Villarreal
Manchester United
Atalanta
Young Boys
Leikjaplanið ætti að verða klárt á laugardaginn
Hinir riðlarnir líta svona út:
Manchester City
PSG
RB Leipzig
Club Brugge
Atletico Madrid
Liverpool
FC Porto
AC Milan
Sporting CP
Borussia Dortmund
Ajax
Besiktas
Inter
Real Madrid
Shakhtar Donetsk
Sheriff
Bayern München
Barcelona
Benfica
Dynamo Kiev
Chelsea
Juventus
Zenit
Malmö
Í kvöld fór fram annar leikur okkar á tímabilinu en að þessu sinni heimsótti liðið þéttsetinn St. Mary’s völl í Southampton. Mikil eftirvænting var meðal stuðningsmanna United eftir leiknum enda var mögulegt að bæði Varane og Sancho fengju fyrsta tækifæri sitt í byrjunarliðinu. Solskjær gerði vissulega tvær breytingar á liðinu sem vann Leeds mjög sannfærandi 5-1 um síðustu helgi en eflaust komu þessar skiptingar flestum á óvart. Nemanja Matic kom inn fyrir McTominay og Martial kom inn í stað Daniel James. Nýju stjörnurnar því bara á bekknum:
Á sama tíma stillti Hassenhuttl upp Southampton í 4-2-2 :
Fyrstu 6-7 mínúturnar voru alfarið í eigu Southampton sem mættu grimmir til leiks og reyndu að færa sér það í nyt að United virtist hafa gleymt að hita upp. En eftir þessar upphafsmínútur kom fyrsta færi United. Það kom eftir brot á Fred en úr aukaspyrnunni kom ágætis fyrirgjöf frá Bruno sem endaði fyrir aftan varnarmúrinn þar sem Maguire tók flugskalla en hitti boltann ekki betur en svo að hann skoppaði ofan á slánni. Þaðan datt hann aftur út í markmannsteiginn þar sem Martial átti einnig skalla sem var bjargað á línu.
Stuttu síðar virtist aftur skapast hætta úr föstu leikatriði frá gestunum, Shaw átti núna fyrirgjöf á fjærstöngina þar sem Pogba tók á móti boltanum, lék á einn varnarmann en skot hans var varið af öðrum varnarmanni.
Þegar hér var komið við sögu tók völlurinn heldur betur við sér og mátti greinilega heyra stuðningsmenn United syngja um Bruno og Martial og frábær stemming á vellinum.
Pogba gerði svo vel í því að krækja í aðra aukaspyrnu við vítateigshornið. Aftur var það Shaw og aftur fann hann Pogba í teignum en að þessu sinni skallaði sá franski boltann yfir þverslánna.
Eftir þetta var ansi lítið að frétta og mikið miðjumoð og barátta.
Bæði lið voru fljót að tapa boltanum og vinna hann aftur. Það sem kannski hjálpaði heimamönnum var að Fred, Lindelöf, Matic og Wan-Bissaka virkuðu allir úr takt og voru ekki að dansa eftir sama laginu í hálfleiknum. Síendurtekin mistök, menn að fylla í sama svæðið á vellinum, hlaupandi í kringum hvern annan, misreikna sendingar og gefa boltann beinustu leik útaf virtist gefa heimamönnum byr undir báða vængi.
Embed from Getty Images
Þeir byrjuðu að færa sig ofar á völlinn og pressa gestina verulega sem skilaði sér því United voru farnir að slaka á þrátt fyrir að staðan væri enn eingöngu 0-0. Á 30. mín var boltanum stolið af Bruno hátt upp á vellinum og Southampton léku vel á milli sín og á endanum datt boltinn fyrir Che Adams við vítateigsbogann en hann smellti honum í tánna á Fred og þaðan alveg út við stöngina og því miður varð sá spænski að játa sig sigraðan enda mikil stefnubreyting á boltanum.
Eftir markið vonuðust eflaust flestir United menn eftir kröftugu svari en þeir urðu fyrir vonbrigðum. Leikmenn United virtust áhugalitlir samanborið við Leeds leikinn og pirringur farinn að gera vart um sig. Sjálfsagt út af því að einhverjir töldu brotið á Bruno í aðdraganda marksins.
