Rauðu djöflarnir

Evrópudeildin

Erum við komnir til Gdansk?

skrifaði þann | 3 ummæli

Annað kvöld leika okkar menn gegn Rómverjum í seinni viðureign þessara liða í undanúrslitum Evrópudeildarinnar. Líkt og gegn Real Sociedad og Granada fyrr í þessari keppni er seinni leikurinn algjört formsatriði eftir að hafa náð í ansi góð úrslit í fyrri viðureigninni. Aðeins hefur einvígið gegn AC Milan verið spennandi í seinni leiknum. Eftir 6-2 sigur í síðustu viku gegn Rómverjum og óvænt frí um síðustu helgi ættu okkar menn að vera ansi vel hvíldir og tilbúnir í að klára verkefnið. Með því að klára þessa rimmu þá er liðið í fyrsta skipti komið í ÚRSLITALEIK undir stjórn Ole Gunnars eftir margar óárangursríkar tilraunir hingað til.

Halldór okkar fór ansi vel yfir fyrri viðureignir þessara liða í söguni í upphitun í síðust viku sem ég mæli með að menn kíki á.

Embed from Getty Images

 

Liðsuppstilling

Ég býst við að Ole stilli upp sterku liði annað kvöld en hvíli þó eitthvað þar sem leikja prógrammið er ansi stíft það sem eftir lifir leiktíðar. Næsti leikur er til að mynda í hádeginu á sunnudag sem þýðir aðeins tveggja og hálfs sólarhrings hvíld milli leikja með ferðalagi til Manchester frá Róm inn á milli. Einnig er ekki en vitað hvar frestaða leiknum gegn Liverpool verður troðið inn.

Ég vil sjá Rashford fá hvíld þar sem hann er ekki búinn að vera 100% lengi og því gott að nýta þá góðu stöðu í einvíginu til að hvíla hann. Eins og staðan er núna er aðeins Martial sem er á meiðsla listanum af þeim leikmönnum sem eru skráðir til keppni í Evrópudeildinni. En auðvitað er Phil Jones meiddur en hann er ekki skráður á leikmannalista liðsins í þessari keppni. 

Líklegt byrjunarlið:

1
De Gea
27
Telles
5
Maguire
2
Lindelöf
29
Wan-Bissaka
6
Pogba
17
Fred
21
James
18
Bruno
11
Greenwood
7
Cavani

Rómverjar

Roma hefur ekki unnið leik í síðustu sex leikjum eftir tap gegn Sampdoria um helgina. Það voru þau örfáu korn sem vantaði upp á til að fylla mælinn hjá stjórnarmönnum Roma sem tilkynntu eftir helgi að Paulo Fonseca stjóri liðsins myndi ekki stýra liðinu lengur að þessu tímabili loknu. Talið var næsta víst að Maurizio Sarri fyrrum stjóri Napoli og Chelsea myndi taka við en hið óvænta gerðist. Jose Mourinho er kominn aftur í boltann eftir stuttann tíma frá síðasta starfi og aftur kominn til Ítalíu. Það verður gamann að sjá hvort að þjálfunaraðferðir hans eigi upp á pallborðið í ítalska boltanum eftir ansi storma sama tíma á Englandi síðastliðinn ár.

Embed from Getty Images

Allir þrír leikmenn Roma liðsins sem þurftu að fara af velli vegna meiðsla í fyrri hálfleik í fyrri viðureigninni eru ekki leikhæfir á morgun. Skarð markvarðarins Pau Lopez er sennilega stærst enda er varamarkvörður Roma liðsins, Antonio Mirante sem fagnar 38 ára afmæli sínu seinna á árinu, ekki sá besti miðað við framviðstöðu hans í síðustu viku.

Líklegt Byrjunarlið:

83
Mirante
23
Mancini
6
Smalling
3
Ibañez
31
Perez
42
Diawara
4
Cristante
2
Karsdorp
77
Mkhitaryan
7
Pellegrini
9
Dzeko

Hinn gífurlega reynslumikli Felix Brych dæmir leikinn í Róm, sem hefst á slaginu 19:00 hér á fróni. Úrslitaleikurinn í Gdansk í Póllandi er innan seilingar og vel það. Áfram Man. Utd.!

