Rauðu djöflarnir

Liðið var enn á ný í 4-2-2-2 uppstillingunni

Varamenn: Henderson, Jones, Shaw, Wan-Bissaka, Matic (78′), Van de Beek, Cavani (46′), Sancho (46′), Elanga

Áherslan hjá Ralf Rangnick hefur verið að styrkja vörnina og endurkoma Raphaël Varane átti sannarlega að gera það. Það voru hins vegar ekki liðnar sjö mínútur þegar Varane misti boltann, sókn Newcastle endaði hjá Saint-Maximin sem lék inn í teiginn, var um það bil að missa jafnvægið en náði skotinu sem small í netinu, óverjandi fyrir De Gea.

Embed from Getty Images

Köld tuska í andlit United, og Newcastle voru bara ansi frískir eftir þetta, Joelinton átti ágætis tilraun framhjá.

Það leið þó hjá og United fór að ná upp betri leik og virkari hápressu. Áhugavert samt að þegar Newcastle náði upp sókn sem United stoppaði var gagnsóknin síður en svo hröð og sendingar til hliðar og aftur komu í ljós, væntanlega ekki það sem Rangnick vill sjá.

Að leyfa Jonjo Shelvey frítt hlaup frá miðju er líklega heldur ekki á óskalista nýja stjórans, vildi til að De Gea gat kýlt skotið frá þegar það kom. Hefði reyndar átt að vera dæmt á brot á McTominay í aðdragandanum.

Mikið af spili United fór gegnum Marcus Rashford hægra megin og það gekk sjaldnast mjög vel. United komst ekkert áfram og Newcastle náði loksins yfirtökum. Allan Saint-Maximin var bestur á vellinum og á 38. mínútu valsaði hann gegnum næstum alla vörn United og gaf stungusendingu en blessunarlega var Wilson rangstæður þegar hann skoraði. Þar slapp United vel.

Einhver slakasti leikur United lengi. Miðjan gagnslaus, Bruno áhrifalaus úti á kanti og Rashford slakur. Það hefði enginn United maður getað kvartað undan því að vera tekinn útaf í hálfleik nema helst David de Gea en það voru Fred og Mason Greenwood sem véku og Jadon Sancho og Edinson Cavani komu inná

Leikurinn var samt ekki tveggja mínútna gamall þegar Saint-Maximin átti að koma Newcastle í 2-0, fékk boltann aleinn inni í markteig, innan við tveimur metrum frá marki en skotið var næstum beint á De Gea sem varði vel. Ótrúlegt að klára þetta ekki betur, og stórkostlega slakt hjá vörn United.

United kom nokkrum skotum að marki en engu á mark, og það var lítið fyrsta kortérið í seinni sem benti til að eitthvað hefði gerst í hálfleik til að breyta til. Besta færið kom þegar Newcatle kom í flotta gagnsókn, Joelinton óð upp völlinn og gaf út á Fraser frían en skot hans fór nokkurn veginn beint á De Gea.

Embed from Getty Images

United leikmenn höfðu verið vælandi allan leikinn, aðallega hver í öðrum en Bruno tókst að væla það mikið í dómaranum að hann fékk gult fyrir og missir af næsta leik.

Newcastle voru áfram betri en á 70. mínútu tókst United að jafna, fyrirgjöf Dalot frá hægri, Cavani aleinn í teignum skaut í varnarvegginn en fékk boltann til sín aftur, slæmdi fæti í boltann og skotið fór inn úti við stöng.

Embed from Getty Images

Fjarri því sanngjarnt og Newcastle ítrekaði það strax á eftir, Saint-Maximin með fínt skot sem De Gea þurfti að fara vel niður til að verja.

Síðasta skipting United var Matic fyrir McTominay, ekki kannske skiptingin sem mann dreymir um til að loka leiknum en svona er þetta.

Newcastle hafði verið með boltann 27% af leiknum og hefði getað klárað leikinn á 88. mínútu, Lewis fékk að athafna sig óáreittur í teignum vinstra megin, gaf inn í þvöguna og United gat ekki hreinsað betur en beint á Lewis sem skaut í þetta skiptið, í stöng og út og Almirón átti frábært skot sem stefndi inn undir slána en De Gea kom svífandi og varði frábærlega.

Cavani hefði getað gert aðeins betur þegar hann vippaði yfir Dubravka á þriðju mínútu uppbótartíma, en það vor of laust og tveir varnarmenn björguðu. Þetta var eftir að Dubravka hafði misst háa sendingu til Sancho.