Rétt fyrir lok fyrri hálfleiks fengu United aukaspyrnu við vítateigsbogann eftir að heimamenn töpuðu honum klaufalega. Bruno stóð, ásamt Fred, yfir boltanum en skotið fór beint í vegginn og þaðan í horn. Úr hornspyrnunni kom eflaust hættulegasta færi United í fyrri hálfleiknum.Úr henni tókst Shaw að finna Matic en skalli hans fór niður í grasið og McCarthy átti ekki í teljandi vandræðum með að verja. Miðað við þennan fyrri hálfleik var breytinga þörf.
Embed from Getty Images
Það var þó ekki strax sem við sáum breytingar. Óbreytt lið marseraði út á völlinn í síðari hálfleik og fór hann ágætlega af stað til að byrja með. Liðið krækti í nokkrar hornspyrnur og síðan fékk Pogba gott færi og vildi reyndar fá víti þegar skot hans virtist fara í hönd varnarmanns en í endursýningu sást að svo var ekki.
Á 54. mín dróg loks til tíðinda fyrir okkar menn þegar sókn United fór að þyngjast. Pogba fékk boltann vinstra megin í teig heimamanna og eftir laglegt þríhyrningaspil við Bruno inn í teignum kom hann boltanum á Mason Greenwood sem skoraði, annan leikinn í röð. Reyndar var McCarthy alls ekki langt frá því að verja frá honum en inn lak boltinn og staðan orðin 1-1. Nóg eftir og Sancho farinn að hita upp á hliðarlínunni. Sá enski kom svo inn á fyrir Martial, sem átti rólegan dag, á 59. mínútu.
Nokkrum sekúndum síðar komst Pogba í frábært færi við vítateigsbogann þegar hann var umkringdur 5-6 varnarmönnum sem allir virtust bakka frá honum. Færið bjó Pogba til sjálfur en hann dróg skot sitt rétt framhjá stönginni. Hvort sem það var útaf skiptingunni eða bara af hreinni tilviljun í kjölfar hennar þá virtist hápressa liðsins snaraukast í kjölfar hennar.
Fljótlega kom frábær sókn hjá United sem byrjaði með því að Matic vann boltann á okkar vallarhelmingi og kom boltanum áfram upp vinstri vænginn þar sem hann endaði hjá Luke Shaw. Bakvörðurinn geystist fram og kom síðan með góða fyrirgjöf sem var miðuð á Sancho en sá síðarnefndi náði ekki alveg til hans og elti boltann út á vænginn. Þaðan kom síðan fyrirgjöf sem Greenwood skallaði í átt að markinu en boltinn lenti ofan á þaknetinu.
Skömmu síðar átti Bruno skalla að marki en McCarthy gerði vel og varði boltann. Um þessar mundir var pressa United töluverð og samhliða því lítið sem heimamenn náðu að setja saman hinu meginn á vellinum. Eða þar til dampurinn datt örlítið úr United og kæruleysi fór að gera vart um sig. Fyrirliðinn Maguire gerðist sekur um slæm mistök þegar hann lét heimamenn stela af sér boltanum fyrirhafnarlítið. Úr varð dauðafæra þar sem Che Adams var kominn einn í gegn en David de Gea átti frábæra markvörslu og kom boltanum í horn. Annað dauðafæri kom úr horninu, þegar títtnefndur Adams bjó sér til pláss og skallaði boltann að markinu en boltinn skoppaði yfir á fjærstöngina og með klafsi kom United boltanum í burtu. Fleiri urðu mörkin ekki og lokaniðurstaðan 1-1 jafntefli í slökum leik.
Áður en lengra er haldið ætla ég að gefa leikmönnunum einkunn fyrir leikinn:
de Gea (7), Shaw (6), Maguire (4), Lindelöf(5), Wan-Bissaka(4), Matic(4), Fred(4), Pogba(6), Bruno(5), Greenwood(7) og Martial (5).
