Rauðu djöflarnir

Enska úrvalsdeildin

Manchester United 1:0 West Ham United

skrifaði þann | 23 ummæli

Manchester United tók á móti West Ham United á Old Trafford í dag í miklum baráttuleik sem skipti töluverðu máli fyrir komandi Meistaradeilarsætisbaráttu hjá báðum liðum. Eftir mikinn og misskemmtilegan baráttuleik stefndi allt í markalaust jafntefli þegar Marcus Rashford poppaði upp á réttum stað á réttum tíma og stýrði flottri fyrirgjöf Cavani í netið af stuttu færi á lokasekúndum uppbótartíma. Alvöru baráttusigur og United skellti sér í fjórða sætið í bili.

Byrjunarliðið hjá Manchester United var svona:

1
de Gea
27
Telles
5
Maguire
19
Varane
20
Dalot
17
Fred
39
McTominay
56
Elanga
18
Fernandes
11
Greenwood
7
Ronaldo

Bekkur: Henderson, Jones, Lingard, Mata, Matic, van de Beek, Cavani (82′ fyrir Greenwood), Martial (82′ fyrir Fred), Rashford (61′ fyrir Elanga).

Byrjunarlið gestanna:

13
Areola
3
Cresswell
4
Zouma
15
Dawson
5
Coufal
28
Soucek
41
Rice
8
Fornals
10
Lanzini
20
Bowen
9
Antonio

Bekkur: Randolph, Diop, Fredericks (70′ fyrir Coufal), Masuaku, Johnson, Kral, Noble, Vlasic, Yarmolenko.

Mörk:

Marcus Rashford með eina mark leiksins. Get in!

Gul spjöld:

Manchester United: Maguire

West Ham: Rice

Fyrri hálfleikur

West Ham mætti til leiks, eins og vænta mátti, mjög vel skipulagt og til í baráttu. Manchester United var það hins vegar líka og hafði góð tök á leiknum að mestu í fyrri hálfleik. Varðist heilt yfir mjög vel og stjórnaði miðjunni megnið af leiknum. Hins vegar vantaði upp á þegar kom að snertingum og sendingum á síðasta vallarþriðjungi. Það var þó eitthvað betra yfirbragð á leik liðsins í fyrri hálfleik en hefur verið, að mínu mati.

West Ham, með hinn öfluga Declan Rice í fararbroddi, varðist þó líka vel. Rice var út um allan völl og er orðinn afskaplega góður í að koma auga á hvar hætturnar geta leynst. Hann var alltaf mættur í hjálparvörn og datt iðulega inn á svæði nokkrum skrefum áður en boltinn og spilið mættu þangað. Þótt ég ætli ekki að fara að ofhæpa hann alveg þá minnti þetta element í hans leik mig töluvert á Carrick upp á sitt besta. Hann var líka að vinna öll sín einvígi í fyrri hálfleik og kom boltanum nánast mistakalaust frá sér á samherja. Hann vantar enn ýmislegt upp á að ná Carrick sem leikmanni en hann er að þroskast og þróast í verulega flottan leikmann. Verðmiðinn er vissulega hár en það bara hlýtur að koma að því að hann haldi í einhvern toppklúbb.

Embed from Getty Images

Bruno Fernandes skapaði annars álitlegt upphlaup fyrir Greenwood í byrjun leiks en Mason tapaði á því að vilja snúa til að koma boltanum á vinstri löppina frekar en að láta bara vaða í fyrsta með hægri. Skil ekki alveg af hverju, verandi þetta jafnfættur og hann hefur oftast sýnt, en hann náði í það minnsta ekki skotinu.

Ronaldo setti aukaspyrnu af hættulegum stað beint í varnarvegginn. Það var lýsandi fyrir marktilraunir í fyrri hálfleik. Liðin áttu saman 6 tilraunir og ekkert þeirra hitti rammann, þetta var allt ýmist framhjá rammanum eða í varnarmann.

Ronaldo vildi svo fá vítaspyrnu á 35. mínútu þegar hann var í baráttu við varnarmann um sendingu inn í teiginn. Hann fékk varnarmann vissulega aðeins í bakið en það var ekki mikið í þessu þótt sá portúgalski reyndi að mjólka þetta ansi mikið. Ekki vítaspyrna að mínu mati.

Seinasti hluti fyrri hálfleiks var svo meiri barátta og misheppnaðar sendingar fram á við hjá báðum liðum. 0-0 í hálfleik.

Seinni hálfleikur

Það var engin sérstök ástæða til að breyta neinu í hálfleik og barátta liðanna hélt áfram í seinni hálfleiknum.

Eftir tæplega fimm mínútna leik kom loks fyrsta tilraun leiksins sem hitti á rammann. Fred fékk þá nokkuð óvænt færi vinstra megin við D-boga vítateigsins og lét vaða. Fínasta skot sem stefndi langleiðina upp í skeytin fjær en Areola náði að verja vel í horn.

Manchester United hafði ekki skorað úr skrilljón hornspyrnum í röð, eða álíka, en Varane var nálægt því á 58. mínútu þegar hann tók gott hlaup á nærstöngina og mætti fínni hornspyrnu frá Alex Telles. Hann reyndi að sneiða boltann með höfðinu í fjærstöngina en boltinn var aðeins of hár fyrir það. Munaði alls ekki miklu þó.

Embed from Getty Images

Elanga átti ágætis skottilraun eftir um klukkutíma leik en hann var að taka skoppandi bolta sem kom á ferðinni svo þetta var erfitt og boltinn endaði framhjá. Stuttu síðar fór hann svo af velli fyrir Marcus Rashford.

Seinni hálfleikurinn var skemmtilegri en sá fyrri en þó vantaði enn upp á lokaafurðina hjá báðum liðum. Eftir því sem leið á leikinn fóru gestirnir að falla aftar og aftar en okkar menn reyndu að finna leiðir framhjá þeim. West Ham reyndi þó að nýta tækifærin sem gáfust, fengu til dæmis gott upphlaup sem endaði með frábærum varnarleik frá Alex Telles og Mason Greenwood í sameiningu.

Rangnick ákvað svo að gera sóknarsinnaða breytingu á 82. mínútu þegar Greenwood og Fred fóru af velli fyrir Cavani og Rashford. United skipti þá yfir í hálfgert 4-1-3-2 kerfi og reyndi að sækja sem mest til að vinna leikinn. Áfram nýttu gestirnir þó tækifærin til að sækja hratt og voru tvisvar nálægt því á lokamínútunum að skora mark. Á 87. fengu þeir hornspyrnu og hafa, ólíkt Manchester United, verið hættulegir í hornspyrnum í vetur. Soucek réðst á boltann og náði skalla sem fór hættulega nálægt stönginni fjær en sem betur fer framhjá. Á 90. mínútu þurfti de Gea svo allt í einu að verja vel, í fyrsta skipti í leiknum, þegar boltinn barst upp völlinn og Antonio átti hörkuskot niðri nær sem de Gea varði í horn.

