Rauðu djöflarnir

Manchester United er á leið til Ítalíu til að etja kappi við AC Milan á San Siro á morgun. Eftir 1-1 vonbrigðin á fimmtudaginn er ljóst að United þarf á marki að halda á morgun, og því er vonandi að liðið verði sókndjarft sem því nemur.

Það verða fá til þessa að gráta um of ef leikjaálag minnkar eftir leikinn á morgun en á hinn bóginn er Milan eitt sterkasta liðið sem eftir er í keppninni og því til mikils ef United kemst áfram. Stærstu fréttirnar eru auðvitað þær að David de Gea, Paul Pogba og Donny van de Beek  eru allir í hópnum. Það er eftir að sjá hvort Pogba er nógu góður af meiðslunum til að byrja inná en hann verður í það minnsta á bekknum. Vonast var til að Edinson Cavani færi með en á síðustu æfingu í morgun kom í ljós að hann er ekki í standi til þess og þarf að verða eftir.

Anthony Martial er enn ekki orðinn heill og er ekki með í för, né heldur Eric Bailly og Juan Mata. Shola Shoretire situr heima en Amad Diallo mætir.

Það þarf því kannske ekki að hafa fleiri orð um þetta, ég ætla að leyfa mér að vona að Pogba verði til í slaginn og liðið verði svona

Engum kæmi þó á óvart ef Fred kæmi þarna inn fyrir Pogba.

United hefur ekki oft riðið feitum hesti frá San Siro, fyrstu fjóra leikina þar skoraði liðið ekki mark, en 2011 vannst frækinn 3-2 sigur eins og Halldór fór yfir í upphitun fyrir fyrri leikinn. Það er nauðsynlegt að sýna þannig frammistöðu á morgun.

AC Milan

Milan var jafnvel í meiri meiðslavandræðum en United, en Hakan Çalhanoğlu, Ante Rebić og Theo Hernández léku allir í 0-1 tapi gegn Napoli um helgina, og búist er við að Zlatan Ibrahimović verði klár líka. Ibrahim Bennacer og Alessio Romagnoli eru svo komnir til æfinga og er búist við þeim á bekkinn.

Rebić, sem kom inná móti Napoli tókst reyndar að fá beint rautt spjald í uppbótartíma fyrir að fyrtast við dómara eftir að hann braut á andstæðingi, en það telur auðvitað ekki í Evrópukeppni. Annað mál hvort það hefur áhrif á það hvort hann byrjar.

Spáum þessu svona

Það getur verið að Zlatan sé orðinn 39 ára en það væri auðvitað stóra sagan ef hann gerði sínu gamla liði grikk. Það má ekki gerast, og það kemur í ljós á morgun kl 20:00

Manchester United vann þræl mikilvægan 1-0 sigur á David Moyes og félögum í West Ham á Old Trafford, í kvöld. Gestirnir létu okkar menn sannarlega hafa fyrir hlutunum en sigurinn var sanngjarn og í raun býsna svekkjandi að hafa ekki skorað meira.

Svona stilltu liðin upp:

Manchester United

West Ham United

Fyrri hálfleikur

Það var ljóst frá upphafi leiks að David Moyes ætlaði sér ekki að sækja á mörgum mönnum. United beið það spennandi verkefni að brjóta á bak aftur þéttan og hávaxinn múr West Ham. Enn eitt þolinmæðisverkefnið og ekki hafa okkar menn riðið feitum hesti þar undanfarið.

Leikurinn var tíðindalítill í upphafi og í raun eina “hálffærið” sem leit dagsins ljós var þegar Luke Shaw gerði vel í að komast framhjá Vladimir Coufal og kom boltanum fyrir á Mason Greenwood en hann hitti boltann illa og Lukasz Fabianski handsamaði hann.

Greenwood var svo aftur á ferðinni um 20 mínútum síðar þegar að hann fékk boltann úti á hægri kantinum. Hann sendi frábæra fyrirgjöf á fjærstöngina þar sem að Marcus Rashford var algjörlega einn á auðum sjó og þurfti í raun bara að ná alvöru snertingu með kollinum á boltann. Sú varð ekki raunin og Rashford einhvernveginn sneiddi boltann langt framhjá markinu. Eiginlega ófyrirgefanlegt að koma boltanum ekki í það minnsta á rammann. Stuttu síðar meiddist Harry Maguire eftir viðskipti við Michael Antonio en fyrirliðinn hristi það af sér og hélt leik áfram.

