahléið. Hvorugur þeirra verður með á morgun. Það gulltryggir Luke Shaw byrjunarliðssæti og líklega byrjar Pogba inni á miðjunni með McTominay, líkt og á föstudag.

Jadon Sancho kenndi sér meins í lok leiks. Ekki hefur annað heyrst en hann sé heill. Sama er að segja um Bruno Fernandes.

United var með tvo markverði á bekknum en vantaði samt eitt nafn upp á að fylla skýrsluna á föstudag. Edinson Cavani og Jesse Lingard æfðu báðir á mánudag eftir að hafa fengið helgarfrí, sem talsvert hefur verið gagnrýnt. Viktor Lindelöf var fjarri til að sinna fjölskyldunni sem fékk áfall eftir innbrot. Hann er trúlega klár. Ekkert hefur spurst til Eric Bailly sem kom meiddur úr Afríkukeppninni.

Líklegt verður að teljast að Rangnick stilli upp svipuðu byrjunarliði og gegn Boro. Þó gætu alltaf orðið einhverjar breytingar eins og gengur og gerist. David de Gea kemur væntanlega aftur í markið og svo er spurning hvort Elanga byrji, þá trúlega á kostnað Sancho eða Rashford.

Hjá Burnley er Jóhann Berg Guðmundsson fjarri eftir að hafa þurft að láta fjarlægja botnlangann. Matej Vydra er líka frá vegna meiðsla og Josh Brownhill í banni en Charlie Taylor og Ashley Barnes tæpir.

Nýi framherjinn Wout Weghorst leikur sinn annan leik fyrir félagið. Segja má að Burnley hafi Burnley-að yfir sig með að kaupa framherja upp á 1,96 metra. Það verður ærin áskorun fyrir Varane og Maguire. Weghorst er ekki sá fljótasti að hlaupa, en snöggur að hugsa og framkvæma sem sést meðal annars á 20 mörkum hans í 34 leikjum fyrir Wolfsburg í fyrra.

United er sem stendur í fjórða og síðasta Meistaradeildarsætinu, sem bæði Arsenal og Tottenham geta hrifsað á ný með að vinna þá leiki sem liðin eiga inni. Þess vegna verður að gjöra svo vel og klára hvern einasta leik, sérstaklega gegn liðum á botninum eins og Burnley. Að sama skapi þarf heimaliðið að fara að hirða stig til að forðast fallið. Keppninautarnir í Norwich, Watford jafnvel Newcastle hafa skrapað inn stigum síðustu vikur á meðan Burnley hefur sokkið dýpra. Jafntefli á heimavelli gegn Watford á laugardag voru úrslit sem liðið hafði engan veginn efni á. Liðið hefur aðeins unnið einn sigur í vetur og vonandi er að það þurfi að bíða fram yfir morgundaginn eftir þeim næsta.

Leikurinn hefst klukkan 20:00 að íslenskum tíma.