Embed from Getty Images

En á lokasekúndum uppbótartímans kom sigurmark Manchester United. Ronaldo, Martial, Cavani og Rashford tóku þá þátt í hröðu spili, í þessari röð. Martial sendi góða stungu á Cavani (sem virtist reyndar rangstæður en VAR var ósammála því) sem brunaði upp, gaf fastan jarðarbolta fyrir markið þar sem Rashford var mættur á fjær og skoraði. Þvílík gleði! West Ham hafði rétt tíma til að taka miðjuna áður en leikurinn var flautaður af. 3 stig og fjórða sætið staðreynd! Í það minnsta þangað til á morgun.

Pælingar eftir leik

Declan Rice var algjörlega frábær í þessum leik. Virkar eins og ekta leikmaður sem Manchester United gæti notað. Stuðningsmenn virðast margir á sama máli.

https://twitter.com/raududjoflarnir/status/1484928249335590916?s=20

Manchester United hélt hreinu í þessum leik, í fyrsta skipti í háa herrans tíð. Enda var varnarlínan mjög traust í þessum leik og de Gea flottur í eina skiptið sem reyndi eitthvað á hann. Ég hafði mjög gaman af bakvörðunum og fannst Dalot eiga einn sinn besta leik sem ég hef séð hjá United. Varane og Maguire voru líka solid í sínum leik og ánægjulegt að sjá Maguire eiga svona sterka innkomu eftir gagnrýni að undanförnu. Það var helst að þeir væru að klikka í löngum sendingum, þar hefði Lindelöf verið betri en þeir vörðust mjög vel og náðu að taka þátt í spili og sókn þegar færi gafst.

Skiptingarnar hjá Rangnick gengu upp. Það var gaman að sjá hann keyra á að sækja þrjú stig og ná þeim með þessum hætti. Allir leikmennirnir sem komu inn á voru sóknarsinnaðir og þeir áttu allir stóran þátt í markinu. Martial fékk reyndar óblíðar móttökur þegar hann kom inn á en hann reyndi samt sitt besta, sjáum hvernig þetta verður í framhaldinu.

Embed from Getty Images

Maður leiksins að mínu mati var Diogo Dalot en Rashford fær heiðurstilnefningu fyrir að tryggja stigin þrjú.

Nú er komið að smá fríi fyrir leikmenn Manchester United en næsti leikur verður föstudaginn 4. febrúar þegar Middlesbrough kemur í bikarheimsókn á Old Trafford. Vonandi nýtir Manchester United fríið vel og kaupir eins og einn öflugan miðjumann eða svo…

Enska úrvalsdeildin

Hamrarnir mæta í heimsókn

skrifaði þann | 1 ummæli

Manchester United spilaði í vikunni sinn 1.938. leik á útivelli í efstu deild á Englandi og vann sinn 704. sigur með því að leggja Brentford með þremur mörkum gegn einu. Árangurinn er þó hlutfallslega miklu skemmtilegri ef við horfum bara á deildarleiki frá stofnun ensku úrvalsdeildarinnar, þá var þetta 300. sigurinn í aðeins 568 leikjum. Það er hressilega gott sigurhlutfall þótt auðvitað megi aðallega þakka framúrskarandi spilamennsku á fyrstu 20 árum þeirrar deildarkeppni fyrir frekar en spilamennskunni á síðustu árum. Og þó, auðvitað fóru piltarnir hans Solskjærs á virkilega gott og öflugt útileikjaskrið í fyrra, sællar minningar.

Á morgun er hins vegar komið að heimaleik númer 1.938 í efstu deild á Englandi. Sigurhlutfallið er, eins og vænta má, töluvert betra á heimavelli en útivelli. Þar eru sigrarnir orðnir 1.155. Sé aftur miðað við upphaf knattspyrnu stofnun úrvalsdeildarinnar eru heimaleikir í deild orðnir 567 og sigrar í þeim 397 talsins. Styttist í stóra fjarkann og vonandi að liðið komist einum leik nær því marki á morgun.

En þrátt fyrir alla þessa talnasagnfræði þá er þetta bara einn leikur sem er framundan og þrjú stig í boði í honum eins og vanalega. Þetta eru mikilvæg stig fyrir bæði lið í baráttunni um sæti í Meistaradeild Evrópu á næsta tímabili. West Ham stendur töluvert betur en okkar menn eins og er, auk þeirra eru bæði Tottenham og Arsenal að þvælast fyrir þessu markmiði okkar. West Ham eru í fjórða sætinu eins og er en hafa leikið fleiri leiki en öll hin liðin sem eru í baráttunni. Okkar lið stendur verst að vígi eins og er, á leik inni á West Ham en hefur spilað fleiri leiki en bæði Arsenal og Tottenham. Eins og spilamennska United hefur verið síðustu vikur, og raun á tímabilinu öllu ef fyrsti leikurinn er skilinn frá, þá er erfitt að segja að liðið eigi heima í Meistaradeildinni. En það er enn tími til að spýta í lófa, bretta upp ermar og fara að vinna fyrir þessu sæti.

Leikurinn á morgun hefst á hinum klassískasta af leiktíma, eins og ótalmargir af þeim 3.875 leikjum sem Manchester United hefur spilað í efstu deild hafa verið flautaðir á í gegnum tíðina, klukkan 15:00 á laugardegi. Dómari leiksins verður Jonathan Moss. Með honum verða Marc Perry og Timothy Wood á flöggum og fjórði dómarinn Michael Salisbury. Í VAR-herberginu verður Paul Tierney með Ian Hussin sér til aðstoðar.

Manchester United

Það hefur ekki gengið eins vel hjá liðinu að fóta sig eftir að Ralf Rangnick tók við og flestir höfðu vonað. Það er ekki að sjá að hann sé að ná að fá liðið til að spila sinn bolta, hann er að nota mikið til sömu leikmenn og Solskjær var að nota með misgóðum árangri og úrslitin hafa verið álíka rokkandi og spilamennskan. United er að vísu aðeins búið að tapa 1 leik af síðustu 12 en 4 jafntefli og heilt yfir lítið spennandi spilamennska hafa gert lítið til að kveikja neistann í stuðningsmönnum.

Embed from Getty Images

David de Gea hefur verið að spila fantavel en það er því miður oft þannig að þegar de Gea er hvað bestur þá er það merki um að restin af liðinu sé ekki að spila nógu vel. Það var þó frábært að sjá Elanga, Greenwood og Rashford skora mjög góð mörk í síðasta leik og Bruno vera duglegan að leggja upp og skora í síðustu tveimur leikjum. Það er eitthvað sem liðið þarf á að halda núna.

Eric Bailly er enn í Afríkukeppninni með landsliði Fílabeinsstrandarinnar. Hann spilaði fyrstu tvo leikina í riðlakeppninni en fór meiddur af velli í öðrum leiknum og spilaði ekki þann þriðja. Fílabeinsströndin er þó komið áfram í 16-liða úrslit og mætir Egyptalandi á miðvikudag í næstu viku, það verður áhugavert að sjá hvort Bailly verði aftur mættur í liðið. Hann gæti þó verið búinn að spila sinn síðasta leik fyrir Manchester United því það eru sögusagnir um að hann leiti leiða til að komast frá félaginu strax í janúarglugganum.