Enska úrvalsdeildin

Liverpool leiknum frestað um óakveðinn tíma

skrifaði þann | 8 ummæli

Fjölmenn mótmæli á Old Trafford í dag urðu til þess að leik United og Liverpool var frestað

Nokkur fjöldi stuðningsmann komst inn á leikvanginn og mótmælti þar eigendum United. Að auki voru mótmæli við liðshótel United og fór á endanum svo að leiknum hefur verið frestað.

Áformin um Ofurdeildina hafa kristallað hversu óásættanlegir eigendur Glazer fjölskyldan er og Rauðu djöflarnir standa með mótmælendum eins og Roy Keane og Gary Neville gerðu í beinni útsendingu á Sky

“The United fans, we have to applaud them. They’ve had enough. That’s why they’ve reacted the way they have. I find it difficult to criticise them.” sagði Keane.

 

Enska úrvalsdeildin

Liverpool í heimsókn

skrifaði þann | 6 ummæli

Fráfarandi meistarar Liverpool koma í heimsókn á Old Trafford á morgun. Slagurinn um Ísland hefur oft verið merkingarmeiri en í þetta skiptið og þó. Ef Manchester City vinnur Crystal Palace á útivelli í hádeginu á eftir getur Liverpool endanlega gert úti um vonir United á titlinum með sigri á morgun. Þetta væri svipað því þegar ég vaknaði upp 33ja ára að aldri og áttaði mig á að atvinnumannsdraumurinn væri líklega endanlega úti. Langræknir muna eftir 1992 og óþarft að rifja það upp nú.

Sigur United á morgun myndi tryggja sæti í Meistaradeildinni í haust, en það er sæti sem þarf ansi mikið að gerast til að gangi United úr greipum. Liverpool háir hins vegar harða baráttu um slíkt sæti og er sem stendur á leið í Framrúðubikar Evrópu, nýja keppni sem byrjar í haust. Meistaradeildarsætið er þó innan seilingar og sigur United á morgun því nauðsynlegur hvað það varðar.

Sigur United á Roma í vikunni gerir þennan leik aðeins auðveldari. Framundan er ferð til Rómar sem ætti að vera nánast formsatriði og hægt að hvíla 2-3 leikmenn þar en stilla upp sterkasta liði á morgun.

Meiðslastaðan er góð, ekkert nýtt eftir fimmtudaginn og eina spurningin er eins og oft áður miðjan. McFred voru ágætir á fimmtudaginn en það er alltaf eitthvað óspennandi við það. Pogba og McTominay sáu um þetta í bikarleiknum sem United vann í janúar og það væri skemmtilegast að sjá þetta svona.

26
Henderson
23
Shaw
5
Maguire
2
Lindelöf
29
Wan-Bissaka
6
Pogba
39
McTominay
10
Rashford
18
Bruno
11
Greenwood
7
Cavani

Spilað til sigurs!

Liverpool

Meiðslavandræði Liverpool í vetur eru vel þekkt og fyrir leikinn á morgun eru Matip, Van Dijk, Henderson, Divock Origi, Joe Gomez og Caoimhim Kellaher allir frá.  Nathan Phillips er mjög ólíklegur til að geta byrjað.

Liðinu er því spáð einhvern veginn á þennan veg

Alisson
Robertson
Kabak
Fabinho
Alexander-Arnold
Wijnaldum
Thiago
Milner
Mané
Jota
Salah

Síðan vörn Liverpool hætti að vera sömu fjórir sterku mennirnir hefur Alisson Becker ekki verið að standa sig jafnvel og fyrr og gert þó nokkur mistök. Fyrir framan hann á morgun verður Fabinho sem eins og vitað er, er sterkastur á miðjunni en vel slarkfær miðvörður og hinn 21s árs Ozan Kabak sem er í láni frá Schalke. Kabak og Fabinho eru búnir að spila síðustu leiki og ættu að vera farnir að venjast hvor öðrum en þetta er vissulega ekki það sama og taka á Van Dijk og Gomez eða Matip.