David de Gea bjargaði stiginu fyrir okkur, nokkuð sem hann hefur gert í fjölmörg ár án þess að fá endilega nægilegt lof fyrir en í dag minnti hann verulega vel á hæfileikana sem hann býr yfir.
Varnarlínan okkar fær falleinkunn í heild sinni. Fyrirliðinn missti einbeitingu á mikilvægum tíma í leiknum og heilt yfir virtist enginn taktur í mönnum í öftustu línu.
Miðjan var engu skárri en Matic virtist þvælast fyrir Lindelöf og öfugt, trekk í trekk og Fred virtist alls ekki hafa spilað fótbolta með Matic áður. Southampton vann bardagann á miðjunni og það var munurinn í dag.
Sóknin var þolanleg, Martial hljóp og pressaði vel en lítið annað sem kom úr honum, Pogba og Bruno áttu mjög góðar rispur en voru langt frá því sem við sáum fyrir viku. Besti leikmaðurinn var Greenwood sem kláraði færið sitt vel og var ljósi punkturinn í dag.
Það sem kláraði leikinn fyrir okkur var að samspilið á milli varnar og miðju gékk brösuglega. Vissulega var Solskjær að bregðast við smávægilegum meiðslum skotans okkar á miðjunni en ekkert flæði komst á leik liðsins í meira en 1-2 mínútur í senn. Liðið virkaði eins og það hefði hvorki fengið hvíld né undirbúningstímabil og sumir leikmenn liðsins voru að spila eins og þeir hefðu tekið síðdegisleik í gær.
Ef eitthvað gott á að taka úr þessum leik þá er það líklegast sú staðreynd að núna hefur Solskjær fullt efni til þess að setja Sancho og Varane inn í byrjunarliðið gegn Wolves um næstu helgi og vonandi verður Cavani klár þá. Annað þá jafnaði United met Arsenal („the invincibles“) með þessum leik en úrslitin þýða það að United hefur ekki tapað á útivelli í 27 leikjum í röð sem er magnaður árangur þótt annað verði sagt um úrslit leiksins.
https://twitter.com/SkySportsNews/status/1429463265789333517
Næsti leikur er sem fyrr segir gegn Wolves á Molineux vellinum þann 29. ágúst klukkan 15:30.
Næsti deildarleikur Manchester United fer fram á morgun en þá heldur liðið suður með sjó og mætir á Saint Mary’s völlinn í Southampton. Eftir griðarlega skemmtilegan og sterkan 5-1 heimasigur gegn Leeds undir stjórn Marcelo Bielsa situr United á toppi deildarinnar (þó einungis eftir einn leik) og má gera ráð fyrir því að þau úrslit hafi ekki gert neitt nema aukið sjálfstraust liðsins. Raphael Varane var kynntur fyrir leikinn og reif upp stemminguna fyrir leik og Jadon Sancho fékk örfáar mínútur og var nálægt því að fagna þeim mínútum með stoðsendingu en nánari úttekt á leiknum var tekin fyrir í síðasta Djöflavarpi vikunnar.
En á svipuðum tíma og United keyrði yfir erkifjendurna í Leeds fóru mótherjar okkar í ekki eins farsæla ferð til Liverpoolborgar þar sem Rafa Benitez stýrði Everton til sigurs gegn Dýrlingunum. Sá leikur fór reyndar vel af stað fyrir liðið að sunnan en þeir komust yfir á 22. mínútu með marki frá Adam Armstrong en Adam var ekki lengi í paradís því Everton svaraði með þremur mörkum í seinni hálfleik.
Á undirbúningstímabilinu spilaði fínan bolta gegn Championship liðunum Cardiff og Swansea (sem lentu í 8. og 4. sæti í deildinni í fyrra) og eftir það unnu þeir Levante með einu marki en Athletic Bilbao reyndist of stór biti og fór sá leiku 3-1 fyrir spænska liðið. Heilt yfir þó ekki slök frammistaða en það er eitt að spila æfingaleiki og annað að spila leik í Úrvalsdeildinni eins og Ralph Hasenhüttl þekkir vafalaust og liðið virtist engan veginn tilbúið í slaginn gegn Everton um helgina.