Embed from Getty Images

Paul Pogba, Aaron Wan-Bissaka, Edinson Cavani, Jesse Lingard og Luke Shaw eru allir skráðir tæpir vegna meiðsla eða leikforms. Harry Maguire er ekki lengur meiddur en hefur verið mikið á bekknum í síðustu leikjum. Það var ekki sjálfgefið að hann myndi ná sætinu aftur af Victor Lindelöf eins og Svíinn hefur verið að spila. En á meðan Manchester United spilaði síðasta leik var brotist inn á heimili Lindelöf þar sem konan hans og börn voru heima. Skiljanlega fór það illa í Lindelöf-fjölskylduna sem er að jafna sig eftir þetta í Svíþjóð og mun Victor því fá frí í þessum leik. Maguire mun því líklega koma aftur inn í vörnina í staðinn.

Scott McTominay hefur oft verið gagnrýndur af stuðningsmönnum Manchester United en hann var mjög góður gegn Brentford, sérstaklega í síðari hálfleik. Hann þurfti þó að yfirgefa völlinn vegna meiðsla. Vonum að þau séu ekki að trufla hann neitt meira.

Spáum þessu byrjunarliði:

de Gea
Telles
Maguire
Varane
Dalot
Fred
McTominay
Elanga
Fernandes
Greenwood
Ronaldo

Vilt þú sjá liðið öðruvísi? Endilega hentu því þá í komment hér að neðan.

West Ham United

Fyrir þau ykkar sem trúið á hjátrú og jinx eða annað slíkt þá biðst ég fyrirfram afsökunar á því sem kemur hér næst.

David Moyes hefur aldrei unnið útisigur í deildinni á Old Trafford sem knattspyrnustjóri. Í fjórtán tilraunum til þessa hefur hann fjórum sinnum náð jafntefli en tapað 10 leikjum. Aðeins Harry Redknapp á fleiri leiki á Old Trafford án sigurs (15).

Embed from Getty Images

Þrátt fyrir allt sem hægt var að segja um stjóratíð Moyes hjá Manchester United þá má Skotinn eiga það að hann hefur staðið sig mjög vel með þetta West Ham lið. Hann hefur sýnt mikla kænsku á leikmannamarkaðnum og sett saman afar sprækt og seigt lið sem hefur haldið sér í Evrópubaráttunni á síðustu tímabilum. Þetta tímabil er engin undantekning, West Ham er sem stendur í fjórða sætinu með 37 stig eftir 22 leiki. Og sá árangur hefur ekki náðst á einhverjum rútulagningum heldur hafa aðeins þrjú efstu liðin skorað fleiri mörk en West Ham (41 mark).

Einn af bestu leikmönnum West Ham á þessu tímabili hefur verið Jarrod Bowen. Þessi skemmtilegi leikmaður getur spilað bæði frammi, á kanti og miðju og hefur verið mikið notaður í holunni. Hann hélt með Mancester United þegar hann var krakki og átrúnaðargoð hans var David Beckham. Hann mun þó væntanlega ekki láta það stoppa sig á morgun heldur reyna að bæta í markaaðkomu sem hefur verið mjög blómleg í síðustu leikjum. Í síðustu 7 leikjum er hann með 5 mörk og 3 stoðsendingar, samtals er hann með 9 mörk og 8 stoðsendingar í öllum keppnum fyrir West Ham á tímabilinu.

Embed from Getty Images

Annar sem hefur verið góður er Jamaíkinn Michail Antonio sem er ávallt drjúgur fyrir West Ham. Hann hefur skorað 8 mörk í deildinni og lagt upp 6 önnur. Þeir eru þó fleiri hættulegir í þessu liði og hefur markaskorunin verið að dreifast ansi vel. 14 leikmenn West Ham eru komnir á blað í deildinni til þessa.

West Ham er líka með einn leikmann á Afríkuleikunum, það er Alsíringurinn Saïd Benrahma. Hann spilaði þó ekki nema 52 mínútur eða svo í tveimur leikjum af þremur í riðlakeppninni þar sem ríkjandi meistarar Alsír féllu úr leik. Benrahma er því á leiðinni heim aftur en nær samt ekki þessum leik.

Angelo Ogbonna er meiddur. Tomas Soucek, Kurt Zouma og Mark Noble eru allir tæpir.

West Ham tapaði síðasta leik sínum, skrautlegum 2-3 leik á heimavelli West Ham gegn Leeds á sunnudag. West Ham náði tvisvar að jafna leikinn en Leeds vann með þrennu frá Jack Harrison. Þar áður hafði West Ham unnið 4 leiki í röð og skorað í þeim 11 mörk.

Moyes stillir líklega upp eitthvað í þessa áttina:

Fabianski
Cresswell
Diop
Dawson
Coufal
Rice
Soucek
Fornals
Lanzini
Bowen
Antonio

Mikilvægur leikur og algjörlega krúsjal að vinna þennan leik til að haldast í baráttunni um Meistaradeildarsæti. Hvaða trú hafið þið á liðinu fyrir þennan leik?

Enska úrvalsdeildin

Brentford 1:3 Manchester United

skrifaði þann | 3 ummæli

Ralg Rangnick gerði eina breytingu á liðinu sem mætti Aston Villa á sunnudaginn var. Í stað Cavani kom Ronaldo inn.

1
De Gea
27
Telles
19
Varane
2
Lindelöf
20
Dalot
17
Fred
31
McTominay
18
Bruno
36
Elanga
7
Ronaldo
11
Greenwood

Á bekknum voru þeir: Henderson, Heaton, Maguire(’70), Mata, Jones, Matic(’84), van de Beek, Rashford(’70) og Martial.

Fyrri hálfleikur

Leikurinn byrjaði ekki vel, a.m.k. ekki fyrir United menn. Brentford mættu eins og þeir hefðu gírað sig upp í úrslitaleik Meistaradeildarinnar og voru dýrvitlausir framan af. Fyrstu mínúturnar virtist mark liggja í loftinu og einungis David de Gea í fantaformi sem sá við þeim. United var kannski meira með boltann en þeir hunskuðust ekki til að gera nokkurn skapaðan hlut af viti með hann. Mathias Jensen og Vitaly Janelt fengu sitthvort dauðafæri sem de Gea varði með lipurri fótafimi og Bryan Mbeumo var eins og gazella út um allan völl og mætti halda að það hefðu verið þrjú eintök af honum á vellinum.

Á meðan voru miðjumennirnir okkar, sérstaklega McTominay og Bruno, að hanga á boltanum fá menn í bakið og missa boltann á hættulegum stöðum. Þetta var eflaust besti leikurinn til að fá akkurat núna. Heimamenn voru tilbúnir í slaginn og mættu í hverja tæklinguna og hvert einvígið með það markmið að koma út sem sigurvegari á meðan United virtust vera að reyna að hanga fram að hálfleik.

