Rauðu djöflarnir

Manchester United og Everton gerðu jafntefli í sex marka leik á Old Trafford nú rétt í þessu. Úrslitin eru ofboðslega svekkjandi í ljósi þess að leikmenn United voru sínir verstu óvinir í leiknum, þar sem að dauðafæri fóru forgörðum og ólýsanlega lélegur varnarleikur leit dagsins ljós.

Fyrir leik lögðu fyrirliðar liðanna, Harry Maguire og Lucas Digne, kransa til að minnast þeirra sem glötuðu lífinu í München flugslysinu þann 6. febrúar 1958. Fyrr um daginn var haldin minningarathöfn og þar hafði Ole Gunnar Solskjær lagt svipaðan blómakrans fyrir framan Old Trafford, í grenjandi rigningu í Manchester. Mínútuþögn var svo fyrir upphafsflautið.

Svona stilltu liðin upp:

Manchester United:

Everton:

Fyrri hálfleikur

Leikurinn fór varlega af stað og liðunum gekk illa að halda í boltann en Everton áttu þó í minni vandræðum með það. United liðið spilaði hægt og færði boltann ekki nægilega hratt á milli kanta, því var auðvelt fyrir Everton liðið að halda skipulagi og spila leikinn eins þröngt og hægt var. Gestirnir voru aðeins frekari, unnu seinni boltana og Bruno Fernandes átti erfitt með að finna svæði milli miðju og varnar Everton. Paul Pogba átti þokkalegan skalla í átt að marki eftir hornspyrnu en því miður kom ekkert úr því.

Það hefði ekki alvöru færi litið dagsins ljós stuttu áður en fyrri hálfleikur var hálfnaður og undirritaður var nálægt því að sækja sér sæng og kodda. Þá tóku United völdin og náðu að festa Everton neðarlega á vellinum. Mason Greenwood átti glæsilegan sprett þar sem að hann fór auðveldlega framhjá Lucas Digne og sólaði síðan Andre Gomes uppúr skónum inní vítateig Everton, en skotið var því miður ekki nægilega gott og fór víðsfjarri markinu. Það var svo á 24. mínútu sem að Bruno Fernandes lagði boltann út á Marcus úti á hægri kantinum. Rashford lagði boltann fyrir sig og setti frábæran bolta á fjær. Þar mætti Edinson Cavani og skallaði boltann af yfirvegun í markið. Virkilega vel að verki staðið hjá El Matador og Rashford!

Næstu mínútur voru ekki mjög viðburðamiklar en United voru þó miklu meira með boltann og teygðu vel á Everton. Gestirnir spiluðu tígulmiðju og þegar United náði tökum á því þá var yfirleitt nóg af svæði fyrir Luke Shaw og Aaron Wan-Bissaka. Edinson Cavani komst í ágætis færi 34. mínútu en skaut eiginlega í sjálfan sig og því kom ekkert úr því. Stuttu síðar féll boltinn fyrir fætur Bruno Fernandes stuttu fyrir utan teig en skot hans var slakt og Michael Keane blokkaði það auðveldlega. Nokkrum mínútum fyrir hálfleiksflautið kenndi Paul Pogba sér meins framan á lærinu og Brasilíumaðurinn brosmildi, Fred, kom inná fyrir hann. Ákaflega svekkjandi fyrir Frakkann sem hefur spilað vel nýlega og var kosinn leikmaður mánaðarins á vefsíðu félagsins fyrir frammistöðu sína í janúar.

Victor Lindelöf lenti í örlitlum vandræðum á 41. mínútu þegar að Lucas Digne pressaði hann stíft ofarlega á vallarhelmingi United. Lindelöf reyndi að þruma boltanum í burtu en boltinn fór af Digne til Richarlison sem var nálægt því að stýra tilraun sinni á markið en David de Gea fylgdi boltanum framhjá markinu. Stuttu síðar gerði Marcus Rashford vel fyrir framan teig Everton áður en hann renndi boltanum til Fred. Brassinn er ekki jafnvígur eins og Greenwood og hægri fótar skot hans var laflaust og langt framhjá.