Það var síðan á 37. mínútu sem að Mason Greenwood fékk boltann rétt fyrir utan teig West Ham. Hann lét vaða og boltinn stefndi í fjærhornið en Lukasz Fabianski gerði frábærlega í að verja boltann í stöngina og aftur fyrir endamörk. Greenwood gerði allt rétt, en því miður fyrir sóknarmanninn unga þá gerði Fabianski það líka. Tveimur mínútum seinna átti Bruno Fernandes háan og lausan bolta á fjær sem að Rashford skallaði að marki en náði ekki nægum krafti í skallann – líklega var Rashford rangstæður í þokkabót.

Þá flautaði Martin Atkinson til hálfleiks og markalaust þegar liðin gengu til búningsherbergja. Hæg uppbygging, lítið um hugmyndir og lítið að gerast. Hljómar kunnuglega.

Seinni hálfleikur

Það komst meira tempó á leik liðsins í byrjun seinni hálfleiks og liðið hélt West Ham ekki einungis inni á sínum vallarhelmingi, heldur bókstaflega upp við eigin vítateig. Lítið var þó um opnanir og skipulögð vörn gestanna stóð vaktina með miklum ágætum. Rice, Noble og Soucek sáu svo um að halda Bruno í skefjum og loka öllum sendingum í gegnum blokkirnar. Á 53. mínútu átti Greenwood góðan sprett upp hægri vænginn og náði fastri fyrirgjöf fyrir markið og Rashford beið á fjær eftir því að renna boltanum í autt markið en Vladimir Coufal bjargaði á síðustu stundu í horn.

Uppúr horninu skoraði Manchester United svo eina mark leiksins. Þá átti Bruno Fernandes flotta spyrnu á nærstöngina, þar reis Scott McTominay hæstur, en Skotinn náði ekki öflugri snertingu og boltinn endaði hjá Craig Dawson en miðvörðurinn seigi skallaði boltann í eigið net. Við tökum því!

West Ham liðið varð nú að freista þess að jafna og færa liðið framar. Það skildi eftir svæði fyrir aftan vörnina og þremur mínútum eftir sjálfsmark Dawson var Marcus Rashford nálægt því að gera út um leikinn. Hann fékk þá stungusendingu frá Bruno á vinstri kantinn og óð á Dawson. Það var þó nokkuð fyrirsjáanlegt hvað vakti fyrir Rashford en hann klippti um það bil 20 sinnum inn á hægri fótinn inni í vítateig West Ham og Dawson beið bara átekta áður en hann blokkaði skot Rashford. Á 60. mínútu varði Fabianski svo glæsilega frá Bruno en Portúgalinn átti þá gott skot rétt fyrir utan teig, eftir undirbúning Greenwood og Aaron Wan-Bissaka, en markmaðurinn var snöggur niður og varði boltann til hliðar.

Þá hafði David Moyes séð nóg og gerði tvöfalda sóknarsinnaða skiptingu, þar sem að Mark Noble og Ben Johnson fengu að víkja fyrir Said Benrahma og Manuel Lanzini. Eftir þetta náði West Ham aðeins að koma sér inn í leikinn og halda aðeins í boltann. Skömmu eftir skiptingu Moyes fengu gestirnir sitt fyrsta færi í leiknum. Þá fékk Jarrod Bowen fínt skotfæri á vítateigsjaðrinum en Harry Maguire henti sér fyrir skotið og blokkaði það meistaralega.

Meira jafnræði var með liðunum næstu mínútur en á 75. mínútu hefði United átt að gera út um leikinn. Þá fékk Daniel James boltann á miðjunni og United í ákjósanlegri stöðu til að sækja hratt. Liðið sótti á vörn West Ham, fjórir sóknarmenn gegn tveimur varnarmönnum en sending James á Bruno Fernandes var afleit og sóknin rann út í sandinn. Á þessu augnabliki málaði undirritaður skrattann á vegginn og bjó sig undir það versta. Sú hugsun yfirgaf mig ekki, þremur mínútum síðar, þegar að Mason Greenwood skaut í annað sinn í stöngina. Fabianski var algjörlega sigraður á línunni en ramminn bjargaði Pólverjanum.

Tíu mínútum fyrir leikslok átti varamaðurinn Benrahma flotta rispu á vinstri kantinum. Hann kom boltanum inn í teig á bekkjarbróður sinn, Lanzini, sem kom honum snyrtilega á Tomas Soucek. Tékkinn lagði boltann fyrir sig og negldi að marki en Luke Shaw og Maguire blokkuðu skotið – þeir félagar ætluðu ekki að hleypa inn marki í kvöld. Síðustu mínúturnar voru tíðindalitlar og United náði að halda boltanum ágætlega til að drepa tímann. Engir óþarfa sénsar voru teknir og þegar að Wan-Bissaka fékk boltann í bakið og aftur fyrir endamörk, þá hélt maður að liðið myndi þurfa að verjast fyrir lífi sínu einu sinni til viðbótar fyrir lokaflautið en Martin Atkinson blés í flautuna og leiknum lokið. 1-0 sigur staðreynd og liðið aftur komið upp í 2. sætið.

