Rauðu djöflarnir

Í hádeginu í dag tók Manchester United á móti Aston Villa en á undanförnum árum hefur gengi Villa manna á Old Trafford ekki verið upp á marga fiska. Leikir þessara liða hafa þó oft boðið upp á ágætisskemmtun og því ekki ólíklegt að sú yrði raunin í dag. Hins vegar var fyrsta korterið afskaplega takmörkuð skemmtun þar sem bæði lið virtust vera að þreifa fyrir sér og reyna að ná smá fótfestu.Ole Gunnar Solskjær gerði aftur 11 breytingar á liðinu frá því í miðri viku og stillti upp í 4-2-3-1:

Á bekknum voru þeir Heaton, Dalot, Lindelöf, Lingard, Matic, van de Beek, Cavani, Martial og Sancho

Fyrsta raunverulega færið kom á 16. mín þegar John McGinn átti góða stungusendingu upp á hægri kantinn þar sem bakvörðurinn Matty Cash, sem skoraði nú í síðustu umferð, bar boltann upp að endamörkum og kom með fyrirgjöf. Á fjærstönginni kom hinn bakvörður gestanna, Matt Targett, á fleygiferð en skot hans flaug himinhátt yfir úr ansi vænlegri stöðu.

Embed from Getty Images

Strax í næstu sókn kom álitlegt færi fyrir heimamenn þegar Mason Greenwood og Bruno Fernandes voru komnir inn í teig gegn einungis tveimur varnarmönnum gestanna. Greenwood gerði vel með boltann en í stað þess að renna boltanum út í teig á Bruno sem var einn og óvaldaður, valdi táningurinn að reyna sjálfur skotið en Martinez í markinu sá frekar auðveldlega við skoti hans. Tilvalið færi ef hann hefði sent á þann portúgalska en oft er bara einn valmöguleiki í huga stráksins og það er að skjóta.

Það var ákveðið deja-vu atvik skömmu síðar þegar Harry Maguire var settur undir pressu á vinstri kantinum okkar og snéri að markinu. Fyrirliðinn ákvað þá að renna boltanum á David de Gea í markinu en sending hans ónákvæm og sá spænski mátti hafa sig allan við að teygja tánna í boltann en sú snerting var ekki af hinu góða. Boltinn datt fyrir lappirnar á Ollie Watkins en markvörðurinn okkar var snöggur á lappir og kastaði sér fyrir og varði vel. Örlítil heppni lék okkur á þessum tímapunkti því frákastið var það fast að það fór beint í Danny Ings og þaðan aftur til de Gea sem greip knöttinn. Sannarlega hefði þetta verið gjöf á silfurfati ef þetta hefði breytt stöðunni í leiknum.

Embed from Getty Images

Aaron Wan-Bissaka og Greenwood áttu síðan afar gott samspil á hægri kantinum sem endaði með því að Bruno fékk stungusendingu við hlið vítateigslínunnar. Þar lék hann á einn varnarmann, bar boltann upp að stönginn og renndi honum síðan út í teiginn þar sem Pogba kom á ferðinni en skot hans endaði í varnarmanni og aftur fyrir endamörk.

Um miðjan fyrri hálfleik var ekki mikill hraði í leiknum og bæði lið virtust þreytuleg en það fór þó aðeins að breytast en ekki áður en Luke Shaw bað um skiiptingu. Englendingurinn hafði sest í grasið snemma leik, krækt sér síðan í gult spjald og nú þurfti hann að koma af velli en í hans stað kom Diogo Dalot.

Þá fengu gestirnir ágætis færi þegar þeir fengu aukaspyrnu nokkuð frá vítateigsboganum en skotið fór í varnarvegginn og í horn. Úr horninu kom svo stórhættulegt fær en skalli Hause fór yfir markið. Síðasta færi hálfleiksins kom einnig út hornspyrnu þegar fyrirgjöfin endaði á pönnunni á Varane sem fleytti honum áfram inn í markmannsteiginn þar sem Pogba reis manna hæst og skallaði boltann en framhjá fór hann. 0-0 í hálfleik og ekki mikið flæði búið að vera í leiknum.