United virtist svo ætla að halda boltanum bara í rólegheitunum fram að hálfleiksflautinu. Töframaðurinn Bruno Fernandes hélt nú ekki. Á 45. mínútu lét hann boltann rúlla framhjá sér út á hægri kantinn þar sem að Aaron Wan-Bissaka tók við. Wan-Bissaka setti hann aftur á Bruno sem að stóð stuttu fyrir utan teig, hann var ekkert að tvínóna við hlutina heldur lagði boltann fyrir sig og þrumaði honum yfir Robin Olsen í markinu og í bláhornið fjær. Stórkostlegt mark. Svo fagnaði Portúgalinn að hætta Cantona. Ofmetinn? Ekki að ræða það!

Andartökum fyrir hálfleiksflautið fékk Dominic Calvert-Lewin svo eina færi Everton í fyrri hálfleik þegar hann slapp einn í gegn en skot hans fór naumlega framhjá markinu. VAR hefði sennilega fundið leið til þess að dæma markið af en af þessari einu endursýningu sem ég sá virtist Englendingurinn var réttstæður. Jon Moss blés svo í flautuna og United með sterka 2-0 forystu þegar gengið var til búningsherbergja. Hæg byrjun en eftir að United liðið náði áttum þá voru þeir miklu betri.

Seinni hálfleikur

Okkar menn mættu grimmir til leiks og Luke Shaw átti flottan sprett upp vinstri kantinn, tengdi vel við Cavani og átti fast skot að marki Everton sem að Olsen varði til hliðar. Stuttu seinna mátti David de Gea týna boltann úr netinu þegar að Dominic Calvert-Lewin komst aftur fyrir Harry Maguire. Hann átti lausa fyrirgjöf sem að de Gea sló beint til Abdoulaye Doucoure. Miðjumaðurinn náði að pota boltanum yfir línuna og staðan orðin 1-2 og 50 mínútur eftir. Það sást hversu slegnir United menn voru við það að fá markið í andlitið og örfáum mínútum seinna hafði James Rodriguez jafnað leikinn. Gjörsamlega afleitur varnarleikur þegar að James fékk boltann út í teiginn og negldi boltanum framhjá David de Gea. Það er ekki orðum ofaukið að tala um að United hafi verið sjálfum sér verstir á þessum hörmulega kafla.

Eftir þetta reiðarslag róaðist leikurinn og United reyndi að finna glufur á Everton liðinu. Leikurinn kominn í algjört jafnvægi eftir að heimamenn höfðu komið sér í frábæra stöðu í lok fyrri hálfleiks. Leikmenn Everton virtust fullkomlega sáttir við að hægja aftur á tempóinu í leiknum og freista þess að sækja hratt þegar að færi gafst. Á 63. mínútu spiluðu United sig vel í gegnum vörn gestanna og Marcus Rashford komst einn í gegn. Hann virtist oviss um hvernig hann ætti að klára færið, það nýtti Robin Olsen sér og át Rashford gjörsamlega.

Á 70. mínútu vann Luke Shaw aukaspyrnu úti á vinstri kantinum, nokkuð langt fyrir utan vítateig Everton. Shaw ákvað að taka aukaspyrnuna sjálfur og það var eins gott því að hann fann hausinn á Scott McTominay sem skallaði boltann í fjærhornið! Það verður að setja spurningamerki við markmanninn Robin Olsen en inn fór boltinn. 3-2 fyrir United, 20 mínútur eftir. Nú var bara að sigla þessu heim.

United átti svo frábæra sókn á 78. mínútu þegar að Bruno renndi boltanum í gegn á Marcus Rashford. Rashford sneri með Michael Keane í bakinu og reyndi fast skot með vinstri en boltinn flaug framhjá markinu. Edinson Cavani beið dauðafrír fyrir opnu marki en sending Rashford hefði þurft að vera góð ef hann ætlaði að finna Cavani. Stuttu síðar átti Lucas Digne fast skot í utanverða stöngina, en ég er 85% viss um að de Gea hafi verið með það allt saman á hreinu…

Á 88. mínútu stuggaði Calvert-Lewin við Harry Maguire og fyrirliði United féll til jarðar. Jonathan Moss lét leikinn halda áfram og Richarlison fékk ágætis færi til þess að jafna leikinn en skot hans var lélegt og langt framhjá. Líklega hefði VAR skoðað þetta vandlega þar sem að þetta leit út fyrir að vera brot á Calvert-Lewin.

Axel Tuanzebe kom inná fyrir Mason Greenwood til þess að bæta við manni í vörnina. Það reyndist afdrifarík skipting þar sem að Tuanzebe braut aulalega á Joshua King. Lucas Digne lúðraði bolta inná vítateiginn, þar var boltanum flikkað inní markteiginn og Dominic Calvert-Lewin réðst á boltann og setti hann í netið. Þrjú góð færi, þrjú mörk. Skammarlegur varnarleikur og í raun ófyrirgefanlegur. Örfáum andartökum síðar blés Moss í flautuna og leikurinn búinn. 3-3 jafntefli niðurstaðan og hún er grátleg.

Næsti leikur er í FA bikarnum gegn West Ham. Vonandi geta menn rifið sig upp og mögulega fundið einhverja Post-It miða um hvernig á að verjast eins og menn. Áfram Manchester United.

Manchester United mætir Everton á Old Trafford laugardaginn 6. febrúar – kl.  20:00. Um er að ræða mikilvægan leik í toppbaráttunni og myndi sigur gera mikið fyrir United þar sem að Liverpool og Manchester City mætast á Anfield í sömu umferð. Við krefjumst kannski ekki 9 marka veislu eins og í síðasta leik gegn Southampton, en vonandi fáum við að sjá skemmtilegan leik og helst ekki enn eitt aukaspyrnumarkið frá Gylfa Sigurðssyni.

Dagsetningin hefur auðvitað þunga merkingu fyrir okkur United menn en það var 6. febrúar 1958 sem að flugvél Manchester United fórst í flugtaki frá München. 23 týndu lífinu, þar af 8 leikmenn Manchester United og 19 slösuðust. Slyssins verður minnst annað kvöld á Old Trafford. Það má lesa minningargrein Rauðu Djöflanna hér frá árinu 2018.

Liðsfréttir

Edinson Cavani þurfti að fara af velli í hálfleik gegn Southampton, eftir harkalega tæklingu Kayne Ramsay og það má segja að El Matador sé í raun sá eini sem vafi leikur á um hvort að geti spilað leikinn… Ef frá er talinn Phil Jones. Aðrir eru leikfærir, sem er magnað. Við fáum staðfestingu á því í dag hvort að Amad Diallo spili með U-23 liði United, en þeir eiga leik gegn Blackburn í kvöld. Ef að vængmaðurinn ungi er ekki í leikmannahópi Neil Wood þá má gera ráð fyrir því að Solskjær vilji hafa hann í hóp gegn Everton. Þó þykir mér líklegt að hann verði látinn sprikla allavega einu sinni til viðbótar með varaliðinu áður en honum er hent í djúpu laugina. Fílbeinsstrendingurinn þykir þó hafa staðið sig afar vel á æfingum og hefur heillað þjálfarateymi United uppúr skónum. Þá tilkynnti Ole Gunnar Solskjær hópinn sem tekur þátt í útsláttarkeppni Evrópudeildarinnar en þar mætir liðið spænska liðinu Real Sociedad.

Svona lítur hópurinn út: David de Gea, Dean Henderson, Lee Grant, Nathan Bishop, Victor Lindelof, Eric Bailly, Phil Jones, Harry Maguire, Luke Shaw, Alex Telles, Aaron Wan-Bissaka, Axel Tuanzebe, Paul Pogba, Fred, Bruno Fernandes, Nemanja Matic, Scott McTominay, Donny van de Beek, Juan Mata, Daniel James, Amad Diallo, Edinson Cavani, Anthony Martial, Marcus Rashford. Mason Greenwood og Brandon Williams eru á B-lista þar sem að þeir eru fæddir eftir 1. janúar 1999 og eru uppaldir hjá félaginu.

United hefur mætt Everton tvisvar á tímabilinu og í báðir leikir hafa unnist gegn þeim bláklæddu. Í fyrri leik liðanna í deildinni vann United 1-3 sigur á Goodison Park þar sem að Edinson Cavani skoraði sitt fyrsta mark fyrir félagið og Bruno Fernandes skoraði tvívegis, þar á meðal glæsilegt skallamark. Í Deildarbikarnum stefndi allt í markalaust jafntefli og vítaspyrnukeppni þangað til að títtnefndur Cavani þrumaði boltanum með vinstri í fjærhornið framhjá Robin Olsen og Anthony Martial tryggði svo 0-2 sigur, eftir að United hafði klúðrað nokkrum ákjósanlegum tækifærum til að gera út um leikinn. Tveir flottir útisigrar og nú er bara að gera eins á heimavelli gegn Carlo Ancelotti og hans mönnum.

Það gladdi flesta stuðningsmenn United að sjá Jesse Lingard finna netmöskvana í tvígang fyrir West Ham gegn Aston Villa og vonandi nær hann að fylgja því eftir og stríða sem flestum liðum sem eiga í kapphlaupi við United.

Frakkinn geðþekki Paul Pogba var hvíldur gegn Southampton og verður því fullhlaðinn fyrir leik morgundagsins. Pogba var nýlega valinn leikmaður mánaðarins hjá Manchester United og átti það sannarlega skilið. Hann kom inná í fyrri leik liðanna í deildinni en er líklegur kandídat í byrjunarliðið, þrátt fyrir flottar frammistöður frá bæði Fred og Scott McTominay. Ég hef enga trú á því að Solskjær róti í varnarlínunni þar sem bakverðirnir Luke Shaw og Aaron Wan-Bissaka hafa gefið honum ærna ástæðu til að velja þá í liðið en báðir áttu afbragðsleik gegn Southampton, þó að Shaw hafi einungis spilað fyrri hálfleikinn. Anthony Martial náði sér í örlítinn skammt af sjálfstrausti eftir flotta innkomu í 9-0 burstinu og það vonandi skilar sér inn í þennan leik.

Líklegt byrjunarlið Man Utd:

Mótherjinn

Everton eiga tvo leiki til góða á flest lið í deildinni og nái þeir leikir að vinnast eru þeir á hælum okkar. Liðið fór afar vel af stað í deildinni, en eftir að hafa unnið fjóra af fyrstu fimm leikjunum fylgdi afar erfið törn þar sem að  einungis þrjú stig fengust af 15 mögulegum. Fyrsti leikurinn í þeirri hrinu var tapleikurinn gegn okkar mönnum. Það er fullt af frambærilegum leikmönnum í liðinu og það getur verið hundleiðinlegt að eiga við þá. Það eru ekki nema um tvö ár síðan að við steinlágum 4-0 á Goodison Park og stuðningsmenn suá verkefnið sem að Solskjær átti fyrir höndum.

Ef við spáum í leikmönnum sem ber að varast er óhætt að nefna Dominic Calvert-Lewin. Englendingurinn hefur heldur betur fundið sig undir Ancelotti og er búinn að skora 16 mörk í öllum keppnum, þar af 12 í Úrvalsdeildinni. Hann er illviðráðanlegur í loftinu og býr yfir lúmskum hraða. Við þekkjum Gylfa Sigurðsson af góðu og slæmu. Hann hefur gefið okkur ótal ómetanlegar minningar í íslensku landsliðstreyjunni, en hann hefur líka grætt okkur United menn oftar en einu sinni – þá aðallega á Old Trafford. Gylfi er stuðningsmaður Manchester United og elskar ekkert meira en að finna netmöskvana á vellinum sem að hann dreymdi um að spila á. Aðrir leikmenn sem gætu reynst hættulegir eru bakvörðurinn Lucas Digne, sem er með frábæran vinstri fót og Brasilíumaðurinn Richarlison sem er bæði góður í knattspyrnu og að hleypa andstæðingnum upp.

Fáir eru á meiðslalistanum hjá Everton. Miðjumaðurinn Allan er tæpur en Ancelotti vonast þó til þess að brimbrjóturinn smái verði klár í slaginn. Þá glímir markmaðurinn Jordan Pickford við einhver eymsli í rifbeinum svo að það mun að öllum líkindum verða Robin Olsen sem stendur á milli stanganna. Varnartengiliðurinn Jean-Philippe Gbamin er svo frá um óákveðinn tíma. Því mætast lið í tiltölulega litlum meiðslavandræðum og því engar afsakanir fyrir því að geta ekki fengið flottan fótboltaleik.

Líklegt byrjunarlið Everton:

Spá

Það væri frekja að fara fram á annan 9-0 leik, þannig að ég læt mér nægja 3-1 sigur. Bruno Fernandes, Marcus Rashford og hinn markheppni Luke Shaw skora fyrir United, en Gylfi Þór skorar eitt af 35 metra færi í uppbótartíma til að laga stöðuna fyrir Everton.

Áfram Manchester United!

Snúið verkefni bíður Manchester United þegar að Ralph Hasenhüttl og lærisveinar hans í Southampton mæta á Old Trafford á morgun, 2. febrúar – kl. 20:15.

Þá reyna okkar menn að rétta úr kútnum eftir brösugt gengi í síðustu tveimur leikjum gegn Sheffield United og Arsenal en þar tókst liðinu einungis að næla í eitt stig. Það þarf ekki að orðlengja um hvað okkur stuðningsmönnum finnst um þá stigasöfnun. Nú gefst United glimrandi tækifæri til að svara gagnrýnisröddum og halda sér sem næst toppliði Manchester City og agnarsmáu skrefi á undan Liverpool.

Vangaveltur og liðsfréttir

Eftir gríðarlega svekkjandi jafntefli á Emirates er nauðsynlegt að sækja þrjú stig í þessum leik. Sama með hvaða hætti það er gert. Líklega er kominn tími á eitt vafasamt Bruno víti … langt síðan síðast. Öfugt við Sheffield United leikinn þar sem að illa gekk að skapa færi að þá fékk United algjör dauðafæri til að klára Arsenal. Mislagðir fætur Cavani og frábærar vörslur Bernd Leno komu í veg fyrir að við yrðum óþolandi á Twitter. Maður fær það á tilfinninguna að þetta sé stífla sem þurfi að losa um á einn eða annan hátt og þegar það loksins gerist að þá fáum við markaveislu.

Við þekkjum það af eigin reynslu hversu erfitt þetta Southampton lið er, eftir að hafa stolið sigrinum með frábærri endurkomu á St. Mary’s í fyrri leik liðanna. Í síðustu heimsókn Dýrlinganna þá fengum við jöfnunarmark í andlitið á 96. mínútu þegar að Michael Obafemi nýtti sér afleita dekkningu United í síðustu hornspyrnu leiksins og laumaði sér á fjærstöngina til að pota boltanum yfir línuna. Ole Gunnar var full pragmatískur í sinni nálgun gegn Arsenal og það myndi gleðja stuðningsmenn ægilega mikið ef að hann stillti upp sókndjörfu liði annað kvöld. Einungis tveir leikmenn eru á meiðslalista liðsins en það eru þeir Scott McTominay og hinn eldhressi Phil Jones. McTominay þurfti að yfirgefa völlinn snemma í síðasta leik vegna magakrampa og ólíklegt að hann taki þátt gegn Southampton.

Það taka kannski glöggir lesendur eftir því að Marcos Rojo er ekki lengur á meiðslalista United, en hann er hársbreidd frá því að snúa aftur til Argentínu og ganga til liðs við Boca Juniors. Þá er 7 (!) ára ferli Rojo hjá United lokið. Þá hefur liðið verið duglegt að lána leikmenn út í janúarglugganum. Þar ber helst að nefna Jesse Lingard til West Ham, Facundo Pellistri til Deportivo Alavés og Tahith Chong hefur yfirgefið Werder Bremen og gengur til liðs við Club Brugge á láni nr. 2 út tímabilið. Gangi þeim allt í haginn!

Fílbeinsstrendingurinn ungi, Amad Diallo, byrjaði heldur betur frábærlega með U-23 ára liði United þegar hann skoraði tvívegis í 6-3 sigri á erkifjendunum í Liverpool. Hann leit afar vel út í leiknum og líklega aðeins of góður fyrir þetta þrep. Það væri skemmtilegt að sjá hann í hópnum en það er líkast til bara óskhyggja. Mason Greenwood spilaði bara 10 mínútur gegn Arsenal svo að hann er óþreyttur og gæti byrjað á hægri kantinum. Annar sem verður sennilega óþreyttur í lok tímabils er Hollendingurinn Donny van de Beek. Eftir að hafa spilað vel gegn Liverpool fékk hann 7 mínútur gegn Sheffield United og kom ekki inná í síðasta leik. Það var Edinson Cavani sem leiddi United til sigurs á St. Mary’s og þrátt fyrir að hann hafi byrjað gegn Arsenal þá spái ég honum byrjunarliðssæti á morgun.

Líklegt byrjunarlið Man Utd:

Mótherjinn

Gengi gestanna hefur verið slakt í síðustu fimm leikjum en liðinu hefur einungis tekist að vinna einn af þeim og það var gegn Liverpool. Þeir hafa skorað lítið sem ekkert og það reynist gjarnan erfitt að vinna fótboltaleiki þegar það er raunin. Southampton þarf sárlega á því að halda að fá markahrókinn Danny Ings í gang en hann spilaði lykilhlutverk þegar liðinu gekk sem best í upphafi tímabils. Hann hefur skorað 7 mörk í deildinni en sigurmark hans gegn Liverpool er hans eina í síðustu 7 leikjum. Aðrir leikmenn sem ber að varast eru aukaspyrnusérfræðingurinn James Ward-Prowse og hinn eldsnöggi Che Adams. Ward-Prowse skoraði og lagði upp í fyrri leik þessara liða – sælla minninga!

Ralph Hasenhüttl hefur verið án danska miðvarðarins Jannick Vestergaard síðan um jólin og hann verður ólíklega með í þessum leik. Vestergaard hefur verið stór partur af uppgangi liðsins en hann og Jan Bednarek hafa myndað gott samstarf í hjarta varnarinnar. Þá eru Oriol Romeu, Kyle Walker-Peters og Theo Walcott allir tæpir. Romeu er þó ekki útilokaður. Ég fagna ekki meiðslum andstæðingsins en ég væri feginn ef að liðið þyrfti ekki að mæta Romeu. Hann er grófasti leikmaður deildarinnar og það er með hreinum ólíkindum hversu oft hann hefur sloppið við reisupassann, miðað við tæklingar og seinleika.

Southampton mátti sætta sig við 0-1 tap á heimavelli í síðasta leik gegn Aston Villa en bæði lið eru í baráttu um Evrópusæti. Þar taldi Danny Ings sig hafa jafnað leikinn á 93. mínútu en VAR hélt aldeilis ekki. Hendi Ings var fyrir innan og því rangstæður. Grátleg niðurstaða og gestirnir koma því særðir á Old Trafford. Því þarf að mæta af festu og miskunnarleysi.

Líklegt byrjunarlið Southampton:

Spá

Það er ekkert lát á bjartsýni hjá okkur þrátt fyrir vonbrigði undanfarið. Öruggur 2-0 sigur og ekkert múður. Við þurfum eitthvað gott í hjartað. Áfram Manchester United!