Hugleiðingar eftir leik

Fyrir leik hugsaði ég að þrjú stig væru það eina sem skipti máli, sama með hvaða hætti þau væru fengin. Þessi sigur var ekki fallegur, en hann var sanngjarn. Liðið hefði getað skorað fleiri mörk gegn liði sem kom á Old Trafford til þess eins að verja stigið og mögulega grísast til að lauma inn marki úr föstu leikatriði. Gott og vel, það hefur virkað ágætlega fyrir nokkra andstæðinga United hingað til, en Guði sé lof að sú var ekki raunin nú.

Miðvörðurinn Harry Maguire átti magnaðan leik í hjarta varnarinnar. Hann stýrði línunni vel, steig vel inn þegar á þurfti og spilaði eins og sannur fyrirliði. Var ósérhlífinn og hvetjandi. Það var ánægjulegt að sjá liðið halda út, sýna yfirvegun á boltanum og verjast vel. Liðið hefur fengið á sig svekkjandi jöfnunarmörk undanfarið og því var gott fyrir sjálfstraust markmanns og varnarmanna að ná að halda hreinu. Mason Greenwood hefur átt erfitt uppdráttar og byrjaði brösuglega í dag en hann vann sig vel inn í leikinn. Greenwood skapaði fyrir aðra og var gríðarlega óheppinn að skora ekki í leiknum. Vonandi er einungis tímaspursmál áður en að ungstirnið finnur markaskóna að nýju.

Það gekk kannski ekki allt upp sem að Bruno Fernandes var að gera en hann skilar alltaf 100% vinnuframlagi. Enginn mun fagna komu Paul Pogba eins ákaft og Portúgalinn magnaði en hann er alltof einangraður þegar að tveir varnarsinnaðir miðjumenn spila fyrir aftan hann. Fred gerir sitt besta til þess að þræða boltann í rétt svæði en Brassinn hefur einfaldlega ekki gæðin sem að Pogba hefur.

Nú taka við tveir stórleikir hjá liðinu. Seinni leikurinn í Evrópudeildinni gegn AC Milan á San Siro (1-1 samanlagt) og 8-liða úrslit í FA bikarnum gegn Leicester City, okkar helstu keppinautum um 2. sætið í deildinni. Það væri óskandi að sjá nokkra af þeim sem prýða meiðslalistann koma til baka í þessi verkefni, en að þeim loknum kemur örlítil pása þar sem að landsleikir verða spilaðir í lok mars.

Við förum því kát inn í vikuna með þrjú stig í farteskinu. Áfram Manchester United!

 

 

 

Það er sannarlega skammt stórra högga á milli hjá Manchester United. Á fimmtudaginn gerði liðið afar svekkjandi 1-1 jafntefli við AC Milan og þremur dögum síðar tekur við annað stórt verkefni. David Moyes og spútniklið West Ham koma í heimsókn á sunnudaginn. Leikurinn hefst kl. 19:15 og má búast við hörkuleik.

Lítið hefur verið um glansfótbolta af okkar hálfu undanfarið, en það má segja um fleiri lið. West Ham hafa verið á ágætis skriði undanfarið og eina tap þeirra í síðustu fimm deildarleikjum kom gegn meistaraefnum Manchester City.

 

Liðsfréttir

Meiðslalisti United líkist óskalista Jólasveinsins æ meir, þrátt fyrir að alheimi hafi verið tjáð að Liverpool væri eina liðið sem glímdi við meiðsli. Helstu nöfn eru Paul Pogba, sem nálgast endurkomu en Ole segir ekki mögulegt að hann verði með á morgun. Donny van de Beek er einnig fjarverandi – en það þyrfti ýmislegt að ganga á til þess að Hollendingurinn fengi byrjunarliðssæti hvort eð er. Svo var Ole ekkert of bjartsýnn á þáttöku Marcus Rashford, Edinson Cavani og Anthony Martial. Þá er David de Gea tæpur svo að Dean Henderson ver búrið á morgun, en hann hefði mátt gera betur í jöfnunarmarki AC Milan á fimmtudaginn. Til að súmmera þessi skemmtilegheit upp, þá höfum við oft staðið betur að vígi hvað mannafla varðar.