Embed from Getty Images

En þrátt fyrir smá tilburði frá United síðustu mínúturnar kom markið ekki og United stálheppið að sleppa með stig. Þrátt fyrir að vera mun minna með boltann voru leikmenn Newcastle miklu betri, og leikur United var í molum.

Ralf Rangnick bíður erfitt verk að koma sínum leikstíl að og það verður afskaplega fróðlegt að sjá hvort 4-2-2-2 lifir að sjá leikinn gegn Burnley á fimmtudaginn.

Ritstjórn vonar að jólin hafi verið ykkur góð!

Jólatörnin byrjar í dag, annan dag jóla, með fjölda Covidfrestana en allt lítur út fyrir að Mancheter United nái að spila sinn fyrsta leik í rúmar tvær vikur þegar haldið er til Newcastle og tekit á við nýríku Nonnana sem hafa enn ekki fengið tækifæri til að spreða olíuauðnum.

Covid-19 setti svo sannarlega strik í reikninginn en fyrir vikið eru allir leikmenn meiðslalausir utan Paul Pogba og verður spennandi að sjá hvort að Rangnick hafi náð að predika vel yfir þeim síðustu viku og náð að koma þeim í gírinn á æfingasvæðinu.

4-2-2-2 kerfið er komið til að vera og með fullan styrkleik ætti liðið að líta einhvern veginn vona út

Það verður sérlega spennandi að sjá endurkomu Raphaël Varane í vörninni og hvort það dugi til að stoppa upp í götin.

Newcastle hefur gengið hrikalega í vetur, og fjlótlega eftir yfirtöku Sáda var Steve Bruce rekinn og Eddie Howe ráðinn.
Hann náði þremur jafnteflum og tapi í fyrtu leikjunum og svo sigri á Burnley en síðan hefur liðið tapað fyrir Leicester City, Liverpool og Manchester City. Streðið gegn Norwich fyrir tveimur vikum sýndi þó að United getur ekki tekið neinu sem gefnu.

Liðsspá Guardian er svona

Eitthvað smá meiðslastreð er í herbúðum Newcastle og Isaack Hayden er í spjaldabanni.

Craig Pawson flautar leikinn á kl 8.

Liðið er næstum eins og Daníel sá það fyrir, 4-2-2-2

Varamenn Henderson, Heaton, Bailly, Jones, Shaw, Lingard, Van de Beek, Greenwood, Elanga

Ljótt en það hefst

Cristiano Ronaldo skoraði eina mark Manchester United þegar liðið marði Norwich City á Carrow Road í dag. Það jákvæða eftir leikinn er að United vann þrátt fyrir að spila illa.

Nýr skerfari er mættur í bæinn en þorpsbúar eru enn við sama heygarðshornið. David de Gea var besti maður Manchester United í dag, varði ein fimm fínustu skot frá Norwich.

Embed from Getty Images

Ralf Rangnick stillti upp óbreyttu byrjunarliði frá leiknum gegn Crystal Palace fyrir viku með þeim orðum að leikmennirnir hefðu staðið sig það vel að þeir verðskulduðu annað tækifæri. Fróðlegt verður að sjá hvaða breytingar hann gerir fyrir Brentford á þriðjudag, með þá sömu rökfræði að þeir sem ekki standa sig vel endi á bekknum. Það athyglisverðasta í liðsvalinu var að tveir markverðir, Tom Heaton og Dean Henderson, voru meðal varamanna.

Sendingar út í loftið í fyrri hálfleik

Norwich byrjaði leikinn betur, voru grimmari á boltann og fastari fyrir í návígum. Þannig var það frekar í gegnum leikinn. Botnliðið var líka á köflum óheppið, hluti af uppleggi United virtist vera að biðja um aukaspyrnur þegar þeir urðu undir í baráttunni. Það virkaði betur fyrir gestina.

Þannig náði Marcus Rashford í aukaspyrnu rétt utan teigs eftir rúmar tíu mínútur. Alex Telles skaut í vegginn og þaðan datt boltinn í þverslána. United var meira með boltann eftir þetta en fékk fá færi. Það besta fékk Ronaldo á 37. mínútu þegar hann slapp inn fyrir vörn Norwich hægra megin, en slök fyrsta snerting hægði á honum þannig Norwich menn gátu þrengt að Ronaldo sem gat lítið annað en skotið á Tim Krul.