Andrew Robertson og Trent Alexander-Arnold eru sem fyrr bakverðir. Eftir að Alexander-Arnold var ekki valinn í landsliðið um daginn hefur þó nokkur umræða verið um stöðu hans. Enginn efast um að hann er einn sterkasti sóknarbakvörður í heimi en svo er það spurningin hvort það er nóg ef hann heldur áfram að vera jafn mistækur og hann hefur verið í vetur, þegar ekki er besti miðvörður í heimi við hliðina á honum.

Embed from Getty Images

United hefur svo sannarlega náð að velgja honum undir uggum og án efa verður spilað upp á það á morgun.

Á miðjunni er enginn Henderson og enginn Fabinho. Thiago hefur sannarlega ekki staðið undir væntingum og James Milner er aðeins farinn að gefa eftir enda sigið á seinni hluta ferilsins. Loks hefur Georgio Wijnaldum þurft að þola gagnrýni stuðningsmanna og sagt að hugur hans sé farinn frá klúbbnum enda rennur samningur hans út í vor og ýmislegt bendir til að Barcelona verði næsti viðkomustaður. Miðjan er því ekki eins sterk og gæti verið og meginástæða fyrir því að það má sleppa því að stilla upp McFred

Embed from Getty Images

Framherjar Liverpool eru heldur ekki sú mikla ógn sem var. Hvorki Sadio Mané né Roberto Firmino eru að skora sem fyrr og allar líkur á að Diogo Jota verði fremstur á morgun enda kom hann vel inn í liðið í haust fyrir meiðsli og er með jafn mörg mörk og Mané í nær helmingi færri leikjum.

Það er því nóg að vinna til á morgun, og engin ástæða fyrir United að tapa þessum leik.

Leikurinn hefst kl 15:30 að íslenskum tíma og það er sjálfur Michael Oliver sem verður á flautunni

Evrópudeildin

Manchester United 6:2 Roma

skrifaði þann | 17 ummæli

Manchester United hefur spilað tvo aðra leiki í Evrópu á þessari dagsetningu. Á þessum degi árið 2008 tryggði Paul Scholes sigurinn gegn Barcelona með stórglæsilegu marki. United náði svo að skella í lás og verja það forskot þrátt fyrir áhlaup eins sterkasta félagsliðs sem Evrópa hefur séð. Ári síðar vann United Arsenal á þessum sama degi með marki frá gulldrengnum sjálfum, John O’Shea.

En það var ekki svipaður varnarleikur uppi á teningnum í kvöld. Því miður. En sem betur fer kom það ekki að sök því sóknarleikurinn var blússandi, sérstaklega í seinni hálfleik. Edinson Cavani, Bruno Fernandes, Paul Pogba og svo Mason Greenwood sáu til þess að United fer með gott nesti til Ítalíu eftir viku.

Það helsta

Solskjær stillti upp þessu byrjunarliði í kvöld:

1
de Gea
23
Shaw
5
Maguire
2
Lindelöf
29
Wan-Bissaka
17
Fred
39
McTominay
6
Pogba
18
Fernandes
10
Rashford
7
Cavani

Bekkur: Henderson, Grant, Telles, Bailly, Tuanzebe, Williams, Amad, James, Mata (90′ fyrir Fernandes), Matic (83′ fyrir Fred), van de Beek, Greenwood (76′ fyrir Rashford).

Gestirnir byrjuðu svona:

13
López
3
Ibanez
4
Cristante
6
Smalling
37
Spinazzola
42
Diawara
14
Villar
2
Karsdorp
77
Mkhitaryan
7
Pellegrini
9
Dzeko

Bekkur: Kumbulla, Peres, Villar, Fuzato, Santon, Mirante, Mayoral, Perez, Darboe, Ciervo.

Mörk:

Manchester United komst yfir strax á 9. mínútu með algjöru gullmarki. Paul Pogba átti þá sprett sem hvaða skíðakappi í svigi sem er hefði verið stoltur af, framhjá hverjum varnarmanninum á fætur öðrum. Þegar hann kom að teignum gaf hann boltann á Cavani sem átti mjög fallega stungu innfyrir vörnina í fyrsta á Bruno Fernandes. Bruno beið eftir að markvörðurinn lagðist og lyfti boltanum þá snyrtilega yfir hann. Stórgott mark.