Fílbeinsstrendingurinn Amad Diallo skoraði sitt fyrsta mark fyrir félagið gegn AC Milan og gæti fengið tækifæri í byrjunarliðinu. Það gæti þó verið að of snemmt sé að láta hann byrja. Solskjær hefur gert vel í að hlífa honum við mikilli umfjöllun og talað mikið um væntingastjórnun hvað ungstirnið varðar. Það er hárrétt nálgun í knattspyrnuheimi þar sem að allt snýst um að hífa menn upp, einungis til að rífa þá niður – à la Mason Greenwood.

Mason hefur átt erfitt uppdráttar í vetur og ekki fundið formið sem hann sýndi á seinni hluta síðasta tímabils. Lítið hefur gengið fyrir framan markið og hann virkar oft hugmyndasnauður úti hægra megin. Ef Diallo byrjar úti hægra megin, þá má gera að því skóna að Greenwood leiði sóknarlínuna. Hann hefur oftast nær tekið sér þá stöðu í miðjum leik eftir skiptingar og róteringar, fremur en byrjað leikinn sem framherji. Mögulega fer hann með kýrskýr fyrirmæli um að spila sem hreinræktaður framherji í þessum leik.

Varnarlínan hefur sloppið tiltölulega vel við meiðslavesen en Victor Lindelöf er tæpur í baki og Solskjær var óviss um þáttöku hans – hann er þó ekki útilokaður. Svipaða sögu er að segja af Eric Bailly sem varð fyrir hnjaski seint í leiknum gegn Milan, en mun líklega vera klár í slaginn. Luke Shaw kom inná sem varamaður gegn Milan og er klár eftir að hafa meiðst lítillega í grannaslagnum um síðustu helgi.

Líklegt byrjunarlið Man Utd:

Mótherjinn

Það er ekki sama meiðslabras á Hömrunum en þeir sakna varnarmannanna Ryan Fredericks, Arthur Masuaku og Angelo Ogbonna. Sömuleiðis könnumst við ágætlega við lánsmann West Ham, Jesse Lingard. Hann hefur farið frábærlega af stað með liðinu og við getum í raun prísað okkur sæla að hann hafi ekki leyfi til að taka þátt í þessum leik. Lingard hefur skorað fjögur mörk í 6 deildarleikjum og gengið í gegnum endurnýjun lífdaga undir Moyes.

Eins og fram hefur komið verður verkefnið ærið og mikilvægt að liðið sé á tánum, frá fremsta manni til þess aftasta. Framherjinn Michail Antonio mun fara fyrir sókn liðsins og á honum þarf að hafa góðar gætur. Hann er snöggur, sterkur og ofboðslega duglegur. Hann er hundleiðinlegur við að eiga.

Á miðjunni ráða þeir Declan Rice og Thomas Soucek ríkjum. Rice tengir miðju og vörn frábærlega saman og dreifir spili vel. Hann hefur verið orðaður við United og ekki af ástæðulausu. Verðmiðinn á honum hækkar með hverjum leiknum og ef að West Ham mistekst að komast í Evrópukeppni, þá gæti Rice hugsað sér til hreyfings. Hinn hávaxni Rice brýtur upp sóknir og les leikinn með miklum ágætum.

Soucek kom til West Ham á láni í lok janúar 2020 og var svo keyptur um sumarið. Hann skoraði gegn okkar mönnum í fyrri leik liðanna og er stöðug ógn í föstum leikatriðum. Tékkinn hefur skorað 8 mörk í 27 leikjum og reynst liðinu afar drjúgur. Það má segja að Moyes hafi fundið í honum sinn Fellaini hjá West Ham.

Moyes gæti breytt um taktík úr því að Lingard er ekki til staðar, en hann hefur þó Said Benrahma og Pablo Fornals sem geta dottið í þessa tíu-stöðu sem Lingard spilar. Það kæmi mér mjög á óvart ef að Moyes myndi mæta með gung-ho leikkerfi þar sem að hann ætlaði að sækja á 10 mönnum. Þegar liðin mættust í bikarnum var lítið um opin marktækifæri og ekkert galið að búast við svipuðum leik á morgun.

Líklegt byrjunarlið West Ham:

Spá

Eftir jafntefli Chelsea gegn Leeds væri afar vel þegið að næla í þrjú stig. Það verður engin markaveisla á morgun, býst ég við. Vörnin þarf að standa vel og menn þurfa að sýna gæði fyrir framan markið þegar tækifærið býðst. West Ham liðið er ólseigt og því ætla ég að spá erfiðum 1-0 sigri okkar manna. Bruno Fernandes skorar úr aukaspyrnu korteri fyrir leikslok. Eftir það lætur liðið okkur fá hjartastopp nokkrum sinnum en tekst að sigla þessu heim.

Áfram Manchester United!