Embed from Getty Images

Því hvernig getur lið sem er 70% með boltann gert nákvæmlega ekki neitt allan hálfleikinn á meðan heimaliðið rétt kemur við boltann en eru stórhættulegir í hvert skiptið? Þeir spiluðu líka upp á föstu leikatriðin, sem virðast ætla verða einhvers konar farsi hjá okkar mönnum þrátt fyrir að Eric Ramsey eigi að heita set-piece specialist-inn okkar. Það var þá, liðið var í eintómum vandræðum hvort sem um var að ræða hornspyrnur eða löng innköst.

Ekki gékk heldur betur sóknarlega í föstu leikatriðunum. Undirritaður fór á Kjarnafæðismótið hjá 8. flokk í sumar og þar eru ekki teknar hornspyrnur en ég efast stórlega um að þær væru verri en það sem var boðið upp á frá okkar mönnum í dag. Þar að auki skapaðist oft á tíðum heilmikil hætta eftir föstu leikatriðin okkar þar sem Brentford komst í boltann og brunaði í sókn.

Embed from Getty Images

Diogo Dalot átti reyndar ágætis tilraun fyrir utan teig á 25. mínútu en mikill snúningur á boltanum varð til þess að hann skrúfaðist frá vinklinum. Stuttu síðar fékk svo Jansen aftur tækifæri en enn varði de Gea með kolkrabbalíkri fótavinnu. Ethan Pinnock var svo þeirra hættulegasti maður í föstu leikatriðunum en hann átti fínan skalla á markið eftir rúmlega hálftíma leik. Báðum liðum mistókst hins vegar að skora í fyrri hálfleik, öðru liðinu mistókst að komast framhjá markverðinum en hinu liðinu mistókst að finna markið en það átti eftir að breytast.

 

Síðari hálfleikur

Þegar liðin mættu út úr búningsklefum í síðari 45 mínúturnar var greinilega búið að sparka í nokkra yfirborgaða rassa. Menn mættu út á völl eins og þeir ætluðu sér að spila tuðruspark. Strax á fyrstu mínútu komst Ronaldo í færi þegar hann fékk sendingu frá Mason Greenwood en færið var þröngt og skotið fór af varnarmanni og í horn. Úr horninu, sem var tekið stutt, kom ágætisfæri fyrir Ronaldo en skalli hann datt ofan á þverslánna en að öllum líkindum var portúgalinn í rangstöðu þegar sendingin kom.

Reyndar fékk Mathias Jensen ENN eitt tækifærið hinu megin á vellinum eftir hraða sókn heimamanna en honum tókst ekki að nýta færið sem Mbeumo skapaði. Sem betur fer fyrir okkar menn átti sá franski eftir að hafa sig hægan í síðari hálfleik miðað við þann fyrri.

Embed from Getty Images

En eftir tíu mínútna leik dróg loks til tíðinda. United var búið að liggja í sókn, en loksins virtist einhver ógn fylgja með, þegar Fred fékk boltann eftir að boltinn var búinn að berast manna á milli fyrir utan teiginn án þess að nokkur glufa hefði myndast á vörninni. Sá brasilíski kom auga á Anthony Elanga sem tók afbragðsgott hlaup inn í teig með Jansson á hælunum. Sænski prinsinn gerði gífurlega vel þegar hann tók við boltanum en boltinn hrökk af fætinum og upp í höfuð hæð á meðalmanni (semsagt vel yfir Elanga) sem stökk upp og skallaði boltann í netið framhjá Lössl í markinu. 0-1 og þungu fargi létt af öllum United mönnum.

https://twitter.com/StatmanDave/status/1483911935712190471

Það leið ekki á löngu þar til dróg til tíðinda aftur. McTominay, sem var gríðarlega kraftmikill og vinnusamur í dag, átti þá sendingu fram völlinn á Ronaldo sem kassaði boltann í hlaupaleiðina hjá Bruno sem stakk vörn heimamanna af og geystist í átt að teignum. Greenwood tók af rás með honum og þegar Lössl kom út á móti Bruno renndi hann boltanum fimlega yfir á Greenwood sem skoraði í tómt markið og tvöfaldaði forystun. 0-2.

Thomas Frank gerði þá þrefalda skiptingu og inn á komu þeir Shandon Baptiste, Yoane Wissa og Rico Henry í stað þeirra Vitaly Janelt, Sergi Canós og Mathias Jensen. Það gaf heimamönnum byr undir báða vængi fyrir lokametrana en mótleikur Ralf Rangnick fólst í því að taka Cristiano Ronaldo og Mason Greenwood útaf á 70. mínútu fyrir þá Harry Maguire og Marcus Rashford. Þétta átti vörnina og fara í 3 miðvarða varnarlínu til að draga sigurinn yfir línuna og forðast klúður eins og gegn Aston Villa um síðastliðna helgi.

Embed from Getty Images

Heimamenn virtust vera að snúa við blaðinu og ná smá yfirhönd í leiknum á 76. mín en þá fengu þeir þriðja markið í andlitið eins og rennblauta tusku. Scott McTominay vann enn einn boltann á miðjunni og snéri af sér tvo leikmenn áður en hann kom boltanum á Bruno Fernandes sem bar boltann að vítateignum. Marcus Rashford kom þá eins og eins manns eimreið hægra meginn við portúgalska töframanninn og fékk stungu inn fyrir vörnina og hamraði boltann á 170 km/klst upp í nærvinkilinn og gulltryggði sigurinn og þrjú verðmæt stig á töfluna.

Embed from Getty Images

Scott McTominay neyddist síðan til að fara af velli vegna meiðsla og í hans stað kom Nemanja Matic. Serbinn kom inn á þegar heimamenn fengu innkast ofarlega á vellinum en Beck, sem hafði verið að taka löngu innköstin fyrir Brentford, hlóð í eina kannónu inn í teiginn og eftir örlítið ping-pong inn í markmannsteignum datt tuðran fyrir lappirnar á Ivan Toney sem var búinn að hafa sig heldur hægan. Sá gerði sér lítið fyrir og skemmdi daginn fyrir David de Gea sem átti svo sannarlega skilið að halda markinu hreinu í dag en allt kom fyrir ekki. 1-3 og stefndi í æsispennandi mínútur þar sem heimamenn eygðu von um að koma inn öðru marki.

En eina hættulega færið féll okkur í skaut þegar Bruno Fernandes kom einn og óvaldaður með boltann inn fyrir vörnina og átti bara eftir að komast framhjá óöruggum Lössl í markinu en í stað þess að hamra boltann á markið, í stað þess að leggja hann innanfótar í fjærhornið, í stað þess að rekja boltann framhjá markverðinum eða skjóta framhjá markinu þá ákvað hann að vippa boltanum í hendurnar á Lössl sem lyfti engu öðru nema augabrúnunum til að lýsa undrun sinni á því hversu illa Bruno hefði nýtt færið.