United gekk illa að halda boltanum í fyrri hálfleik. Slakastir þar voru Bruno Fernandes og Marcus Rashford en þriðjungur sendinga þeirra fór á mótherja, sem er óásættanlegt, jafnvel þótt Bruno hafi leitast við að reyna stungusendingar. Rangnick hefur sagt að hann vilji fá fleiri sendingar fram á við, frekar en til hliðanna og hefur varla verið ánægður með það sem hann sá í dag.

Betra að Bruno hefði nýtt færið

Eftir um tíu mínútna leik í seinni hálfleik varð de Gea frábært skot Teemu Pukki. Hann átti eftir að verja tvisvar vel frá Özan Kabak auk þess sem varnarmenn United náðu að henda sér fyrir tvö skotfæri Billy Gilmour.

En áður en flest þessara færa komu hafði United reyndar náð að skora. Við fyrirgjöf frá hægri fór Ronaldo niður í markteignum með miklu öskri. Upptökur sönnuðu að Max Aarons hafi gerst sekur um að leggja höndina utan um herðar Portúgalans sem nýtti sér það til fulls. Ronaldo skoraði svo sjálfur úr vítinu á 75. mínútu með föstu skoti. Hins vegar hefði verið óþarfi að deila um vítið hefði Bruno nýtt skallafærið sem hann fékk á fjærstönginni þegar Ronaldo var rifinn niður.

Embed from Getty Images

Portúgalarnir tveir fengu á lokamínútunum tvö færi á lokamínútunum til að gera út um leikinn, einkum Ronaldo sem mokaði boltanum yfir úr markteignum eftir undirbúning Rashford. Það varð til þess að vænt mörk leiksins voru 1,25-1,99 United í hag, en talan lækkar í 1,22 án vítaspyrnunnar. Það segir kannski sitt um að United slapp með skrekkinn.

Þegar um kortér var eftir af leiknum fór Viktor Lindelöf út af meiddur. Fyrstu fréttir er að hann hafi fengið högg og átt erfitt með að anda en eigi að ná sér fljótt og vel.

Lítilfjörlegur sóknarleikur

De Gea var bestur í liði United. Sólskinsdrengurinn Fred átti líka fínan dag, vann 11/12 návígum og sendi rúm 90% sendinga sinna á samherja. Á köflum virtist sem hann hefði helst verið að hlusta á þjálfarann því hann virkilega leitaði að færum til að senda boltann fram á við. Ekki er beint hægt að segja að ákveðnir leikmenn United hafi spilað illa, Bruno og sérstaklega Rashford, bættu ráð sitt í seinni hálfleik, en sem fyrr segir spiluðu fáir útispilarar vel. Fyrsta markmið Rangnick var að United færi að halda hreinu. Það er jákvætt að það hafi tekist tvo deildarleiki í röð. Margt er hins vegar óunnið í leik liðsins. United skapaði sér ekki mörg dauðafæri gegn Palace og sóknin var afar stirðbusaleg í dag. Leikmenn Norwich voru tilbúnir til að nota líkamann vel og gekk ágætlega að ýta framherjum United út úr aðgerðum sínum. Það má líka setja spurningamerki við 4-2-2-2 kerfi Rangnick í dag, það virtist vanta breidd í sóknarleikinn. Líkt og Palace reyndist Norwich ekki of erfitt að verjast United inn á miðjunni. Samhæfð pressuvörn lét lítið yfir sér í dag, nema helst að Norwich voru snöggir að loka á sóknaraðgerðir United. Vissulega er styrkleikamerki að vinna jafna leiki, en United verður að spila betur strax á þriðjudag.

Áfram heldur desembertörnin! Næsta verkefni Manchester United er heimsókn á Carrow Road og andstæðingurinn er neðsta lið deildarinnar, Norwich City. Leikurinn er á morgun, laugardag – og hefst kl. 17:30. Kanarífuglarnir eru í neðsta sæti með 10 stig, jafn mörg og milljarðalið Newcastle og Íslendingalið Burnley.

Okkar menn sitja í 6. sæti en gætu brugðið sér upp í það fjórða ef allt gengur vel. Til þess þarf United reyndar að vinna nokkuð örugglega og að sama skapi þarf West Ham að fá skell. Mögulega látum við 5. sætið duga í bili, en mestu skiptir að koma með þrjú stig í pokanum til baka til Manchester.