Embed from Getty Images

Seinni hálfleikur

Síðari hálfleikurinn fór vel af stað fyrir gestina sem vildu fá vítaspyrnu á fyrstu mínútunum þegar Danny Ings féll í teignum en dómarinn var ekki á sama máli. Eflaust hafa margir verið að vonast eftir einhverri lukku í síðari hálfleik en sú lukka virðist hafa gleymst á æfingasvæðinu. Fljótlega eftir að hálfleikurinn var kominn á fullt þurfti United að gera aðra skiptingu í vörninni. Að þessu sinni var það Maguire sem þurfti að hætta leik, en í hans stað kom Victor Lindelöf til að klára síðasta hálftímann eða svo. Það þýddi að einungis átti Solskjær eftir eina skiptingu til að breyta leiknum. Flæðið í leiknum var hins vegar ekkert, liðin skiptust á að glata boltanum og komast í hálffæri.

Þrátt fyrir að United hafi verið óheppið með meiðsli vorum við heppnir með óheppni gestanna. Þeir virtust vera sjálfum sér verstir þegar kom að því að klára færin sín og ná góðum marktækifærum. Maguire var til að mynda stálheppinn að sleppa með spjald áður en hann fór útaf, eftir að hann virtist toga niður McGinn sem var að sleppa framhjá honum en ekkert dæmt. Téður McGinn nældi sér síðan í gult spjald eftir hefnibrot á Bruno í næstu sókn.

Embed from Getty Images

Á 66. mínútu átti Greenwood gott hlaup fyrir aftan vörn gestanna og Bruno stakk boltanum inn fyrir en því miður var sendingin ekki fullkomin og Greenwood neyddist til að rekja boltann í átt að vítateigshorninu. Þaðan reyndi hann skot en það var ekki mikil fyrirhöfn hjá Martinez að verja frá honum. Þá kom eitt besta færi gestanna í síðari hálfleik, en eins og við sjáum svo oft þegar United reynir að pressa þegar langt er liðið á leikinn, þá býður það hættunni heim. Að þessu sinni komst Ollie Watkins enn og aftur í gráupplagt færi en de Gea, sem er líklegast búinn að vera okkar besti leikmaður í deildinni á þessu tímabili, varði vel frá honum.

Greenwood fékk ansi mörg færi en það var eins og það sæti í honum að Ronaldo hefði ekki sent boltann á hann í leiknum gegn West Ham, því táningurinn reyndi að gera allt sjálfur við hvert tækifæri. Þegar um tíu mínútur voru eftir á klukkunni gerði Solskjær sína síðustu breytingu, Cavani kom inn á í stað McTominay og átti að fjölga inn í boxi andstæðingsins.

Embed from Getty Images

Næsta færi kom eftir fyrirgjöf frá Greenwood sem endaði með skalla frá Bruno en skallinn var laus og auðveldur fyrir Martinez. Gestirnir fóru í kjölfarið að gefa í og uppskáru bæði hornspyrnu og innkast stuttu eftir þetta. Úr löngu innkasti frá Cash ákvað Lindelöf að skalla boltann í horn þrátt fyrir að vera undir lítill sem engri pressu. Úr horninu kom svo sigurmarkið. Cavani og Hause áttust við í teignum og eftir tiltal frá dómaranum hófst dansleikur þessara leikmanna í kringum de Gea. Þegar boltinn kom í átt að markinu stakk Hause sér fram í átt að nærstönginni og skallaði boltann framhjá de Ge og breytti stöðunni í 0-1 með örfáar mínútur til leiksloka.

Þegar komið var í uppbótartíma virtist lukka United loksins vera að snúast. Bruno Fernandes átti fyrirgjöf úr aukaspyrnu á kantinum sem Cavani skallaði í átt að markinu. Boltinn fór af höfðinu á honum og í höndina á títtnefndum Hause. Vítaspyrna dæmd og loks fengjum við úr því skorið hvort Bruno eða samlandi hans, Ronaldo, færi á punktinn. Það varð hálfgerður skrípaleikur í kringum punktinn og Martinez og fleiri leikmenn Aston Villa virtust vera að reyna hafa áhrif á dóminn þrátt fyrir að VAR herbergið hefði staðfest dóminn.