Embed from Getty Images

En dómarinn flautaði leikinn fljótlega af og því 1-3 sigur United í höfn í kaflaskiptum leik sem vekur eflaust upp fleiri spurningar en hann svaraði. Næsti leikur liðsins er svo núna um helgina þegar West Ham kemur á Old Trafford kl 15:00 á laugardaginn. West Ham vélin hans Moyes hefur heldur betur verið á blússandi siglingu en hún hökkti í síðustu umferð þegar liðið tapaði 1-3 fyrir Leeds. Hamrarnir eru sem stendur í 4. sætinu, tveimur stigum á undan United sem á leik til góða á lærisveina Moyes. Leikurinn er því gríðarlega þýðingamikill í þessari Meistaradeildar baráttu og gæti vissulega flokkast sem sex stiga leikur!

Embed from Getty Images

Enska úrvalsdeildin

Nýliðar Brentford taka á móti Rauðu djöflunum í miðri viku

skrifaði þann | 2 ummæli

Þá er komið að næsta leik United en það er viðureign við nýliðana í Brentford sem átti að fara fram í desember en vegna kórónuveirufaraldursins var leiknum frestað. Um liðna helgi átti Manchester United erfiðan útileik gegn Aston Villa þar sem liðið glutraði niður tveggja marka forystu og voru líklega heppnir að sleppa heim með stig í farteskinu.

Ralf Rangnick hefur nú stýrt liðinu í átta leikjum og úr þeim komið 4 sigrar, 3 jafntefli og 1 tap. Honum hefur ekki enn tekist að setja mark sitt á leikstíl liðsins og einhverjir leikmenn virðast eiga í stökustu vandræðum með að finna sig í þessu nýja 4-2-2-2 leikkerfi hans. Það varð úr að Rangnick stillti því upp í 4-3-3 sem virtist ganga ansi vel í 70 mínútur en því miður er hver leikur 90 mínútur og því fór sem fór.

En á morgun taka býflugurnar í Brentford á móti okkur en Brentford sem var á efra skilti deildarinnar í desember þegar liðin áttu að mætast situr núna í 14. sæti deildarinnar með 1 sigur í síðustu sex leikjum sínum í deildinni. Sá leikur var einmitt gegn Aston Villa og tókst Býflugunum hans Thomas Frank því það sem okkur tókst ekki um helgina, að klára Aston Villa.

 

Brentford

Saga liðsins er hreint ótrúleg en liðið spilaði síðast í efstu deild á Englandi fyrir 74 árum. Tímabilið 2006/2007 endaði liðið í neðsta sæti í League One og féll í League Two (d-deildina). Var það að stóru leyti því að kenna að liðið tapaði 10 af síðustu 13 leikjunum í deildinni og fékk á sig 79 deildarmörk yfir tímabilið. Liðið fór í gegnum þrjá stjóra á tímabilinu og til að strá salti ofan í sárin voru fjármál félagsins í hræðilegum málum. En það var uppalinn Brentford stuðningsmaður, Matthew Benham, sem reyndist bjargvættur liðsins. Í september mánuði árið 2005 hafði hann hlaupið undir bagga fyrir félagið og lánað stuðningsmönnum eina milljón punda til að kaupa félagið sem um leið varð fyrsta atvinnufótboltafélagið í Lundúnum þar sem stuðningsmenn áttu meirihluta í félaginu.

Þrátt fyrir þessa peningainnspýtingu gekk ekki vel á vellinum og féll liðið eins og áður sagði í League Two og endaði liðið um miðja deild um vorið 2008. Þá var endurgerður samningur við Benham sem tryggði félaginu eina milljón punda árlega til fimm ára. Þetta gerði það að verkum að hann eignaðist 35% hlut í félaginu og liðinu tókst að vinna sig upp í League One aftur tímabilið á eftir. Að lokum gerði Benham enn einn samninginn við liðið sem færði honum meirihlutavöld yfir liðinu árið 2012.

Embed from Getty Images

Áhrifin Benham voru ekki einungis fjárhagsleg því með auknum umsvifum hans innan félagsins jókst áhersla liðsins á tölfræðigögn og leikgreiningu. Liðið gerði afskaplega vel á leikmannamarkaðinum og byggðist stefna liðsins á því að vinna út frá þessum gögnum og kaupa leikmenn sem voru vanmetnir þegar kom að verðlagi. Liðið fékk til liðs við sig leikmenn frítt eða fyrir lága upphæðir en seldi þá oft með miklum hagnaði stuttu síðar. Þannig kom Adam Forshaw frítt en var seldur á 3,5 millj. punda, eins með Stuart Dallas en hann seldur á 1,7 millj. punda. Andre Gray var fenginn til liðsins á 558 þús. pund en Burnley keyptu hann á rúmar 11 millj. punda einungis ári síðar.

Þannig hefur þetta haldist síðan, liðið notaði hagnaðinn af Gray sölunni til að fjármagna kaup á Ollie Watkins (6,5 millj.) og Neal Maupay (1,8 millj.) fyrir tímabilið 2017/2018. Tveimur árum síðar seldu þeir Maupay á 20 millj. og í fyrra seldu þeir Watkins á 30,5 millj. Þá keyptu þeir Saïd Benrahma (1,5 millj.) og Ezri Konsa (2,6 millj) og seldu þá á 24 millj. og 12 millj. innan tveggja ára.

Embed from Getty Images

Þetta hljómar örlítið eins og Jóakim Aðalönd sé að spila Football Manager en þrátt fyrir þessa gífurlegu leikmannaveltu hefur liðið staðið sig gríðarlega vel á vellinum á sama tíma. Eftir fimm ár í League One (2009/10 til 2013/14) tókst liðinu að vinna sér sæti í næstefstu deild (Championship) undir stjórn Mark Warburton. En þrátt fyrir að koma liðinu í umspilssæti á sínu fyrsta tímabili (5. sæti) tilkynnti stjórn Brentford að Warburton yrði ekki stjóri liðsins áfram. Liðið féll úr leik í umspilinu og næst tóku við stjórar sem ekki reyndust langlífir í starfi en í nóvember sama ár tók Dean Smith við liðinu sem þá endaði í 9. sæti. Á næstu fjórum tímabilum var liðið rétt fyrir ofan miðja deild og virtist vera að fóta sig í deild þeirra næstbestu á Englandi.

Embed from Getty Images

Það var svo í desember 2016 sem daninn Thomas Frank kom til liðsins sem aðstoðarþjálfari, en þegar Dean Smith lét af störfum í október 2018, tók Frank við aðalliðinu. Thomas Frank hafði þá einungis stýrt Brøndby í þrjú ár og þar áður stýrt unglingalandsliðum Danaveldis. Hann kláraði tímabilið 2018/19 með liðið í 11. sæti en á sínu fyrsta heila tímabili skilaði hann liðinu í 3. sæti Championship deildarinnar þrátt fyrir að hafa selt helsta markaskorara liðsins, Neal Maupay, fyrir tímabilið. Í undanúrslitum umspilsins lék liðið í síðasta sinn á heimavellinum Griffin Park og var það eins og skrifað í skýin að liðið myndi kveðja heimavöllinn til 116 ára á leið sinni í deild þeirra bestu.