Embed from Getty Images

En því miður náði Roma að snúa leiknum við í fyrri hálfleik með tveimur mörkum úr eiginlega þeirra einu almennilegu sóknum í fyrri hálfleik. Fyrst fengu þeir víti eftir að fyrirgjöf Karsdorp endaði í framhandlegg Paul Pogba þar sem Frakkinn var að reyna að tækliblokka fyrirgjöfina. Það er mjög auðvelt að benda á að svona handadómar séu ósanngjarnir, það var enginn ásetningur í þessu hjá Pogba og menn geta ekki tekið hendurnar af sér þegar þeir henda sér í tæklingar eða hreyfa sig. Engu að síður er þetta í samræmi við lög og hefðir þessa dagana, þótt Pogba hafi ekki viljandi verið að gera sig stóran til að blokka fyrirgjöfina með hendinni þá var hendin hátt uppi og blokkaði sannarlega fyrirgjöfina. Pellegrini tók vítið og þótt de Gea hafi verið í réttu horni þá var vítið fast og nógu langt úti í horni til að vera alveg óverjandi.

Það var á 15. mínútu og helvítið hann Dzeko kom svo Roma yfir á 34. mínútu. Spinazzola átti þá góðan sprett upp vinstri kantinn, fann svo Mkhitaryan sem átti frábæra stungu á Pellegrini, Pellegrini var með alltof mikið pláss og gat gefið þægilega fyrirgjöf á Dzeko sem var á fjær. Alltof margir í vörn United gerðu mistök í þessu marki.

Embed from Getty Images

Í byrjun seinni hálfleiks náði Edinson Cavani að jafna með öðru stórglæsilegu United marki. Bruno Fernandes átti þá sprett upp að teig Roma, fann Cavani með góðri stungu. Cavani sá að hann var einn á móti markmanni inní teignum en ákvað samt að gera þetta extra erfitt fyrir varamarkmanninn með því að líma boltann innanfótar alveg upp í skeytin. Geggjað slútt hjá okkar manni og staðan 2-2. Vægast sagt sanngjarnt jöfnunarmark.

Cavani var svo réttur maður á réttum stað á 64. mínútu þegar hann fylgdi á eftir sjaldséðu en góðu skoti frá Wan-Bissaka. Skotið var reyndar ekki nógu gott til að vera mjög líklegt til marks en nógu gott til að markvörðurinn náði ekki meira en slá boltann út í teig þar sem gammurinn Cavani sendi hann þar sem hann átti heima, í netmöskvunum á marki Roma. 3-2 og útlitið orðið töluvert betra.

Embed from Getty Images

Útlitið varð svo enn betra á 71. mínútu þegar Bruno Fernandes skoraði fjórða mark Manchester United, úr vítaspyrnu sem dæmd var á Chris Smalling. Smalling fór þá í Cavani sem féll við. Vissulega var snerting og ég trúi því að Cavani hafi fundið fyrir þessu og ekki verið að dýfa sér. En það verður að viðurkennast að þetta var í mýkri kantinum. Bruno var sléttsama um slíkar pælingar og setti vítið bara öruggt uppí skeytin.

United liðið var ekki hætti. Bruno átti frábæra fyrirgjöf fjórum mínútum síðar sem fann Paul Pogba í loftinu. Turn af skalla sem var óverjandi fyrir Mirante.

Embed from Getty Images

Enn var tími og Mason Greenwood nýtti hann á 86. mínútu til að skora sjötta mark United. Þá fékk hann stungu frá Cavani eftir að United hafði unnið boltann og sótt snöggt. Greenwood bar boltann upp og skaut svo föstu, óverjandi skoti að marki Roma. Hvílíkt partý!

Spjöld:

Gonzalo Villar fékk gult á 50. mínútu og Paul Pogba á 51. mínútu.

Smalling fékk svo gult á 61. mínútu fyrir að brjóta á Bruno Fernandes.

Annað:

Það rigndi rómverskum skiptingum í fyrri hálfleik. Miðjumaðurinn Jordan Veretout tognaði eftir þriggja mínútna leik og þurfti að fara af velli fyrir Gonzalo Villar. Markvörðurinn Pau Lopez meiddist á öxl við að skutluverja langskot frá Pogba eftir tæpan hálftíma og þurfti að fara af velli fyrir Antonio Mirante. Vængbakvörðurinn Leonardo Spinazzola meiddist svo skömmu eftir að hann átti stóran þátt í öðru marki Roma og þurfti að fara af velli fyrir Bruno Peres.