Embed from Getty Images

Það kom eflaust mörgum á óvart að Bruno stillti upp boltanum og hugðist taka vítið. En lukkan var ekki með honum í þetta skiptið og skot hans fór himinhátt yfir markið. Mjög ólíkt honum en það þýddi að United fór stigalaust úr þessum leik.

 

Pælingar að leik loknum.

Núna hefur United haldið einu sinni hreinu í síðustu 16 leikjum. Fyrir lið sem hefur varið jafn háum fjárhæðum í varnarmenn er það hreinlega ekki boðlegt. David de Gea hefur verið frábær að undanförnu svo ekki liggur sökin hjá honum. Liðið hefur verið að fá á sig mörk úr föstum leikatriðum og á þessu tímabili hefur liðið líka fengið á sig mörg skot fyrir utan teig.

Eric Ramsey var ráðinn í sumar til að taka við þjálfun varðandi föst leikatriði en enn eigum við eftir að sjá afraksturinn af því, þó vert sé að sýna þolinmæði enda lítið búið af tímabilinu. En þessi leikur þýðir það að United mun að öllum líkindum missa Liverpool fram úr sér, Chelsea stendur í stað eftir 0-1 tap gegn City, sem eru líka komnir fram úr okkur.

Embed from Getty Images

Auðvitað þarf að taka inn í reikninginn að Solskjær neyddist til að breyta vörninni tvisvar en þetta lið á alltaf að geta skorað á hvaða lið sem er. En fyrstu fréttir herma að Maguire og Shaw verði að öllum líkindum ekki með í miðri viku gegn Villareal. Við eigum harma að hefna eftir Evrópudeildina og þurfum líka að rífa okkur upp eftir tvö 0-1 töp í röð. En áfram gakk, næsti leikur takk!

Eftir fyrstu fimm deildarleiki þessa veturs situr United í 3. sæti með 13 stig, rétt eins og Chelsea og Liverpool sem þó hafa +2 í markatölu á okkur. Ekkert lið hefur skorað fleiri mörk en United þrátt fyrir að liðið hafi ekki fengið eitt einasta víti það sem af er leiktíðar. Þetta kann að hljóma eins og draumastaða en dapurt tap varaliðsins í deildarbikarnum í vikunni og súr byrjun á Meistaradeildinni í Sviss varpa skugga á annars fínt gengi í deild. Þá hefur spilamennska liðsins einnig verið gagnrýnd en liðið hefur engu að síður einungis tapað tveimur stigum í fimm leikjum þrátt fyrir að liðið hafi ekki spila eftir getu í þeim öllum.

Liðið hefur spilað við Leeds, Southampton, Newcastle, Wolves og West Ham en nú er röðin komin að Aston Villa en baráttuglaðir lærisveinar Dean Smith áttu heldur betur góðu gengi að fagna á síðustu leiktíð eftir að hafa rétt bjargað sér frá falli árið áður. Aston Villa endaði reyndar í 11. sæti í fyrra en var lengi vel í baráttu um Evrópusæti en á endanum helltust þeir úr lestinni en enduðu samt sem áður 10 stigum ofar en næsta lið.

l

Aston Villa

Liðið fór mikinn á leikmannamarkaðinum í sumar. Þeir byrjuðu sumarið með látum og keyptu Emiliano Buendía, 24 ára gamlan argentínskan sóknarmiðjumann á 35 millj. punda. Buendía var kosinn besti leikmaður Championship deildarinnar í fyrra með 15 mörk og 17 stoðsendingar fyrir Norwich sem jafnframt unnu deildina þægilega en ef tekið er mið af sóknarleik liðsins í Úrvalsdeildinni sést að þetta hefur verið driffjöðurin í sóknarleik liðsins.

Embed from Getty Images

Aston Villa lét hann ekki duga heldur sópaði til sín leikmönnum, Ashley Young kom frítt frá Inter, Leon Bailey kom frá Bayer Leverkusen á 30 millj. punda, Danny Ings kom að sunnan á 27 millj. og síðan kom Alex Tuanzebe á láni frá United. Þetta var hins vegar einungis hægt vegna þess að þeir seldu uppalinn landsliðsmann sem státar glæsilegustu kálfum deildarinnar.

 

Embed from Getty Images

Hér á ég auðvitað við Jack Grealish sem seldur var á metupphæð til Manchester City. Lykilmaðurinn í þessu Aston Villa liði undanfarin ár og ætlaði stjórnin svo sannarlega að bæta upp allt sem þeir misstu með því að fá fyrrnefnda leikmenn til liðs við sig. Dean Smith sagði að þeir hefðu misst mikið þegar Grealish fór en þeir hefðu sannarlega keypt leikmenn sem ættu að geta það sem hann getur gert, það gleymdist hins vegar að segja stjóranum að hann getur ekki leikið þeim öllum inn á í einu í stað Englendingsins.

En að öllu gamni slepptu þá er Dean Smith frábær stjóri sem tók við Aston Villa 10. október 2018 en áður stýrði hann Brentford og Walsall þar áður. Aston Villa hefur undir hans stjórn unnið rúmlega 40% leikja sinna og spilar oft á tíðum mjög skemmtilegan sóknarfótbolta. Honum tókst meðal annars að koma liðinu í úrslitaleikinn gegn Manchester City í deildarbikarnum fyrir 2 árum, kom þeim í gegnum umspilið í Championship árið áður og þá var hann einnig valinn „Manager of the Month“ Úrvalsdeildinni í desember á síðasta ári.

Embed from Getty Images

Hann er duglegur að breyta liðsuppstillingu og leikkerfum eftir því sem hann telur henta hverju sinni en núna eftir að Ollie Watkins er orðinn leikfær aftur hefur hann stillt upp í 5-3-2 til að koma honum og Danny Ings báðum inn í byrjunarliðið, með misjöfnum árangri (0-3 tap gegn Chelsea og 3-0 sigur gegn Everton).

Liðið átti leik í miðri viku gegn Chelsea þar sem Smith ákvað að stilla upp frekar breyttu liði og gaf t.a.m. framherjunum sínum frí. Það ættu því allir að vera ferskir á morgun fyrir leikinn að undanskildum Leon Bailey sem verður frá vegna meiðsla fram yfir landsleikjahlé. Þá er Alex Tuanzebe á láni frá United og má ekki spila gegn klúbbnum. Því spái ég liðinu á morgun;

 

Manchester United

Það eru einhverjar jákvæðar fréttir úr herbúðum United fyrir komandi umferð. Má þar nefna að Edinson Cavani er orðinn leikfær og þrátt fyrir að trúleysi hafi farið aukandi á heimsvísu þá halda kraftaverkin áfram að gerast. Eric Bailly er heill og leikfær og spilaði við hlið Lindelöf í deildarbikarnum og Phil nokkur Jones, sem eldri stuðningsmenn hafa kannski séð spila fyrir United, var á bekknum í þeim leik. Það verður þó að teljast ólíklegt að nokkur þeirra komi við sögu í leiknum á morgun, einna helst þá Cavani, en því spái ég liðinu á þann veginn;

Marcus Rashford og Amad Diallo eru enn frá vegna meiðsla en eru báðir á batavegi. Jadon Sancho spilaði í miðri viku og verður líklegast á bekknum og þar sem Aaron Wan-Bissaka er í leikbanni fyrir næsta Meistaradeildarleik fæ Diogo Dalot líklegast að spreyta sig þar. Wan-Bissaka verður því líklegast áfram í hægri bakverðinum. Dean Henderson spilaði sinn fyrsta leik á tímabilinu í vikunni og stóð sig vel gegn West Ham en David de Gea hefur verið nánast óaðfinnanlegur í markinu það sem af er, sem sést líka á því að 3 af 4 mörkum sem liðið hefur fengið á sig í deildinni hafa komið fyrir utan teig, þar af tvö sem breyttu um stefnu (Ayling og Benrahama mörkin).

Embed from Getty Images

Liðið ætti því að velja sig nokkurn veginn sjálft, Ronaldo er ógnvænlegur upp á toppnum og Mason Greenwood hefur verið að raða inn mörkum, kominn með 9 eða 10 mörk í síðustu 12 leikjum sínum fyrir liðið og Pogba er langstoðsendingahæstur í deildinni og virðist finna sig vel á vinstri kantinum.

Embed from Getty Images

Stigin sem eru í boði úr þessum leik og þeim næsta (gegn Everton) eru án vafa mjög mikilvæg fyrir liðið enda er liðið að sigla inn í eina erfiðustu leikjahrinu sem sögur fara af:

Leicester City (Ú)
Atalanta (H)
Liverpool (H)
Tottenham (Ú)
Atalanta (Ú)
Manchester City (H)
Watford (Ú)
Villareal (Ú)
Chelsea (Ú)
Arsenal (H)

Eftir þetta gengur í garð talsvert hentugri dagskrá ef svo má að orði komast en þessi hrina mun reyna verulega á lykilleikmenn og breidd hópsins. Ferðalög til Ítalíu og Spánar ásamt því að spila við öll hin stóru liðin í deildinni mun bæði reyna á liðið og stjórann og verður áhugavert að fylgjast með á komandi vikum hvernig þetta fer allt saman.

Leikurinn við Aston Villa hefst 11:30 á morgun á Old Trafford

 

Liðið var eins og spáð hafði verið, albreytt frá síðasta leik

Varamenn: Heaton, Jones, Wan-Bissaka, Bruno (72′), McTominay, Elanga (72′), Greenwood (61′)

Lið West Ham var líka að mestu breytt

Leikurinn var tíðindalítill framan af, West Ham aðeins sókndjarfari, fengu næstum færi á 7. mínútu þegar Yarmolenko skaut í Bailly og tveimur mínútum síðar kom mark. West Ham fór upp hægra megin, Fredericks var kominn á öfugan kant og fór auðveldlega framhjá þremur varnarmönnum. Alex Telles var einna sekastur í að hleypa honum í gegn. Fredericks komst upp að endamörkum við markteigslínuna, gaf út í teiginn og þar var Lanzini algerlega óvaldaður og skoraði auðveldlega. Hrikalega slök varnarvinna þar og West Ham komið með forystuna.

Þá loksins vöknuðu United menn og skelltu í stöðuga sókn næstu mínútu. Lingard hefði líklega átt að fá víti fyrir peysu- og buxnatog frá Noble en annars voru varnarmenn með á nótunum. Mata og Martial voru næstum búnir að búa til færi en Martial ákvað að renna boltanum þvert. Það var hins vegar Diogo Dalot sem var næstur boltanum en ekki einhver sóknarmaður, sem skýrir hvers vegna hann var 3 metra frá en ekki að éta færið.

Þetta var alveg mynstrið fram yfir miðjan hálfleik, West Ham leyfði United að leika sér en sóknirnar voru bitlausar. Jesse Lingard leiddist þetta þóf og reyndi skot sem reyndist vera alveg prýðileg tilraun, en Areola varði i horn.

Bitleysið í sóknum United var hvort tveggja að þakka ágætri og stundum helst til of harkalegri vörn United og líka því að leikmenn United virtust í stökustu erfiðleikum með að finna glufur og hvern annan, og hraðinn á þeim var sjaldnast mikill.

Hvorugt lið gerði breytingu í hálfleik og leikurinn hélt áfram í sama gír og fyrir hlé. Oft var eins og United vantaði aðeins herslumuninn, síðustu sendinguna.

Juan Mata átti ekki góðan dag, enda kominn af léttasta skeiði, og hann var fyrstur útaf á 62. mínútu. Mason Greenwood kom inn á og fyrsta snerting hans var að taka á móti langri sendingu inn fyrir. Skotið var aðeins of ónákvæmt og Areola varði vel.

Embed from Getty Images

Næstu tíu mínútur gáfu hins vegar lítið meira af spennu og Anthony Elanga og Bruno Fernandes komu inná til að setja meiri kraft í þetta. Telles og Lingard fóru útaf. Þetta hafði nokkur áhrif og pressa United jókst og ákefðin sem hafði sárlega vantað var að koma. En marktilraunirnar voru aðallega langskot sem voru ekki alveg nógu góð.

Þess í stað átti Yarmolenko að klára þetta þegar West Ham komst í sjaldgæfa sókn, og Yarmolenko var allt í einu kominn innfyrir og framhjá Henderson en tókst einhvenr veginn að skjóta í stöng.

Það var allt opið í United vörninni þegar West Ham komst í gagnsóknir því strax í þeirri næstu fékk Mark Noble boltann einn á móti Henderson og í þetta skiptið varði Henderson. Illa nýtt þar hjá West Ham en það kom þeim ekki í koll. Þrátt fyrir að United reyndi alls konar undir lokin og Dean Henderson kæmi fram í horn varð í raun aldrei ógn af því og West Ham sigldi sigrinum heim.

Þetta var afskaplega slök frammistaða hjá United. West Ham gat haldið sig vel til baka og United fundu engar leiðir. Þetta var enn einn handboltaleikurinn, þar sem United voru að senda á milli sín út á velli og stungusendingarnar fundu aldrei leið og langskotin voru vonlaus.

Ekki fyrsti leikurinn sem við sjáum svona frá þessum leikmönnum, kannske sá síðasti í bili, varamennirnir byrja á laugardaginn og þá verður einn mesti leikbreytir boltans með.

Það er eitthvað.

Það molnar sífellt undan deildarbikarnum og kæmi líklega fáum á óvart ef stóru liðin hættu þátttöku eða settu U-23 alfarið í keppnina, líkt og þau eru núna í framrúðubikar neðri deilda. En það er ekki enn komið að þeim tíma og Manchester United mætir West Ham í annað skiptið á fjórum dögum á morgun.

Það gerir þó enginn ráð fyrir að liðin verði eitthvað lík því sem þau voru á sunnudaginn. Nú þegar er búið að tilkynna að Anthony Elanga og Alex Telles verði í hópnum og búist er við að Phil Jones verði það líka á sinni löngu leið tilbaka úr meiðslum. Það er þó ekki endilega það sama og að þeir byrji og við skjótum á að liðið verði albreytt.

Dean Henderson er búinn að spila með U-23 og ætti að vera tilbúinn, og þarf að sýna sig, því eins og David de Gea er búinn að vera spila verður erfitt að ryðja honum úr sessi. Ef Telles er heill verður öll vörnin fersk. Það er ólíklegt annað en að Donny van de Beek fái sjaldgæft tækifæri til að sýna sig. Hvort Nemanja Matic verður treyst fyrir heilum leik verður að koma í ljós,  Jesse Lingard byrjar örugglega, sem og Anthony Martial. Jadon Sancho þarf heilan leik og þá er bara spurningin hvort það er nóg eftir  í tankinum hjá Juan Mata til að hann byrji, en segjum það bara.

Það verður síðan örlítið spennandi að sjá bekkinn, það ætti að vera eitthvað af stóru kanónunum þar ef Solskjær ætlar að taka keppnina eitthvað alvarlega. Það er jú ekkert verra að hafa þessa leiki inn á milli til að gefa mönnum tækifæri, enda sést af ofangreindu liði að United getur stillt upp mjög sterku varaliði.

West Ham

Markvörðurinn Alphonso Areola kom á láni frá PSG og búist er við honum í byrjunarliði. Alex Král er annar lánsmaður sem búist er við að fái tækifæri, ungur Tékki sem er samningsbundinn Spartak Moskvu. Mikhail Antonio fékk að hvíla um helgina vegna banns og gæti því mætt ferskur ef ekki á að spara hann fyrir deildarleik gegn Leeds um helgina. Loks gæti verið að Mark Noble byrji en hann sat á bekknum á sunnudaginn áður en hann kom inná til að láta De Gea verja frá sér víti.

Að auki eru nefndir Issa Diop, Ryan Fredericks og Manuel Lanzini, sem léku í Evrópudeildinni á fimmtudaginn.

Leikurinn hefst kl 18:45 að íslenskum tíma og Jonathan Moss sér um að blístra.