Á síðustu leiktíð mættust liðin fyrst á heimavelli Dýrlinganna þar sem United fór með 2-3 sigur af hólmi eftir frábæra innkomu Cavani en síðari leikurinn sem því miður fór fram án áhorfenda á Old Trafford lauk með 9-0 stórsigri United þar sem gestirnir fengu 2 rauð spjöld og sjö mismunandi leikmenn skoruðu fyrir United. Það gætu því margir búist við því að United myndi valta yfir Southampton á sunnudaginn en þeir hafa þó reynst okkur sýnd veiði en ekki gefin. United hefur reyndar ekki tapað gegn þeim síðan 23. janúar 2016 en síðan þá hafa liðin mæst ellefu sinnum, sex sigrar, fimm jafntefli og markatalan 26-11. Þeim hefur oft tekist að hanga á jafntefli þrátt fyrir látlausar sóknir okkar manna og jafnvel þrátt fyrir að vera manni færri en það er seigt í þessu Southampton liði.
En þrátt fyrir það lenti liðið í 15. sæti á síðustu leiktíð þrátt fyrir að hafa á tímabili verið á toppi deildarinnar en eftir að liðið sigraði Liverpool og Ralph Hasenhüttl kraup niður á hné grátandi virtist ekkert ganga upp hjá dýrlingunum sem töpuðu hverjum leiknum á fætur öðrum. Liðið vann 12 leiki, gerði 7 jafntefli og tapaði 19 leikjum (50%) og eru margir á því að Hasenhüttl þurfi að draga fram fleiri töfrabrögð en það að vinna ríkjandi meistara ef hann ætlar að halda Dýrlingunum í deild þeirra bestu á næstu leiktíð.
Hann á hins vegar ekki létt verk fyrir höndum enda hefur liðið orðið fyrir blóðtöku, Danny Ings (29) er farinn til Aston Villa, Jannik Vestergaard (29) er farinn til Leicester City og þá er Ryan Bertrand (31) farinn frítt og Takumo Minamino (26) snúinn aftur heim til Liverpool eftir lánið. Á sama tíma hafa þeir fengið til liðs við sig Adam Armstrong (24) úr Championship deildinni, Romain Perraud (23) úr frönsku deildinni og Valentino Livramento að láni frá Chelsea U-23. Brekkan virðist því ansi brött fyrir Austurríkismanninn í brúnni.
Þrátt fyrir að það sé ekki með góðu móti hægt að bera saman keppnisleiki við æfingaleiki á undirbúningstímabili ætla ég að gera það til gamans. Því tilviljun ein réði því að United spilaði síðasta leik sinn á undirbúningstímabilinu við Everton sem voru einmitt mótherjar Southampton um síðustu helgi eins og áður sagði.
Everton (4-2-3-1) gegn Man Utd:
Pickford, Digne, Keane, Godfrey, Coleman, Doucouré, Allan, Iwobi, Rodriguez, Townsend, Gray.
Everton (4-2-3-1) gegn Southampton:
Pickford, Digne, Keane, Holgate, Coleman, Doucouré, Allan, Richarlison, Gray, Townsend, Calvert–Lewin.
Eins og sést er ekki mikill munur á byrjunarliðunum í þessum leikjum að undanskilinni sókn Everton manna. Dominic Calvert-Lewin og Richarlison koma inn fyrir James Rodriguez og Alex Iwobi og Mason Holgate stekkur inn í vörnina í stað Ben Godfrey. Everton steinlá fyrir United í þessum leik 3-0 í fyrri hálfleik og áttu bláliðar aldrei færi á að koma einhverju höggi á United. Síðan mæta þeir löskuðu Southampton liðið (án lykilmanna og með 3 nýja leikmenn í byrjunarliðinu) og keyra yfir þá 3-1.
Þetta Southampton lið átti í stökustu vandræðum með að komast framhjá vörn heimamanna og einungis varnarmistök sem urðu til þess að Armstrong skoraði sitt fyrsta Úrvalsdeildarmark. Stjórinn stillir upp í 4-4-2 sem flæðir stundum yfir í 4-2-2-2, kerfi sem hann notaði með ágætis árangri fyrir 2 árum síðan. Töluvert hefur nú dregið úr sóknarstyrk liðsins en föstu leikatriðin, sem yfirleitt voru í höndum James Ward-Prowse, virðast ekki eins hættuleg þegar Vestergaard og Ings eru ekki lengur til staðar.