Norwich féll úr Úrvalsdeildinni tímabilið 2019-20, en komst aftur upp í deild þeirra bestu á síðasta tímabili. Tímabilið 2019-20 vann United báðar viðureignir liðanna í deildinni, auk þess að slá Norwich út í FA bikarnum. Síðasti deildarleikur á Carrow Road er eftirminnilegur fyrir þær sakir að okkar menn afrekuðu það að klúðra tveimur vítaspyrnum í sama leiknum. Tim Krul, markmaður Norwich, varði fyrst frá Marcus Rashford og síðar frá Anthony Martial. Báðir skoruðu þó úr opnu spili í leiknum ásamt Scott McTominay og niðurstaðan 1-3 sigur.

Liðsfréttir og vangaveltur

Ralf Rangnick var ekkert að tvínóna við hlutina í miðri viku og gerði 11 breytingar á liðinu sem mætti Crystal Palace um síðustu helgi. Auðvitað er erfitt fyrir leikmenn að sýna sitt allra besta í samsuðu sem engan raunverulegan spiltíma hefur fengið saman. Gott var að sjá Amad Diallo fá mínútur og sýndi hann lipra takta á kantinum. Má gera ráð fyrir því að Fílbeinsstrendingurinn fái að fara á láni í janúar, en til stóð að senda hann til Feyenoord á lán í sumar áður en óheppileg meiðsli gerðu út um það.

Sömuleiðis var glimrandi gott að sjá Luke Shaw eiga stoðsendingu á Mason Greenwood og vonandi mun barátta hans og Alex Telles um byrjunarliðssæti ná því besta fram úr báðum. Shaw hafði staðnað eftir frábært síðasta tímabil og magnaða frammistöðu á EM í sumar. Þá held ég að það sé nokkuð ljóst að Juan Mata á lítið sem ekkert erindi lengur í lið Manchester United. Lappirnar á Spánverjanum dásamlega eru alveg farnar og hann hreyfist varla úr stað.

Þá gaf Rangnick nokkrum ungum og efnilegum leikmönnum tækifæri lífs síns og ekkert nema yndislegt um það að segja. Getur vel verið að Zidane Iqbal eða Charlie Savage eigi aldrei eftir að spila aðra mínútu fyrir aðallið Manchester United – þetta augnablik tekur enginn frá þeim.

Meiðsli og bönn

Þónokkrir leikmenn United eru á meiðslalistanum. Eftir að hafa spilað 95 mínútur gegn Young Boys, þá slasaði Aaron Wan-Bissaka sig á síðustu andartökum leiksins og er ólíklegt að hann verði klár fyrir morgundaginn. Serbneski risinn Nemanja Matic spilaði í miðverði í vikunni og komst áfallalaust frá leiknum en samkvæmt Ralf er hann að glíma við einhvern kvefskít og er spurningamerki sem stendur, en skilaði þó neikvæðu COVID prófi. Raphael Varane og Edinson Cavani ættu að vera klárir í næstu viku, en lengra er í Paul Pogba. Miðað við blaðamannafund Ralf að þá er enn u.þ.b. mánuður í Frakkann lífsglaða.

Þá er Anthony Martial enn meiddur og sagði umboðsmaður hans í dag að Martial vildi yfirgefa United í janúar. Ég held að ég tali fyrir hönd flestra sem að styðja United þegar ég segi að þær fregnir séu ekki beinlínis reiðarslag fyrir klúbbinn. Tony byrjaði feril sinn hjá United frábærlega og sýndi glæsileg tilþrif á sínu fyrsta tímabili undir Louis van Gaal. Fátt gladdi augað þá!

Þá virtist sem að allt væri á réttri leið undir Ole Gunnar Solskjær, þegar Martial skoraði 23 mörk í öllum keppnum tímabilið 2019-20 og átti flottan lokasprett það tímabil. Síðan þá hefur þetta verið stopp-start og eiginlega bara eyðimerkurganga. Best er því bæði fyrir klúbb og leikmann að leiðir skilji í næsta félagsskiptaglugga.

Hvernig mun liðið líta út?

Þrátt fyrir fína innkomu Dean Henderson (og Tom Heaton) í liðið gegn Young Boys, þá heldur David de Gea sæti sínu. Ef að de Gea getur bætt „sweeper keeper“ hlutverki í sinn leik, þar sem að hann hreinsar upp stungusendingar aftur fyrir vörn United þá erum við að tala saman. Þetta gerir Henderson virkilega vel, en hefur auðvitað ekki kattarviðbrögð de Gea í rammanum.