Það kom sér heldur illa fyrir Roma því þótt liðið ætti rétt á fimm skiptingum í allt þá var það bara hægt í þremur skiptistoppum í leiknum sjálfum. Þannig að þegar enn Romaleikmaður var augljóslega meiddur í lok leiks þá átti Roma ekki skiptingarstopp inni.

Pælingar eftir leik

Miðað við allt og allt í þessum leik þá er Manchester United einfaldlega miklu betra fótboltalið en AS Roma. Roma varðist vel í fyrri hálfleik en náði samt að gefa dauðafæri undir lok fyrri hálfleiks sem Cavani var klaufi að nýta ekki. Svo þegar leikmenn Roma þreyttust í seinni hálfleik þá valtaði United einfaldlega yfir liðið. Auðvitað munaði um það fyrir gestina að missa þrjá menn meidda af velli í fyrri hálfleik en getumunurinn var samt augljós fyrir það.

Embed from Getty Images

En United reyndi sitt besta að skemma fyrir sér í fyrri hálfleik. Ég myndi ekki ganga svo langt að kenna Pogba um vítið sem hann fékk á sig. Ég held það sé engin leið að renna sér með hendur meðfram líkamanum svo þetta var meira óheppni og strangar reglur en eitthvað klúður. Hins vegar hefði mögulega mátt stoppa þessa sókn fyrr.

Annað mark Roma var hins vegar klúúúúður hjá United. Maguire og Shaw höfðu alltof miklar áhyggjur af Dzeko. Lindelöf var kominn í hjálparvörn út á hægri kantinn, menn höfðu áhyggjur af Mkhitaryan en allir bara steingleymdu Lorenzo Pellegrini þar sem hann lullaði sér inn fyrir vörn United og fékk allt plássið og allan tímann til að sigta út fyrirgjöf á fjær. Hrikalegt. Fred var næstur Pellegrini og átti að fylgja honum en öll varnarlínan fær vænan slurk af skömm fyrir þetta. Sérstaklega var svekkjandi að sjá að fyrst Maguire og Shaw höfðu svona ofsalega miklar áhyggjur af Dzeko (sem gerði reyndar vel í að teyma þá í burtu með boltalausa hlaupinu sínu) þá náðu þeir samt ekki að stoppa hann þegar hann svo fékk fyrirgjöfina til sín.

En sem betur fer kom þetta ekki að sök. Varnarleikurinn og leikur liðsins í heild var miklu, miklu betri í seinni hálfleik. Þá kom þessi gírun sem ég kallaði eftir í upphituninni. Það var alvöru karakter í því að klára leikinn með svona miklum stæl. Þetta einvígi er ekki búið en ef bæði lið spila svipað í seinni leiknum eftir viku þá á United að fara áfram.

Ég veit ekki hvað Roma á mögulega inni á heimavelli en Manchester United þarf allavega að passa að mæta svipað til leiks þá og þeir gerðu í seinni hálfleik í kvöld.

Embed from Getty Images

Maður leiksins var Edinson Cavani með tvö mörk, tvær stoðsendingar, eina fiskaða vítaspyrnu og sífellda ógn í sínum leik.

Ekki langt þar á eftir var Bruno Fernandes með tvö mörk og tvær stoðsendingar sömuleiðis. Pogba var líka góður.

Hinn leikurinn í Evrópudeildinni

Villareal tók á meðan á móti Arsenal á Spáni í hinni undanúrslitaviðureigninni.

Heimamenn komust í 2-0 í fyrri hálfleik og útlitið dökknaði fyrir Lundúnarliðið í seinni hálfleik þegar Ceballos fékk sitt annað gula spjald og þar með rautt.

En Nicolas Pepe náði að minnka muninn úr víti áður en Villareal missti líka mann af velli með rautt spjald. Lokastaðan 2-1. Arsenal fer með tap en útivallarmark aftur til Englands og á ágætis séns í seinni leiknum, myndi maður halda.

Evrópudeildin

Undanúrslit í Evrópudeildinni

skrifaði þann | 4 ummæli

Það er líklega skiljanlegt að vissu marki að leikurinn gegn Leeds hafi ekki verið hressari en hann var. Manchester United á enn tölfræðilega möguleika á efsta sætinu en það kallar á meira en blússandi óskhyggju að sjá fyrir sér að þetta Manchester City lið tapi nógu mörgum stigum til að það verði alvöru möguleiki. Annað sætið er svo gott sem klárt, í það minnsta er engin hætta á að Meistaradeildarsætið sé í nokkrum vafa. Manchester United hafði því ekki að miklu að keppa. Leeds hafði það í sjálfu sér ekki heldur, fyrir utan að verja sært stoltið frá síðustu viðureign þessara liða. Það sást á því hvað Leedsarar lögðu í varnarleikinn.

En nú er komið að alvöru, alvöru leik þar sem við treystum á að okkar menn geti gírað sig almennilega upp í verkefnið. Fyrri leikurinn í undanúrslitaviðureign í Evrópudeildinni. Fellur Solskjær enn og aftur á undanúrslitaprófinu eða nær hann að koma liðinu alla leið til Gdańsk þar sem úrslitaleikurinn verður spilaður 26. maí?

Helstu upplýsingar

Leikurinn verður annað kvöld á Old Trafford og hefst klukkan 19:00.

Dómari leiksins verður Carlos del Cerro Grande frá Spáni.

Veðurspáin er fín, það stefnir í 6-9 gráðu hita, varla vindur að ráði, hálfskýjað með 30-40% séns á úrkomu. Viðrar vel til fótbolta.

Hinn undanúrslitaleikur Evrópudeildarinnar er leikur Villareal og Arsenal sem verður spilaður á Spáni á sama tíma.

Byrjunarliðspælingar

Helstu leikmannafréttir síðustu vikuna voru af því þegar Eric okkar Bailly skrifaði undir nýjan samning. Samningurinn gildir til 2024 með framlengingarákvæði til eins árs.

Það er lítið óvænt við það. Við vitum öll að á sínum degi er Eric Bailly frábær miðvörður. Helsta vandamálið hans hefur verið að hanga heill nógu lengi til að spila almennilega. Hann er núna á sínu fimmta tímabili og hefur spilað slétta 100 leiki fyrir félagið. Það er ekkert alslæmt, þannig lagað, en aðalmiðverðir United þurfa að spila meira. Phil Jones er með 96 leiki á sama tíma. Harry Maguire er með 104 leiki á tveimur tímabilum. En það er reyndar ósanngjarnt að bera aðra leikmenn saman við klettinn Harry Maguire sem er í sérflokki hvað þetta varðar.

Embed from Getty Images

Vonum að Bailly fari að finna sinn stöðugleika. En það er spurning hvort þetta þýði eitthvað fyrir komandi sumarglugga, er þá félagið ólíklegra til að splæsa í nýjan miðvörð í sumar eða breytir þetta kannski engu þar um?

Um það bil hálfur leikmannahópur Manchester United tók út leikbann í síðasta leik vegna uppsafnaðra, gulra spjalda. Það var ansi vel gert fyrir þessa viðureign. Það er því enginn í leikbanni í þessum leik.

Það eru tveir frá vegna meiðsla, Anthony Martial og Phil Jones. Munar mismikið um þá í þessum leik.

Það er óþarfi að hvíla einhvern sérstaklega fyrir leikinn gegn Liverpool um helgina. Sá leikur skiptir Liverpool meira máli en United. Aðalfókus okkar manna ætti að vera á þessari keppni, þar sem við getum unnið hana.

Spái þessu byrjunarliði:

de Gea
Shaw
Maguire
Lindelöf
Wan-Bissaka
McTominay
Fred
Pogba
Fernandes
Rashford
Cavani

Ef Marcus Rashford spilar í þessum leik þá verður það hans 50. Evrópuleikur á stuttum en mögnuðum ferli.

Embed from Getty Images

Roma hefur verið að glíma við meiðsli að undanförnu, til dæmis voru 5 meiddir fyrir síðsta Evrópudeildarleik hjá þeim.

Meðal þeirra sem hafa verið að glíma við meiðsli hjá Rómverjunum eru góðkunningjar okkar, Chris Smalling og Henrikh Mkhitaryan. Þeir voru báðir í byrjunarliði Manchester United sem vann þessa keppni fyrir tæplega fjórum árum síðan.

Báðir hafa staðið sig með mikilli prýði fyrir Roma síðan þeir komu þangað. Þeir fóru báðir á láni í fyrstu, Smalling í lok ágúst 2019 og Mkhitaryan í upphafi september sama ár. Mkhitaryan var síðan á undan að skrifa undir fastráðninguna, hann samdi við félagið í lok ágúst 2020. Smalling fylgdi honum svo eftir í byrjun október.

Embed from Getty Images

Smalling hefur spilað samtals 55 leiki fyrir Rómarliðið og skorað í þeim 3 mörk. Mkhitaryan hefur hins vegar skorað 20 mörk í sínum 66 leikjum og er orðinn ein helsta sóknarógn þeirra, hvort sem hann skorar sjálfur eða býr til eitthvað fyrir samherja sína.

Þeir einu sem eru meiddir hjá Roma fyrir þennan leik eru gamli Chelsealeikmaðurinn Pedro og svo hinn ungi Nicolo Zaniolo. Zaniolo hefur ekkert spilað fyrir Roma á tímabilinu svo hans meiðsli hafa lítil áhrif. Pedro hefur hins vegar spilað töluvert í deild og Evrópu svo það gæti munað eitthvað um fjarveru hans. Hins vegar er ítalska liðið líklega aðallega fegið að vera komið með nánast alla heila aftur, ættu að geta stillt upp sínu sterkasta liði á Old Trafford á morgun.

Roma hefur verið að stilla upp í 3-4-2-1 með Smalling í hjarta varnarinnar. Þetta er líklegt byrjunarlið hjá gestunum:

López
Ibanez
Smalling
Mancini
Peres
Diawara
Veretout
Karsdorp
Mkhitaryan
Pellegrini
Dzeko

Roma er sigurlaust í síðustu fjórum leikjum en inní því er jafntefli sem tryggði þeim sigur í einvíginu gegn Ajax. Svo er spurning hversu mikil áhersla er á ítölsku deildina hjá þeim. Roma er í 7. sæti eins og er, talsvert á eftir Lazio sem er í neðra Evrópudeildarsætinu og enn lengra á eftir Juventus sem er í neðsta Meistaradeildarsætinu.

Þeirra besti sóknarmaður í Evrópu hefur verið framherjinn Borja Mayoral. Hann hefur skorað 7 mörk og lagt upp 2 önnur. Edin Dzeko, fyrrum leikmaður fjármálasteraboltanna í Manchester City, sem ég hélt reyndar að væri löngu hættur að sparka í bolta, kemur þar á eftir með 4 mörk og 1 stoðsendingu.

Embed from Getty Images

Mkhitaryan er með 9 mörk og 8 stoðsendingar í ítölsku deildinni en hefur hins vegar verið rólegur í Evrópu til þessa, bara með 1 mark og eina stoðsendingu þar. En það borgar sig samt að fylgjast vel með honum og passa upp á hann.

Sagan gegn Rómverjum

Manchester United og AS Roma hafa sex sinnum áður mæst á knattspyrnuvellinum. Merkilegt nokk þá leið ekki nema 371 dagur á milli þess sem liðin spiluðu fyrsta leikinn og þann síðasta.

Manchester United hefur betur í innbyrðisviðureignunum og með töluverða yfirburði í markatölu. United er með 4 sigra, Roma einn og einum leik lauk með jafntefli. Markatalan er 13-4 í leikjunum sex.

Fyrsti leikurinn var í 8-liða úrslitum Meistaradeildarinnar tímabilið 2006-07. Fyrri leikurinn var á Ólympíuleikvangnum í Róm, miðvikudagskvöldið 4. apríl 2007. Það var hiti í mannskapnum bæði í stúkunni og inni á vellinum. Áhorfendur köstuðu hlutum inn á völlinn United-megin og lögreglan þurfti að skerast í leikinn, stundum reyndar af meiri krafti en nauðsyn endilega þótti.

Paul Scholes lét stemninguna gíra sig fullmikið upp svo hann endaði með rautt spjald eftir aðeins 34 mínútna leik. Þá var hann að fá sitt seinna gula spjald. Rodrigo Taddei kom heimamönnum yfir á 40. mínútu en Wayne Rooney jafnaði metin eftir klukkutíma leik. Mirko Vucinic tryggði Rómverjum þó sigurinn með marki sjö mínútum síðar. Staðan 2-1 fyrir seinni leikinn á Old Trafford.

Embed from Getty Images

Manchester United þurfti þó sem betur fer ekki mikið að treysta á útivallarmarkið úr fyrri leiknum, hvað þá að fjarvera Paul Scholes kostaði þá mikið í seinni leiknum á Old Trafford, tæplega viku síðar. Manchester United rúllaði yfir Roma í leiknum, skoruðu 4 mörk í fyrri hálfleik og bættu þremur við í seinni. Lokastaðan 7-1 og United fór áfram samanlagt 8-3.

Michael Carrick skoraði ekkert rosalega mörg mörk fyrir Manchester United á ferlinum, Patrice Evra enn færri. Þeir skoruðu báðir gegn Roma, Carrick með tvö glæsimörk. Alan Smith, Wayne Rooney og Cristiano Ronaldo x2 skoruðu rest. Þetta var stærsti sigur Manchester United í Evrópu síðan liðið vann írska liðið Waterford með sömu tölum í október 1968.

Eftir um klukkutíma leik kom Ole Gunnar Solskjær inn á fyrir Ryan Giggs. Þetta var síðasti Evrópuleikurinn sem Solskjær spilaði fyrir Manchester United á ferlinum. Hann náði því miður ekki að skora. Hann spilaði 7 leiki til viðbótar fyrir félagið, náði að vinna deildina með United en tapaði svo lokaleiknum sínum í bikarúrslitum gegn Chelsea.

Embed from Getty Images

Roma hefur sennilega verið komið með nóg af Manchester United eftir þennan leik en þurfti svo að standa í því tímabilið á eftir að mæta United fjórum sinnum. Fyrst drógust liðin saman í F-riðil ásamt Sporting og Dynamo Kyiv.

Fyrri leikurinn var spilaður á Old Trafford í byrjun október 2007. Wayne Rooney skoraði eina mark þess leiks í 1-0 sigri. Seinni leikurinn var spilaður um miðjan desember og endaði 1-1 þar sem Gerard Pique kom United yfir í fyrri hálfleik en Alessandro Mancini jafnaði fyrir heimamenn í seinni hálfleik.

Manchester United endaði í efsta sæti riðilsins með 16 stig af 18 mögulegum. Roma endaði í 2. sæti með 11 stig.

United sló svo Lyon út í 16-liða úrslitum á meðan Roma gerði sér lítið fyrir og tók Real Madrid út með því að vinna báða leikina gegn þeim með 2 mörkum gegn 1.

Embed from Getty Images

United og Roma mættust því aftur í 8-liða úrslitum. Þótt það hafi ekki verið neitt 7-1 rúst í þetta skiptið þá sigldi United einvíginu mjög þægilega í land með því að byrja á 0-2 útisigri í fyrri leiknum og taka svo 1-0 heimasigur í þeim síðari. Ronaldo setti tóninn með einhverju magnaðasta skallamarki sem Meistaradeildin hefur séð. Rooney bætti svo við á Ítalíu en Tevez tryggði sigurinn í Manchester.

Manchester United fór svo alla leið í úrslit það árið og vann Meistaradeildina. Það var nú bara alls ekkert leiðinlegt.

Hin undanúrslitaviðureignin í Evrópudeildinni

Í hinni undanúrslitaviðureigninni í Evrópudeildinni mætast Villareal, sem er í 7. sæti í spænsku úrvalsdeildinni, og Arsenal, sem er í 10. sæti í ensku úrvalsdeildinni.

Það verður áhugavert að sjá hvað Unai Emery gerir gegn sínum gamla liði. Hann hefur auðvitað mikla og góða reynslu af Evrópudeildinni eftir að hafa unnið hana þrjú ár í röð með Sevilla á árunum 2014-2016. Hann náði líka að koma Arsenal í úrslitaleikinn 2019 en tapaði þar fyrir Chelsea.

Seinni leikirnir í báðum einvígjum verða spilaðir fimmtudagskvöldið 6. maí, klukkan 19:00.