Che Adams og Djenepo eru báðir skeinuhættir en þeir virðast þó of mistækir til að það sé þorandi að taka áhættuna á að reiða sig einungis á þá tvo yfir heilt tímabil. Adam Armstrong er síðan óskráð númer en hann gerði virkilega flotta hluti í b-deildinni í fyrra. Þá eru báðir bakverðir liðsins óreyndir í ensku deildinni og Jack Stephens í vörninni átti afleitan dag gegn Everton þannig að ef United mætir með sama hugarfar og þeir gerðu í fyrstu umferðinni þá ætti þessi leikur að vera fyrir þá eins og að veiða fisk í tunnu. Þrátt fyrir að liðið tapaði 3-1 í fyrstu umferðinni tel ég að stjórinn komi til með að halda sig við 4-4-2 og sama byrjunarlið:
Það ætti að vera ágætis andi í búningsklefanum hjá United eftir þessa byrjun, með 75 þús. áhorfendur, stórsigur á erkifjendum, efstir á töflunni, Varane kynntur til leiks fyrir leikinn og mikil jákvæðni í loftinu. Þrátt fyrir hörkugóð kaup í sumar er liðinu ekki spáð nema 3.-4. sætinu, liðið ætti þó að sigla þægilega inn í Meistaradeildarsæti en ætti ekki að gera sér vonir um efstu tvö sætin ef marka má sparkspekingana. Vonandi er liðið ekki mikið að lesa þessa spá né heldur að velta fyrir sér spám og getgátum heldur með alla einbeitingu á leiknum gegn Southampton. Eftir Leeds leikinn er erfitt að réttlæta það að gera mikið af breytingum, enda til hvers þegar hlutirnir virðast virka?
Það er þó augljóst að Raphael Varane og Jadon Sancho voru ekki keyptir til þess að verma bekkinn enda heimsklassa leikmenn. Þrátt fyrir að Daniel James og sérstaklega Victor Lindelöf hafi átt fínan leik er erfitt að sjá að þeir haldi sæti sínu í liðinu mikið lengur. Ég tel að James verði að víkja fyrir Sancho en hugsanlega bíður Solskjær lengur með að setja Varane inn í liðið, jafnvel ekki fyrr en eftir landsleikjahlé þegar hann hefur náð að æfa vel með liðinu. Engu að síður þá stilli ég upp liðinu eins og ég tel að Solskjær vilji hafa það fyrir leikinn gegn Southampton:
Nýja breytingin hjá enska knattspyrnusambandinu heimilar liðum að hafa níu leikmenn á bekknum og þar vil ég sjá þá: Tom Heaton, Anthony Martial, Amad Diallo, Anthony Elanga, Alex Telles, Raphael Varane, Donny van de Beek, Eric Bailly og Diogo Dalot.
Ef ég fengi ráðið færu Sancho og Varane beint inn í liðið og McFred væri ekki á miðjunni heldur Nemanja Matic og Donny van de Beek sem spiluðu frábærlega saman á móti Everton en serbinn gerði liðinu kleift að spila 4-3-3 og henda fleiri mönnum fram sem gerði það að verkum að liðið átti mun auðveldara með að brjóta á bak aftur varnarmúrinn. Þrátt fyrir að Southampton verði með fullan völl af stuðningsmönnum er enginn að fara telja mér trú um annað en að þeir verði varkárir og liggi djúpt í leiknum gegn okkur og því gæti þessi miðjukokteill svínvirkað í leiknum.
Það verður þó hins vegar að nefna það að McTominay og Fred spiluðu mun framar en þeir eru vanir í síðasta leik og hugsanlega mun Solskjær hleypa þeim aftur svo framarlega, sérstaklega ef Varane kemur inn í liðið með meiri hraða í varnarlínuna okkar. Annars eru Shaw, Pogba, Bruno, Greenwood og Maguire allir læstir í byrjunarliðið um þessar mundir og hafa varla stígi feilspor.