Í vörninni heldur Diogo Dalot sæti sínu í hægri bakverðinum, en hann hefur staðið sig vel í undanförnum leikjum. Ef Portúgalinn heldur áfram á sömu braut þá er staðan hans og Wan-Bissaka í kuldanum. Hinu megin býst ég við því að Alex Telles byrji. Luke Shaw er enn að koma til baka eftir meiðsli og Telles hefur staðið sig ágætlega. Í miðvarðarstöðunum verða svo Harry Maguire og Victor Lindelöf. Í síðustu leikjum hefur Lindelöf heillað mig og þá sér í lagi í fyrsta leik liðsins undir Ralf Rangnick. Sýndi frumkvæði, áræðni og góðan skilning á leiknum. Vann boltann ofarlega og kom boltanum fljótt í spil.

Fyrir framan vörnina verða hinir margrómuðu McFred! Fred skoraði glæsilegt sigurmark gegn Crystal Palace og átti bara heilt yfir mjög góðan leik. Hann nýtur sín talsvert betur í box-to-box hlutverki, fremur en sem pjúra akkeri. Það stríðir gegn eðlishvötum Brassans að sitja og dekka svæði. Sama má kannski segja um Scott McTominay, en líklega er auðveldara að stýra honum og fá hann til þess að fylgja fyrirmælum!

Í næstu línu fyrir framan verða Bruno Fernandes og Jadon Sancho. Báðir eru að finna form um þessar mundir og megi það halda áfram. Sancho er kominn á blað og maður sér hann vaxa í sjálfstrausti með hverjum leiknum sem líður. Það gerði ofsalega mikið fyrir Bruno að ná inn marki gegn Arsenal og það er eins og þungu fargi hafi verið létt af honum. Þessi magnaði leikmaður virtist taka slæmt gengi liðsins og brotthvarf Ole Gunnar Solskjær sérstaklega inná sig – en kannski er ég bara að lesa of mikið í hlutina.

Frammi með Cristiano Ronaldo vil ég sjá Mason Greenwood. Þeir virtust eiga í erfiðleikum með að ná saman undir Solskjær, en vonandi tengjast þeir sterkum böndum undir Ralf Rangnick. Greenwood skoraði glæsilegt mark í miðri viku og Ronaldo nældi í tvennu gegn Arsenal, eins og er hans von og vísa.

Líklegt byrjunarlið Man Utd:

 4-2-2-2 er líklegasta kerfið, með Greenwood efst uppi ásamt Cristiano Ronaldo.

Andstæðingurinn

Botnlið Norwich verður án Milot Rashica, Mathias Normann, Christoph Zimmermann, Sam Byram og síðast en ekki síst, Brandon Williams. Williams má ekki spila gegn sínu eigin liði. Fyrrum stjóri Aston Villa, Dean Smith, tók við hjá Norwich 15. nóvember og hefur liðið náð í 5 stig af 10 undir hans stjórn. Liðið fékk 3-0 skell gegn Tottenham í síðustu umferð og því er um að gera að strá salti í sárin.

Alltaf hættulegt að tala um skyldusigra í ensku Úrvalsdeildinni en staðreynd málsins er sú að Manchester United má ekki verða af stigum í leikjum á borð við þennan, þ.e. ef að einhverja atlögu á að gera að Meistaradeildarsæti. Undirritaður horfði á 1-1 jafnteflisleik Newcastle og Norwich um daginn og gæðaminni leik mun ég líklega ekki sjá á þessu tímabili. Norwich voru manni fleiri frá 9. mínútu leiksins en sköpuðu varla færi í leiknum. Það var finnski galdramaðurinn, Teemu Pukki, sem að bjargaði stigi fyrir Kanarífuglana með glæsilegu marki undir lok leiks. Á honum þarf að hafa gætur.

Norwich hefur skorað 8 mörk og fengið á sig 31 í 15 deildarleikjum. Það eru engar afsakanir fyrir því að klára ekki þetta verkefni.

Líklegt byrjunarlið Norwich:

Spá

Gerum aðeins betur en Tottenham og vinnum 0-4 sigur. Bruno skorar snemma og róar taugar liðsins. Þá bætir Ronaldo við öðru marki, áður en Jadon Sancho og Mason Greenwood reka síðustu naglana í kistu Norwich. Hljómar þetta ekki eins og plan?

Áfram Manchester United!