Embed from Getty Images

Í úrslitum umspilsins mætti Brentford Lundúnaliðinu Fulham en eftir að David Raya, markvörður Brentford, gerðist sekur um eitt dýrasta skógarhlaup sögunnar sat liðið eftir í Championshipdeildinni með sárt ennið. Gríðarleg vonbrigði fyrir Thomas Frank og lærisveina hans en einnig Matthew Benham og aðra stuðningsmenn liðsins sem fæstir hverjir voru á lífi síðast þegar liðið var í efstu deild. Því á tímabilinu var mikið rætt um sóknarþríeyki liðsins, sem samanstóð af Said Benrahma, Bryan Mbeumo og Ollie Watkins eða BMW-línan en henni var stundum líkt við framlínuþríeyki Liverpool endar röðuð þeir inn mörkunum og var Watkins markahæstur í deildinni með 25 mörk.

Það boðaði því ekki gott að liðið missti bæði Benrahma og Watkins í sumarglugganum 2020. En rétt eins og áður, það kemur maður í manns stað og Ivan Toney, sem hafði verið hjá Peterborough í neðri deildunum fékk að stíga á sviðið. 31 mark frá honum í deildinni hjálpaði svo sannarlega liðinu sem endaði í 3. sæti á eftir Norwich og Watford en að þessu sinni fór liðið í gegnum úrslitaleik umspilsins og mætti lítilli mótspyrnu frá Svönunum í Swansea City og draumurinn orðinn að veruleika. Í fyrsta sinn í 74 ár var Brentford á meðal þeirra bestu.

Embed from Getty Images

Byrjun leiktíðarinnar hjá Brentford lofaði einnig góðu en eftir að meiðsli fóru að setja strik í reikninginn þá situr liðið í 14. sæti með 23 stig og markatöluna -9. Samt sem áður hefur liðið lagt lið eins og West Ham, Arsenal, Aston Villa og gert 3-3 jafntefli við Liverpool svo Brentford virðist eiga fullt erindi í deildina. Thomas Frank hefur verið lunkinn og sveigjanlegur þegar kemur að því að stilla upp liði Brentford. Að undanförnu hefur hann einna mest stuðst við 3-5-2 leikkerfið þar sem Mbeumo og Toney hafa leitt sóknina saman sem er mikil breyting frá því í Championship deildinni þegar liðið spilaði yfirleitt 4-3-3.

Embed from Getty Images

Hins vegar hafa meiðsli og aðrir utanaðkomandi þættir þvingað Frank til að breyta til í fjarveru lykilleikmanna eins og Josh Dasilva og David Raya og þá greindist Ivan Toney með COVID-19 nýverið en er aftur kominn á stjá. Liðið er þekkt fyrir að vera sérlega hættulegt í föstum leikatriðum rétt eins og Arsenal menn fengu að kynnast í upphafi leiktíðar og þá hefur liðið einnig verið þekkt fyrir mikla þrautseigju ekki ósvipað og United á síðustu leiktíð og eru vanir að sækja stig þrátt fyrir að lenda undir í leikjum. En ég spái liðinu svona:

Fernandez
Pinnock
Janson
Jansson
Henry
Janelt
Norgard
Baptiste
Roerslev
Toney
Mbeumo

Hættulegustu leikmenn liðsins eru vitaskuld Bryan Mbeumo og Ivan Toney en því miður fyrir heimamenn þá hefur Mbeumo átt auðveldara með að hitta í rammann sjálfan en inn í hann og Toney er búinn að vera mjög kaldur á þessu tímabili.

 

Manchester United

Það er fátt sem fær United stuðningsmenn til að brosa þessa dagana. Fjöldinn allur af sögusögnum um óánægju leikmanna, kergju meðal þeirra og misvísandi sögur og lekar úr klefanum eru ekki að hjálpa. Eftir leikinn gegn Aston Villa sagði Rangnick að Anthony Martial hefði ekki viljað vera í hópnum fyrir leikinn en sá franski póstaði samdægurs á samfélagsmiðlum að það væri ekki rétt. Twitter teymi liðsins ákvað svo að henda í 50 leikja status fyrir Donny van de Beek sem hefur spilað 69 mínútur í deildinni og ekki byrjað deildarleik á þessari leiktíð. Í raun hálf kómískt að hann er með 1, 2, 4, 1, 1, 45, 10, og 5 mínútur spilaðar í þessum 8 leikjum sem hann hefur komið inn á í deild.

Embed from Getty Images

Líkamstjáning leikmanna á borð við Rashford, Greenwood, Ronaldo og Bruno hefur verið mjög mikið gagnrýnd og það þarf engum blöðum að fletta að andrúmsloftið í klefanum er ekki í lagi. Fjölmargir leikmenn liðsins virðast óánægðir með leiktímann og vilja burt. Lingard, van de Beek, Eric Bailly o.fl. virðast réttilega gera kröfu á fleiri mínútur en allt kemur fyrir ekki.

Þrátt fyrir að strax í fyrsta leik liðsins undir stjórn Ralf Rangnick hafi ýmsar áherslubreytingar gert vart við sig er hverjum manni það ljóst að það var skammgóður vermir og að enginn ætti að drekkja sér í gleðinni og peppinu. Liðið marði Crystal Palace og Norwich og hefði líklegast ekki skilað 3 stigum gegn erfiðari andstæðing. Liðið sýndi t.a.m. ekki sömu ákefð í að vinna aftur boltann gegn Kanarífuglunum eins og það gerði gegn Örnunum og skapaði ekki mörg færi. Eftir það kom 0-1 tap gegn Úlfunum og 2-2 endurkomujafntefli frá Aston Villa. En vitaskuld er erfitt fyrir Rangnick að gjörbreyta leikstíl liðsins eins og hendi væri veifað á miðri leiktíð og með leikjaplanið eins þétt og það er.

Embed from Getty Images

Rangnick stillti upp breyttu liði um helgina en helst var það að frétta að Anthony Elanga, 19 ára gamall svíi úr akademíunni, byrjaði á vinstri kantinum. Sá stutti var sannarlega líflegur og áræðinn og virkar mjög spennandi leikmaður. En leikir vinnast og tapast á miðsvæðinu og þar erum við því miður ekki mjög vel mannaðir. Matic og Fred voru langt frá sínu besta gegn Aston Villa, tankurinn hjá serbanum tæmdist á innan við klukkustund og Fred var mjög mistækur og vel sjáanlegt hvers vegna sumir hafa sagt að lið fókuseri á að pressa hann þegar hann er á boltanum.

Ronaldo var hvergi sjáanlegur gegn Aston Villa og var að glíma við einhver smávægileg meiðsl fyrir leikinn en vonandi verður hann búinn að jafna sig á þeim fyrir leikinn gegn Brentford. Cavani komst lítið á boltann um helgina og er eflaust ekki maður í marga leiki á viku svo portúgalinn verður að taka við keflinu að mínu mati.

1
De Gea
23
Shaw
5
Maguire
19
Varane
20
Dalot
18
Bruno
39
McTominay
17
Fred
36
Elanga
7
Ronaldo
25
Sancho

Aðrir sem eru frá vegna meiðsla, veikinda, Afríkukeppninnar eða með aðrar ástæður: Aaron Wan-Bissaka, Anthony Martial, Marcus Rashford, Paul Pogba, Amad Diallo, Eric Bailly og Hannibal Mejbri. Góðu fréttirnar eru þó þær að Pogba, Ronaldo og Rashford voru á síðustu æfingu liðsins en frakkinn verður þó ekki leikfær ef marka má orð Rangnick.

Embed from Getty Images

Scott McTominay var í leikbanni rétt eins og Luke Shaw fyrir síðasta leik en telja má víst að Rangnick setji saman þá McFred og Bruno í miðjuna ef hann snýr aftur með 4-3-3. Þessi þétti miðjupakki býður upp á er að pressan byrjar mun framar á vellinum og varnarlínan getur leyft sér að fara ofar á völlinn um leið þegar við erum með Raphael Varane í liðinu. Þó má gera ráð fyrir því að enski landsliðsmiðvörðurinn, Harry Maguire, detti inn í liðið á kostnað sænska prinsins og myndi, ásamt Varane, hjarta varnarinnar.

Ef liðið ætlar sér að vera með í baráttunni um 4. sætið og reyna að tryggja áframhaldandi veru sína í Meistaradeildinni á næsta ári þá þarf Ralf Rangnick að fara ráða úr þessari flækju sem liðið er í. Hann virðist vera búinn að gefa eftir 4-2-2-2 leikkerfið en stærsta vandamálið sem blasir við núna virðist vera að gera menn andlega tilbúna fyrir verkefnin. Það virðist þó vera þrautin þyngri, þrátt fyrir að leikmenn fá nokkra tíkalla fyrir vikið og að búið sé að ráða Sascha Lense íþróttasálfræðing til að reyna að skrúfa toppstykkin á þessa leikmenn.

Næstu leikir liðsins eru svo West Ham (heima), Middlesborough (bikar), Burnley (úti), Southampton (heima) og Leeds (úti). Á blaðinu ættu þetta að vera 12 stig og næsta umferð í bikarnum en ég skal éta hattinn minn ef sú verður niðurstaðan. Leikurinn á morgun hefst kl 20:00.

Embed from Getty Images

Enska úrvalsdeildin

Aston Villa 2:2 Manchester United

skrifaði þann | 7 ummæli

Ralf Rangnick gerir þrjár breytingar frá leiknum gegn Aston Villa um helgina en leikmenn eins og Ronaldo, Rashford og Maguire hafa verið að glíma við smávægileg meiðsli en Shaw og McTominay voru í leikbanni eftir uppsöfnuð gul spjöld. Helstu fréttir kvöldsins voru samt þær að Rangnick stillti ekki upp í 4-2-2-2 heldur 4-2-3-1 og í fjarveru Maguire og Ronaldo var Bruno með bandið. Raunar má færa rök fyrir því að liðið hafi stillt upp í 4-3-3 með Matic sitjandi dýpst á miðjunni og Fred og Bruno sitthvoru megin við hann.

1
De Gea
27
Telles
19
Varane
2
Lindelöf
20
Dalot
17
Fred
31
Matic
18
Bruno
36
Elanga
21
Cavani
11
Greenwood

Á bekknum voru þeir Henderson, Heaton, Jones, Maguire, Lingard (’88), Mata, Sancho (’75) og Van de Beek (’88).

 

Steven Gerrard stillti upp sterku liði heimamanna:

Martinez
Digne
Konsa
Mings
Cash
Sanson
Luiz
Ramsey
Buendía
Ings
Watkins

Á bekknum voru svo þeir Steer, Kesler-Hayden, Targett, Hause, Iroegbunam, Chukwuemeka, Archer og nýjasta viðbótin við liðið, Philippe Coutinho.

 

Leikurinn

United byrjaði leikinn af miklu meiri krafti en heimamenn og fóru fyrstu sex mínúturnar nær eingöngu fram á varnarþriðjungi Villa. United vann hvert fasta leikatriðið á fætur öðru og uppskar að lokum aukaspyrnu vinstra meginn á vellinum. Þeir Alex Telles og Bruno stóðu yfir boltanum en í stað þess að lúðra boltanum beint á kollinn á fremsta varnarmanninum þá hljóp Telles yfir boltann og sendi hann aftur fyrir sig á meðan Bruno tók við honum og fór nær teignum. Fyrirliðinn kom með skot fyrir utan sem fór beint á Martínez en argentíski búrvörðurinn missti boltann á klaufalegan hátt á milli fóta sér og inn lak boltinn. Klárlega ekki fallegasta markið hjá Bruno en telur jafn mikið.

Embed from Getty Images

Reyndar vildi Martínez meina að Cavani hefði verið rangstæður og haft áhrif á sjónarsviðið með fyrrnefndum afleiðingum en markið dæmt gott og gilt, a.m.k. gilt.

Áfram héldu yfirburðir Manchester United næstu mínúturnar en þegar 12 mínútur voru liðnar voru heimamenn einungis búnir að vera með boltann um 15% af leiknum. Mesti sóknarþungi United kom upp vinstri vænginn þar sem Elanga og Telles sáu um að halda breiddinni með Bruno með sér. Sá sænski var mjög líflegur framan af og minnti um margt á Rashford á fyrstu mánuðunum sínum í aðalliðinu. Hann var beinskeyttur, áræðinn og hugrakkur í sóknaraðgerðum sínum og var að valda Matty Cash og Konsa miklum vandræðum.

Embed from Getty Images

Anthony Elanga átti svo ágætis færi þegar hann stakk þessa fyrrnefndu herramenn af en datt í teignum en kom engu að síður boltanum með örlitlu klafsi á Cavani en færið rann út í sandinn. Næsta hættulega sóknin kom svo þegar Greenwood fékk fyrirtaks færi. Boltinn hrökk þá upp í loftið vinstra meginn úr teignum, yfir á fjærstöngina þar sem Greenwood tók boltann í fyrstu en Emi Martínez var mættur út á móti og náði að loka vel á skotið og bjarga í horn.

Einungis tveimur mínútum síðar lagði Greenwood af stað í eins manns sókn þegar hann lék heimamenn grátt á hægri kantinum og brunaði framhjá þeim og dróg sinn inn á miðjuna en lét að lokum samherja fá boltann og lítið varð úr sókninni.

Embed from Getty Images

Eftir 31 mínútu kom loksins fyrsta færi heimamanna þegar David de Gea þurfti að verja frá Watkins eftir að Emi Buendía átti sendingu í gegnum vörnina. Hættulegasta færið þeirra kom þó þegar Cash brunaði niður að endalínunni hægra megin við markið og átti fyrirgjöf sem rataði á hinn bakvörðinn, Digne, sem var einn og óvaldaður og hamraði boltann í fyrsta en de Gea varði með fótunum. Það var honum að þakka að United fór inn í klefann í hálfleik með forystuna.

Embed from Getty Images

 

Síðari hálfleikur

Heimamenn byrjuðu þann seinni eins vel og United hafði byrjað þann fyrri. Þeir réðu lögum og lofum fyrstu mínúturnar en þrátt fyrir það átti Elanga fyrsta skotið í síðari hálfleik en Martínez sá við honum. Jacob Ramsey átti síðan skot á markið hjá gestunum stuttu síðar en hann átti eftir að koma meira við sögu þrátt fyrir að sá spænski hefði varið í þetta skiptið. Næsta færi heimamanna féll svo í skaut Buendía eftir að sá smávaxni fékk frían skalla á markið en de Gea vel staðsettur og beint á hann.

Hinu megin á vellinum héldu þó varnarmistökin áfram. Matty Cash reyndi að hreinsa boltann á vítateigslínunni, en boltinn fór hátt upp í loftið en endaði hjá Elanga sem tók nokkra varnarmenn á og skaut svo rétt framhjá markinu en Bruno, sem var einn og óvaldaður í um 4 metra fjarlægð var æfur yfir því að sá sænski hefði ekki rúllað boltanum á hann þar sem hann var í upplögðu færi.

Embed from Getty Images

Næst var komið að Greenwood þegar hann fékk boltann frá Fred og bar boltann inn í teig heimamanna og tók skot með hægri úr þröngu færi en boltinn sleikti stöngina og spurning hvort hann hefði frekar átt að reyna fyrirgjöf eða skot með vinstri úr þessu færi. Aftur var það svo Fred, sem að þessu sinni komst inn í arfaslappa sendingu frá Sanson og bar boltann að vítateignum og dróg um leið varnarmenn í sig sem skapaði pláss fyrir Bruno Fernandes. Sá portúgalski fékk stungusendinguna og gjörsamlega smurði boltann í neðri hluta þverslánnar og inn. 0-2 og United í virkilega góðum málum þegar innan við hálftími var eftir af leiknum.

Embed from Getty Images

Á 68. mínútu urðu ákveðin kaflaskil í leiknum þegar gamall erkióvinur United, Coutinho, kom inn á í sínum fyrsta leik fyrir Aston Villa og skömmu síðar kom Chukwuemeka inn á. Þessir tveir leikmenn voru svo viðriðnir næsta mark leiksins þegar sá síðarnefndi kom boltanum á Coutinho sem dansaði inn í teig gestanna og fann Jacob Ramsey óvaldaðan sem skoraði með þrumu fram hjá de Gea. 1-2 og völlurinn tók virkilega við sér.

Fimm mínútum síðar gerðist það svo sem lá í loftinu. Heimamönnum tókst að jafna þegar Buendía kom boltanum á téðan Ramsey sem átti laglega sendingu fyrir markið á fjærstöngina þar sem Coutinho var svo mættur fyrstur manna og skoraði. Varane hefði að öllum líkindum náð tá í boltann ef hann notaði hálfu númeri stærra af skóm en staðan orðin 2-2 og eftirleikurinn virtist vera dæmdur til þess að „þrauka fram að flauti“ fyrir United.

Coutinho átti svo annað færi og virtist ekkert benda til annars en að ef einhver myndi stela sigrinum á lokasprettinum þá yrðu það heimamenn. Buendía meiddist í upphafi viðbótartímans sem gerði það að verkum að leikið var í tæpar 7 mínútur umfram þessar hefðbundnu 90 en á ’90+6 féll boltinn fyrir Van de Beek, sem hafði ásamt Jesse Lingard, komið inn á rétt fyrir 90. mínútu. Sá hollenski tók snúning inn í teignum, virtist týna boltanum en fann hann fljótt aftur en skot hans var stoppað af Hause og þar með rann síðasta færi leiksins út í sandinn.

Embed from Getty Images

 

Að leik loknum…

Það er augljóst að liðið er að spila langt undir getu. Þrátt fyrir meiðsli og kórónuveirusmit, sem reyndar flest öll lið eru að glíma við líka, þá er hópurinn sem við telfdum fram í kvöld það sterkur að hann á að geta unnið Aston Villa á útivelli ef menn spila nálægt getu. En vandamálið virðist vera stöðugleikinn, því United er aldrei með 11 byrjunarliðsmenn sem eru allir að spila nálægt getu. Það eru alltaf einhverjir sem eiga slæman dag og hvernig sem viðrar hjá okkur virðast mótherjar okkar eiga mjög auðvelt með að gíra sig upp.

Leikurinn í dag sýndi að minnsta kosti að Rangnick er ekki eins þrjóskur stjóri og forverar hans. Í síðustu leikjum hefur 4-2-2-2 leikkerfið þurft að víkja í síðari hálfleik og nú var uppleggið greinilega 4-3-3 með Matic dýpstan. Það gerði það að verkum að við sáum betri hliðina af Fred í dag þar sem hann spilar rullu svipaða þeirri og hann gerir með brasilíska landsliðinu. Hins vegar er Matic ekki sambærilegur Casemiro og virtist serbinn eiga í stökustu vandræðum með að fóta sig í þeim síðari.

https://twitter.com/StatmanDave/status/1482428593472950274

Bruno virtist líka loksins vera að vakna af værum blundi og átti flottan leik. Vissulega var Martinez gjafmildur í byrjun leiks en portúgalinn var mjög góður í dag. Það sama má segja um Varane,  David de Gea og Anthony Elanga. En enn og aftur voru margir farþegar í liðinu í dag og það var að lokum það sem gerði út um leikinn.

Bæði lið áttu 13 skot og sjálfsagt jafntefli sanngjarnasta niðurstaðan. Fyrir leik hefðu sjálfsagt einhverjir stuðningsmenn tekið jafnteflinu en þegar lið er komið með tveggja marka forystu og rúmar tuttugu mínútur eru eftir af leiknum þá er óneitanlega súr tilfinning sem fylgir þessu staka stigi þegar öll þrjú stigin voru innan seilingar. Úrslitin þýða það að eftir 20 leiki er United með 32 stig, að meðaltali 1,6 stig úr leik. Það þýðir lítið að horfa á liðin í kringum okkur þar sem sum lið hafa spilað 21 leik en sum 1, 2 eða 3 leikjum færra.

Það verður á brattann að sækja ef liðið ætlar sér fjórða sætið en næst er viðureign gegn Brentford sem lögðu Aston Villa fyrir skemmstu og þrátt fyrir að einhverjir vilji meina að þeir liggi vel við höggi þá getur það auðveldlega snúist við þegar þeir mæta Rauðu djöflunum. Viðureignin er á miðvikudaginn kl 20:00.

Embed from Getty Images