Mest er ég spenntur fyrir því að sjá Sancho spila 90 mínútur enda held ég að það gæti reynst afar vænlegt að spila honum gegn leikmanni sem er einnig nýr í ensku deildinni. Helstu styrkleikar Sancho felast einmitt í því að ná að einangra menn í 1-á-1 og taka þá síðan á, ásamt því að draga í sig tvo, þrjá og stundum fjóra varnarmenn sem býr til gríðarlega mikið pláss fyrir aðra leikmenn á vellinum. Það gæti þá opnað stór svæði fyrir Bruno til að hlaupa inn í en eins og sást í Leeds leiknum og á síðustu leiktíð eru fáir sem virka betur sem eins konar ‘second striker’ og þegar eins fjölhæfur og skapandi leikmaður eins og Sancho er kominn á svæði sem mótherjar okkar voru nánast hættir að dekka (þ.e. hægri kantinn) verður spennandi að sjá hvernig lið bregðast við því, þar sem tæpur helmingur allra sókna United liðsins fór upp í gegnum vinstri kantinn á síðustu leiktíð.
Um er að ræða sunnudagsleik fyrir United en flautað verður til leiks kl 13:00. Flautuleikarinn verður Craig Pawson sem dæmdi síðast leik rauðu djöflanna gegn Leicester City í leik þar sem United neyddist til að spila varaliðinu sökum þéttrar leikjaröðunar. Andre Marriner verður í VAR herberginu og honum til aðstoðar verður Lee Betts.
Maggi, Dóri, Steini og Frikki settust niður og fóru ítarlega yfir stórsigurinn gegn Leeds Utd, félagaskiptagluggann hingað til og hituðu létt upp fyrir leikinn gegn Southampton á sunnudaginn.
Hægt er að hlusta á þáttinn í spilaranum hér fyrir ofan, auk þess sem hægt er að hala honum niður í gegnum spilarann eða hér að neðan. Jafnframt má gerast áskrifandi að þættinum í gegnum ýmis podkast-forrit:
Gerast áskrifandi í Spotify
Gerast áskrifandi í Apple Podcasts
Gerast áskrifandi í öðrum forritum
MP3 niðurhal: 104. þáttur
Ef þið viljið senda okkur spurningar þá er það hægt að senda okkur skilaboð á Facebook síðu Rauðu djöflanna.
Manchester United er komið á topp ensku úrvalsdeildarinnar og verður í eða nálægt toppsætinu eftir umferðina eftir stórgóðan 5-1 sigur á erkifjendunum í Leeds United.
Paul Pogba stjórnaði umferðinni og gaf fjórar stoðsendingar á meðan Bruno Fernanes skoraði 3 mörk (merkilegt nokk þá var ekki eitt þeirra úr víti). Pogba var svo góður að hann gat m.a.s. látið Fred skora.
Raphaël Varane var tilkynntur úti á miðjum velli fyrir leik og stappfullur Old Trafford ærðist. Victor Lindelöf fylltist innblæstri af því og átti frábæran leik. Toppaði þann leik með stórkostlegri stoðsendingu fyrir síðasta markið í þrennu Bruno Fernandes.
Scott McTominay var frábær í leiknum í dag í meira box-to-box hlutverki og olli því að Leeds þurfti að endurskipuleggja allan sinn leik í hálfleik. Mason Greenwood var frábær og skoraði markið sem kom Manchester United aftur yfir í 2-1 eftir að Luke Ayling hafði jafnað í 1-1 með frábæru langskoti í byrjun seinni hálfleiks.
Jadon Sancho fékk svo nokkrar mínútur í lokin til að sýna sig og var mjög vel fagnað.
Toppbyrjun á tímabilinu og vonandi það sem koma skal. Hvílík gleði líka að fá áhorfendur aftur á Old Trafford.
Byrjunarlið Manchester United í leiknum:
Bekkur: Heaton, Dalot, Williams, Andreas, Mata, Matic, van de Beek, Martial, Sancho.
Leeds byrjaði með þetta lið: